Il notiziari de Cjargne
Sara Maieron conduce il notiziario in friulano, incentrato sugli avvenimenti della settimana in Carnia.
Fontanini: "Che Udin no deventi tiere di sperimentazion di eutanasie"
"Cemût che al à impensât l'assessôr regjonâl Vladimir Kosic i sorestants de cliniche "Quiete" di Udin a scugnin lâ daûr a chês che a son lis funzions propriis de struture. La Quiete, in fats, e à tant che fin chel di dâ acet ai malâts pal recupar e la cure dai stes". Cussì il president de Provincie di Udin on. Pietro Fontanini te zornade di arîf tal cjâf lûc furlan di Eluana Englaro. "Pûr devant ae evidence dai fats, mi sei sorestât che la cliniche furlane a vebi decidût di dâ acet ae zovine - al à notât Fontanini - e se invezit che continuâ a fâle vivi si la fasarà murî, o crôt che pardabon Udin e deventarà protagoniste di une des pagjinis plui brutis de storie. No 'nd è stât avonde dai intervents dai plui impuartantats rapresentants dal mont politic, religjôs - no ultin il Pape - sociâl: Udin e sta par deventâ il centri di sperimentazion de eutanasie". Rabie e straneament duncje intes peraulis di Fontanini che al marche inmò une volte la sô totâl contrarietât e fâ finî la vite di Eluana. "No voi jentrâ tal merit dal drame di un pari cuntune fie in chê cundizions da tancj agns - al à continuât - ma, tal rispiet di ducj chei che si cjatin intes stessis cundizions, al scuen prevalê il rispiet pe vite".
Fontanini al à ribatût cemût che "intai ricoveris la int a ledi par vivi miôr i ultins agns di vite, no par murî. Invidi ducj chei - al à sierât - che, come il sindic Honsell, ai disin che cheste soluzion a sedi "juste e civîl" a pensâ su cuâl che a sedi la linie di confin tra la vite e la muart. E je une vergogne che il sindic di Udin di cheste iniziative".
Convint supuart de Provincie ae nassite dal Distret tecnologjic
Ancje la Provincie di Udin, cuntune cuote dal 14% , e partecipe ae costituzion de Agjenzie pal disvilup dal distret des tecnologjiis digjitâls, al servizi di passe 10mil aziendis impegnadis tal setôr des Tecnologjiis de informazion e de comunicazion (ITC). La gnove struture cuntun capitâl sociâl di 100 mil euros, e sarà logade intai uficis dal Friûl Inovazion a Tavagnà, e e fasarà riferiment ae societât "Ditedi Scarl", a maiorance publiche.
"Si trate di une sfide e tal stes timp di une oportunitât - al sclarìs l'assessôr provinciâl ae Informatiche Mario Virgili - par supuartâ e judâ lis impresis dal high-tech intal dificil passaç dal laboratori al marcjât, dulà che il faliment al è une vore alt massime par chest gjenar di aziendis".
La scree di chest distret - daûr l'esponent di Palaç Belgrât - di une bande e valorize la capacitât dai nestris imprenditôrs di rinovâsi, di chê altre e permet di pontâ a un strument plui moderni e compatibil cu lis direzions comunitariis in teme di economie industriâl e e risulte strategjiche pai obietîfs di un ent di aree vaste tant che la Provincie.
6 scandai su pal artesanât in provincie di Udin
Mancul cors di inglês e plui formazion tecnologjiche. Smirâ aes manifaturis ma cuntun voli di rivuart al turisim. Pal president de Provincie di Udin on. Pietro Fontanini a son i pas da fâ in chest moment. La ocasion par reclamâ a fuart la competence in materie di formazion professionâl, in ore presint competence de regjon, e je stade la conference di presentazion dal 6 scandai su pal artesanât, inmaneât de Confartesanât di Udin. "Forsi si sta svilint un tic masse il rûl che in chest moment al scuen vê la formazion - al à dit Fontanini - stant che si sta fevelant di un moment di crisi di passaç, che nol durarà par simpri, si scuen "uçâ i imprescj" in spiete de riprese. Si che duncje al sarès di just, su la fonde di une atente analisi dal marcjât, indreçâ chê int che cumò e je in casse integrazion, viers cors di formazion, bogns di incressi il lôr savê e creântin di gnovis".
