PROVINCIE, IN MOSTRE LIS LENGHIS DAL FRIÛL

Un dai grancj fatôrs identitaris di une comunitât a è cence dubi la lenghe. E propit as lenghes dal Friûl a è dedicade la mostre "Patrie dal Friûl - Lis lenghis de Patrie". Fint ai 16 di Mai inta Glesie di Sant Antoni Abât. La mostre, organizade da Provincie, cul sostegn da Regjon e da Fondazion CRUP, a è stade inaugurade dal president da Provincie on. Pietro Fontanini e dal assessôr Elena Lizzi. Par Fontanini, <<la Provincie a à programât une mostre su las lenghes da Patrie no nome par reclamâ la atenzion dal public su la complessitât dal tiessût culturâl furlan, ma encje par contribuî, su la fonde das linies che la Comunitât Europeane a à indicât, a valorizazion das lenghes minôrs, passant par une "visualizazion" di suns e concets che trop spes a son proprietât nome dai specialiscj dal setôr>>. <<Cjacarâ une lenghe - al à rilevât Lizzi - al è, prime di dut, comunicâ cualchi valôr. La pluralitât das lenghes presints sul teritori da Provincie di Udin a testemonie une ricjece uniche che no à riscuintri in ates realtâts similes>>.

VILE, PIZZUL TESTEMONI DE PRIMEVERE DAL CÛR

Encje il cûr al vûl il so check-up e par chest motîf i Comuns cjargnei di Vile, Lauc, Denemonç e Raviei, a slançaran intal meis di Mai la "Primevere dal Cûr", une iniziative che a vûl sensibilizâ la popolazion locâl intai confronts dai problemes dal cûr. Di fat i citadins da Alte Furlane a presentin, daûr das ricercjes puartades indevant da Aziende Sanitarie Locâl, un cuadri medic cuntune incidence fuarte di problemes al cûr, leâts cuasi simpri a stîi di vite che a podin jessi miorâts e a mancjance di cognossince o acès ai percors di cure. Cun cheste campagne informative, che a rivuardarà une serie di incuintris informatîfs e di proves pratiches intai week-ends dal meis, si cirarà di proviodi soredut al insegnament da prevenzion primarie as persones cence malaties dal cûr cognossudes e che a no san il livel dai propris fatôrs di pericul. " Intai varis Comuns il program - al spieghe Stefano Mecchia, che al rapresente i Comuns promotôrs - a si articolarà cuntune serade informative-educative (il sabide) e cuntune zornade di aciertaments e operativitât (la domenie), dulà che a vegnaran misurâts i livei dai singui fatôrs di pericul".

FOR DISORE, FRANE SUL PUINT

Il puint dal Riu Marodia, dilunc la strade statâl 52 "Cjargnele", cirche cinc chilometris prime dal centri abitât, al è stât interessât di un dissest, probabilmentri causât da tante ploie colade intai dîs passâts. Dopo la comunicazion rivade al assessôr regjonâl a Viabilitât e Traspuarts, Riccardo Riccardi, e ai responsabii di FVG Strades, i tecnics da stesse FVG Strades - intervegnûts sul puest - a àn proviodût a ristrenzi la cjarezade e a disponi un sens unic alternât, regolant il trafic cuntun semafar. Il dissest, secont une prime valutazion, al interesse nome une part dal puint e al ven a incidi su la struture in beton realizade encjemò intai agns Cincuante par consolidâ e slargjâ la strade. Intai dîs che a vegnaran il personâl tecnic di FVG Strades al proviodarà a monitorâ intai minims particolârs la situazion par fâ une valutazion esate dai dams e dai intervents necessaris.

