27 AGOSTO 08
In curt ancje in Cjargne la prime "Banca del Tempo"
Ancje la Cjargne e varà la sô "Banca del Tempo", ven a stâi la particolâr forme di associazion che si fonde su pal scambi di ativitâts jenfri i socis che a metin a disposizion un blec dal lôr timp, calcolât in oris, vintti in cambi la stesse cuantitât. Tai dîs stâts a son començâts in fats i lavôrs pe dade dongje de prime "Banca del Tempo" de Cjargne a fuart volude de Comission Pari Oportunitâts cjargnele e prudelade e finanziade de Comunitât Montane de Cjargne, dal Servizi Pari Oportunitâts de Regjon FVJ e de Provincie di Udin.
«La "Banca del Tempo" - e à sclarît la president de Comission Nives Baldacconi - e à un rûl impuartant dal pont di viste sociâl stant che e permet di dâ e vê timp par mieç di un scambi ecui e solidari. Cun di plui cun cheste iniziative o stimìn di contribuî a recuperâ e infuartî chê culture de solidarietât che da simpri e à cualificât il teritori cjargnel, dant aes relazions umanis un puest di prin plan e metint in vore une schirie di scambis intun clime di cooperazion amichevul. I ritmis de societât moderne nus obleìn a une vere e proprie corse cuintri il timp, che al samee jessi simpri pôc: cun chest progjet smirìn a inmaneâ une rêt di contats jenfri lis personis, che a podarà puartâ a un miorament grant de cualitât de vite».
Cuintri lis acisis de benzine
In vore une petizion par sbassâ lis acisis de benzine, progjet inmaneât dal Moviment Difese dal Citadin. La int furlane e je clamade a firmâle sul sît www.mdc.fvg.it par domandâ la sbassade imediade di chescj soreplui. Lis acisis talianis a son il 57,1% plui altis dal minin UE. Il president dal Moviment Difese dal Citadin dal FVJ Raimondo Gabriele Englaro, al indrece ducj a lâ sul sît internet par firmâ e fâ cognossi a amîs e parincj la iniziative. La acise e je une tasse indirete che e va a pesâ su lis singulis produzions: par esempli a son acisis chês su pe eletricitât, i alcolics e i tabacs. A da da pensâ il fat che su pe benzine in Italie 'nd è ben cuatri tassis: la acise, la IVA sul presit, la IVA su pe acise stesse e la tasse su pai vuadagns des compagniis.
L'Assessôr Mario Virgili al pant la sô opinion
«In chest spazi o voi pandi la mê opinion su pe cuestion dal manager Ejarque. Dut al salte fûr dai sbalis de zonte Illy e benon a stan fasint il president Tondo e il sô vice Ciriani. O sclarìs. Ind è un distingui su pe sielte di manager e dai dirigjents de Publiche Aministrazion: il concors. I dirigjents che a vegnin cjapâts sù da un ent public par mieç di un concors a son e a scuegnin restâ tecnics neutrâi tai confronts dai aministradôrs. Ande dal dut difarent e je chê dai manager clamâts dai politics a cjâf di ents o dentri des Aministrazions publichis. Chescj dirigjents "a clamade" a lavorìn su la fonde di un rapuart fiduciari. Illy e i siei a varessin podût, duncje, meti in vore contrats fintramai ae fin dal lôr mandât. Il vê sotscrit plui contrats cun Ejarque par un totâl di bêçs une vore alt, cuntune scjadence ben oltri a chê de fin de legjislature a è stade une falope grande, cussì come meti dentri cundizions contratuâls, dal gjenar di "parecjadudis (paracaduti) daur", che a stabilissin che la fin dal rapuart a causione une spese grande di bêçs publics (basti pensâ che par risolvi i contrats di 2 alts dirigjents de Insiel a son stâts impegnâts 500 mil €). Illy nol stave gjestint la sô Illycafè, ma un Ent public e vê, diretementri o midiant siei oms di fiducie, permetût o adiriture seondât la metude in pîts di chescj contrats cun scjadincis superiôrs a chê dal so mandât, al è stât un at incussient. Si che duncje ancje Marescotti (Friulia), i adets di Autovie venetis e Finest e chei altris manager a clamade metûts de zonte Illy a varessin di cjapâ cussience dal gnûf contest, rimetint lis lôr posizions aes valutazions de zonte Tondo che e à vinçût lis elezions cuntun program a fuart difarent di chel di Illy».
Fontanini al incuintre il gnûf vice cuestôr vicjari
Il President de Provincie di Udin, on. Pietro Fontanini, al à ricevût a Palaç Belgrât il gnûf vice cuestôr vicjari, dot. Claudio Cracovia. Dant il bon acet al dot. Cracovia che al torne in Friûl, stant che al è nassût a Triest, Fontanini al à marcât tant che positîf il fat che i responsabii dal ordin public a cognossino ben la realtât locâl dulà che a lavorin par podê inmò miôr dâ rispuestis sveltis e zovevulis su pe sigurece, robe che a fuart e je domandade de int. «Si scuen vê iniment - al à zontât Fontanini - che inte nestre regjon, la Provincie di Udin e je chê plui esponude aes infiltrazions de delincuence che e rive dal est european, stant che e confine cu la Austrie e la Slovenie». Il Vice cuestôr Cracovia, che al à vût impuartants esperiencis intai cjamps dal ordin e de sigurece publiche, dal control dal teritori e dal contrast ae criminalitât organizade, al à sigurât il so plui grant impegn a pro de sigurece de popolazion inte nestre provincie.