Un purcit par difindi la furlanetât
Si segnale cun plasê la strane iniziative dal Salumifici furlan Uanetto che, cun simpatie ma ancje un tic stiçant, e à decidût di marcâ la bontât dal so prodot locâl fasint "fevelâ furlan" i siei purcits. L'orgoi e il rispiet des nestris lidrîs furlanis e passin cumò ancje traviers il sproc dal purcit che, cun grande ironie, al pant la sô furlanetât e al devente un simbul inte difese dal "locâl", cuintri la globalizazion.
Chê che achì o podês viodi e je une figure de publicitât metude suntun gjornâl locâl, che e sta fasint cetant discuti.
Kickboxing-Andrea Esposito arint in Croazie
A Pakrac in Croazie si è davuelt il torneu di kickboxing specialitât semi/light/Full contact Croazia Open 2008.
Ae manifestazion a jerin presints passe 600 atletis di tancj paîs europeans. E jere presint pe nestre regjon la scuare Carnia kickboxing di Paluce, cun 4 atletis Andrea Esposito, Battain Federico, Muser Michele e Boschetti Lucia.
I fantats si son ben plaçâts rivant adore di puartâ a cjase 2 arints e un bronç.Un arint al è rivât da Andrea Esposito inte categorie - 63 kg. Un altri cun Federico Battain inte categorie massime, i + 94 kg. Benon ancje la Boschetti inte categorie - 55 kg feminîl dulà che e à jonzût un tierç puest, batude dome in semifinâl da une atlete bulgare.
Un premi pal sît dal albierc difondût di Lauc
La Cooperative che e gjestìs l'Albierc difondût dal plan di Lauc e à vint il premi "Coopnet" dal edizion 2008, inmaneât ogni an de Leghe nazionâl des Cooperativis, tant che ricognossiment pai miôr sîts internet des impresis che a fasin part de organizazion. Inte motivazion dal premi, si lei che il sît dal Albierc difondût di Lauc al è stât sielt stant che al pant "un mût inteligjent di valorizâ edificis e borcs cence cambiâju. Cheste e je la fonde dal Albierc difondût, un mût difarent di fâ turisim, dulà che si insede il progjet che al tocje il plan di Lauc. Dal sît si pues notâsi une stanzie, dopo vêlis viodudis e viodût il puest par mieç di cetantis imagjins". Contents i sorestants de cooperative, che a àn viodût ricognossût a nivel nazionâl, il lavôr fat intai ultins agns intal setôr turistic. Une realtât, cheste di Lauc, sparniçade jenfri lis frazions di Trave, Davai e Vinai, e che si cjate dividude in 12 cjasis che a àn permetût di gjavâ fûr 23 residencis cun 120 puescj jet.
Lis Termis di Darte e mudin oraris
In spiete de gnove stagjon termâl, cu la vierzidure di SaluTermae, specializade in curis cu lis aghis termâls e i "fangos", da miercus ai 28 di Zenâr lis Termis e slargjin l'orari di vierzidure invernâl: lis sezions AquaDea, l'impuartant Centri di Estetiche e Benstâ, e FisioTermae, la zone pe riabilitazion fisioterapiche, a son viertis dut l'an e ancje, su apontament, la buinore. Par informazions si pues clamâ, dilunc l'orari di vierzidure, al numar 0433.929320. La inviade di ducj i stabiliments di Darte e je previodude par vinars ai 10 di Avrîl, tant des fiestis di Pasche, e in cheste ocasion al al scomençarà l'orari estîf, vâl a dî des 8 aes 18.30 (domenie orari curt).
Tondo ae Scuole Mushing di Fusine
Il president de Regjone, Renzo Tondo al à visitât la Scuola Internazionâl Mushing di Fusine, par testemoneâ la ecelence di une realtât sportive e turistiche, che ancje se stimade “di nicje”, e tire simpri un grant numar di personis. Il president, dopo une curte lezion su pes tecniche di vuide de slitine, in gracie ai conseis di esperts maestris, al à podût gjoldi di une corse cui cjans lant daûr a difarents percors, tal mieç dal cidinôr e de bielece dal maraveôs senari dal bosc dal Tarvisian e de plane di Fusine.
