27 FEBBRAIO 08
La Telemedisine dal doman e partìs da Udin
I vôi di dut il mont si son fissâts sul Meeting internazionâl di Tarvis: miedis e sienziâts a àn osservât cun cetant interès un event che, inmaneât de Societât italiane di Artroscopie - cun a cjâf Riccardo Minola - e dal American Academy, il plui rimarchevul orghin mondiâl di chirurgjie ortopediche, al à podût tacâ a spalancâ lis puartis aes gnovis ricercjis e gnovis scuviertis di terapiis, fatis doprant la chirurgjie mini-invasive e la Telemidisine. Ae 4 dîs di discussions e di operazions fatis sul moment, a àn cjapât part 400 jenfri i miôr chirurghis dal mont, 5 dome dal American Academy, che e à ancje patrocinât l'event, e cheste e je la prime volte che lu fâs intun paîs che no sedi la Americhe. Par Udin a erin presints Enrico Gervasi, president e coordenadôr dal cors internazionâl e primari ortopedic dal ospedâl di Tisane, e Araldo Causero, diretôr de Scuele di specializazion in Ortopedie de Universitât di Udin.
No podeve mancjâ une senografie in stîl midisine futuristiche: un colegament 'spaziâl' in fats al à svicinât Udin a Tarvis, stant che al è stât il satelit a sigurâ il colegament jenfri lis 3 salis operadoris di Udin e i congrès di Tarvis: il Palaç dal sport, il Centri culturâl e il Consorzi pai servizis turistics.
Tamau - dade dongje dal Circul Culturâl
Si è tornât a dâ dongje il Circul culturâl di Timau e tant dal incuintri si son frontâts argoments cetant interessants parcè che a rivuarde i prossims impegns de Associazion.
Il Circul al sta cirint une sede che a puedi contentâ lis dibisugnis di spazi pes riunions, mostris e par logâ materiâl informatîf e didatic: dut chest si è stimât cjatâlu intes stanziis dal ex ostarie "Al Cervo", che e jere stade puartade indevant fintramai a sierade da Anna Matiz. Il locâl principâl, vonde grant, mont e net, si cjate suntune strade interne dal paîs e al à un grant barcon, puest ideâl pe mostre di libruts e opuscui.
Cun di plui il Circul al sta par otignî da Oreste Unfer, bielissimis fotos di Tamau e dal circondari. L'Unfer al è un tamovês, emigrât in Francie, che za timp indaûr al veve donât dibot un centenâr di fotos, e 300 di chestis e jerin stadis dopradis da Laura Plozner e Mauro Unfer pal libri fotografic "Gli occhi su Timau".
DARTE - Lis termis si presentin ae BIT di Milan
Lis termis di Darte si presentin ae BIT di Milan, alì dal stand de Regjon FVJ, cuntune gnove struturazion des sôs propuestis termâls, che da chest an si spartissin cussì: Salutermae, Fisiotermae e Aquadea. Pûr tignint da cont la filosofie aziendâl de gjestion IN.T.Ter Spa, il stabiliment cjargnel al smire simpri plui a une utence internazionâl e al vûl pontâ (in spiete de sierade dai lavôrs tal Repart des Aghis) su ce che za di ecelent al à, par conservâ o tornâ a vê, un stât psico-fisic bon: aghe e paltan (fango) termâl, personâl specializât, alte cualitât des terapiis. "La midisine termâl - a sclarìs la diretore Anna Zambelli - e je jenfri i plui antîcs e valevui sistemis di cure dal mont, e à davuelç une impuartant funzion inte prevenzion, cure e riabilitazion di tantis malatiis. In ore presint lis curis fatis in Fisiotermae, dal nestri personâl, a si zontin aes terapiis tradizionâls di Salutermae, buinis in gracie des grandononis proprietâts de nestre aghe termâl, sedi par grancj che par fruts. Il Centri Wellness AquaDea impen al è stât pensât di pueste pal rilassament e par jonzi armonie e ecuilibri interiôr a mieç di trataments di bielece, e al complete la ufierte des termis di Darte, che a son simpri plui frecuentadis da zovins". Chest an, impuartant par esportâ la nestre imagjin, lis termis si presentin duncje, a Milan, tant che un stabiliment di cure e benstâ che al sarà in curt incressût da pissinis, sedi par divertiment che a fin terapeutic.
TUMIEÇ - Dôs novitâts in Consei Comunâl
Il Consei comunâl di Tumieç, tant de ultime sentade, al à sostituît i doi conseîrs dimissionaris Mauro Crosilla e Venanzio Manfreda, ducj doi elets tal Zugn dal 2004 inte liste n. 1 "Uniti per Tolmezzo". Seguint l'articul 45 dal TUEL (vâl a dî che la sostituzion e scuen jessi fate doprant candidâts che inte stesse liste a seguissin diretementri l'ultin elet) a son jentrâts in cjarie Copetti Alessia e Cattaino Giovanni Battista, chest ultin al sostituìs Lorenzo Marini che al à rinunciât ae cjarie.
