Fonts aes associazions che a lavorin tal sociâl e aes parochiis
A son di 235mil euros i contribûts dâts fûr, in dôs difarentis spartizions, su iniziative dal assessôr Adriano Piuzzi, a pro des associazions e dai ents locâi che a lavorin tal sociâl e aes parochiis. Il vie libere al è rivât tai dîs stâts de zonte provinciâl. In detai aes associazions e ents locâi a laran 69mil 500 euros, biel che aes parochiis par intervents di edilizie scolastiche privade a laran sù par jù 166 mil euros (ex leç 10/1988). «La Provincie – al à marcât l'assessôr Adriano Piuzzi - e davuelç un rûl di fonde tal cjamp des associazions di volontariât che, propit pe lôr nature, e scugnin vê il supuart public par podê jonzi i lôr obietîfs. Si cjacare di realtâts, piçulis e grandis, che dut câs, midiant il lôr lavôr, a son dai ponts di riferiment pe int. In concret – al à continuât – chescj bêçs a laran a premiâ la progjetualitât di chestis associazions che, o voi impensâ, a son dadis dongje da int che e lavore sore nuie». In chest setôr a son 33 lis associazions che si zovaran dal contribût.

Furlan a scuele: il 64% des fameis a à dit sì
Il 64% des fameis furlanis de Provincie di Udin al à dât il sô benstâ par che il furlan al sedi jenfri lis materiis di insegnament dai lôr fîs. Lu pant l'Ufici scolastic regjonâl dulà che, da pôc, a son rivâts i numars des preiscrizions aes scuelis pal an 2009/10. Daûr ce che al è previodût des leçs al è cumò che lis fameis, che a stan intes zonis stabilidis de leç 482/99, a scugnin decidi pal insegnament de marilenghe. E su la fonde dai dâts rivâts aes scuelis, al à pandût il so pinsîr il president on. Pietro Fontanini: «par me al è cetant dificil indreçâmi a cetante part de int, daspò des polemichis saltadis fûr da bande di cui che al dîs che, chei pal furlan, a son bêçs butâts vie. Cui che a lu sosten, si fonde su la idee che intun moment come chest, di crisi, lis istituzions a scugnin pontâ a supuartâ dome la economie. Se duncje anìn daûr a chest resonament alore, jo mi domandi, no varessin di jessi scanceladis dutis lis iniziativis di caratar culturâl: parcè continuâ a finanziâ une mostre o un spetacul teatrâl se e je la crisi?».

De C.M.C. finanziaments par dibot 100mil euros
Dibot 100mil euros i bêçs che la Comunitât montane de Cjargne e smire a butâ fûr par sostegni i intervents plui urgjents di sistemazion des caseris dal comprensori ruvinadis des neveadis e permeti cussì la metude in vore des ativitâts. A dîlu a son stâts il  president dal ent sorecomunâl Lino Not e l'assessôr ae agriculture Luciano Mazzolini tant dal incuintri cui parons e i gjestôrs des struturis par capî cetancj dams e stazâ lis prioritâts di intervent. I sorestants de Comunitât montane de Cjargne ai àn sburtât i parons e gjestôrs a presentâ, dentri pôcs dîs, un prospet dai intervents di sistemazion da frontâ daurman, di mût di inviâ la stagjon in mont. A partî da chescj la C.M. e stimarà il totâl dai finanziaments e i bêçs da dâ fûr par ogni struture par tacâ il prin pussibil i lavôrs. Parcè che a tocje, invezit, lis oparis mancul urgjents, la C.M. e prontarà un plan di intervent da mandâ ae Regjon, par calcolâ i finanziaments disponibii, ma ancje par podê domandâ une rifusion par stât di calamitât naturâl.