Fabricâts rurâls gjavâts fûr dal paiament ICI
"La int di mont e i agricultôrs no scugnaran plui paiâ l'ICI sui fabricâts rurâi. Cheste regule e cjaparà dentri ancje la Cjargne dulà che fintramai cumò e je stade fate paiâ, sbaliant cheste tasse. Chest ce che al dîs un emendament de On. Manuela Di Centa che e à clarît il vueit interpretatîf dal art. 1 de leç 21/2/2000 e che e puartà ae gjavade fûr dai fabricâts rurâi dal paiament de tasse comunâl. "Cun cheste emendament si è volût ricognossi la impuartance de ativitât peade ae agriculture, aes zonis di mont e di ducj chei che a lavorin in chest setôr cetant colpît in chest moment di crisi. Par scjampâ ogni gjenar di malintindût - e sclaris l'On Di Centa, l'emendament al gjavarà la peraule fabricât e e clarissarà dal dut il posizionament e l'incuadrament ai fins de Ici".
Si slargje la difusion dal segnâl tv in Cjargne
Si slargje la difusion dal segnâl televisîf in Cjargne. La zonte de Comunitât montane e à in fats fat bon, tai dîs passâts, il plan che al smire a risolvi, intai paîs plui fûr di man, i principâi problemis de cuvierture dal segnâl, massime pai canâi de RAI. L'ent sorecomunâl, che al à riviodût e rinovât lis convenzions cu la RAI, al à in fats cualchi tarlìs doprât par spandi il segnâl. "In chescj ultins mês - al sclarìs il president de Comunitât Montane de Cjargne, Lino Not - o vin partecipât a tancj incuintris sedi cui responsabii de Rai regjonâl che cun chei nazionâi parcè che o volevin dâ il prin pussibil, ae int di cualchi zone de Cjargne, la pussibilitât di ricevi il segnâl e di vê, in chest mût, un gnûf canâl informatîf a disposizion, sedi a nivel nazionâl sedi locâl. Chest progjet, che al cjape dentri i canâi de Rai e al stât realizât in gracie ae consulence dal inzegnîr Roberto Barbina, al podarà po dopo jessi doprât ancje par altris gjenars di segnâi". La cifre stanziade par chest progjet e je di 150mil euros e e fâs part dal "Fondo montagna".
Federalisim fiscâl in Regjon FVJ
"Il federalisim fiscâl al torne a fâ discuti su pe necessitât dal riordin urgjent dai Ents locâi de Regjon. Aromai ducj a son dacuardi che ‘nd è dibisugne di percors che al puarti a sparagnâ e miorâ i servizis. Ma chest al scuen par fuarce passâ midiant une riforme globâl dal sisteme des autonomiis". Il vicepresident dal Grup PdL in Consei regjonâl Franco Baritussio al interven su pe cuestion, zontant : "La aministrazion Illy, cu la leç 1/2006, si ere slontanade da chest obietîf incressint i ents piçui mezans. Daspò de abolizion dai Aster – al zonte Baritussio – cheste aministrazion e à l’assum di definì e meti in vore un riordin des autonomiis che si insedi intai mecanisims inmaneâts de riforme sul federalisim fiscâl".
In Slovenie aur a Giacomo Matiz
Grandis sodisfazions par Giacomo inte trasfierte Slovene a Skopja Loka e no dome par lui. Il so alenadôr Mike Leoni (di Bellinzona) dopo de inrabiade causionade da une prime sbaliade valutazion des provis di cualifiche, inte stesse zornade di vinars , ma massime sabide e domenie al à vût i compliments pal lavôr davuelt sui atletis talians, prime dai alenadôrs presints e po dopo dai amîs rivâts de Cjargne; inmò plui impuartants i compliments vûts dal Diretôr Agonistic de Nazionâl Taliane Gianfranco Collinassi. In struc i risultâts: vinars cope Europe, 3° Giacomo e 31° Ruggero Rosi, sabide:cope Europe 1° Giacomo e 17° Ruggero.Schi di font: Luigina Menean e Gian Paolo Englaro ai Campionâts Mondiâi Master
Dai 30 di Zenâr ai 6 di Fevrâr a Autrans in Francie si davuelzaran i Campionâts Mondiâi Master di Schi di font, dulà che a parteciparan ancje doi atletis de Polisportive Timaucleulis: Luigina Menean e Gian Paolo Englaro, jenfri chei altris atletis regjonâi impegnâts inte manifestazion a son ancje Gervasio Puntel e Luigi Rossi.
