PROVINCIE-FILOLOGJICHE, REALIZÂT IL PRIN VOCABOLARI DUT PAR FURLAN

Il furlan al à il so prin vocabolari monolengâl. La opare, che la Societât Filologjiche Furlane a à realizât cul contribût da Provincie, a è stade presentade a Palaç Belgrât dal president da Provincie on. Pietro Fontanini, dal president e vice president da Societât Filologjiche Furlane, Lorenzo Pelizzo e da Federico Vicario. Si trate di une version tascabil, di semplice consultazion, che a cjape denti 7.500 peraules (12.000 comprendudes las lacuzions). Il Vocabolari Furlan, chest il titul, al è stât stampât in 5.000 copies che a saran distribuides in dutes las scueles dal Friûl. <<Il Vocabolari – al à det il President Fontanini –si inserìs intas azions che cheste aministrazion a promôf da diviers agns a pro da lenghe furlane par tutelâle, fâle matudâ in tiermins di status e, soredut, tant che element fondamentâl da noste identitât furlane>>.

 FONTANINI, <<FRIUL-JULIA, LEAM INDISSOLUBIL>>

<<Al esist un leam indissolubil tra il Friûl e la Brigade Alpine “Julia”. E chest soredut pal fat   che i vêrs valôrs da Julia a son, a la fin, chei dai furlans: salts, onescj e lavoradôrs>>. Lu à det il president da Provincie on. Pietro Fontanini tant da visite, intai dîs stâts, fate a caserme Di Prampero, sede dal Comando di chê che a è stade la famose brigade. Acompagnât dal assessôr Adriano Piuzzi, Fontanini al à incuintrât il Comandant Gjenerâl Gianfranco Rossi, il Cjâf di Stât Maiôr Tenent Colonel Salvatore Paolo Radezza, insieme dai vertiçs da Brigade. L’incuintri al è stât l’ocasion par fâ il pont sul cuadri das operazions in Italie e in chei paîs dulà che a son impegnâts i oms da Julia. L’intervent dal President Fontanini al à fat propit riferiment a dificil situazion in cualchi pont cjalt dal mont, tant che l’Afghanistan. <<La presince das nostes trupes in chei che a son i senaris internazionâi plui delicâts a è indispensabil – al à rilevât Fontanini -: las missions di pâs, che i nostis oms a stan puartant indevant in tantes zones cjaldes dal mont, a son strategjiches par dâ une man là che las popolazions a vivin in condizions critiches>>.

LA MONT FURLANE E SPIETE IL GÎR DI ITALIE CUNTUN PORTÂL

Un portâl inovatîf, www.montagnasenzaconfini.it, al favorissarà la acolience da mont furlane in spiete da tape dal Gîr di Italie di ciclisim. Chest al è ce che al è saltât fûr intal incuintri che si è tignût a Tumieç e che al meteve adun l’Assessôr provinciâl al Svilup da Mont, Ottorino Faleschini, l’Assessôr al Sport, Mario Virgili, e l’Assessôr al Turism, Franco Mattiussi. La iniziative a è madurade dopo jessi vignûts a cognossince che intal Mai dal 2010 il Gîr di Italie al tocjarà ancje cualchi localitât dal Friûl: dopo vei atraviersât divers Comuns da Provincie di Udin, si concludarà in som dal Çoncolan. Chest event al rapresente une oportunitât par rilanciâ dut il teritori seti dal pont di viste economic che da chel turistic. Par jessi in grât di ospitâ un event di cheste portade, la Provincie di Udin, in colaborazion cui Comuns da Cjargne, a proviôt di svilupâ las infrastrutures sportives esistents e di tirâ dongje cetancj turiscj cu la realizazion di un portâl ad hoc.

REGALÂT UN MONITOR MULTIFUNZIONÂL AL REPART DI PEDIATRIE

Il repart di pediatrie dal ospedâl di Tumieç al à un nûf monitor multifunzionâl. Une aparecjadure regalade da Associazion “Luca Onlus”, che da agns a opare al servizi dai fruts malâts di tumôr e das lôr famees. La consegne dal monitor a è stade fate intai dîs passâts, a presince dal president da Associazion, Andrea Balloch, dal diretôr da struture pediatriche, Luigi Catarossi, e dal dirigjent gjenerâl da Aziende sanitarie numar 3 “Alte Furlane”, Luciano Zanelli. <<Chest monitor – al à spiegât il dotôr Catarossi – al permet il control a distance dai pazients intas cjamares, in particolâr fruts e neonâts. Al è pussibil di fat monitorâ la lôr frecuence cardiache, chê respiradorie e la saturazion di ossigjen. Une aparecjadure – al à zontât – che a permet di regjistrâ ducj i dâts e che a pues jessi doprade encje no tacade a une reit, par esempli suntune ambulance>>.

