OMAÇ DE COMISSION DES PÂRS OPORTUNITÂTS A FRANCESCA BALLALI
L'obietîf dai incuintris, che la Comission provinciâl das pârs oportunitâts tra om e femine a à organizât, al è fâ cognossi e valorizâ la imprenditorie furlane al feminîl che si è distinte intal ambit da sô ativitât a livel internazionâl. Donata Cantone a è da cjâf a cheste Comission e a stesse a partecipe, oltri as componentes, encje la Conseire di paritât Katia Pagnutti. La ospite da ultime riunion da Comission a è stade Francesca Ballali, che a fâs part da imprenditorie furlane e che recentementri a è stade premiade cul encomi dal Comitât das Organizazions Professionâls Agricules da Union Europeane (COPA): tra las miôr 15 idees imprenditoriâls, su 15mil partecipants. Il COPA al à assegnât il ricognossiment pa inovazion intal cjamp da pet-therapy e da educazion al bielstâ. Al è stât spiegât che la Ballali a à une maniere inovative che si ispire a relazion tra om, nature e animâi, par promovi la educazion al bielstâ. Laureade in pedagogjie e cuntun lunc curriculum intal ambit da educazion, da comunicazion e da pet-therapy, Francesca Ballali a puarte, cu la sô maniere, la inovazion intai procès formatîfs e di cressite.

LAVÔR AUTONOM E MICRO-IMPRESE

Il lavôr autonom e la micro-imprese a son stâts i argoments al centri di un incuintri che i Conseîrs Regjonâi Sandro Della Mea e Enzo Marsilio a àn promovût in colaborazion cul ufici di Tumieç da Confederazion Comerciâl (Confcommercio). I funzionaris di INVITALIA, la Agjenzie Nazionâl pa atrazion dai investiments e il svilup da imprese SpA, a àn ilustrât a une platee un grum numerose las svariades oportunitâts di ocupazion par cui che nol à un lavôr e al vûl començâ une ativitât in propri. Si trate di misures che a rapresentin un dai struments principâi di supuart pa realizazion e l'inviament di piçules ativitâts imprenditoriâls da bande dai disocupâts e das persones che a cirin une prime ocupazion, cul obietîf di favorî il lôr inseriment intal mont dal lavôr.
"Las oportunitâts che INVITALIA a ufrìs - a àn det i Conseîrs Della Mea e Marsilio - a son struments di intervent un grum adats par favorî la realizazion di une serie di ativitâts imprenditoriâls necessariis par aumentâ i progjets di svilup turistic dai comprensoris montans".

CONVIT BACHMANN, AFIDÂTS I LAVÔRS

<<I lavôrs dal Convit Bachmann a saran afidâts prime dai 31 di Zenâr>>. Lu veve det cualchi timp indaûr l'assessôr a edilizie scolastiche Mario Virgili. Un impegn rispietât cun puntualitât e precision: a Tarvis intal cors di une cerimonie, dulà che a erin presints, plui di Virgili, encje il sindic da citadine, e cjâf grup dal PDL in Consei Provinciâl, Renato Carlantoni, il dirigjent scolastic Antonio Pasquariello e i dirigjents da aziende che a à vint l'apalt, la Provincie a à afidât i lavôrs pa realizazion dal coleç-convit che al ospitarà i fantats dal istitût comprensîf  "Ingeborg Bachmann". <<Si trate di un risultât otim - al à afermât cun sodisfazion Virgili - , rindût pussibil da eficience dai nostis uficis che a àn concludût l'iter procedurâl in timps curts>>. Par Carlantoni, <<une volte ultimade, la opare a consintarà la sistemazion definitive dai students cumò ospitâts in diviers albiercs di Tarvis, davuelzint une sigure atrazion pai zovins no nome dal Friûl Vignesie Julie, ma encje di dut il Nord Italie e das vicines Austrie e Slovenie>>.

