Tondo denant dai artesans: 'Al è stât straçât masse in Cjargne'

'Al è stât straçât masse in Cjargne' al à dit il President de Regjon la dì de scree a Tumieç dai uficis di mandament di Confartigianato Udine. Une sede cheste che e à ricevût lis laudis dal President Tondo che si è complasût cul President di Confartigianato Udine Carlo Faleschini e cu la Presidente de Cjargne di Confartigianato Licia Cimenti. “A son segnâi come chescj – al à dit il Sindic di Tumieç Dario Zearo- che nus disin che la riprese de economie in Cjargne e je scomençade e che nus fasin ben sperâ pal avignî.” Une gnove, cheste, che e je stade confermade dal Assessôr al lavôr de Provincie di Udin Daniele Macorig, che al à dit che la “Cjargne e à sopuartât miôr, ancje di altris zonis de provincie di Udin,  cheste crisi tremende.” Licia Cimenti, Presidente di Confartigianato Tolmezzo, però no à platât il fat che “lis jentradis in Cjargne a son però plui bassis de medie regjonâl” e e à domandât al President Tondo, che e à ringraciât pal impegn, di slontanâ i ostacui che a frenin l’ûs dai fonts europeans. Faleschini, infin, si è complasût cu la Regjon pes politichis a pro dal credit a lis impresis e al à marcât cemût che lis impresis artesanis de provincie di Udin a crodin te inovazion: “a àn fat domandis, dutis acetadis, che a son plui dal dopli de some destinade de Regjon che e je di 7,5 milions di euro.

 

Al Borgat di Tumieç protagonist il President Tondo in vieste di 'Puar'

Si è sierade cun sucès la edizion 2010 dal Borgat che e à movimentât il cûr storic di Tumieç cun concierts, gastronomie, mostris, culture, esposizions di machinis storichis. “O sin contents di jessi rivâts ancje chest an a ufrî ae citadine une fieste siore di ideis –al comente il President de Pro Loco Gianni Martin – un ringraziament particolâr a ducj i volontaris che a àn dât une man, aes associazions Amici di Sant’Ilario, Porta di Sotto e 4Cche e à inmaneât la prime preseade edizion dal Marcjât dai Pulçs, ai esercents, al Camec di Denemonç, un gracie particolâr ancje ae Tratorie Da Modesto che e à dât ricrei cui siei goloseçs cja de cort dal Museu Cjargnel dulà che sabide sere e je lade in sene la proiezion dal video “Carnia tra Cielo e Terra”.

 

 

Darte, la Udinese e prepare l’avignî.

Al è scomençât il ritîr tant spietât de Udinese, che e je tornade a Darte pe preparazion estive. Fin ai 7 di Avost i zuiadôrs ai ordins di Guidolin si alenaran in Cjargne cuntun calendari di alenaments penç, fat di partidis amichevulis e ancje incuintris cul public. La TurismoFVG e à previodût, cun chê di dâ acet te miôr maniere pussibil ai visitadôrs, un program di apontaments e di vantaçs par ufiertis turistichis “ad hoc” fatis in colaborazion cul consorzi turistic e pensadis pai tifôs che a vuelin compagnâ i lôr beniamins e tal stes timp profitâ par cognossi lis atrazions de zone. “Pe Cjargne dâ acet al ritîr de Udinese e je une otime ocasion di promozion turistiche – al à marcât il vicepresident de Regjon Luca Ciriani – stant che intant dal ritîr a Darte e rivarà dal sigûr une sdrume di tifôs par viodi lis primis zuiadis dai lôr campions. Cun di plui la Udinese e puartarà su lis maiis il gnûf steme turistic de Regjon, garantint un rivoc di imagjin une vore impuartant.”

Screât il Marcjât contadin, Violino: 'Mangjait furlan'

Viertis lis cjasutis di Place Cente fatis in colaborazion tra la aministrazion comunâl e l’Ersa cu la gjestion, pal avignî, de Nuona Pro Loco di Tumieç.
L’assessôr regjonâl ae Agriculture al à pocât i agricultôrs cjargnei a crodi in cheste iniziative.
Lis vot cjasutis che a saran viertis al public ogni lunis buinore de setemane a viodaran dâsi di volte une desene di produtôrs agricui de mont cjargnele (che a deventaran 17 a regjim, ae fin de stagjon intes malghis). Cui mês che a vegnin si podarà zontâ une zornade di vierzidure il vinars. Ae scree a jerin presints il sindic Dario Zearo, la assessore Bubisutti, il diretôr de Ersa Bellini e i conseîrs de Pro Loco cul president Martin. Di Violino l’apel ai agricultôrs cjargnei a sfrutâ cheste ocasion pal miôr.