La Provincie di Udin e premie il merit scolastic 
Al è stât publicât il bant pe assegnazion, da bande de Provincie di Udin, di 30 borsis di studi a scuelârs des superiôrs che si diplomaran tai dîs cu vegnin. Cheste la iniziative pandude de assessore provinciâl ae Istruzion, Elena Lizzi, che e pense cetant che cheste iniziative e rimarchi il rûl impuartant dal ent di aree vaste inte formazion des gnovis gjenerazions. «Cun chest volìn premiâ i students che a mostrin plui impegn e a palesin di volê lâ indevant cui studis ae universitât o in altris struturis. O volìn ancje supuartâ il sfuarç economic des fameis in chest moment di crisi, ancje se no si trate di un jutori ma dome di un ricognossiment dal merit scolastic».
Ogni borse di studi e je di 1.250 euros – par un totâl di 37.500 euros – e e sarà dade fûr su la fonde di criteris di merit a students residents in provincie di Udin ae date dai 31 di Dicembar dal 2008 e dai 31 di Lui dal 2009.

In curt un plan pe metude in sest dai trois in mont
I trois di mont de nestre regjon ai àn dibisugne di un intervent urgjent par meti a puest i dams causionâts de orende stagjon invernâl stade, sedi pe metude in sigurece sedi pal rilanç turistic dal teritori. Une pensade piçule pai coscj ma grande tai risultâts. Cheste la clâf di leture de propueste che si cjate dentri de interogazion che i conseîrs Menis, Della Mea e Marsilio ai àn puartât in aule a Triest su pe dibisugne di sestâ i trois dal FVJ. «L'idee e je cetant sempliç – a sclarissin Menis, Della Mea e Marsilio – ma un grum impuartant par tutelâ ducj chei che, ogni dì, a zirin lis nestris monts par escursionisim o par passion. In concret, si trate di prontâ un plan di control e pulizie dai principâi trois de Regjon e di rindiju sigûrs coinvolzint lis scuaris de Protezion Civîl, lis sezions CAI-SAF dal teritori e ducj chei che a vuelin dâ un contribût in chest sens.

Fontanini: «Identitât come model di disvilup»
Identitât come valôr in plui pe economie furlane. Cjapade di cussience des propriis capacitâts par frontâ la crisi e par jessi pronts a tornâ a partî tal moment de riprese. Pal president de Provincie on. Pietro Fontanini, «cheste crisi economiche mondiâl che e à segnât ancje il nestri teritori e je la ocasion par rindisi cont des potenzialitâts de economie locâl. Une economie, chê furlane che, ancje se e je da simpri il cûr di dut il FVJ, no a à mai capît fint dapît il so potenziâl». E par svilupâ chest argoment, la idee e je chê di dâ dongje i rapresentants dal mont scolastic, economic e politic intune cunvigne dulà che a cjacarâ a sedin i fats: de storiche ricostruzion dopo taramot, aes ecelenziis di produzions deventadis famosis par dut il mont. «O soi convint - al è lât indevant Fontanini - che il Friûl al puedi deventâ il laboratori par un model di svilup espuartabil, cemût che al è za sucedût pe ricostruzion». Il president al pant dute la sô fiducie tal Friûl par ripartî dopo la crisi e rilançâ il "furlan pride", l'orgoi furlan. «Inte ere de globalizazion là che dut al è vualivât – al à ribatût – si infuartìs la idee che al è par mieç de diviersitât che si pues jonzi la ecelenzie».

Donazion dai orghins: furlans cetant sensibii
Il 2009 al è començât benon pe donazion dai orghins in FVJ. Tai prins mês di chest an si son vudis il 33, 2% di donazions par milion di abitants, seconts dopo Trent e cun 0,3 ponts percentuâi in plui rispiet al stes periodi dal 2008. Chescj i risultâts pandûts dal conseîr nazionâl de associazion taliane pe donazion di orghins, tiessûts e celulis (Aido), Daniele Damele, che al à partecipât a Rome ae assemblee nazionâl adun ae presidente regjonâl Aido, Daniela Mucignat, e a chê di Pordenon, Fiorella Bernabei.
Damele al à ancje palesât altris dâts che a fasin onôr al FVJ: il 49,8% par milion di donadôrs segnalâts, biel che la medie nazionâl e je dal 40,3%, e la calade a fuart des oposizions ae donazion. «Tal 2009 o sin cuarts, daûr Trent, Bolzan e la Basilicade, al 13,3%, mentri che la medie nazionâl e je dal 29,1, invezit tal 2008 lis oposizions e jerin, da nô, pardabon al 25%».

