04 GIUGNO 08
European handbike
Si clame "European handbike" e al è l'otâf "Zîr dal Friûl", une manifestazion indreçade a fâ cognossi il sport dal Handbike, fat cuntune bici speciâl par paraplegjics. L'apontament si davuelzarà a Dartigne domenie ai 8 di Zugn cun partence a misdì e mieç. Un'event presentât de Provincie di Udin. Il circuit, che al tocje ancje Magnan, al è lunc 9 km e al è da fâ dôs o cuatri voltis secontri la categorie.
"Cheste e je une des mil musis dal sport ma par me e je la plui biele" al à dit l'assessôr provinciâl al sport, Mario Virgili, mentri che il so coleghe aes politichis sociâls, Adriano Piuzzi, al à marcât cemût che "chestis realtâts a sedin motîf di vant de comunitât furlane oltri che un esempli di cemût che si pues ridi de vite ancje intes dificoltâts".
Ae presentazion dal Zîr a jerin ancje il sindic di Dartigne, Roberto Venturini, e il vicesindic di Magnan, Fabrizio Piccoli, adun cu la presidente de associazion sportive disabii "Basket e non solo" Paola Zelanda, che e à notât cemût che "l'handbike al è un mût che al permet di competi e jonzi risultâts sportîfs di alt nivel".
Provincie: nomine dai rapresentants dai Ents
Cui vôts favorevui de maiorance e lis astensions de oposizion, il Consei provinciâl di Udin al à fatis buinis lis nominis dai siei rapresentants in ents, aziendis e istituzions. La maiorance, par chest cont, e à ancje acetât doi emendaments sui 4 presentâts de minorance, un su pe publicazion des nominis fatis sul sît internet de Provincie, proponût da Diego Travan e un altri su pe verifiche des nominis, proponût da Cristiano Shaurli. Refudâts invezit doi emendaments de conseire Schiratti, un su pe percentuâl de presince di gjenar tai ents e chel altri su pe esclusion das nominis di parincj dai aministradôrs.
Il Consei provinciâl, cun a cjâf Marco Quai, al à ancje sostituît Ottorino Faleschini (nomenât assessôr dal president de Provincie Pietro Fontanini) cun Luca Marcuzzo, prin dai no elets de Udc, sindic di Buie.
Nomenâts pûr i rapresentants provinciâi dal Consei diretîf de Upi, intes personis di Marco Quai e Sandro Bassi (Pdl), Massimo Milesi (Lega) e Diego Travan e Renato Antonelli (Pd).
Il Consul gjenerâl U.S.A in visite a Palaç Belgrât
Dentri dal so zîr che al cjaparà dentri dutis 4 lis provinciis dal FVJ, il gnûf consul gjenerâl dai Stâts Unîts pal nord Italie, Daniel Weygandt, al è rivât a Udin par cjatâsi cul President de Provincie, on. Pietro Fontanini. Il consul american a Milan al è stât ricevût tal salon dal Consei provinciâl. Il President Fontanini al à dât il bon acet al rimarchevul ospit pandintti il gust di podêlu acolzi inte sede storiche de provincie e ae presince di ducj i conseîrs. L'on. Fontanini al à po dopo memoreât la solidarietât che il popul american al à simpri mostrât pe Italie e massime viers il Friûl tant de tragjedie dal taremot dal 1976, cun contribûts economics che a àn permetût la costruzion di scuelis. Fontanini al è lât indevant marcant cemût che cheste visite e infuartissi i leams jenfri il Friûl e la Americhe , dulà che si cjatin tancj furlans emigrâts e dulà che in ore presint a operin cetancj Fogolârs. Finide la cerimonie, il consul gjenerâl american adun cul president Fontanini al è lât a Cividât par visitâ la citât ducâl sul Nadison, gustant intune des aziendis agriculis de zone.
Incuintri jenfri i presidents des Provinciis di Udin e Pordenon
Il President de Provincie di Udin, on. Pietro Fontanini, il VicePresident Fabio Marchetti e il President dal Consei Marco Quai si son dâts dongje a palaç Belgrât cul vicepresident de Provincie di Pordenon Alessandro Ciriani (stant che il President De Anna al è stât elet in Consei regjonâl), cul il President dal Consei Antonio Sartori di Borgoric e cul assessôr Antonio Consorti. L'incuintri, informâl, al è il prin di une schirie inmaneade des dôs aministrazions provinciâls par tornâ a meti in vore il progjet de "Associazion des Provinciis furlanis", fermât tant des elezions di Avrîl. Metude in pîts la gnove Aministrazion provinciâl e je rivade l'ore di tornâ a començâ chest progjet midiant chest apontament jenfri i sorestants dai doi ents, inte programazion dai impegns previodûts pe metude in vore de Associazion che, rapresentant une forme di valorizazion des identitâts linguistichis e culturâls, de union teritoriâl, sociâl e economiche des difarents comunitâts provinciâls dal Friûl, e je indreçade a davuelzi in mût associât lis propris funzions. Il President, on. Fontanini, al à pandût un convint supuart ae iniziative, marcant che la Associazion e scuen tacâ a lavorâ par mieç di intervents concrets lumâts des dôs Provinciis pitost che di iniziativis gjenerichis che no puartin nissun risultât pes comunitâts.