 

FONTANINI E MACORIG: “LA FORMAZION AE PROVINCIE”

“La Provincie di Udin e domande cun fuarce la pussibilitât di podê gjestî in maniere direte il setôr de formazion professionâl par stâ ancjemò di plui dongje di chei che a cirin une ocupazion, operant in sinergjie cui sogjets che si ocupin di chest setôr sul teritori.” Si è esprimût in chest mût il president de Provincie, on. Pieri Fontanini, introdusint la cunvigne che si è davuelte li dal Salon dal Consei di Palaç Belgrât pe presentazion dal scandai fat tra i mês di Avrîl e Mai dal Ires, Istitût di Ricercjis economichis e sociâls dal Friûl Vignesie Julie, sul teme dal dibisugn des figuris professionâls de bande des aziendis.
Tal so intervent Daniele Macorig al à ricuardât invezit l’impegn tes politichis ativis a pro di cui che al è daûr a cirî un puest di lavôr, in gracie, massime, de rivoluzion copernicane metude in vore par mieç dal ûs dal masterplan segnalât de Regjon.

Provincie, passe 282 mil euros par Comuns e privâts

 

A rivin in dut a passe 282 mil euros i contribûts destinâts de Provincie a pro di Comuns e di privâts dentri dal secont ripart 2010. Lis dôs delibaris, daûr de propueste dal assessôr ai rapuarts istituzionâi Adriano Piuzzi, a son stadis fatis buinis inte ultime sentade dal esecutîf di Palaç Belgrât. In datai a rivin a 203 mil 750 euros i fonts dâts fûr daûr de leç 10/88 ducj destinâts a sogjets publics. A son invezit 78 mil 827 euros chei che a laran a cuvierzi lis spesis di implants sportîfs (19 mil 706 euros) e privâts (59 mil 120 euros). Come che al à spiegât l’assessôr Piuzzi “si trate di fonts dâts fûr in maniere juste sul teritori che a laran a sodisfâ part des dibisugnis dai ents che ju vevin domandâts.”

 

Energjie, 350 mil euros par meti sù implants a biomassis

«Un sostegn concret a cui che al decît di meti sù implants alimentâts cun biomasse di len». L’assessôr ae energjie Stefano Teghil al à comunicât la graduatorie des domandis che a puedin jessi ametudis al tierç Bant sperimentâl biomassis. Propit cun chê di promovi la difusion dai implants che a funzionin cu la biomasse, la Provincie, ancje chest an, e à istituît il fonts par chest bant. Nassût tal 2007 e cumò tornât a finanziâ pe tierce volte, il fonts al ponte a promovi l’ûs di cjalderiis cuntune eficience alte e cuntun contignût tecnologjic alt, alimentadis cun biomasse di len (çocs di len o len pestât) pal riscjaldament des cjasis. Cun chest bant a vignaran dâts fûr 350 mil euros: 30 lis domandis ametudis su  lis 140 che a son rivadis tai uficis destinâts par chel servizi. Cui che al ricevarà il contribût al varà 270 dîs par fâ sù l’implant, partint de date di cuant che al ven comunicât che la domande e je stade fate buine.

 

Soclêf, 32me RASSEGNE CJARGNELE ART, CULTURE, LAVÔR

La rassegne, rivade ae 32me edizion, e vûl valorizâ e promovi lis ativitâts artesanâls e artistichis di cualitât e, cun lôr, la creativitât e l’impegn dai imprenditôrs e dai artiscj che a lavorin sul teritori. I espositôrs a son une sessantine cun plui di dusinte oparis. Ve, alore, lis buteghis di artesanât artistic e tradizionâl e la lôr produzion di mobii, tiessûts, vistîts, ceramiche, oresinarie, imprescj musicâi… Un spazi espositîf al è stât dedicât ai ricams, esempli di passion e di abilitât des mans che no si strachin e che a cognossin ben cheste art, di desenis di ricamadoris che a fasin onôr e a esaltin la Art dal ricam. Prime de scree e je stade fate une cunvigne sui problemis sociâi e economics de Mont furlane dulà che a jerin stâts invidâts esponents autorevui dal mont politic regjonâl e locâl.

 

Si sierin lis puestis in mont e Tondo al lasse fâ.

