MUSEU DI STORIE NATURÂL, FONTANINI AL AUSPICHE CHE AL TORNI A VIERZI

<<Une sede adeguade intal cjâf lûc furlan a à jessi assegnade al Museu furlan di storie naturâl>>. Cheste a è la prese di posizion dal president da provincie on. Pietro Fontanini che, dopo vê ricevût a palaç Belgrât i rapresentants dal comitât “Amîs dal Museu Furlan di Storie Naturâl”, al à decidût di mandâ une letare al sindic Furio Honsell par capî miôr cemût cha a stan las roubes. Il comitât, che al à za cjapât sù cirche 4 mil firmes, al domande, a 10 agns da sô sierade al public, une nove sede par une das maiôrs istituzions culturâls, educatives e di ricercje sientifiche dal Friûl. <<I sei dal dut in acuardi cui rapresentants dal Comitât – al à det Fontanini – e mi ativarai par cjatâ une rapide soluzion a cuestion. I calcoli che a podarès jessi percoribil la proposte avanzade dai promotôrs da racolte di firmes: di fat a è di proprietât dal Comun di Udin la ex Caserme dai Vigjils dal Fûc, struture che, pas sôs carateristiches, a podarès trancuilamenti ospitâ il Museu>>. 

ZONTE, APROVÂT IL BELANÇ DI PREVISION 2010

Un belanç di prevision prudent e solit che al spiele l’atuâl moment di dificoltât economiche. Inta ultime sentade, la Zonte provinciâl a à dât il vie libare al belanç di prevision 2010 che si siere cuntun totâl di cuasi 206 milions e 600 mil euros (cirche 20 milions in mancul rispiet al 2009). <<Un document economic contabil – al spieghe il President on. Pietro Fontanini – che al conferme seti il procedi prudenziâl dal an passât che encje l’impegn di chei setôrs in grât di introdusi monede sul mercjât. Il 2010 al sarà l’an dulà che nou contìn di dâ inviament a diviers cantîrs e di completâ chei za scomençâts. Magari cussì no – al continue Fontanini – no vin la sfere di cristal e no podìn savei par trop che si fasaran sintî encjemò i efiets da crisi, chel che al è sigûr al è che i prins segnâi si comencin a viodi.

CONFINDUSTRIE, STIME PE OPERATIVITÂT DE MOTORIZAZION PROVINCIÂL

A è miorade sensibilmenti, intai ultims meis, la operativitât dai uficis da Motorizazion civîl da Provincie di Udin. Lu rileve il cjâf grup Traspuarts e Logjistiche da Confindustrie di Udin, Enrico Rosina, intune letare indreçade al president onorevul Pietro Fontanini. Un miorament, al sotlinie Rosina, che al rivuarde, in particolâr, i timps di spiete par otegni la cjarte di circolazion, che si son sensibilmenti ridots, cussì come lis sessions pes revisons e i colaudos che a àn cjapât sù une buine programazion (la uniche criticitât a rivuarde i timps par otegni las cjartes di cualificazion dal vuidadôr).
<<In ogni câs, no si pos che dâ at da atenzion che la Aministrazion privinciâl di Udin a à dedicât a chest setôr fin dal moment dal passaç das competences dal Stât, e di chest nou i sin pardabon ricognossints>>.

I CUADRIS DI FULVIO TALAMUCCI IN MOSTRE A TUMIEÇ

Une mostre par contâ il percors artistic dal pitôr Fulvio Talamucci, començât intai agns Otante, ma ancje las emozions e i framents di vite che lu àn ispirât. La esposizion, dal titul “Cjargne, tra reson e emozion”, a è stade inaugurade vinars ai 27 di Novembar intal Centri di coordenament culturâl da Cjargne a Tumieç e a sarà visitabil fin al 10 di Zenâr. A organizâle a è la Comunitât Montane, in colaborazion cul Museu cjargnel das arts popolârs Michele Gortani, che cussì a proponin al public las opares di un pitôr adotât da mont furlane. Talamucci, di fat, al nas e al vîf a Milan, dulà si aferme come publicitari. Al ven in Cjargne propri par cjapâ las distances dal ritmi caotic da citât, che dopo al abandone in favôr di cheste tiere e da sô pâs.