Suor Maria Pia Matiz e je deventade badesse
Ai 21 di Març stât suor Maria Pia Matiz e je deventade badesse dal convent di Sante Scolastiche logât a Civitella S. Paolo, un industriôs centri laziâl dongje Rome. Suor Maria Pia, cumò madre Maria Pia, e je nassude a Tamau cul non di Ottavina, fie di Miro Matiz, fradi di Otto dal "Becc", e di Irma Unfer. A 23 agns e veve sintût la clamade dal Signôr e e jere jentrade tal convent di Sante Scolastiche, deventant muinie Benedetine daspò dal noviziât. Dopo une vite di preiere, meditazion e ricercje di Diu, suor Maria Pia e je stade stimade mertevul dai siei sorestants tant da jessi nomenade badesse dal convent. Ae presince di une rimarchevule assemblee di autoritâts religjosis, militârs e civîls, ai 21 di Març suor Maria Pia, tant di un emozionant e sugjestîf rît, e à cjapât dal Vescul di Civita Castellana i simbui dal so gnûf stât: l'anel, il pastorâl e la "regule" di S. Benedet. Dute la int di Tamau a fâs i siei miôr augûrs di lungje vite a Madre Maria Pia, une fie di cheste tiere che a savût pandi cun umiltât e indurance, la strade da bati par rivâ a Diu.
DIMPEÇ- Progjet par un licôr cjargnel doc
Pensâ e produsi un licôr tipic dal Cjanâl di Dimpeç da presentâ uficialmentri inte edizion 2008 di "Friuli Doc". Chest l'obietîf dal progjet che al cjape dentri la facoltât di Agrarie de Universitât di Udin e cualchi realtât imprenditoriâl cjargnele. La iniziative e stade presentade a palaç Unfer a Dimpeç dentri de cunvigne "Erbe officinali e antiche piante da frutto: nuove opportunità per il turismo agro-alimentare in Carnia". L'incuintri al è stât inmaneât de Confederazion taliane agricultôrs e de Universitât di Udin dentri dal progjet Intereg Italie-Austrie "Conser-va". Il progjet al è stât pandût de coordenadore dal grup, Carla Da Porto, docent di Tecnologjie des bevandis alcolichis de Universitât furlane. "Dopo dal sucès dal "Cramâr", l'amâr di jerbis di Cjargne, a Friuli Doc 2007, e de sgnape di piruçs Sant Martin di For Disot, cul progjet di un licôr tipic dal cjanâl di Dimpeç, la facoltât di Agrarie - e sclaris Da Porto - e puarte indevant la valorizazion des plantis oficinâls e dai antîcs pomârs de Cjargne tal cjamp agro-alimentâr".
Il tor de Glesie di Sante Gjeltrude al à une gnove crôs
E je stade poiade vinars ai 30 di Mai su pe spice dal tor di Sante Gjeltrude, la gnove crôs roman-gotiche, volude dal consei parochiâl par memoreâ e fiestezâ i prins 50agns de nomine juridiche de parochie di Tamau, tal 1957. La crôs e je stade benedide da Don Tarcisio Puntel e presentade ae comunitât, domenie ai 24 di Mai tant de Messe. Dilunc la cerimonie il Siôr Santul al à impensât e marcât il grant valôr di fede che chest simbul cristian al pant "metût cussì ad alt, intune posizion dominant, nus travuarde e al spant lis sôs graciis su dute la comunitât". Marco Plozner tal presentâ lis carateristichis de crôs al à marcât cetant che il consei al à batût a fuart su chest progjet, par lassâ un segnacul impuartant di agrât a ducj chei che cun sacrificis a àn contribuît in chê prime dade di autonomie economiche. La crôs, cul telâr di ram, e à vût ancje une prime camisete in nikel-cromo par dopo jessi dal dut inaurade di mût di salvâle dilunc il passâ dal timp.
Valentina Unfer, Michele Bellina e Marco Primus premiâts a Feagne
La stagjon di corse 2007/2008 si è sierade cu lis premiazions finâls a Vilalte di Feagne, sabide ai 24 di Mai, ospits dal grup “Aquile Friulane” alì dal oratori Don Bosco.
Pe Polisportive Timaucleulis ‘nd è stâts doi prins puescj inte categorie “esordienti femminili” cun Valentina Unfer e inte “Amatori A” cun Marco Primus, biel che inte categorie “Ragazzi” Michele Bellina al è rivât al tierç puest. Tant dai salûts dal President provinciâl dal CSI Clara Del Negro e dal Responsabil de Comission Atletiche Adriano Zanchetta, si è fevelât ancje de partecipazion dai nestris atletis aes finâls nazionâls di Paestum sul finî di Març e ancje i risultâts che Marco, Michele e Valentina a àn jonzût inte passade edizion dal Trofeu Gortani di Corse in Mont. Il dopo misdì si è sierât cu la aromai tradizionâl paste che e segne ducj i apontaments sportîfs inmaneâts dal Centri Sportîf Talian.