Puestis Talianis e je daûr a fâ un progjet di riorganizazion de sô struture che al va in dam in particolâr des zonis di mont, des frazions e dai piçui centris de Regjon e che al à fat nassi un moviment gjenerâl di proteste. In prime linie, come simpri i Sindics, l’ANCI e tancj citadins, e po no è mancjade nancje la iniziative des organizazions sindacâls, di cualchi Conseîr Regjonâl e di cualchi Parlamentâr.
“Cul bloc di fat des ativitâts des Comunitâts Montanis – al à declarât Marsilio – al è vignût a mancjâ il sostegn a dute une schirie di progjets che cun sucès a contrastavin i tais graduâi dai servizis di prossimitât, come, par esempli, i sportei INPS, i traspuarts e lis ativitâts sociâls. A completâ il lavôr a rivin cumò i colps di manarie des Puestis Talianis e cui che a ‘nt fasaran lis spesis a saran massime lis fassis plui debilis de popolazion, in particolâr i vecjos e chei che a son in situazions di discomut.

 

Viabilitât, screât il gnûf puint di Montenârs

A son stâts screâts i lavôrs di sistemazion dal puint sul riu Orvenco su la Strade Provinciâl di Montenârs tai comuns di Dartigne e Montenârs. La opare, dal valôr totâl di 700 mil euros, e cjape dentri i lavôrs di slargjament dal manufat che a àn permetût di fâ dôs corsiis di passe trê metris di largjece ognidune, plui un marcjepît laterâl larc 1 metri e 70 centimetris. Il progjet esecutîf dal manufat al è stât prontât di une associazion provisorie di professioniscj che a son stâts daûr ancje de direzion dai lavôrs e dal coordenament pe sigurece intant dai lavôrs fats de societât che e à cjapât sù l’apalt (I.C.O.S. s.r.l. cun sede a Tumieç). “Si trate di un dai tancj intervents che cheste aministrazion e sta metint in pratiche – al à comentât il president on. Pieri Fontanini – cun chê di rindi il plui sigure pussibil la rêt stradâl provinciâl metint in sigurece i ponts plui pericolôs de rêt stradâl provinciâl.”

 

Concors “CineGiovani e…adulti” a Trep di Cjargne

Se ti plâs creâ o produsi progjets cinematografics, notiti ae 4e edizion dal Concors a premis par senegjaturis e curtmetraçs “CineGiovani e…adulti” che la Associazion Culturâl Elio cav. Cortolezzis e organize a Trep di Cjargne cu la premiazion dai lavôrs il mês di Novembar cu ven. Va a viodi il sît CineGiovani o clame il 377 2905666. La iscrizion, che e je sore nuie, si pues fâle fin ai 11 di Setembar e e je indreçade a ducj dai 15 agns insù.

 

Rabli, sagre di Caroli e Stafete “Val Del Lago”

Grant sucès di public e di partecipants ae sagre di Caroli, a Rabli, dulà che e je stade fate ancje la Stafete “Val Del Lago”, che e je lade une vore ben. La Stafete “Val del Lago”, une gare di triathlon tal percors spetacolâr che in 32 km al à puartât un centenâr di concorents a Tarvis e a Rabli cu la prime frazion di ski roll, di Rabli a Nevée cu la frazion di ciclisim e dopo di gnûf a Rabli cu la ultime frazion di corse. E à vinçût la scuadre formade di Andrea Silverio, Thomas Selanati e Paolo Della Mea de Aldo Moro di Paluce. Presints ae cerimonie ancje Renato Carlantoni, sindic di Tarvis, Franco Baritussio, conseîr regjonâl e Luciano Baraldo, comissari straordenari par Rabli. Cheste ocasion di fieste e je stade impuartante ancje par ricuardâ che la Polisportive di Rabli, che e à inmaneât l’event, e sta continuant i lavôrs par fâ il cjamp sportîf a Rabli, che al sarà pront dentri de fin dal Istât.

Corse in mont, 43m Trofeu Gortani

La cuarte prove dal 43m Trofeu Gortani di corse in mont si è davuelte a Mueç. Il trofeu “Edoardo Kravanja” al è lât al prin Cadet Michele Bellina e la Polisportive Timaucleulis e svante il secont puest te classifiche di societât. Sot dal soreli che al cueieve e intun scjafoiaç dificil di sopuartâ e je saltade tai voi la vitorie tai Principiants di Gianluca Puntel, pe seconde volte sul scjalin plui alt dal podi. Di gnûf prins des rispetivis categoriis ancje Marco Primus, Luigina Menean e Gian Paolo Englaro. Lis medaiis di arint a son ladis a pari e fi: Elio e Simone Ferigo, in plui che a Veronica Morassi e Nicole Puntel. A sierâ i tancj podis a son stâts i doi bronçs di Erwin Puntel e Gabriele Primus.