A TUMIEÇ IL BASKET AL FÂS FIESTE PE SERIE C CU LA INCOGNITE DE PALESTRE

Passade la fieste grande pa storiche promozion, pa Solai Cjargne Basket Tumieç si vierç cumò une partide encjetant impuartant: chê relative ai necessaris adeguaments da Palestre dal cjâf lûc cjargnel. Se nissun al interven a coventarà une deroghe. Di fat pal salt di categorie la struture no risulte a norme, cul pericul, se no rivarà une deroghe di bande da FIP, la federazion taliane di chest sport, di dovê emigrâ intune ate palestre. "I cognossin chest probleme, - al spieghe il president da societât Alessandro Paolini - za in passât i vevin vût mût di segnalâ i adeguaments necessaris di parquette, linies di cjamp, canestris e cjamarins; i vevin encje presentât un progjet di massime. I speri che, encje cu la mediazion dal sindic Zearo, si puedi cjatâ une soluzion". I coscj dai intervents di manutenzion a saressin di cirche 200 mil euros.

 

VENÇON, IN COSTRUZION LIS PRIMIS ECO-CJASIS

A Vençon, in borc Rozza, a son començâts i lavôrs pa realizazion di dôs unitâts abitatives progjetades secont i principis da architeture bio-climatiche e dal Protocol "CjaseClime A plui". A son cjases cetant comudes, progjetades e realizades da imprese locâl "Ideaedile", che a àn la peculiaritât principâl di consumâ poucje energje. A fâ il pont da situazion, sui lavôr començâts recentementri, al è il titolâr da imprese, Augusto Madrassi. <<Di pôc - al spieghe - al è atîf il cantîr di borc Rozza, dulà che, intun contest di grant valôr paisagjistic e ambientâl, a vegnaran realizades las viles che a saran las primes costruzions eco-compatibiles da noste Regjon. I lavôrs a procedin secont las previsions>>. La Certificazion cu la marcje di cualitât CjaseClime, a vegnarà dade da Agjenzie Provinciâl pa Energje (APE) di Glemone, dopo las verifiches oportunes.

DARTE, LIS TERMIS A FASIN MARKETING TERITORIÂL

Proselitisim inta proprie tiere pas Termes di Darte che, dopo vei planificât las prossimes strategjies a medi-lunc tiermin, cumò a acelerin cul marketing teritoriâl par cjatâ nûfs utents, soredut cjargnei. Di fat intai dîs passâts il nûf management da struture, Manlio Petris e Claudio Noacco in particolâr, rispetivementri diretôr di Promotur - atuâl gjestôr das Termes - e diretôr sanitari dal centri, al à clamât dongje ducj i aministradôrs cjargnei, cu la responsabile teritoriâl di Turisim FVG, Francesca Bruni, e cul conseîr regjonâl Luigi Cacitti, par ilustrâ une propueste smirade a fâ vivi miôr i propris citadins, in gracie di convenzions speciâls rivolzudes as varies fasses di etât e duncje aes divierses esigjences. In sostance si trate di un pachet "base" che al ponte as ativitâts di grup, sudividudes par fasses di etât, e a coscj promozionâi.

SOCLÊF, FOTOGRAFÂT L’ORS CHE AL DIMORE INTE VALADE

Il scat al è stât fat di une cjamare a rais infraròs, instalade da risierve di cjace locâl che Luigi De Colle al dirêç. La imagjine a è stade fate as 3.57 di buinore inta zone di confluence dal torent Lumiei cul Tiliment e a mostre un esemplâr di cirche 150 chilograms di peis. <<I nin indevant cul progjet començât cu la Universitât di Udin - al spieghe il vice-president da risierve Lucio Zanier - pal monitorament continuât dal salvadi intal nosti teritori>>. Divierses species animales, che si crodeve scomparides in Cjargne di tant timp, a son stades za fotografades, o è stade confermade la lôr presince. In plui dal ors a è stade rilevade la presince da linç, dal siacal dorât e dal cjan procion, che al è il prin rilevament fotografic in ambient documentât in Italie. Par chest motîf Soclêf si candide puntualmentri tant che puarte naturâl al inseriment das Dolomitis tra i patrimonis mondiâls da UNESCO, ricognossiment che al pues ricualificâ dute la zone.

