16 GENNAIO 08
ÇONCOLAN- Cont indaûr pal Crazy Bob
A mancjin dome doi mês ae 6 edizion de manifestazion spietade da cetancj passionâts dal divertiment su pe nêf, vâl a dî il Crazy Bob, la origjinâl e mate gare di fantasiôs bobs e estrôs slitins, che si davuelzarà dai 7 ai 9 di Març sul Çoncolan.
L'event, che si pues stimâ come un dai plui impuartants apontaments invernâi de regjon, parturît da une inzegnose pensade di un grup di amîs tal 2000, daspò de fermade dilunc il 2007, al tornarà a clamâ dongje ducj i sostenidôrs di cheste biele e sane matetât. E in cheste dade di timp che a mancje, ducj si sçurvielin e si sfidin a colps di invenzions, bravure, creativitât e robis sproposidatis indreçadis a maraveâ e divertî ma ancje a tegni dûr dilunc il percors preparât dai organizadôrs. A chest proposit visìn che a son stadis stabilidis lis misuris di chescj mieçs: la largjece no à di superâ i 2,80 metris, la lungjece e à di jessi no plui di 5 metris, biel che il pês nol varès di lâ parsore dai 6,5 cuintâi tignint cont ancje des 5 personis sul bob. Ae manifestazion si pues iscrivisi fintramai ai 24 di Fevrâr, e a son za cirche vincj chei che a àn sigurât la lôr partecipazion.
CONCJE TUMIEZINE - Pronte la "Cjarte Famee"
La Regjon FVJ e à metût in vore la Cjarte Famee , ven a stâi un gnûf imprest par supuartâ lis fameis cun fîs, cul fin di daûr agjevolazions intal ûs di bens e servizis e sul paiament di cualchi tasse locâl. Par podê jessi a part di chescj jutoris 'nd è dibisugne di vê almancul un fii, ancje adotât o in fidance (affido); jessi residents in regjon da almancul un an; vê un model ISEE (Indicadôr de situazion economiche) che nol passe i 30mil euros.
In ore presint la regjon no à ancjemò decidût clarementri cuâl che a sedin lis agjevolazions, ancje se si previôt la metude in vore di convenzions cui ents furnidôrs di aghe, eletricitât, gas e vie indevant. Duncje ancje se i jutoris de Cjarte Famee no son inmò ativâts, e nancje definîts, a covente cognossi cetancj che a son chei che a varan dirit, e furnîur un numar par identificâju intun secont timp. I comuns de Associazion Intercomunâl Concje Tumiezine a àn duncje començât a tirâ dongje lis domandis. Par plui informazions i interessâts a podaran indreçâsi al Sportel dal Citadin dal comun di Tumieç e ai Sportei dai comuns di Damâr, Cjavaç e Verzegnis.
TUMIEÇ - Sparagn energjetic par ducj
Dai 14 di Zenâr, alì dal municipi di Tumieç, e je tacade la dade fûr a gratis des lampadinis a sparagn energjetic e dai imprescj "rompigetto" pal sparagn de aghe metûts a disposizion de ENEL. Però si scuen marcâ che chest materiâl nol sarà avonde pes dibisugnis di ducj, stant che al è ce che al è restât daspò di une prime dade fûr za fate intes frazions comunâls. Par ritirâ lis lampadinis e il rest, che a vignaran dâts fûr fint ae fin des scortis dome ae residents che no li àn inmò vudis, a coventarà che un component de famee al ledi in municipi in place a Tumieç, intal plan tiere a diestre, dal lunis al vinars des 8 ae une dopo misdì, e al compili il modul di pueste.
PRÂT- 300mil euros pal progjet dai orlois
La Zonte regjonâl, su propueste dal assessôr ae Mont Enzo Marsilio, al à lumât il comun di Prât tant che beneficiari di un contribût di passe 298mil euros pe metude in vore dal 4 lot dai lavôrs dal progjet "Pesariis, il paîs dai orlois". Il progjet al previôt la realizazion di un zîr a teme lant daûr ae colocazion dai orlois monumentâi tal borc e la complete metude in sest de pavimentazion.
RESIUTE – Dade dongje de Zonte regjonâl
Resiute al è un dai Comuns cun mancul abitants (sù par jù 330) dal FVJ, ma la sô storie e la sô posizion gjeografiche, ae fin dal Cjanâl dal Fele viers la planure furlane, a àn fat di chest lûc un puest cognossût e cun prospetivis di disvilup.
Il sindic Emilio Beltrame al à sclarît al president Riccardo Illy e ae Zonte regjonâl, dade dongje tal municipi dal paisut, la storie e lis oportunitâts turistichis dal teritori che al cjape dentri ancje gran part dal Parc naturâl des Prealpi Juliis. La sioretât ambientâl, il recupar e l'ûs de vecje miniere, la finide de piste ciclabil Alpe Adria, la metude sù de zone artesanâl, il recupar di edificis da destinâ a cjasis par fameis zovinis, il gnûf casel dal autostrade ae jessude Resiute-Scluse, il doprâ energjie nete, a son elements di un progjet complessîf pandût dal sindic Beltrame.