 

ICI Tumieç: scjadince sprolungjade ai 16 di Lui
La Aministrazion comunâl di Tumieç e à decidût che l'acont de ICI al podarà jessi paiât fintramai ai 16 di Lui cence fastidis. Si è scugnût sprolungjâ daspò di cualchi probleme tecnic che al à causionât ritarts inte spedizion dai boletins di cont corint postâl. Si che duncje si podarà, cence fastidis, paiâ la ICI dai 17 di Zugn ai 16 di Lui.
Si impense che dopo de abolizion de ICI su pe prime cjase, la tasse e je restade dome pai edificis "di lus" (che a fasin part de categorie catasticâl A1, A8 e A9), pes secondis cjasis, pes areis fabricabilis e pes cjasis dai citadins talians residents tal forest.

Damâr: il stabiliment Luvata nol sierarà
Il president de Regjon Renzo Tondo e l'assessôr aes Ativitâts produtivis Luca Siriani si son cjatâts a Udin cui sorestants dal Grup Luvata, che ai àn ribatût la volontât di sierâ la fabriche di Sant Vît al Tiliment. Par altri ai àn a fuart dineât di volê taiâ personâl in chei altris doi stabiliments dal FVJ (Pucinie e Damâr) pandint anzit la voie di tornâ a cjapâ sù i operaris di Sant Vît, a Pucinie a pene che lis cundizions dal marcjât lu permetaran. Par Pucinie e Damâr par cumò si continuarà a doprâ la casse integrazion ordenarie ma, al è stât dit, cence nissune volontât di licenziament (a Pucinie 'nd è 618 operaris, a Damâr 272). La sierade dal stabiliment di Sant Vît, ai àn sclarît i manager de Luvata al president Tondo e al vicepresident Ciriani, no è stade metude in vore par delocalizâ di altris bandis, ma si è scugnude fâ pe dificil situazion che il marcjât dai scambiadôrs di calôr al sta passant cuntune calade dai ordins dal 50 par cent.

2° edizion de "International Skirace Carnia"
Domenie 14, atletis de Polisportive TimauCleulis, ai àn corût inte seconde edizion de "International Skirace Carnia" validis come Campionât talian. Il titul talian pes feminis lu à cjapât Lavinia Garibaldi pe Timaucleulis rivade seconde dopo de spagnole Jimenez Stephanie, seste Luigina Menean prime de categorie B. Pai mascjos al à vint Fulvio Dapit, biel che pe Timaucleulis si è fat viodi Gianpaolo Englaro, rivât 11 e prin inte sô categorie, dopo Miuri Del Bon e Matteo Romano che ai àn sierât in 54 e 55 posizion, dopo vê patît fastidis e il ganf che no ur à permetût di cressi in classifiche.

Tamau e Cleulis a spietin i Alpins
Dut pront a Tamau e Cleulis pal radun sezionâl dai alpins che si davuelzarà ai 12 di Lui cu ven. L'apontament a fuart volût dai doi grups Ana locâi al previôt par domenie la tradizionâl sfilade che a partissarà tor lis 11 dal Templi Ossari par rivâ in place Pio X. Dibant dî che l'apontament al sarà insiorât da altris events di contor e i doi paîs a son pronts e ferbints inte spiete dai alpins da simpri cetant amâts de nestre int. 
In detai il program de zornade al varès di jessi
aes 09 e mieze ALZABANDIERA alì dal Templi Ossari
aes 10 la Messa, cun poiade di une corone di orâr
aes 11 principi de sfilade
aes 12 mancul un cuart poiade di une corone di orâr al monument des “puartadoris cjargnelis”
aes 12 discors des autoritâts
aes 12.30 il tradizionâl e saurît mangjâ alpin