A son començadis lis iniziativis pei 100 agns di Secab

A son scomençadis in vie uficiâl vinars ai 25 di Jugn, cu la convocazion di une riunion straordenarie dal consei di aministrazion vierte ancje ai sindics dai Comuns dal comprensori, ai dipendents e al Comitât organizadôr, lis celebrazions pai prins 100 agns de Secab, che e prodûs e e distribuìs energjie eletriche tai Comuns di Paluce, çurçuvint, Liussûl, Ravasclêt, Sudri e Trep di Cjargne. L’incuintri si è davuelt, di fat, juste te stesse zornade e ae stesse ore di cuant, 99 agns fa, i fondadôrs di Secab a derin vite ae cooperative. Chest apontament al è stât il prin di une schirie di iniziativis che a lararan indenant fin ai 25 di Jugn dal 2011, cuant che Secab e finissarà cent agns. “Nus è someât un dovê – al dîs il President de Cooperative, Luigi Cortolezzis – tacâ lis celebrazions cuntune riunion che e fos in stât di rivocâ il spirt e la capacitât di viodi lontan che, 99 agns fa, a vuidarin i socis fondadôrs, che a vioderin lis oportunitâts di cressi pal teritori cjargnel. Oportunitâts  che a vignivin dal doprâ fonts netis e che si puedin rinovâ par produsi energjie eletriche. L’an dal centenari al sarà caraterizât di une schirie di events impuartants pe aziende e massime pal teritori, che a cjaparan dentri sei moments di aprofondiment sientific che iniziativis culturâls”.

Mont, destinâts 330 mil euros de Provincie

Al è stât decidût de Zonte provinciâl il prin ripart 2010 dal fonts pe mont. In dut si trate di 331 mil e 500 euros che a rispuindaran a 46 des 189 domandis rivadis un pôc di ogni bande dal teritori montan de Provincie. Daûr de propueste dal assessôr provinciâl Ottorino Faleschini, duncje, l’esecutîf al à dât vie libare al intervent di supuart a pro di chês ativitâts che a àn la lôr sede tai comuns montans dal teritori. «La Provincie di Udin – al à comentât Faleschini -, doprant lis sôs risorsis, e à metût sù un “Font a pro dal disvilup sociâl, economic e produtîf tai teritoris montans cun svantaçs plui grivis di altris” cun chê di puartâ economie ancje tai piçui centris dal nestri teritori montan, dâ un sburt ae ocupazion e butâ lis fondis par iniziativis di disvilup. Un mût insume – al à continuât – par fâ tirâ il flât a cui che al à sielzût di lavorâ tes localitâts di mont. In gjenerâl si trate di ativitâts fatis di privâts, Comuns, associazions e parochiis che a garantissin un servizi a residents e turiscj».

Dolomitis, a Udin il coordenament pe tutele dal paisaç

La Provincie di Udin e coordenarà lis azions pe tutele dal paisaç des Dolomitis. E je une des decisions cjapadis dal Consei di aministrazion de Fondazion Dolomitis Unesco, che si è dât dongje a Belun e dulà che al à cjapât part, pal ent di Palaç Belgrât, l’assessôr al disvilup de mont Ottorino Faleschini. Inte riunion al è stât dât il vie libare al belanç 2010 che si è sierât cuntun util di cuasi 600 mil euros, e ae predisposizion dal plan di gjestion, e po dopo al è stât fat bon ancje il scheme organizatîf de Fondazion. Il scheme al previôt, in particolâr, la costituzion di rêts tematichis che, in cualchi câs a saran coordenadis des diviersis Provinciis e in altris câs de Fondazion stesse come, par esempli, la comunicazion, la informazion, la ricercje di finanziament e il coordenament.». L’assessôr Faleschini al
à pandût grande sodisfazion «pe azion zovevule bielzà inviade de Fondazion che, in cheste maniere, nus permet di cjalâ cun otimisim al avignî in viste ancje de visite di ispezion de bande dai orghins dal Unesco, fissade pal an cun ven. Ma massime pes conseguencis positivis che chestis azions a puartaran a pro dal nestri teritori».

Rigulât, paiament boletis aghe e depurazion.

In chescj dîs a son stadis puartadis tal Comun di Rigulât lis boletis di paiâ pe aghe e pe depurazion, daûr di ce che al è stabilît de leç. “No è mê intenzion fâ polemichis su cemût che dut chest al è stât gjestît o ben su la esagjerazion de aplicazion di un cost fis par persone che, clarementri, al penalize lis fameis plui numerosis, che a son za di cussì obleadis a fâ une vore di sacrificis par rivâ ae fin dal mês. E no vuei nancje contestâ la gjestion di CARNIACQUE SpA, Societât che in jê o ai simpri crodût, parcè che o soi dal dut cussient dal fat che al è impussibil par un Comun piçul gjestî il cicli integrât, viodudis lis tantis problematichis che il setôr al presente. Cun cheste premesse, che mi si permeti di marcâ il discomut che di un pôc di timp incà, tant che Aministradôr public, o vîf ogni dì stant che il nivel di eficience che e veve auspicât CARNIACQUE SpA, nol à sodisfat lis spietis che tancj si imagjinavin. Tantis ineficiencis a àn di jessi superadis, come ancje la “costruzion “ de “bolete“  che i utents a àn di paiâ, a scuen jessi tornade a viodi dal dut, vint rispiet des fassis plui debulis de nestre societât.”
Fabio D’ANDREA Sindic di Rigulât

