Il progjet de Provincie di Udin
Al è stât presentât tal salon dal Consei provinciâl di Udin il "Progjet integrât di sigurece stradâl inte Provincie di Udin". Cetante la int presint adun cun sindics e aministradôrs locâi, pulizie, gjestôrs di locâi publics, maestris di scuele vuide, rapresentants di ents che si interessin de materie, Sert, Asl e tante zoventût. Il plan, finanziât de Regjon FVJ e da Provincie di Udin, al previôt ativitâts di formazion, informazion e metude jù de segnaletiche su pes stradis provinciâls. "Ogni dì 15 personis a murin su pes stradis talianis, o sin devant a une vere emergjence sociâl, une vuere dal nestri timp che no podìn acetâ - al dîs il vicePresident de Provincie di Udin Fabio Marchetti - no podìn jessi un svarion e la ricercje di un divertiment che nol esist a copâ. Ogni persone e à il dirit e il dovê di rispietâ se stesse e chei altris parcè che la vite e je une sole. Chei che a son dentri inte "robe publiche" a scugnin, e duncje nô o scugnin, fâ di plui e miôr par incressi e spandi la culture de vite sot ogni forme - e al à continuât Marchetti - a 'nd è avonde di pôcs seconts par cambiâ par simpri la vite di une o plui personis.

Su pal comissariament des Comunitâts Montanis

Lis declarazions dal President de Regjon Renzo Tondo pandudis tant dal incuintri cui gnûfs comissaris des Comunitâts Montanis a mostrin ancjemò une volte come cheste maiorance regjonâl e sedi pardabon cence un progjet reâl pes Autonomiis locâls dal FVJ.
E va indevant la politiche dai sprocs, des reclams des cjossolis da meti in vore e in fin dai fats si procêt cu lis contradizions dal President Tondo e de sô maiorance che e mude idee dispès e pal solit nus use a vivi a la zornade.
Dilunc chescj dîs, nomenâts di presse i Comissaris des Comunitâts Montanis dopo che cualchidun si ere incuart che a podevin colâ i supuescj pal provediment di comissariament, il president Tondo al fâs savê che il lôr fin principâl al sarà chel di sbassâ il plui pussibil lis spesis (cetant che ai costin i comissaris si pensarà plui indevant), di sveltî l'iter aministratîf des pratichis e di risolvi i problemis de mont.
Robe di ridi. Cemût podaraial un dirigjent regjonâl o un segretari comunâl, che al passarà mês a capî dutis lis ativitâts e funzions des CM e cuntun mandât di un an (ma no vevie di jessi fate la riforme des autonomiis locâls dentri dai 31 di Dicembar di chest an cemût pandût intal ordin de zornade presentât ae zonte de Leghe?), risolvi i problemis de mont e di une istituzion publiche dut câs complesse tant che la Comunitât.  Cuâl ise la propueste che e à butât fûr la zonte Tondo su pal riordin des Autonomiis Locâls? Su par chest cont no 'nd è nuie biel che a continuin i comunicâts dai varis Fontanini, Seganti e di ultin Lenna.

C.M.C.: 450mil euros a supuart des impresis comerciâls dai piçui paîs
A saran dâts fûr ancje chest an, cuntun bant in scjadince ai 5 di Otubar, i contribûts stanziâts de Comunitât montane de Cjargne a pro dai esercizis comerciâi logâts intai paîs cun mancul di tremil abitants al fin di conservâ sul puest la ativitât e frenâ il bandon. I bêçs metûts a disposizion dal ent par mieç il bant, publicât tai dîs stâts, al è di 450mil euros. Al bant a podaran partecipâ dutis lis ativitâts comerciâls cjapadis dentri inte zone interessade, a pat di no vê passât, tal 2007, un limit massim di vuadagns stabilîts par ogni gjenar di ativitât e di ubicazion de stesse. La percentuâl di jutori aes ditis che a jentraran in graduatorie e podarà rivâ al 70 % de spese amissibil, fint a un impuart massim di tremil euros. L’an passât lis domandis acetadis a son stadis 162 suntun totâl di 170 presentadis, cuntun contribût di 2.500 euros par ogni beneficiari.
Il tiermin ultin pe presentazion des domandis al è ai 5 di Otubar e i modui si puedin cjatâ alì de CM o discjariâts dal sît www.comunitamontanacarnia.it.

Gnove leç regjonâl antisismiche

Costruzion in zone sismiche e tutele fisiche dal teritori, in publicazion la gnove leç regjonâl. La leç, fate buine de aule inte sentade dai 30 di Lui, e va incuintri ae dibisugne di un adeguament a la svelte de normative antisismiche regjonâl aes gnovis disposizions nazionâls che a stimin dut il teritori, ancje se a nivei difarents, a riscli sismic. Tignint cont de necessitât sedi de tutele des personis che de necessitât de massime semplificazion burocratiche pussibil, il consei regjonâl al à fat bon un provediment indreçât a sigurâ un alt nivel di control su pes costruzions,  simpri cuntun voli di rivuart ae sigurece.