FEDERCASALINGHE, SOSTEGN DE PROVINCIE ANCJE PAL 2010
<<La Provincie a continuarà a supuartâ chês realtâts locâls che, cu la lôr ativitât e las lôr iniziatives, a contribuissin cun costance a valorizazion dal Friûl>>. Lu à confermât il president da Provincie On. Pietro Fontanini intal cors dal incuintri cu la president regjonâl di Federcasalinghe Lauretta Serafini. Un incuintri che al è stât encje ocasion par fâ il pont su la ativitât puartade indenant da associazion intal an che si è a pene concludût e su chê proviodude pal 2010. <<In Friûl, tant che i ducj i aitis Paîs industrializâts - al à comentât Fontanini -, no esistin plui chês fameis slargjadis dulà che al ere usance che i nonos a stessin in cjase e a fossin acudîts, in câs di necessitât, das fies o das brûts. Vuei las robes a son divierses e las famees a àn bisugne di persones preparades e afidabiles vie pa zornade, vâl a dî cuant che ducj i components da famee a son al lavôr, par dâ assistence as persones no autosuficients.

ZORNADE DE MEMORIE

<<Associâ al ricuart da Zornade da Memorie i fats leâts a noste tiere e ai siei oms grancj >>. Lu à ribatût il president da Provincie On. Pietro Fontanini intal cors da presentazion dal progjet "Tren da Memorie". <<Chest an - al è lât indenant Fontanini - a Provincie di Udin al è stât afidât il compit di jessi di vuide par dute la regjon: par chest motîf i vin inserît, tra las fases dal progjet, encje chê relative a visite dai lûcs simbui da memorie tant che Porzus e Basovizza. E se cheste part nus sarà assegnade encje l'an prossim, i lavorarìn par che, dongje as iniziatives pa cognossince dai fats internazionâi, i nostis zovins a fasin une riflession su chei furlans perseguitâts e copâts cence justizie>>.

FONTANINI, <<BIASUTTI AL À SIMPRI LOTÂT PAR DÂ CENTRALITÂT AL FRIÛL>>
<<Un om determinât che al à dât un spinte fuart a cheste regjon, garantint simpri une part centrâl al Friûl>>. Chest al è stât det dal president da Provincie di Udin on. Pietro Fontanini daûr da muart premadure dal ex president dal Friûl Vignesie Julie e parlamentâr da DC, on. Adriano Biasutti. <<Ma encje ex dipendent provinciâl>> al à zontât Fontanini ricuardant che Biasutti al à lavorât intai uficis di Palaç Belgrât dal 1968 al 1991, cuvierzint, tra las ates, encje la cariche di Cjâf di Gabinet dal alore president Vinicio Turello. <<Cun Comelli e Berzanti, Biasutti - al à seguitât Fontanini - al è stât tra i prins presidents da noste regjon a assegnâ une part fondamentâl al Friûl, puartant indenant las istances dal teritori tant a livel regjonâl che a livel nazionâl>>.

ANIMÂLS NOCÎFS, INTAL 2009 COPADIS 452 NUTRIIS
Il lavôr da Provincie par contrastâ i dams provocâts dai animâi salvadis al va indenant. Las nutries a son tra i animâi ritignût nocîfs pai dams che a causin as rostes dai flums e as cultures. <<Chel da nutrie - al à spiegât l'assessôr a cjace e pescje Ottorino Faleschini - al è un probleme presint in buine part dal teritori provinciâl. Si trate di grancj roseadôr puartâts achì dal om e, duncje, cence predatôrs naturâi. Par chest motîf al è necessari che l'om al intervegni: di fat par tignî front a difusion rapide dai nutries i vin dovût parâ il colp començant une operazion di riduzion da lôr popolazion. I dams plui importants provocâts da chest grant roseadôr a son dovûts al fat che, par costruî la sô tane, al fâs buses un grum profondes in corispondence dai cors di aghe, che a vegnin indebolîts, e das strades no asflaltades, che, cul passaç dai mieçs agricui, a subissin cualchi cediment. Cheste situazion a è stade contrastade cun l'abatiment das nutries, midiant proviodiments in deroghe>>.