Mudament di date pe Biker Fest
La Biker Fest 2008 si torne a spostâ dal Çoncolan a Osôf e si vierç cuntune gnove pal panorame motoradunistic e biker internazionâl. In fats l'apontament cu la BIKER FEST INTERNATIONAL al ven anticipât - par resons tecnichis e logjistics: la 22 edizion si davuelzarà dai 5 ai 8 di Zugn a Osôf, dulà che la manifestazion e à vivut agns di sflandôr e je cressude deventant internazionâl. Cheste edizion duncje si logarà tal Parc dal Rivellino, une aree di passe 240mil metris cuadris, intal vert, facil da cjatâ e pronte a ospitâ spetacui e concierts internazionâi, oltri che la pacifiche invasion di tancj passionâts, rivâts di ogni bande di Europe e no dome. Pal program dal event però bisugnarà spietâ inmò cualchi setemane.
BANT BIOMASSIS PR AZIENDIS AGRICULIS
Seguint il sucès vût dal precedent "Font Sperimentâl Biomassis", il Servizi Risorsis Energjetichis de Provincie di Udin al à inmaneât un gnûf bant di finanziament pe metude in vore di cjalderiis a biomassis.
Beneficiariis dal incentîf dal gnûf bant, cheste volte, a saran lis aziendis agriculis che a podaran domandâ un contribût fintramai al 50% (cuntun tet massim di 50.000€) su pes spesis vudis inte metude in vore di chescj implants alimentâts da çocs di len, da tocuts o materiâi vignûts fûr da coltivazions legnosis agrariis. Il fin al è chel di incressi i implants tecnologjichementri plui indevant e che a àn bas coscj di gjestion, smirant a dopleâ sul teritori il slargjament des energjiis netis.
Pre System prime cuntun faturât di 22 milions e 500 mil euros
Cuntun faturât avuâl a 22 milions e 500 mil euros, Pre System di Sedean e je risultade la aziende cul plui alt zîr di afârs in regjon dal 2006 intal cjamp de edilizie industrializade. A pandilu "Impresa & Economia 2007 - le aziende leader dal Friuli Venezia Giulia", iniziative editoriâl anuâl butade fûr di pôc e che a tirât dongje ducj i principâi dâts sui belançs des miôr 2mil ditis che si cjatin in regjon scjernudis par faturât. "Si trate di un travuart storic pe nestre societât - al à notât Tiziano Giuliani, president di Pre System - che al premie l'impegn di une dite che e à sielzût di diferenziâsi de concorince sigurant al client un pachet "dut includût". Il nestri fin al è chel di dâ al client un servizi a 360° cuntun sôl interlocutôr e cu la sigurece di presits cierts". In detai, Pre System e je buine di seguî i lavôrs de prime ae ultime fase: da progjetazion ae consulence tecniche, de produzion ae prontade dai manufats prefabricâts in peton fin ae costruzion vere e proprie. "Al è propit chest - al marche Giuliani - che al samee jessi il particolâr che al fâs la diference permetint ae nestre aziende di diferenziâsi a pet di chês altris aziendis dal nordest".
Valentina Unfer vincint inte cross di Glemone e je prime
Domenie ai 17 di Fevrâr a Godo di Glemone si è davuelzude la tierce prove de corse campestre dal CSI cuntun scomençament ferbint pe Polisportive Timaucleulis, stant il sucès di Unfer Valentina, prime inte categorie “Esordienti” feminîls cuntune gare segnade da une partence za intes primis posizions e cuntune acelerade jenfri i vignâi par rivâ a jonzi il cjâf dal grup e vinci; seste posizion par Veronica Cortolezzis inte stesse categorie che e je rivade al travuart cuntun distac di 20 seconts. Daspò cheste gare pal moment Valentina e Veronica a son al prin e tierç puest de classifiche gjenerâl e a fasin ben sperâ ancje par cheste istât. Pe prime volte te categorie Ragazzi, Michele Bellina cuntun biel secont puest, prestazion dal sigûr penalizade da pocje esperience in chest gjenar di garis e dal no cognossi i aversaris cemût che al jere usât al Trofeu Gortani di corse in mont, dulà che al à ben figurât tant da jessi nomenât l'an passat atlete dal an pe corse da societât. Jenfri i Amatori A al conferme la seconde posizion de gare precedent, Primus Marco che, in cumò, al è a cjâf de classifiche gjenerâl, biel che al 25 puest cjatin Fabrizio Cortolezzis che al sta lant simpri in miôr.
Corse: Valentina Unfer e Marco Primus inmò vincidôrs
Domenie ai 24 di Fevrr si è davuelzude la 4 prove dal trofeu CSI di corse tal Parc des Risorgivis di Codroip. Obietîf centrât cul bielissim 9 puest de Polisportive inte classifiche di societât e i risultâts dai nestris atletis. Prime categorie ae partence e je stade chê des Esordients feminîls cul 2 puest Valentina Unfer che, par ben metât gare e je stade a cjâf dal grup, par dopo fâsi passâ de vincidore Vissa Sintayehu, de societât parone di cjase. Al è mancjât par un pêl il podi invezit, inte stesse categorie, a Veronica Cortolezzis che e je rivade cuarte dome par un secont da Gariup Francesca del G.S. Natison ma rivant a no fâsi passâ da Cettolo Miriana de Atletica 2000 di Codroip. Inte categorie Ragazzi lis posizions a son stadis ben claris za da principi cun Bellina Michele che al à cjapât il 3 puest ae so seconde corse campestre. Jenfri i Amatori A: 3 posizion par Marco Primus che al à vût ancje malstâ tal ultin dai trê zîrs previodûts e 28 puest par Fabrizio Cortolezzis. Confermadis lis posizions in classifiche gjenerâl la che Valentina Unfer e Marco Primus a son simpri prins di categorie e Veronica Cortolezzis tierce spietant lis ultimis dôs provis.