02 LUGLIO 08
Consei provinciâl dai 27 di Zugn
Cun 18 vôts contraris (Pdl, Lega Nord e Udc) e 12 favorevui (Pd, Idv e Rc), il Consei provinciâl di Udin al à refudât la mozion di sfiducie al president dal Consei Marco Quai (Pdl) presentade dai grups di oposizion daûr dal art. 6 dal Regolament dal Consei par un resint patizament di Quai cause un "tentatîf di incitâmint al fals in at public". Il President Quai nol à cjapât part ae votazion e al à domandât che a cjâf de sentade al fos il Vice President vicjari Renato Antonelli. Il Consei provinciâl al à po dopo fat bon il cont economic 2007, cunvignint che la buine risulte di esercizi e je di passe 6.600 milions di euros, e ancje (cun 19 favorevui e 12 astignûts), la variazion dal "Belanç di Prevision 2008" e dal "Belanç Plurienâl 2008/2010" pe regjistrazion di jentradis e spesis cun destinazion vincolade e ziradis di fonts.
Il Consorzi dai mosaiciscj al ufrìs il steme in mosaic ae Provincie
Il President dal Consorzi pe Scuele dai Mosaiciscj dal Friûl di Spilimberc, Alido Gerussi, al à donât al Consei provinciâl, une significative opare in mosaic cul steme de Aministrazion provinciâl di Udin. Tant dal incuintri, Gerussi al à impensât la lungje storie de Scuele Mosaiciscj (che dal Dicembar 1996 si clame Consorzi pe Scuele Mosaiciscj dal Friûl) inte formazion didatiche e professionâl di miârs di zovins artesans di chest particolâr setôr, rivâts da 23 nazions dal mont. Fontanini al à ringraziât di cûr il Consorzi e i arlêfs che a àn metût dongje il steme, che al vignarà picjiât difûr di Palaç Belgrât tant di une cerimonie.
Cunvigne su pes energjiis ecologjichis a Trep
In gracie dai implants a biomassis, idroeletrics, di cogjenerazion e fotovoltaics za inviâts o che a stan par inviâsi, la Comunitât montane de Cjargne e produsarà energjie par 7milions di euros. Cheste e je la cifre pandude tant de convigne "La montagna e le fonti rinnovabili per l'autonomia energetica", inmaneade a Trep pe scree dal prin implant a biomassis dal comprensori, metût in vore de Comunitât montane adun cu la aministrazion comunâl dentri dal progjet di rilanç de mont fondât su pe valorizazion de risorse len in clâf energjetiche.
A fâ i onôrs di cjase al è stât il sindic di Trep Luigi Cortolezzis, che al à marcât cemût che: "chest event al sedi grandonon pe comunitât, che e conte sù par jù 650 abitants e al è in grât di sigurâ a chescj la autonomie energjetiche. Trep duncje al è un esempli a nivel regjonâl e nazionâl e al pant cemût che al sedi pussibil meti in vore positivis politichis di disvilup in gracie ae colaborazion jenfri istituzions". Pal president de Comunitât montane, Lino Not "chest al è un dai events plui impuartants inte vite dal ent, che da agnorums al puarte indevant il teme de valorizazion des fonts energjetichis netis, tacant dal idroeletric passant pes biomassis e rivant ae cogjenerazion, cence dismenteâ l'implant fotovoltaic che si cjate sul cuviert de stazion di Tumieç".
