17 DICEMBRE 08
Tumieç - Indenitât di disocupazion, note Inps
La Agjenzie Inps di Tumieç, e vise che da lunis 15 di Dicembar intai Uficis de Inps a saran disponibii i modui par presentâ domande di indenitât di disocupazion cui recuisîts ridots par chei che no àn versât plui di 52 contribûts setemanâi intai ultins doi agns, ma che l'an prime a vebin lavorât almancul 78 dîs e che a sedin sigurâts da doi agns. La domande e scuen jessi presentade jenfri il 1 dì di Zenâr e il 31 di Març 2009 cun dute la documentazion. Par fâ un lavôr un tic plui svelt, la Agjenzie e sburte a lei e seguî cun scrupul lis "avertencis" che si cjatin sui modui, massime parcè che a rivuarde la trasmission midiant internet, servizi furnît a gratis dai ents di Patronât. E a chest proposit si fâs savê che e vignarà dade precedence aes domandis mandadis vie internet.Tumieç- Primis novitâts par "Leggimontagna 2009?
Al torne l'apontament cun "Leggimontagna", il premi leterari nazionâl e di audiovisîfs inmaneât de Asca (Associazion des Sezionis Cjargnelis dal C.A.I. - For Avoltri, For Disore, Ravasclêt, Tumieç) adun cu la Comunitât montane de Cjargne e il supuart di impuartants ents e istituzions. Dal sigûr un dai apontaments plui impuartants de regjon e che al permet di segnalâ lis oparis dedicadis ae mont. Di pôc al è stât publicât il bant cun cualchi novitât, prime fra dutis une gnove categorie intal setôr dai audiovisîfs. In fats oltri ae sezion "classico", rivade ae cuarte edizion, che e cjape dentri lis oparis di documentazion o di finzion (curt, mezan e luncmetraç) fatis tra il Novembar 2006 e il Fevrâr 2009 e che a smirin a valorizâ la sensibilitât viers la mont, la scuvierte de culture alpine, la ricercje e la esplorazion dal mont dal alpinisim, il premi al previôt ancje la sezion "a tema". A mudâ al sarà pûr il periodi de premiazion: no plui in primevere ma in Setembar a Malborghet Valbrune.MONT- Comunitât Montane insieme par Interreg
Lis 4 Comunitâts montanis dal FVJ si dan dongje par meti in vore in maniere coordenade i progjets Interreg gjestîts de Union Europeane intai setôrs dal ambient, ricercje e svilup, culture e sociâl, che tra l'altri a rientrin ancje intai Plans di azion locâl inviâts dai 4 ents su la fonde de leç regjonâl 4/2008. Par fâlu lis Comunitâts montanis a àn firmât, tai dîs stâts, un protocol di cooperazion impegnantsi a meti a disposizion lis lôr risorsis, sedi in tiermins di personâl che di cognossincis, a coordenâ fra di lôr progjets e partner par miorâ cualitativementri la programazion e individuâ un grup di lavôr par ogni Comunitât montane che al siguri il scambi di informazions e al partecipi ae definizion dai plans di atuazion dal protocol. Chest progjet al vûl creâ lis cundizions par che lis Comunitâts montanis a puedin presentâ des propuestis di valôr dentri dai progjets gjestîts diretementri de Union Europeane, che a permetaran, midiant la partecipazion ai bants, di inmaneâ intervents sul teritori".
OSÔF - Borsis di studi par universitaris
Il Comun di Osôf al à inmaneât un bant di concors par judâ i students universitaris plui brâfs. E je la prime volte che si fâs une robe dal gjenar. "Lis borsis di studi - al sclarìs l'assessôr aes politichis zovanîls, Paolo De Simon - a son 4, da 300 euros ognidune, dôs pes facoltâts sientifichis e dôs pes umanistichis (in cheste a son cjapadis dentri ancje: Jurisprudenze, Siencis politichis e Economie). A puedin partecipâ ae selezion i students iscrits a partî dal 2 an, se: a son citadins talians, comunitaris o extre comunitaris in regule; a stedin a Osôf; a vebin fat i esams previodûts dal plan di studis o intal vademecum de facoltât cuntune votazion medie di almancul 24/30. La domande - in cjarte semplice, sul model prontât - e scugnarà rivâ ae Aministrazion comunâl dentri di misdì 12 dai 29 di Dicembar di chest an, adun cul certificât de Universitât cul numar dai esams fats e i vôts cjapâts e la fotocopie di un document di identitât.