I zovins contents di cjacarâ par furlan

No si vergognin plui di fâsi sintî a cjacarâ par furlan. E a varessin plasê di scoltâ cualchi lezion par furlan, ancje inte scuele superiôr. Chest, in curt, ce che al salte fûr di un cuistionari che al è stât fat fâ ai students dal Malignani di Udin. I risultâts dal cuistionari – cuistionari e elaborazion dai dâts a son stâts fats par cure di Dorotea Di Marco, ricercjadore de Universitât di Gurize – a son stâts presentâts cja dal Istitût dal cjâf lûc furlan. Il studi al à tocjât 244 zovins e al rivuardave la lenghe furlane e l'interès pe storie dal nestri teritori. Ae presentazion al è intervignût ancje il president de Provincie di Udin onorevul Pieri Fontanini. «Cul ingrès inte scuele, la lenghe furlane e gjolt di plui rispiet e cumò si pues scomençâ a viodi cualchi risultât – al à dit Fontanini -. Ma bisugne fâ un salt di cualitât: plui che libris, a coventaressin i cines di vuê voltâts par furlan, gjornâi, la pussibilitât di viodi la television cun programs e gnovis in marilenghe e musiche.

Fonts a lis Parochiis che a gjestissin istitûts scolastics

A rivin in dut a 142 mil e 500 euros i fonts dal prin ripart dal 2010 che la Provincie e à destinât a sù par jù une trentine di Parochiis che a gjestissin istitûts scolastics. Su propueste dal assessôr Adriano Piuzzi, la Zonte provinciâl inte ultime sentade e à dât il vie libare ae assegnazion dai contribûts ex leç 10/1988 che a laran a cuvierzi lis spesis pe edilizie scolastiche privade (Parochiis). «Cheste prime part – al à spiegât Piuzzi – e rivuarde dome i sogjets privâts. In chest câs a son stâts privilegjâts juste apont intervents di edilizie scolastiche». 

Agriculture, destinâts 77 mil euros de Provincie

Al rive in dut a 77 mil e 500 euros il prin ripart 2010 in materie di agriculture. La Zonte e à dât vie libare ae delibare, propueste dal assessôr Daniele Macorig, inte ultime riunion. In pratiche si trate di jutoris finanziaris dâts a ents, associazions e comuns pe organizazion e pe realizazion di manifestazions, ativitâts e iniziativis di grant interès provinciâl o locâl tal setôr agricul e agroalimentâr e che no àn chê di fâ inviâ ativitâts comerciâls, ma a son indreçâts ae realizazion di finalitâts istituzionâls dai rispetîfs beneficiaris. «Dant contribûts al mont agricul e ae sô filiere – al à comentât Macorig – la aministrazion e rapresente un bon imprest di supuart a lis ativitâts, singulis o associadis, che a àn une part significative pe economie dal teritori.

 

Lenghis minoritariis, la vôs e rive in Europe

Mancjance di continuitât e pôcs finanziaments, insuficience di progjets pal ûs veicolâr de lenghe minoritarie tes scuelis, “invisibilitât” tes aministrazions publichis e mancjance di sensibilitât de bande de emitent radiotelevisive publiche. Chescj a son dome cualchidun dai problemis principâi des lenghis minoritariis de nestre regjon (chê furlane, chê todescje e chê slovene) pai rapresentants che a puartin i interès des minorancis linguistichis dal Friûl e che vuê a palaç Belgrât a àn vût la lôr grande ocasion: fâ sintî la lôr vôs in Europe. Di fat, e à fat tape te sede de Provincie di Udin la delegazion dal Comitât consultîf de Convenzion cuadri pe protezion des minorancis nazionâls dal Consei di Europe.

Val dal Tiliment, doi puints gnûfs a miorin la viabilitât

E continue cun doi puints metûts a gnûf la ristruturazion de Strade Statâl 52 “Carnica”, colegament principâl tra la Val dal Tiliment e il Cjadovri traviers de Màurie.  L’assessôr regjonâl ai traspuarts Riccardo Riccardi e il president di Stradis Fvj Giorgio Santuz a àn screât i puints tornâts a meti a gnûf sul riu Auze e sul Riu Piçul, fats rispetivementri di Anas e de Protezion Civîl regjonâl tal comun di For disot, par une spese totâl di plui di 1 milion di euros. “O vin dât no dome une rispueste concrete ai problemis de viabilitât, ma o vin ancje dât une rispueste ai problemis de mont – al à dit Riccardi, acompagnât dal senatôr Vanni Lenna, dal conseîr regjonâl Cacitti, dal sindic Marco Lenna e dal vicediretôr de Protezion civîl regjonâl Petris. Chest al dimostre che la nestre e je sì une politiche di anunzis, ma di anunzis concrets, di robis fatis”.