E va indevant il procediment dal UNESCO pes Dolomitis Furlanis
Tal mês di Lui al tornarà a començâ il lavôr des Provinciis di Udin, Belun, Bolzan, Pordenon e Trent pe candidature des Dolomitis a ben mondiâl de umanitât. Daspò de presentazion dal fassicul a Parigj, tal Zenâr stât, il grup des provinciis al à di pôc vût comunicazion dai uficis Unesco e dal Ministeri dal Ambient e de Tutele dal Teritori e dal Mâr, che la candidature e à ducj i recuisîts tecnics previodûts des liniis vuide. Chest al sarà il prin incuintri tecnic-politic dulà che al parteciparà l'assessôr Ottorino Faleschini, che al à la deleghe ae mont e duncje al scuen stâ daûr ae cuestion; in ogni dade l'assessôr al sarà judât dai tecnics de Aministrazion. I prossims pas a saran chei di inmaneâ dentri dal mês di Otubar su pes Dolomitis Furlanis la passade di un espert mandât dal Unesco, che al varà l'assum di stazâ la coretece dai parametris previodûts dal teritori che al cole in Cjargne.I fruts a crodin inte convivence pacifiche jenfri i popui
Friûl e Sudameriche a vierzin un gnûf cjanâl di comunicazion e condivision: centenârs di fruts e puems, jenfri i 6 e i 14 agns, a deventin protagoniscj scambiantsi storiis e liendis popolârs e tradizionâls dal FVJ e di Argjentine, Nicaragua, Uruguay. Al è un program complès ma ancje une preziose oportunitât par coivolzi la int peantle cuntun fîl ugnul: crodi inte convivence pacifiche dai popui. Chest al è il progjet di colaborazion e cooperazion culturâl "Storie di qua e di là dal poç", che e cjape dentri ancje la Cooperative sociâl Itaca tant che partner de associazion furlane "Due Mondi" e dal Ent furlan di “Assistence sociâl e culturâl al emigrant”. Obietîf principâl dal progjet al è chel di infuartî intai furlans e inte comunitât dai furlans che si cjatin tal forest la necessitât di une convivence pacifiche daûr de Declarazion universâl dai dirits umans dal 1948, che chest an a à il 60° aniversari.Provincie di Udin atente al mont agricul
« La Provincie di Udin e scoltarà cetant i problemis dal mont agricul furlan, e e impromet, a cui chel al presentarà progjets gnûfs e inovatîfs, ogni pussibil e zovevul sosten, no dome aes Associazions di categorie, ma ancje aes singulis ditis e cussì e davuelzarà il so assum intes funzions trasferidis da la Regjon FVJ». Chest il messaç a clâr pandût dal assessôr provinciâl ae Agriculture, Daniele Macorig, incuintrant tai dîs stâts i sorestants des organizazions di categorie. Da bande des categoriis a son stât plui voltis marcâts i tancj problemis dal setôr agricul, come la dibisugne di finanziâ i implants forestâi previodûts de leç regjonâl 65/1976 pai agns 2007/2008, o la necessitât di vê de regjon altris contribûts pai agriturisims (dilunc il 2007 a son stadis presentadis 18 domandis par un totâl concedibil di passe 1.800.000 Euros, biel che tal 2008 lis domandis a son stadis a pene 2), e ancjemò la scugne di meti a puest la segnaletiche pe indicazion des aziendis agrituristichis, la domande di inmaneâ cors par otignî i patentins par podê comprâ prodots fitosanitaris.DARTE - Atmosfere da Champions cul Slavia Praga
Une impuartant scuare di balon internazionâl e à sielzût Darte pal ritîr estîf. Si trate dal Slavia Praga, formazion zovine e da pôc vincidore dal titul dal campionât de Republiche Ceche. Lu à dit l'assessôr comunâl al sport dal centri termâl, Francesco Candoni: «La vincidore dal campionât ceco si fermarà a Darte dai 10 ai 23 di Lui e sarà logade alì dal Albierc Gardel di Plan Darte. Si trate di une scuare di alt nivel - al à notât l'assessôr - che doprant lis nestris struturis sportivis si prepararà pe Champions League». Sabide ai 12 di Lui intes Termis di Darte si varà la presentazion uficiâl dal ritîr; la struture e metarà a disposizion dai zuiadôrs lis sôs areis benstâ e relax. Te dade di permanence in Cjargne, il Slavia Praga al zuiarà dôs amichevulis tal locâl implant sportîf: la prime ai 13 di Lui e la seconde trê dîs dopo. Inmò da decidi i aversaris. Cussì si infuartìs la tradizion sportive di Darte: dopo de Udinese, cumò il Slavia Praga. «Si augurin - al à sierât l'assessôr - che chest ritîr al puedi puartâ a un reon di imagjin pal nestri Comun, che magari al podarà dâ acet ancje a cualchi tifôs. A trai zovâmint a saran lis ativitâts economichis de zone».