DAMÂR- Cun "Ocjo" e je di sene la sigurece
“Ocjo: la sicurezza, un bene comune. Costruiamola insieme” chest il titul de iniziative a fuart volude de ECO (Grup Luvata) e inmaneade in gracie al supuart e ae colaborazion de INAIL FVJ, da agns impegnât a fâ passâ intes aziendis e intes scuelis il messaç de culture de sigurece sul lavôr. Al incuintri che al à viodût la partecipazion di rapresentants de INAIL e de ASS 3 de Alte Furlane, ‘nd erin passe 300 dipendents de sede ECO di Damâr, e a chescj si son zontâts i responsabii aziendâi - promotôrs de iniziative - e lis autoritâts locâls. Ducj a son stâts coinvolzûts, emozionâts e divertîts dai intervents di Bruzio Bisognano – maestri in materie di prevenzion – e dai Trigeminus che – cuntun sketch da ridi par furlan – ai àn puartât in sene i compuartaments sbaliâts e pericolôs che dispès si fasin sul puest di lavôr.
ALTE FURLANE - Incuintri pal plan 2009 de Ass 3
Al è pardabon positîf il parê che la Rapresentance dai sindics de Ass3 al à pandût su pe propueste di plan atuatîf locâl pal 2009 presentade in assemblee dal diretôr gjenerâl Luciano Zanelli e dal diretôr sanitari Beppino Colle. La Rapresentance, a vôs dal president Sergio Cuzzi, e à marcât di preseâ un Plan che si presente ambiziôs e che al samee dâ rispuestis concretis al teritori de Alte Furlane. Il document di program de Ass3 al previôt un significatîf numar di assunzions (miedis e infermîrs) e jenfri chestis ancje chê di un chirurc e di un cardiolic pal ospedâl di Glemone e di doi miedis pe aree emergjencis dal ospedâl tumiezin. Cun di plui al vignarà incressût il setôr de prevenzion, massime parcè che a tocje i incidents stradâi e in cjase, il tabac, l'alcul e lis vacinis. Pai investiments a son invezit in program la fin dai lavôrs intal ospedâl di Tumieç e un gnûf centri pe dialisi a Glemone. Il Plan atuatîf locâl 2009 al varà in cumò di jessi discutût cu la Agjenzie regjonâl de sanitât.RESIE - Une associazion pal "Ai di Resie"
Si è dade dongje di pôc alì de sede dal Parc des Prealps Juliis a Prât di Resie, la associazion "Aglio di Resia" che e à tant che socis i coltivadôrs di ai de valade. La gnove presidente Donatella Pizzaioli e à pandût i fins de associazion che e je indreçade a promovi e tutelâ il Presidi e la biodiviersitât dal ai di Resie, aderint ai principis dal Slow Food. L'ai al è un prodot cun particolârs carateristichis organichis che si manifestin cul odôr e savôr cetant fuart. Al ven coltivât in piçui orts sparniçâts ator pal comun, fin a 1000 metris e la produzion e je sù par jù di 10-12 t/ha di prodot tal periodi che al va de fin di Lui ae fin di Setembar. L'incuintri si è sierât cun cualchi propueste da bande dai coltivatôrs pe promozion di ativitâts e metodis par valorizâ di plui l'ai come piçul patrimoni di biodiviersitât.TUMIEÇ - Dade sù in gjestion dal "bocciodromo"
La Aministrazion comunâl di Tumieç e à butât fûr un bant pe dade su in gjestion dal "bocciodromo" di Tumieç pai prossims 10 agns. Lis societâts e lis associazions sportivis diletantistichis cence fin di vuadagn, aderents al CONI o ae Federazion taliane Bocis, a puedin presentâ domande in buste sierade dentri di misdì 22 di Dicembar, al ufici Protocol dal comun di Tumieç. Par informazions e vê la documentazion indreçâsi al ufici Sport, tel. 0433.487961 - 487988, ducj i dîs, dal lunis al vinars, des 8 ae l'une. I documents a puedin jessi discjamâts ancje dal sît dal comun www.comune.tolmezzo.ud.it inte sezion "appalti".