 

Interogazion su pai incarics dirigjenziâi destinâts  di pôc in mont

Tignût cont che di pôc in mont a son stadis rinovadis lis direzions gjenerâls di dôs impuartants societâts a partecipazion di interès regjonâl come Agemont S.p.A e il Ricovar di Tumieç e che in ducj i doi i câs lis nominis a àn rivuardât personis che no stan in mont e che adiriture ae direzion de Agemont al è stât nomenât un ex dirigjent regjonâl in pension, tignint dut câs ad a ments che un progjet di disvilup economic de mont, par jessi zovevul, al scuen podê fâ calcul ancje e soredut su risorsis professionâls e umanis dal puest. Cun chestis premessis il conseîr regjonâl Enzo Marsilio al à fat une interogazion al president de regjon par savê: se al stime che al sedi coerent pal rilanç de economie la nomine di dirigjents che a vebin sielt di no stâ in mont e che duncje no vivin in prime persone i problemis;  se i conseis di aministrazion des societâts che a àn proviodût aes nominis si sedin preocupadis di meti in vore criteris di selezion bogns di lumâ zovins cualificâts che a vebin sielt invezit di vivi in mont; se i sore dits partecipants a vebin fat concors pe direzion des societâts sore ditis e, tal câs, cemût mai che a sedin stâts escludûts.

 

Zimulament jenfri i nonos e la mularie de "Cjase Colledani Bulian"

Si è davuelzude inte Cjase albierc Colledani Bulian la fieste di sierade dal Centri Estîf di Voleson. In fats ogni an i "brâfs animadôrs di Itaca" a rindin partecips i nonos de Cjase di cheste fieste. L'obietîf al è chel di "zimulâ" nonos e mularie regalant a ducj i doi un moment di ligrie."E je une zornade cetant spietade ancje dai nestris vecjos - a disin i socis di Itaca de Colledani Bulian - che si preparin par timp a dâur acet prontant dai piçui regâi". E cetancj ricuarts dal timp passât tant dai preparatîfs! "Ce bielece viodi i fruts plui piçui tirâsi dongje dai nonos par fâsi niçulâ" a contin i operadôrs di Itaca - tancj nonos si son emozionâts stant che al ere tant che no cjapavin tal braç un frut". Il dut si è sierât cuntune buine mangjade, pan e salam, angurie, gjelâts e bevi a plasiment. Cu la impromesse di cjatâsi indaûr ducj insieme prime dal an cu ven.

 

A Lauc la mostre di Giovanni Centazzo
E va indevant alì de sale polifunzionâl de Cjase dal Popul a Lauc, la mostre dal famôs pitôr furlan Giovanni Centazzo, clamade "Lauco e la mia Carnia" e avodade ai personaçs dal Plan di Lauc. Il sindic Dionisio al fâs savê che la mostre e restarà vierte ducj i dîs fintramai ai 30 di Avost, i visitadôr a podaran preseâ tancj cuadris che a figurin il paisaç di Lauc e de Cjargne, fondâts sul grant amôr dal artist pe nature e pai nestris bielissimis panoramis. O sei sigûr che cheste iniziative culturâl e merte un public numerôs locâl e forest - e al siere - chescj events a son impuartants par ce che a disvein i nestris paîs e a insiorin lis za tantis manifestazions inmaneadis sul nestri teritori, dant ocasion di ricrei sedi ai paisans che a chei che, simpri di plui, a vegnin in feriis ca su". 

 

Triathlon di Davâr e vinç la TimauCleulis

Sabide ai 8 di Avost, la Timaucleulis si è presentade al Triathlon di Davâr cuntune formazion fûr dal solit ma vincint. Franco Puntel al è lât benon in salide e, al contrari dai siei aversaris, cui skiroll fint a Clavais al è lât in pas alternât. Al cambi al à lançât Marco Primus che de seconde posizion al è rivât ae prime fasint ancje il record de dissese, cussì Giorgio Morassi al à podût vinci tornant inte piçule frazion di Davâr, ma cheste volte in bici e segnat il cuart timp di frazion.

La formazion feminîl de TimauCleulis e vinç la stafete sul Lussari
La formazion feminîl de Timaucleulis e à jonzût pe prime volte inte storie de societât, une vitorie in stafete inte classiche dal Lussari ai 9 di Avost. Dopo dal secont puest di Ravasclêt, lis atletis de polisportive a àn dominât subite, cun Lavinia Garibaldi e cu la mari Luigina Menean, che a àn dât passe 5 minûts di vantaç aes rivâls de Aldo Moro di Paluce. Luigina e à savût ripeti il miôr timp fat te domenie stade e e Carla Spangaro e à savût mantegni il vantaç e rivâ prime al travuart.
Purtrop no je lade cussì ben ai mascjos, Marco Nardini intal toc in salide al à cambiât par secont cuntun svantaç di passe mieç minût, in dissese Miuri Del Bon al à jonzût il cuart timp di frazion e lançât Marco Primus. Il finâl al à viodût la Polisportive sierâ al cuart puest daûr des scuaris di Paluce e de Atletiche Buie. Dodicesim e je rivade la scuare B cun Gian Paolo Englaro, setim timp de salide, Fabrizio Cortolezzis e Matteo Romano.