02 AGOSTO 08
Incuintri jenfri Fontanini il prefet Ivo Salemme
Il significatîf rûl che e davuelç la Provincie di Udin tal nord-est e l'individuazion di strategjiis che i permetino un doman di continuâ a vê chest rûl ancje a pet dai rapuarts socioeconomics cu la Austrie e la Slovenie , oltri che cul est european, al è stât il teme dal incuintri a Palaç Belgrât jenfri il President de Provincie, on. Pietro Fontanini, e il Prefet di Udin, dot. Ivo Salemme. Tant dal incuintri Fontanini e Salemme a àn resonât su ce che a capite sul teritori provinciâl che, pe sô grandece, al cjape dentri oltri a difarents paisaçs ancje diferentis realtâts sociâls. Il President de Provincie e il Prefet, marcant il grant lavôr davuelzût des istituzions locâls (ancje piçulis e decentradis sul teritori) a àn impensât i bogns risultâts jonzûts sul plan economic e sociâl, pandint il fat che parcè che e tocje la sigurece la situazion no presente particolârs berdeis e che dut câs ‘nd è un continui control des fuarcis dal ordin.MONT- Contribûts regjonâi pai capanons
La Zonte regjonâl, su propueste dal assessôr aes Risorsis economichis e finanziaris Sandra Savino, e à autorizât la metude in vore di acuardis di program pal finanziament di trê progjets indreçâts ae promozion economiche in mont. Il prin al sarà cul Consorzi pal disvilup industriâl di Tumieç e al tocjarà la realizazion dal prin lot di un capanon inte zone industriâl. La Regjon achì e furnissarà un contribût di 1 milion di euros su une spese di 1.484.000. Il secont finanziament al sarà dât al Comun di Soclêf pal ingrandiment di un edifici inte zone artesanâl, achì il contribût al sarà di 300.000 euros par une spese totâl di 400 mil. Al fin, cul tierç acuardi, firmât cul Comun di Resiute, la Regjon e butarà fûr 500 mil euros par finanziâ la metude in pîts di un capanon industriâl inte zone artesanâl, su di une spese totâl di 700.000 euros. E, su propueste dal assessôr Savino, la Zonte e à ancje fat bon un acuardi di program cu la Comunitât montane de Cjargne pe metude in vore di un progjet smirât ae promozion economiche de mont. Il contribût di 200 mil euros su di une spese di 480 mil, al è pe realizazion di struturis pe lavorazion e il dipuesit di biomasse dal len pai implants di teleriscjaldament in costruzion a Darte, Trep, Dimpeç, Verzegnis, Prât, Lauc e For di Avoltri.
Provincie: incuintri cui gnûfs tredis dipendents
Tredis gnûfs dipendents di categorie B a son stâts cjapâts sù a timp indeterminât de Provincie di Udin in diviers servizis dal Ent par mieç di un concors public. I vincidôrs a son stâts ricevûts a Palaç Belgrât, inte sale de zonte, dal President, on. Pietro Fontanini, e dal Assessôr al Personâl Mario Virgili. Il President Fontanini al à dât il bon acet ai gnûfs dipendents impensantjur la storie e la struturazion aministrative dal Ent e ancje il rimarchevul rûl de Provincie di Udin. Fontanini al à po dopo notât cemût che ancje lui al sedi un dipendent public e duncje al sepi benon cuâl che a sedin lis spetancis de int e al à zontât cemût che la fiducie de int inte aministrazion publiche e scuen jessi ripaiade cun servizis eficients e eficaçs. Il President de Provincie al à cun di plui marcât ai gnûfs dipendents cemût che tancj zovins a sedin intune situazion cetant mancul fortunade de lôr e al à sierât augurant a ducj bon lavôr.
500mil euros de C.M.C. a pro des impresis comerciâls
Prudelâ in maniere concrete i esercizis comerciâls dai paisuts cjargnei par che a puedin tignî vierte la lôr ativitât fasint cussì cuintri al bandon de zone. Cun chest fin, tai dîs stâts, la Comunitât montane de Cjargne e à fat bon il bant di passe 500mil euros, indreçât aes ativitâts comerciâls (cjapant dentri ancje chei benzinârs che si cjatin in lûcs cun popolazion che no passe i 3.000 abitants). La Comunitât montane e à cun di plui fissât, su la fonde dai diviers gjenars di ativitâts e di dulà che si cjatin, un liminâr peât ai vuadagns vûts tal 2006, e sot di chest si podarà fâ domande di finanziament.
"Oltri a cheste iniziative - al sclaris il president de Comunitât montane de Cjargne, Lino Not - l'ent al à di pôc sierât il bant pal sostegn dai centris polifunzionâi de Cjargne che, cuntun contribût di 290mil euros, al cjaparà dentri 16 impresis dal setôr dal cumierç. O crodin cetant, duncje, tal mantegniment e tal disvilup des ativitâts comerciâls de mont, che a davuelzin un rûl impuartant sul plan sociâl e economic". La percentuâl di jutori aes impresis che a rivaran a jentrâ in graduatorie e podarà rivâ fintramai al 70% de spese fin a un massim di 3.000 euros.