Sauris, 'Teatro fra le nuvole 2010' otave edizion

Si rinove il Progjet Teatrâl “FRA LE NUVOLE”, program siôr di propuestis che si disvilupin tra lis dôs borgadis di Sauris. Progjetât e coordenât di Daniela Fattori, che e à curât ancje lis edizions passadis, il plan al rive al otâf an consecutîf dimostrant cussì che la iniziative e je zaromai ben inlidrisade tal teritori dulà che e cjate otim acet e poie. Il slontanament dal dran dran e des corsis di ogni dì - par cirî ispirazion te pâs verde e frescje di Sauris – al permet ai professioniscj che a vuidin i seminaris di lâ insot e tocjâ aspiets diviers dal lengaç teatrâl, cuntun lavôr penç che al va de acuisizion dai contignûts ae verifiche. I grups, simpri une vore unîts e in stât di spartî esperiencis e di colaborâ, a son la miôr carateristiche cualitative dal progjet. Sîs apontaments a segnin il pas dal progjet, che al va dai 2 di Lui ai 8 di Avost.

Solstizi cjargnel

O ai passât une biele serade in Cjargne in compagnie di cualchi sindic dal centridiestre, che o vevi invidât a cene par fâ il pont de situazion. Su la taule, i problemis de aministrazion di ogni dì tai comuns di mont, lis problematichis de Cjargne, la voie di continuâ a strenzi i dincj in spiete di timps (sot dal pont di viste finanziari) miôr di chescj…
Ancje se il moment nol è biel o ai cjatât une energjie positive in chescj aministradôrs che si impegnin pe lôr comunitât.
No son mancjâts stimui interessants che dal sigûr mi judaran a cjatâ cualchi soluzion, che par resons che a son ben claris cumò no pues anticipâ.                                                                Renzo Tondo

 

Alt al comissariament des comunitâts montanis.

Al è ce che a domandin i Conseîrs Regjonâi dal PD Della Mea e Marsilio par cirî di impedî che al dam si zonti la burlade. “ La Zonte Regjonâl – a àn declarât i Conseîrs dal PD- e jere stade impegnade a preparâ dentri dai 31 di Dicembar 2009 une propueste di leç pe modifiche dal ordenament dai Ents Locâi che e previodeve la abolizion des Comunitâts Montanis e la elaborazion di altris soluzions organizativis pe gjestion dai teritoris montans. Si sa che a disfâ si sta un moment e che invezit al covente ben altri par fâ sù lis robis, e cussì, se al è bastât un colp di man par comissariâ lis Comunitâts Montanis,  a plui di un an di distance ancjemò no si viodin lis  “soluzions di gjestion secjis e buinis” che a jerin stadis profetadis in sostituzion de situazion di prime, e, viodût il nivel di conflit e i contrascj de maiorance, cuissà trop timp che al varà ancjemò di passâ prime che si puedi tornâ a vê  un sisteme aministratîf ordenari.” “E intant – a concludin Della Mea e Marsilio- no si capìs ancjemò cemût che la gnove formule propueste, ven a stâi chê de union dai Comuns, e puedi risultâ plui buine pe gjestion des politichis di disvilup dai teritoris de mont, al è di preocupâsi par cuale che e sarà la part che a varan di fâ i Comuns pal avignî.

Corse in mont

I miôr atletis de Timaucleulis si son presentâts ae partence de 4te
edizion de Cronoscjalade Dimpeç Mont Pure no cate il tris timp. 8 tra i miôr atletis de Polisportive a àn sfidât il frêt e la ploie insistente par ben 7.2 km di gare, rivant plui in sù di 1400 metris di altece cja dal “Rifugio Tita Piaz”. I primâts dal percors a son stâts fruçâts
sei te sezion dai oms che in chê des feminis, tal prin câs de bande di Manuel Da Col pai Vigjii dal Fûc di Belun e, tal secont câs, de bande di Lavinia Garibaldi de Timaucleulis. La gare dai oms e je stade dominade dal dut dal coridôrf che al à sierât devant di Marco Primus e Marco Nardini che si son viodûts passâ di chel che lôr stes, cence sorprese, a àn definît un aeroplan. Sest plaçament assolût par Gian Paolo Englaro. La gare des feminis e à viodût la vitorie di Lavinia Garibaldi e il secont puest di Carla Spangaro, dutis dôs sot dal timp de Romanin. A sierâ il poker de Timaucleulis i àn pensât Luigina Menean e Federica Bulliano rivadis, tal ordin, tierce e cuarte.