Stagjonâi: vie pal istât a Lignan e dilunc l'invier a Bolzan
Ancje chest an la Provincie di Udin in gracie dal assessorât al Lavôr di Daniele Macorig al à rinovât l'acuardi pe Borse dal Lavôr tal compart turistic cu la Provincie autonome di Bolzan. Il fin de iniziative al è chel di pandi lis oportunitâts ocupazionâls, pal invier cu ven, tal cjamp turistic, dant ai lavoradôrs cualificâts dal setôr alberghîr e de ristorazion (che dilunc la istât a lavorìn a Lignan) la ocasion di continuâ il lôr lavôr in Alto Adige vie pal invier. Il diplome di scuele alberghire e il savê la lenghe todescje a son doi recuisîts impuartants par podê jessi cjapâts sù.
La Provincie di Udin, par mieç dal Centri pal implei di Tisane, adun cu la Union Otelîrs e la Provincie di Bolzan, al à inmaneât une zornade la che i altotesins, responsabii dal Servizi domande-ufierte dai Centris pal implei de Provincie autonome di Bolzan a saran disponibii a un prin colocui cui lavoradôrs interessâts e po dopo ai segnaran i curricula intune bancje dâts di pueste. Daspò de publicazion dai curricula sul sît internet de Provincie di Bolzan, a saran i otelîrs altotesins a contatâ i lavoradôrs selezionâts.
Tumieç - il municipi al mude sede
Il Municipi di Tumieç al mude sede, da place XX Settembre al è stât trasferît in vie Roma n. 1, tal edifici di chê che une volte e jere la Sip. Te gnove sede a saran logâts chescj uficis: il sportel dal citadin, il centralin, il protocol, i uficis di segretarie, culture, assistence e istruzion, oltri che i uficis dal sindic, dai assessôrs e dal segretari gjenerâl. Ind è la pussibilitât che il traslocament a causioni la sierade a turni e par cualchi ore dai uficis. Il mudament al è une scugne par permeti il sierai dai lavôrs di metude a puest de sede municipâl. Ae fin di chescj lavôrs i uficis dal Comun a cjataran la lôr sistemazion definitive.
Areis di mont: la salût plui dongje al citadin ...
Si pues svicinâ la salût al citadin, massime in chês areis plui discomudis, come lis zonis rurâls e montanis. A provâlu e je la Ass 3 Alte Furlane che a Parigi, a à presentât il progjet su pal disvilup des risorsis locâls pal supuart e l'infuarciment des comunitâts rurâls e montanis, vâl a dî, cemût puartâ la salût plui dongje ae int. La ocasion e je stade dade de Conference Soci-Sanitarie Europeane, rivade ae sô 16 edizion, che e ven inmaneade ogni an dal European Social Network (cun supuart de Comission Europeane). No dome esperts dal setôr, ma ancje tancj miedis "di base" impegnâts a puartâ indevant il sium di une midisine funzionâl e zovevul ancje in zonis gjeografichementri mancul fortunadis, dulà che il riscli di bandon al è plui alt, sedi parcè che a rivuarde la mont mezane che chê alte. Oltri ae promozion dai mûts di vite e de sostignibilitât sociâl, principis sigurâts dal progjet Voucher (sosten aes fameis par mieç di assegnis di servizi) che al sigure l'apaiament di primis necessitâts, la Ass 3 e à proviodût ae informatizazion dai miedis di midisine gjenerâl (Azion E-Health) e ae nassite/potenziament dal progjet "Punti Salute" - ambulatoris e poliambulatoris - in mont, tant che une soluzion ai colegaments dificii ai ospedâi di Tumieç e Glemone.
Tondo al incuintre la olimpioniche Chiara Cainero.
Un grant mac di rosis per dâ il benvignût ae medaie daur di Pechino, biel che jê e à cuintricambiât regalant a Tondo il cjapielut uficiâl dai Zûcs cinês, cu la sô firme. Une cerimonie semplice e sclete; «come il caratar di Chiara – al à marcât Tondo – une che ae int a plâs cetant, cemût che o ai podût capî di persone. Il FVJ al è orgoiôs di jê». «E jo o soi orgoiose de mê regjon» e à dit cun convinzion la Cainero, compagnade dal pari Eddi. Il president si è interessât di cognossi cemût che la atlete si è svicinade a chest grant sucès, pandint ancje la intenzion di meti in vore un progjet bon di sburtâ la imagjin sportive di dute la regjon. Eddi Cainero al à ringraziât ducj pal biel riceviment vût de fie e al à pandût il so agrât sedi ae associazion di “Tiro a volo” di Cjampfuarmit (dulà che par solit Chiara si alenave) sedi a chê di Tumieç.
Lauc: cuistion "antene"
E va indevant la querelle jenfri Legambiente e il comun di Lauc pe antene de stazion radio base di Telecom logade sul tet dal municipi. Tai dîs stâts il sindic Olivo Dionisio, par dâ une rispueste ae petizion firmade da 177 personis cuintri il ripetitôr, al pandeve il bon risultât des rilevazions fatis de Arpa, che a veve regjistrât valôrs di 10 voltis plui bas dal limit di leç. La associazion ambientaliste, in ore presint, e à rispuindût sclarint che «no 'nd è mutîf di dubitâ che i nivei cjatâts a sedin in regule cun chei stabilîts par leç, ancje se, bisugnarès tignî cont dai oraris la che plui si telefone, e cussì fasint magari si podaressin regjistrâ cressites di chescj valôrs. Dut câs, se parcè che a rivuarde la normative lis robis a son a puest, al è clâr - al fâs savê Marco Lepre dal circul cjargnel - che inte int a 'nd è simpri une cierte preocupazion pes conseguencis su pe salût, ancje vint iniment i studis plui resints che a stimìn i nivei stabilît de leç inmò masse alts».