"Chest comun al à mostrât cetante capacitât progjetuâl", al à notât Illy, che al à po dopo sigurât il sosten de regjon a progjets concrets che a son za dentri tes liniis de programazion regjonâl e a son indreçâts a seondâ il disvilup e la tornade di zovins in mont.
FOR DI AVOLTRI- "Scuolamagia" in prime pagjine
Une scuele in prime pagjine des cronachis. Si trate de scuele mezane "Romano Romanin" di For di Avoltri, daspò dal servizi trasmetût ai 16 di Novembar dal 2006 su pal insert "Venerdì di Repubblica" e lis ripresis de trasmission Rai Mediterraneo che si podaran viodi plui in là. A clamâ l'atenzion di gjornâi e television e je stade la "Scuolamagia". Pôcs i scuelârs, dome 10, ma cun tante voie di cressi e imparâ. Une scuele sintude come un ben sacrisant de int dal paîs, difindude ogni volte che 'nt vegni menaçade la sierade. Cence "Scuolamagia" ,For, no sarès la stesse robe, nancje i fruts e i professôrs che alì ai insegnin. Ma lassant da bande il non “Scuolamagia”, no 'nd è nuie di incredibil, achì dut al è sempliç e naturâl, come che al varès di jessi intune cualsisei scuele. Ca sù, a 900 metris di cuote, insegnâ al è plui dificil ancje parcè che e je stade gjavade la norme che dave plui ponts ai maestri "precaris di mont". Dut câs al sarà ancje dificil ma, cemût che nus pant l'esempli di For, nol è impussibil. E sarà l'aiar frescje di mont, a saran i fruts o i maestris, dal sigûr "Scuolamagia" si merete di stâ in prime pagjine, tant che model di une scuele che, ancje ad alt e je buine di dâ i siei risultâts miôr.
CJARGNE - Un diferenziial pe mont
Cu la leç finanziarie dal 2008 al è stât metût dentri un regjim fiscâl agjevolât par piçui imprenditôrs, professioniscj e lavoradôrs autonomis, cun redit fin a 30 mil euros ad an: impueste al 20% e so paiament intune sole soluzion, esoneri dai adempiments contabii e esclusion da Iva e Irap, dai studis di setôr e dal oblic di presentâ listis di clients e furnidôrs. Si pense a dibot un milion di partidis Iva, il numar dai sogjets economics cjapâts dentri da chest provediment, dome par finte inovatîf. Lu dîs la CNA de Cjargne, a mieç dal so president Delio Strazzaboschi, che al impense la propueste za fate timp indaûr di meti in vore la leç statâl pe mont (la n. 97 dal 1994, prin firmatari l'on. Carpenedo), a dîs agns de sô butade fûr. Cemût, da pôc dit, dal ministri Visco: "no 'nd ere mutîf di insisti cu lis persecuzions procedurâls che a stimavin un piçul artesan tant che un industriâl." Si sa ancje che intermediaris e comercialiscj par pôre di pierdi clients, no viodevin benon il forfait fiscâl, che, par stesse amission dal ministri, si sarès podût emanâ za dîs agns indaûr. In realtât, i intermediaris plui cussients a podaran maiormentri lavorâ ae consulence plui cualificade, no par confrontâsi cul fisc ma cul marcjât. Si scugnarà duncje scombati ancjemò, par che ducj i sogjets economics che a lavorin in comuns montans cun mancul di mil abitants e tai borcs cun mancul di 500, a podin beneficiâ di specifichis misuris fiscâls diferenziadis. Par esempli: la estension dal gnûf regjim fiscâl agjevolât ai redits fin a 60 mil euros".
CJARGNE - Scuele, finanziament de Regjon
Il Consei regjonâl al à fat bon un finanziament di trê agns di 240mil euros indreçât ai fruts de Cjargne che a van al asîl, aes elementârs e aes mezanis. I contribûts a saran doprâts par une schirie di iniziativis culturâls che a seondin la socializazion dai scuelârs cjargnei. Il promotôr de iniziative, il conseîr regjonâl Petris, al pant cemût che "tal 2006 o vevi fat meti dentri une precise linie di spese par supuartâ lis iniziativis di caratar culturâl a pro dai students cjargnei. O ai ancje cjapât part, in gracie a un plasevul invît, a une schirie di incuintris che a àn cjapât dentri, cjanâl par cjanâl, scuele par scuele, tancj fruts de Cjargne. Alì mi jere stade domandade da plui parts la pussibilitât di continuâ su cheste strade. Stimâts i risultâts e lis domandis, o ai volût a fuart, potenziâ economichementri chest progjet". La motivazion vere, par Petris, e je che, i aministradôrs comunâi, i conseîrs e assessôrs regjonâi a son par solit puartâts a favorî la metude in vore di lavôrs publics pal disvilup, ma al è cetant impuartant promovi e supuartâ dutis lis azions zovevulis a formâ i citadins dal doman.