PAULÂR, NONE OLIVIE PRIME DI TRÊ CENTENARIIS

Fieste grande a Paulâr in onôr da prime centenarie dal an. Di fat, intal 2010 nome inta Val di Incjaroi, ates dôs siores a celebraran un secul di vite. Olivia Ferigo, dete la 'Uliva dal Nela', a à fat i siei prins cent agns e, pa ricorence un grum impuartant, une comunitât intiere - vuidade dal Sindic Maurizio Vuerli e di cualchi assessôr, insieme al fi di Olivie, Fiorello Del Negro, e a sô femine - si è riunide daprûf a nonute, par manifestâ il propi afiet e la proprie gratitudin par chel che al à significât la sô presince intal paîs cjargnel in ducj chescj agns. La Filarmoniche"Nascimbeni" a à legrât la fieste, mentri il Grup locâl da A.N.A. al à metût a disposizion la proprie sede e al à preparât un gustâ di ecezion, servît di fantates bieles in costum. Il Plevan, Don Titta, al à ricuardât i moments impuartants da vite di none Olivie, mari e femine esemplâr, ma encje burlone grande e spiritose, che, encjemò in etât no plui zovine, a faseve scherçs ai siei paisans. Il Sindic, a non da Aministrazion, al à regalât a none Olivie un maç di flôrs e une pergamene; ducj a àn fat i auguris afetuôs a none par i siei prossims cent agns.

VILE, VIABILITÂT E TECNOLOGJIE, A RIVIN 800 MIL EUROS REGJONÂI

Lu à stabilît la zonte Tondo dant il vie libare a une stipule di convenzion. La Zonte Regjonâl a à dât il vie libare a stipule di une convenzion cul Comun di Vile par realizâ il prin lot dai lavôrs di viabilitât e reits tecnologjiches a servizi das aziendes da zone artesanâl-comerciâl. In virtût di chest acuardi di program, stipulât dal President da Regjon Renzo Tondo, su proposte dal assessôr a programazion Sandra Savino, La Regjon a contribuirà cun 800 mil euros a spese proviodude di 965 mil euros pal prin dai trei lots. La realizazion complessive das infrastrutures proviodudes in particolâr dal Plan Regoladôr Comunâl a costarà 2 milions e 409 mil euros.

SERVIZIS E UFICIS IN MONT, MARSILIO AL CLAME IN CAUSE LA REGJON

Puestes, manutenzions, jentrades, "al devi finî il timp dai spots e dai anuncis: a son za stâts trops i tais ai servizis e as oportunitâts dal teritori montan, Tondo e la sô Zonte a àn di començâ a cjalâ la margjinalitât cressint di chestes tieres". A cjacarâ al è il conseîr regjonâl Marsilio che al fâs buins i reclams dai dîs passâts dal senatôr Vanni Lenna su la riduzion dai servizis da Agjenzie das Jentrades di Tumieç e al denuncie aitis tais dai ultins meis inta Alte Furlane, "ben plui grâfs di chel das Jentrades, dulà che al è stât trasferît a Udin nome il repart di control, mentri nuie al cambie rispiet ai aitis servizis che a restin intal cjâf lûc cjargnel". Marsilio si riferìs "al spostament a Udin di centris direzionâi strategjics, tant che i uficis das puestes di Tumieç e dal servizi regjonâl di manutenzion, o al dismantelamint di ce che si ere tentât di fâ pai servizis di vicinance, tant che i progjets di sostegn dai uficis postâi periferics, dai servizis INPS, dal sisteme scolastic, dai traspuarts e dai servizis sociâi.