Agriculture: fat bon il progjet pal ûs dai "voucher"
I conseîrs regjonâi Franco Jacop e Enzo Marsilio a àn pandût gust pe fate buine dal progjet pe doprade dai voucher in agriculture, in fats cun chest imprest si permetarà aes impresis agriculis di cjapâ sù a zornade i lavoradôrs. I prins risultâts si podaran viodi za cu la prossime cjapade sù de ue e des pomis. Si trate de metude in vore di un progjet a fuart volût e sostignût de passade Aministrazion regjonâl, che tai mês stâts a veve puartât ae firme di un protocol di intese jenfri il Ministri Damiano e il President Illy.
I doi conseîrs a àn po dopo marcât cemût che chest al sedi un risultât impuartant parcè che, oltri a distrigâ un dai plui pençs problemis dal mont agricul, al propon un sisteme doprabil ancje in altris setôrs dal mont economic.
Situazion viabilitât SS 52bis. Trate Tumieç - Pas di Mont di Crôs di Cjargne.
Il conseîr regjonâl Marsilio al à in chescj dîs pandût il pinsîr di tancj citadins sul stât de stâtal 52bis, in fats ducj chei che a passin dilunc cheste strade che da Tumieç a mene in Austrie o il contrari, a podin ben notâ cemût che il toc di strade in teritori talian nol sedi un biel viodi, a difarence di chel todesc che invezit al mostre dute un altre cure e atenzion. Di fat dilunc dut il toc di strade da Tumieç al Pas di Mont di Crôs no si è netât nuie, i ceis no son stâts seâts, biel che in Austrie e je dute un altre storie. Ce dî devant a dut chest? Ce pensarano i trops di forescj che a passin di cheste bande par lâ al mâr? Dal sigûr e je un panorame che al pant il grât di sdavàs e dissintarès da bande dal Ent Gjestôr de statâl taliane che, oltri no mostrâ un biel biliet da visite pai forescj, al da ancje problemis di sigurece pal trafic stradâl .
Il Comun di Sudri indaûr sot procès
Il dossier di Legambiente " La Carovana delle Alpi - Bandiere nere - Ferite aperte nel territorio alpino" e pant un gnûf berli di alarme su pes politichis dal Friûl metudis in vore par stâ daûr a un improbabil "ski-business". E tant che esempli negatîf al ven puartât il progjet dal "Villaggio turistico" sul Çoncolan, che al darès il colp finâl ae opere di pestadice, che za a à interessât la Proprietât coletive di Priole e Nearis (massime parcè che a tocje il mont Tamai). Par chest, in face ae "Bandiera nera" dade a Sudri (di domini public dai 25 di Lui) al è rivât un significatîf ricognossiment ae opere dal Aministrazion frazionâl di Pesariis. La Proprietât coletive de Val Pesarine e je stade segnalade pe buine gjestion dai siei bens e par un disvilup de economie atente al patrimoni teritoriâl. A fâ stâ in pinsîr, naturalmentri, a son lis conseguencis di petonament salvadi, l'impat sul paisaç, la mancjance di aghe, l'inevitabil contrast jenfri chest gjenar di insediament e il recupar di puescj jet intes cjasis che za si cjatin in zone (Progjet "Albergo Diffuso") che al cjape dentri, oltri che Sudri, ancje altris comuns. Il doman nus prepare a inviers simpri plui cjalts e cun simpri mancul nêf. Tal lunc periodi secontri i esperts, a restaran dome chês localitâts turistichis che a stimaran la nature e il paisaç come lôr principâl "cjapital", cemût che si sta fasint su lis monts francesis dulà che al è in vore un profont rinovament dal mût di fâ turisim.
Olimpiadis: il President al incuintri Alessandro Talotti
"Jessisi cualificât pe seconde volte in rie aes olimpiadis, strapassant i 2 m e 30 al è un bonissim risultât che nissun altri talian al veve jonzût prime, e e je la fonde par podê cun orgoi, professionalitât e capacitât, puartâ alt il non dal Friûl a Pechin". Chest il pinsîr pandût dal president de Provincie di Udin, on. Pietro Fontanini, che al à ricevût Alessandro Talotti, di Cjampfuarmit (stes paîs dal President), a palaç Belgrât adun cul president provinciâl Fidal, Mario Gasparetto, che al è ancje l'alenadôr di Talotti, e al vice-president dal Coni di Udin, Silvano Parpinel.
L'auguri dal president Fontanini al è stât indreçât ancje al ciclist Fabio Masotti (di Ruvigne/Ragogna), al zuiadôr di balon Simone Padoin e a Chiara Cainero che, si è impensât, si alene dispès tal cjamp di "tiro a volo" di Cjampfuarmit.
Tant dal incuintri Talotti al à marcât cemût che la "passion, la amicizie e il volontariât a sedin i valôrs de esperience che al sta vivint". A Pechino Talotti al varà dongje altris trê saltadôrs talians. Al jere dai Zûcs di Montreal che no 'nd erin 4 saltadôrs talians. L'onorevul Fontanini al à consegnât a Talotti il simbul dal Ent insiemit cuntun grant "in bocje al lôf".
Buinis risultis pe Polisportive Timaucleulis
Domenie ai 27 di Lui ad Adrara San Martino (BG) si è davuelzude la seconde prove dai Campionâts talians Fidal di corse in mont, cui colôrs de Atletiche Brugnera, a àn partecipât trê nestris atletis: Primus Thomas rivât al 17° puest intai “Juniores”, Garibaldi Lavinia 27° puest e 4° inte categorie “Promesse” e Menean Luigina al 41° puest pe categorie “Senior”.