GRANT SUCÈS PE KERMESSE “EIN PROSIT”

Si è sierade la edizion numar undis di “Ein Prosit”. Cu la cene event di Sanjay Dwivedi dal ristorant Zaika di Londre, al è calât il sipari su la principâl vetrine dai prodots enogastronomics dal Friûl Vignesie Julie. Une manifestazion che, di là dai numars, a à puntât cetant su la cualitât da ufierte, che a è stade buine di sodisfâ ducj i sogjet coinvolts: i adets ai lavôrs, las istituzions, i espositôrs e i professioniscj invidâts. Grant sucès soredut pai “Itineraris dal gust”, cui menùs “ad hoc” preparâts dai grancj chef  da cusine italiane. A fâle da paron però, dilunc la kermesse dal gust,  al è stât Malborghet, cui “Laboratoris dai savôrs”. Fisse di int la “Mostre cerce”, cun miârs di persones che a àn sielt las sales dal palaç Venezian par entrâ in contat cui savôrs dal Friûl Vignesie Julie ma ancje da Italie, da Croazie, da Gjermanie, da Francie e da Austrie.

NEVEE, GNOVE TELEFERICHE MA PÔCS PARCS

Pa stagjon turistiche-invernâl 2010/2011 la localitât a sarà dotade di un parchegjo grant e nûf, adat encje a soste dai campers. La notizie a è saltade fûr da un incuintri vût a Triest inta sede dal Consei Regjonâl. La riunion a à vût tant che protagoniscj l’assessôr a la Viabilitât e ai Traspuarts dal Friûl Vignesie Julie, Riccardo Riccardi, il comissari straordenari da Comunitât montane dal Glemonat, Cjanâl dal Fier e Val Cjanâl, Gianni Verona, e i sindics di Scluse e Resiute, Luigi Marcon e Emilio Beltrame, cu la partecipazion dal conseîr regjonâl Franco Baritussio.
Al è stât concuardât che as risorses finanziaries stanziades diretamenti da Regjon la setemane passade (par 1 milion di euros) si podaran di fat zontâ i fonts che la Comunitât montane à za.

SAURIS, DAI 6 AI 8 DI DICEMBAR UN DAI MARCJADUTS NATALIZIS PLUI BIEL

Las vies e las plaçutes dal borc antîc, a dibot 1370 metros di altece, si implenin di desines di bancareles che a ufrissin prodots nassûts da passion, da sensibilitât artistiche e dal ingegn di tancj mistirants cjargnei. A Sauris di Sore, dai 6 ai 8 di Dicembar prossims, cun orari continuât das 10 di binore as 6 di sere, si fasarà il marcjadut natalizi, legri e plen di colôrs. Un trionf dal artesanât cjargnel e di dutes las specialitâts gastronomiches da Val Lumiei, si che duncje di semplicitât gjenuine, cun stands plens di furniments natalizis, mateçs di len, biliets di auguris, ‘striutes’ di piece e pipines di varies cualitâts. Dilunc das strades e tra las cjases di len, cjants natalizis cun cuarnamuse, bombarde e tambûr. A ‘nd è encje spazi pa buine gastronomie di une volte, spontanee e naturâl, che a ufrìs il miôr di se in gracie a persuts, salums, dolçs, sirops, sgnapes, mîl, conserves, prodots tipics e tante ate buine roube.

VERZEGNIS, PAR SELE CJALÇUTAN SI CIRIN GNÛFS GJESTÔRS

Une das storiches metes schiistiches dai agns ’80 in Cjargne, da tancj agns colade inta dismentie, a tente une nove strade di rilanç, cun la spade di Damocle da cuote nêf su pas spales. Il comun al met a bant l’afidament dai implants.
Di fat la aministrazion comunâl di Verzegnis, propietarie dai vecjos implants schiistics e da struture ricetive tacade, a à promovût un bant di gare pa aste publiche dedicade a locazion di dut il complès. La durade dal contrat a sarà di sîs agns, rinovabî par aitis sîs, e par stimolâ pussibii afituâi l’impuart di base da aste al è stât fissât in 3.600 euros anuâls. Cui che al vinçarà il bant al sarà clamât a gjestî las dôs pistes da disese su la cueste dal Mont Plombande, il cjamput scuele “Montute”, la piste di schi di font, localizade inta plane di Sele e inta localitât Bandit, e il bar e il ristorant dal puest.

LA VACINE ANTI INFLUENZE ‘SUINE’? INUTILE E ANCJE DANOSE

La vacine anti influenze ‘suine’? Inutile e encje danose. Lu aferme il dotôr Mauro Stegagno, une das tantes vôs che – cun cognizion di cause – a è cetant critiche intai confronts da campagne mediche intor dal virus H1N1. Un banâl virus si è trasformât inta pandemie dal XXI secul. Marketing di stampe e cjases farmaceutiches? Ce ‘nt pensaiso? Il dotôr Mauro Stegagno al è specialist in medisine interne e cardiologjie; espert in medisine no convenzionâl, il dotôr al spieghe la ineficence e il pericul da vacine parcè che al so interni a son presints sostances tossiches che a provochin gravissims dams al nosti cuarp. La prevenzion cun sostances naturâls a risulte jessi la miôr arme par combati cheste influence, cetant mancul pericolose di chê stagjonâl che di muarts a ‘nt cause fin a 8 mil ad an.