PROVINCIE – MUSEU DAL DOMO, INSIEMI INTAL SEGN DI BERTRANDO

"Intor al Patriarcje Bertrando" al è il progjet dal Museu dal Domo par ricuardâ il Beât, figure eclesiastiche e politiche che a à dât contribûts significatîfs intal so guvier (1334 - 1350): di fat il Museu al è dedicât propit a Bertrando. Il program da iniziative al è stât ilustrât, al president da Provincie On. Pietro Fontanini, da diretore Maria Beatrice Bertone. <<La Provincie - al à afermât Fontanini - a è pronte a dâ il so supuart a cheste iniziative che a vûl difondi la cognossince da figure e da personalitât dal Patriarcje Bertrando, in relazion cu la storie da citât, dai monuments e das opares che a son stades realizades par sô volontât o intal cors da sô vite, tant che espression dal operât poliedric dal Beât>>. Alfin la diretore Bertone a à spiegât che cun chest progjet si vûl furnî esperiences e struments utii pa cognossince e pal aprofondiment da storie furlane.

TARAMOT IN MOLÎS, PROVINCIE PROTAGONISTE DE RICOSTRUZION

Il gnûf pôl scolastic di Casacalenda (CB) al è stât realizât encje cul contribût da Provincie di Udin. La gnove opare, inaugurade a presince, tra i aitis, encje dal assessôr a edilizie scolastiche Mario Virgili, acompagnât dal president dal consei Marco Quai, a è costade in dut 2 milions e 680mil euros: la Provincie di Udin a à donât 260mil di chescj euros. A ere la buinore dai 31 di Otubar dal 2002 cuant che une scosse fuarte di taramot, di 5,4 grâts di magnitudo da scjale Richter (otâf grât da scjale Mercalli), a à fat tremâ San Julian di Pulie. Dilunc il taramot a è lade jù une scuele e a son muarts 27 fruts e une maestre. Subit dopo la tragjedie, ai 6 di Novembar, il Consei provinciâl al veve fat bon un ordin dal dì par che intal Belanç di prevision 2003 a vignìs proviodût un stanziament a favôr das persones colpides dal taramot e a fos metude a disposizion dai aministradôrs dal Molîs la esperience e las capacitâts acuisides dai tecnics da Provincie cu la ricostruzion das scueles furlanes distrutes intal 1976.

DARTE, PICCO AL SINT “PUCE DI BRUSÂT” SU LA CENTRÂL

Il conseîr regjonâl da Leghe Nord al à presentât une interogazion par savei "cetant che al è stât spindût pa costruzion e pal colaut dal implant" e "se pal funzionament da centrâl a podin jessi doprâts aitis combustibii in plui das biomasses".
Enore Picco al spieghe: "La Comunitât Montane da Cjargne a à tacât a realizâ siet implants a biomasse legnose alimentâts cun len "cippato" pal riscjaldament, tra chestes centrâls encje chê di Darte, destinade in plui a produzion di energjie eletriche. L'implant al è costituît di une centrâl pa produzion di energjie eletriche e termiche e di une reit pa distribuzion da aghe cjalde as utences, cuntun numar di sotstazions pa consegne da energjie termiche as singules utences. Ma i conts no tornin dal dut". Picco al continue: "A sarès oportun che ducj i citadins a podessin cognossi i coscj sostegnûts dal implant, tropes utences a son tacades e se, rispiet al progjet iniziâl, las speses a son aumentades. Al è encje da cjapâ in considerazion l'aspiet ambientâl: a mi risulte che un grum di voltes il funzionament no simpri otimâl dal implant al compuarti emissions di fum che no son justificabiles par un implant di chest gjenar”.