PROVINCIE, 449 MIL EUROS PAI IMPLANTS SPORTÎFS

Da Palme a For di Sore, da Lignan a Paulâr: a son 19 i beneficiaris, tra Comuns e Associazions sportives diletantistiches, che a si dividaran 449.449 euros anuâls par vincj agns (par complessîfs 8.989.981 euros), erogâts da Regjon midiant la Provincie di Udin che a à predisponût il Plan. L’investiment al è finalizât ai intervents di ristruturazion, completament, adeguament e metude in norme dai implants sportîfs. La Zonte Provinciâl a à aprovât la delibare relative su proposte dal Assessôr al Sport, Mario Virgili. <<Al entre cussì tal vîf – al aferme Virgili – il Plan provinciâl pa impiantistiche sportive, fat bon il 31 di Lui stât, che al proviout la concession di contribûts plurienâi inta forme dal 75% da spese ametude e presentade dai richiedents>>.

FONTANINI, <<LA UNIVERSITÂT DI UDIN E JE FONDAMENTÂL PE CRESSITE DAL FRIÛL>>
<<Un lavôr ecelent di razionalizazion e cualificazion da spese, ancje par mieç di riorganizazions internes, chel dal magnific retôr Cristiana Compagno, che a à i mieis compliments e i auguris par podei lâ indavant cun sucès in chest percors dificil>>. Al è il messaç che al à volût lassâ il president da Provincie on. Pietro Fontanini in ocasion da cerimonie di inaugurazion dal an academic 2009/2010 da Universitât dai Studis di Udin. <<La Universitât – al à det – a rapresente un strument fondamentâl pa cressite e pal svilup dal teritori. La int, cutune racolte di 125 mil firmes, a à volût la noste universitât. L’ateneo furlan al à savût radicâsi e ramficâsi cetant in là dal so ambit di origjine. Un percors lunc al è stât començât – al à continuât – e nou vin di garantî a chest ent une cressite che a seti proporzionâl ai risulâts cualitatîfs e cuantitatîfs otignûts>>.

L’ASSESSÔR MARIO VIRGILI AL À RICEVÛT A PALAÇ BELGRÂT
A partìs da Provincie di Udin une iniziative origjinâl che a met dongje la art e il mont dal sport sot las insegnes dal Fair play. Da coretece. Da lealtât. Dai valôrs. Cuntun messaç etic fuart:”Il sport nol pos vivi cence armonie”. Si trate di 19 opares inedites (cuadris su tele) dai contegnûts artistics-sportîfs, indreçades al mont dal public dal balon professionist (Serie A), e realizades da tancj artiscj gradîts a livel locâl e nazionâl, che a operin intas cuatri provinces da Regjon. La donazion, in calendari pai 28 di Dicembar prossim as 17.30 intal Auditorium da Regjon a Udin, intal cors di une manifestazion che a viodarà encje la presentazion di un libri sul balon, a à vût un prolic a Palaç Belgrât, dulà che l’Assessôr al Sport, Mario Virgili, al à ricevût cualchidun dai 19 artists.

ELETRODOTS IN CJARGNE, SI TORNE A VIERZI LA VERTENCE E I COMITÂTS A SI ORGANIZIN
Intas setemanes stades a son stâts depositâts intai uficis tecnics dai comuns interessâts dal passaç dai traçâts ipotizâts, i nûfs incjartaments progjeturâi da linee aeree Wurmlach-Samblâc targade Pittini-Fantoni. Intant il NO al è pront a dâsi dongje in place. Nissune novitât sul front das compensazions economiches ai teritoris comunâi coinvolts: intal Fevrâr passât si ere incaricât da cuestion l’assessôr regjonâl Riccardo Riccardi, ricevint mandât dai sindics di Cjavaç, Paluce, Sudri, Tumieç e Zui (continue pa sô strade dal NO invezit Çurçuvint) di tratâ cui proponents. A chest nûf passaç burocratic a vorà di seguî dopo, al inizi dal 2010, la nove valutazion di impat ambientâl, la conference dai servizis e la intese Stât-Regjons, dulà che si spiete il parei favorevul da Regjon (anunciât intal Avrîl passât dal stes Tondo). A spietâ novitâts intai prins meis dal prossim an invezit a è, dal front austriac, la tierce linee, chê dal mini-interât Wurmlach-Paluce sostignût da cuardade Secab-Alpe Adria Energy Lines e za autorizât da Regjon Friûl Vignesie Julie.