Sît web avodât a Pre Checo Placerean
"La Provincie di Udin e finanziarà la realizazion di un portâl web, in cjâf al Istitût ladin-furlan 'Pre Checo Placerean, avodât a un dai personaçs simbui de furlanetât: don Francesco Placereani. Une persone che a dât un fuart sburt al disvilup dal sens di identitât de int furlane". A dîlu l’on. Pietro Fontanini, ae manifestazion pai 20 agns dal sodalizi ladin-furlan, memoreât a Cjase Turoldo a Coder di Sedean. Pre Checo, nassût a Montenârs tal 1920, muart a Udin tal 1986, al è stât jenfri i promotôrs de Mozion pal clericam che si bateve par une gnove pagjine di svilup dal Friûl daspò dal taramot dal 1976. Si fasè cognossi ancje tal grup culturâl "Int furlane" e intal "Movimento Friuli". Al à voltât in marilenghe il Messâl roman e al à contribuît ae traduzion de Bibie par furlan.Stefano Chiabai, alenadôr de Timaucleulis, al jonz la prime vitorie
Stefano Chiabai, alenadôr pe corse de Timaucleulis, al jonç la prime vitorie cui gnûfs colôrs. Dopo lis premiazions dal Trofeu Gortani 2008 a tornin a començâ lis stagjons dal schi di font e de corse pe Polisportive Timaucleulis. Impensìn i premis che i atletis a àn ritirât a Paluce ai 29 di Novembar: Valentina Unfer e Gianluca Puntel a àn sierât al secont e tierç puest inte categorie Esordienti, Michele Bellina e Livio Maieron al prin e tierç puest jenfri i Ragazzi, Lavinia Garibaldi e Luigina Menean secondis jenfri lis Senior e lis Amatori B e al fin Marco Primus al à ribatût il so primât jenfri i Amatori A. Cun di plui Livio Moro al à sierât al cuint puest la maratonine di Buie fate su 21 km di teren mist. Po dopo l’alenadôr Stefano Chiabai al à vint la Marcie de Imaculade a Ravose, dongje Udin devant a Edi Turco e Stefano Perisutti. Cheste e je stade la prime vincite di Stefano Chiabai cu la Timaucleulis, cumò si spiete che i piçui e grancj atletis ai ledin daûr.
Sudri: “Borghi e Presepi 2008/09”
Sabide ai 20 di Dicembar aes 16.30 si screerà la tradizionâl manifestazion di Sudri “Borghi e presepi”. Ae presince des autoritâts locâls si inauguraran ancje il sportel I.N.P.S. di Sudri, Çurçuvint e Darte, une oportunitât par dute la int dal Cjanâl dal Bût, la mostre “Sacrorum. I restauri di Sonia Beltrame” e si impiarà il “Falò della Pace”.
Cun di plui sabide ai 27 di Dicembar, aes 16,30, alì de Sale Consiliâr dal Muncipi di Sudri, si davuelzarà la presentazion dal libri “In file atorn dal fogolâr”, l’ultime fadie di Domenico Molfetta. La opare, scrite te variant di Sudri, e je une racuelte des storiis che une volte i nestris vecjos si contavin “in file”, ma dentri cjatarês ancje sprocs, proverbis, indivinacui, contis veres e tantis fotos di cemût che a erin lis cjasis di Sudri prime dal taramot. Un libri cetant interessant e tal stes timp divertent che nus puarte indaûr intun timp che nol è plui.