‘TUMIEÇ, DIGHE CUINTRI IL DISPOPOLAMENT DE MONT’
Chest al è il messaç che il president da Regjon Renzo Tondo al à trasmetût al sindic di Tumieç Dario Zearo, a zonte comunâl e ai rapresentants di istituzions publiches dal Stât, dai Ents Locâi e das categories economiches da citât.
La coesion fuarte tra istituzions publiches e imprenditorie privade e un clime politic cambiât rispiet a prime a  permetin di cjalâ cun fiducie al futûr da Cjargne: di fat il compit di Tumieç al è chel di jessi centri dai servizis pa dute la zone montane.
Cussì al è chest il messaç che il president da Regjon Renzo Tondo al à trasmetût al sindic di Tumieç Dario Zearo, a zonte comunâl e ai rapresentants di istituzions publiches dal Stât, dai Ents Locâi e das categories economiches, presints inta aule consiliâr dal cjâf lûc da Cjargne. La riforme dai Ent Locâi, cul superament das Comunitâts Montanes, a devi jessi ocasion - secont il president - par rindi las istituzions plui buines a rispuindi as esigjences dal teritori e la proposte, che Zearo al à ricuardât, di dâ vite a une "union" tra i Comuns cjargnei a va inta direzion juste. “No saran soprimûts i comuns piçui - al à continuât Tondo - ma i vin cussience, e encje i volìn, che cheste union a cressi e che i servizis e i centris di programazion da spese a devin jessi associâts”.

CAMPIONÂT REGJONÂL FIDAL
La seconde prove dal Campionât Regjonâl FIDAL di societât a è stade fate intal Parc dal Cormôr e la Atletica Dolce Nord-Est si è presentade cun coridôrs gnûfs par miorâ las prestazions za buines da prime prove. Intal setôr dai zovins al à tacât a fâ gares Bellina Federico, inte categorie "Fantats", e za a prime aparizion al à savût concuistâ un otim secont puest: sin dal inizi cul grup di teste intal finâl al à recuperât encjemò cualchi posizions. Michele Bellina al conferme tra i "Cadets" il precedent secont puest: encje se al à provât a distanziâ l'aversari, atlete dal Brugnera, intal trat finâl si è fat superâ, un vêr pecjât! Par ce che al rivuarde il duel, dut cjasalin, che si strissine za das proves dal CSI, inta categorie "Fantates", Nicole Puntel a à sorpassât di une posizion Valentina Unfer, concludint une 12esime e che ate 13esime; simpri inta stesse categorie Veronica Cortolezzis a è rivade 23esime. Tra i "Juniores" Paolo Puntel si è classificât 18esim e Alex Bellina al è rivât 20esim, spietant di cjatâ riscat intas gares estives.

MARCIALONGA 2010
Plui di 6.000 atletes di schi di font a àn fat i 70 km dal percors da Marcialonga, la plui famose gare taliane su lungje distance, tra chescj a son presints encje coridôrs da Polisportive TamauCleulis che si son rindûts protagoniscj di risultâts un grum importants: 72esim assolût Giorgio Morassi, che cun 3h.25 di gare si è classificât prin tra i furlans; subit dopo, cun nome trei minûts di diference, al è rivât Gian Paolo Englaro, che al à concuistât il prin puest inta sô categorie. Encje las categories das femines a àn dât un grum di sodisfazions: une sodisfazion a è stade la 30esime posizion di Luigina Menean, che a è risultade la prime regjonâl e adiriture la seconde taliane cul timp di 4h.29; infin, inta edizion ridote a nome 45 km, Alessandra Primus si è classificade al 23esim puest cun 3h.50 di fadie che purtrop la zimule Daniela no è rivade a puartâ a tiermin par cause dai solits dolôrs a schene: di fat, rivade al 18esim km, a à decidût di no sfidâ di plui la fortune e di rimandâ encjemò par cualchi timp las competizions.
Inta foto: Giorgio Morassi, prin furlan.