 

ALBIERCS DIFONDÛTS IN MONT, ULTIME CHANCE PAI FONTS
La aprovazion di doi bants a pueste, efetuade da Zonte Tondo pai comuns montans, a è probabilmentri la ultime oportunitât di ricevi risorses comunitaries (12 i milions di euros complessîfs a disposizion) pa creazion e pal ampliament di cheste formule ricetive alternative. In Cjargne a son sîs i Albiercs Difondûts atîfs: i precursôrs di Comelians e Sudri, il Grop a Davâr, l’Altiplan di Lauc, l’Albierc Difondût di Sauris e chel dal Cjanâl di Incjaroi a Paulâr, par un totâl di passe 550 puescj jet. Tegnint cont che a livel comprensoriâl, inte otiche di cualificâ la ufierte turistiche, si è fissât l’obietîf di incrementâ i puescj jet complessîfs, cumò 16 mil, cun cirche 1600 “brandes” noves (tra albiercs classics, agriturisims, baites e afins), la categorie dai Albiercs Difondûts a vorès vût di concori cun 400 jets in plui.

PARCS E MANUTENZIONS, 160 PUECJ IN PERICUL. L’ALARME DAI SINDACÂTS
A son 160 i puescj in pericul tra i lavoradôrs dal servizi parcs e boscs da Regjon. I tais proviodûts da Finanziarie 2010, di fat, a laran a colpî encje chest setôr, a partî dal personâl a tiermin dal servizi manutenzions idrauliches e forestâls: si trate su par jù di 40 lavoradôrs, assunts intai ultims trei agns e mai confermâts, encje se si son vudes rimostrances dal sindacât. Pa mont une emergjenze nove no nome ocupazionâl, ma encje in tiermins di tutele dal teritori. A lanciâ l’alarme a son Cigl, Cisl e Uil e i rispetîfs sindacâts di categorie.

RABIE SILVESTRE, E RIVE LA VACINE ORÂL PAS BOLPS
La decision da Regjon di procedi, par mieç das Aziendes pai Servizis Veterinaris, cuntune serie di misures di contrast da malatie. Tra chestes, la vacine orâl das bolps. Atenzion as lescjes. La rabie silvestre a è in fase di espansion. Dopo il prin câs individuât intune bolp abatude in Val Resie, numerous aitis câs a son stâts rilevâts intal teritori regjonâl. E duncje la decision da Regjon – par tutelâ la salût publiche – di procedi, par mieç das Aziendes pai Servizis Veterinaris, cuntune serie di misures di contrast a malatie. Tra chestes, la vacine dai cjagns e dai aitis animâi das arees in pericul e la vacine orâl das bolps (misure, cheste, cetant racomandade da Comission Europee e dal Ministeri da Salût e ritegnude dai esperts dal setôr l’unic mieç util par argjinâ la malatie).

TAMAU: DISTRIBUZION BOLETIN PAROCHIÂL “IL FONTANON”
Al jentrarà in chescj dîs intas cjases di Tamau il boletin parochiâl “IL FONTANON NADÂL 2009”. Tant che ducj i agns il boletin al da dongje i aveniments religjous e culturâi che a àn traversât la vite da comunitât di Tamau intal cors dal an. Chel di chest an al è un boletin un grum corpôs, componût di ben 40 pagjines plenes di notizies e di particolârs che a dimostrin la vitalitât e la atenzion da comunitât as tradizions religjoses e culturâls e tal stes timp a dimostrin cemût che a seti la volontât di partecipâ ativamenti a cuotidianitât dal vivi in paîs. Simpri a Tamau si tignarà sabide ai 19 di Dicembar as ores 20.30, inta Sale polifunzionâl da Cjase da Zoventût di Tamau, la II edizion di NADÂL INSIEME, organizât da Parochie e da Proloco di Tamau. Chest an la manifestazion a viodarà la partecipazion da Bande Musicâl dal Santuari di Ponteibe, che sot da direzion dal Mestri Glauco Comoretto a sunarà divierses sinfonies e musiches relatives al Nadâl.