LA ENERGJIE CHE E FÂS BEN AL AMBIENT

Valorizâ la filiere dal len, curte e sostignibil. A è la mission dal FIPER (Federazion Italiane Produtôrs di Energjie di Fonts Rinovabiles) che recentementri a à fat la sô assemblee anuâl a Applis di Davâr, a presince dal President da Zonte Regjonâl, Renzo Tondo. In Friûl Vignesie Julie, in chest moment, a 'nd è encjemò cualchi ritart intal setôr. Di fat, nome il 3,3% da energjie di fonts rinovabiles, che a è prodote in Italie, al ven fat in Friûl. Cetant disot da medie das regjons che a è al 5%, ma cuntun fuart potenziâl di cressite che si sta manifestant inta realizazion di tancj implants nûfs, sei di piçule taie, pas famees, che di dimensions plui grandes. Par esempli, las centrâls di Darte, chê di For Disore, di Trep, di Lauc e di Verzegnis che a produsin energjie termiche.  

AL STÂ PAR RIVÂ A FIN IL PROGJET “BIOINNOVERBE” DI CIRMONT

Semafar vert pal progjet BioInnoverbe di CIRMONT (Centri Internazionâl di Ricercje pa Mont), realizât in colaborazion cun ERSA, cul Vivâr Dipartimentâl e cu la Universitât di Udin, finalizât a coltivazion di plantes spontanies par evitâ il sac salvadi dal teritori e creâ oportunitâts noves di redit, che si sta inviant a conclusion cun risultâts superiôrs as aspetatives. A evidenziâ il sucès dal binomi "tradizion e inovazion" a son stâts encje il senatôr Vanni Lenna e il conseîr regjonâl Luigi Cacitti, che a àn fat recentementri visite al CIRMONT e a àn sotlineât il tornecont di coniugâ las tradizions cul nûf.

SUCÈS PAI FORMADIS FURLANS IN VETRINE A FALCADE

Cualitât e tradizion a son ricognossudes dal dut as produzions casearies da mont furlane: une dimostrazion a ven dai "Grancj Formadis Talians di Mont & il Sport", prime rassegne nazionâl dal setôr organizade dal centri di ricercje "Caseus Montanus" e patrocinade dal Ministeri das Politiches agricules, alimentârs e forestâls. L'event al è stât fat a Falcade (Belum), in contemporanie cui Campionâts di Schi Alpin, e AGEMONT al à partecipât metint in vetrine - in colaborazion cul Consorzi Prodots da Mont FVG e cul patrocini da Cjamare di Cumierç di Udin - une selezion di prodots das lataries di Ugovizza, Sudri, Denemonç, Campolessi e Vençon. "I formadis - al comente il diretôr di AGEMONT SPA, Luiginio Maravai - a costituissin un impuartant patrimoni gastronomic dal teritori montan e la aministrazion regjonâl, cul Plan di riconversion dal setôr latîr-caseari da aree montane dulà che AGEMONT a è fuartementri impegnade, a intint propri rilançâ e valorizâ la ativitât zootecniche e casearie di mont”.

36^ EDIZION DE MARCE VERDE

Domenie ai 11 di Avrîl si è disputade la 36^ edizion da Marce Verde a Seorgnan cu la partecipazion di cirche 500 persones che si son cimentades suntun percors di 10 km, cualchidun corint e cualchidun cjaminant cui siei familiârs, in gracie di une biele zornade. Nonostant la no competitivitât da manifestazion, a son stâts cetancj i apassionâts e encje i professioniscj a partecipâ; tra chescj ultins encje il vincitôr da edizion passade Marco Primus, da Polisportive TamauCleulis, che chest an però al à dovût cedi il pas a Michele Ermacora, dal G.S. Aquilee. Ermacora al è lât in teste al grup dai coridôrs fint dal inizi da gare e al è rivât vitoriôs a fin. Al tierç puest si è classificât Alex Danelutti (U.S. Aldo Moro) e al cuart Francesco Tamigi (Atl. Buie). La manifestazion, organizade dal grup A.N.A. locâl, si è concludude cu la solite pastesute e il rigjâf das iscrizions, tant che ogni an, al è stât dât in beneficence.