 

DIMPEÇ, 800 MIL EUROS DA REGJON PAR SISTEMÂ LA STATÂL ’52 CJARGNELE’

L’assessôr regjonâl a Viabilitât e Traspuarts Riccardo Riccardi al à confermât al Sindic Michele Benedetti un urgjent intervent di adeguament da strade (in gjestion a FVG Strade), i lavôrs a podaran començâ inta prossime primevere.
“Considerade la pericolositât in particolâr di une dade di cirche 200 metros da 52, in comun di Dimpeç, un vêr e propi ‘pont neri’ da viabilitât in chê aree”, al à sotlineât l’assessôr Riccardi, “la Zonte regjonâl à deliberât il stanziament di passe 800 mil euros par  miorâ la sigurece da circolazion cu la realizazion da retifiche di une curve e il slargjament da cjarezade e das relatives banchines laterâls”.
L’urgjence e la necessitât di chest intervent, al rileve Riccardi, a erin stades segnalades encje dai conseîrs regjonâi Franco Baritussio e Luigi Cacitti.

AQUILEE, PRIN INCUINTRI PAI LAVÔRS DI CONSERVAZION DE BASILICHE

Definî un acuardi di program pe conservazion de Basiliche di Aquilee tra Sovrintendence, Regjon, Provincie, Comun di Aquilee e Arcidiocesi di Gurizie. A è la conclusion cjatade a la fin dal incuintri organizât dal president e dal assessôr al turism da Provincie, on. Pietro Fontanini e Franco Mattiussi. Par discuti i detais di cheste ambiziose iniziative, che a podarès concretizâsi intal plui grant progjet di restaur in Friûl dal ultim secul, si è istituide une vere e propie taule taronde. <<Viodude l’unitât das posizions saltades fûr intal incuintri – al à rilevât Mattiussi – i sei sigûr che i sarìn in stât prime da metât di Dicembar di concretizâ un prin document. Chest ultim al contegnarà la definizion dai pas necessaris no nome par podei riposizionâ i frescs inta Basiliche di Sante Marie Assunte ma encje par podei proviodi ai lavôrs di manutenzion straordenarie. Un progjet organic, duncje, che al proviout encje la nomine di cui che al varà l’impuartant compit di coordenâ da une bande la taule dai aministradôrs e di chê ate la taule tecniche>>. <<La Provincie no si tire indaûr – al à ribadît Mattiussi – e a metarà a disposizion i siesi uficis>>. Mattiussi al è otimist e al spere di podei condividi l’acuardi diretamenti cul Ministri Sandro Bondi.

AL È SALTÂT FÛR IL XV NUMAR DAL PERIODIC “LA VICÌNIA”

Il premi Nobel pa economie Elinor Ostrom e il judiç costituzionâl Paolo Grossi a son, cun Pape Benedet XVI e la sô encicliche sociâl “Caritas in veritate”, i protagoniscj dal gnûf numar dal periodic “La Vicìnia”, il strument regjonâl di colegament e riflession su la propietât coletive e su las formes divierses di gjestion das Tieres civiches, in Friûl e sul Cjars triestin. Come che al sucêt da 7 agns incà, la publicazion – sostignude dal Coordenament regjonâl da Propietât coletive – a salte fûr in ocasion da “Riunion sientifiche” di Trent, il principâl apontament italian relatîf a chei ordenaments coletîfs che l’inteletuâl milaneis Carlo Cattaneo al à definît <<un ati mût di possiedi>>. In gracie dal impegn dal Centri studis e documentazion sui Demanis Civics e las Propietâs coletives da Universitât trentine, dai 26 ai 27 di Novembar, esperts e aministradôrs di dute Italie si son confrontâts sul teme: ”Valorizâ  il patrimoni di propietât coletive, jessi protagoniscj pal svilup sostenibil e la promozion dal teritori. Strategjes di gjestion”.

PALUCE: VIERT IL SPORTEL DI LENGHE MINORITARIE TIMAVESE

Il Sportel pe lenghe minoritarie timavese al è stât tornât a vierzi lunis ai 16 di Novembar dal 2009, in gracie da Leç 482/1999. Il Sportel al è tal secont plan dal Municipi di Paluce e al è viert cun  chescj oraris:
LUNIS          DAS 14.00 AS 17.00
MARTARS    DAS 9.00 AS 13.00 – DAS 14.00 AS 18.00
MIERCUS     DAS 14.00 AS 17.00
JOIBE          DAS 14.00 AS 18.00
Par informazions il recapit di pueste eletroniche al è:alessandra.primus@com-paluzza.regione.fvg.it