16 LUGLIO 08
Il Pres. Fontanini e l’Assessôr Virgili a àn incuintrât lis Associazions
“Vuê o fevelin di risultâts sportîfs cetant impuartants che a fasin sì che la comunitât provinciâl us vebi a grât e us din un premi pe imagjin positive e vincent chi dais dal Friûl in dute Italie”, chest il pinsîr pandût dal president de Provincie di Udin, on. Pietro Fontanini, ai zuiadôrs des associazions “S.D Centro Sedia Basket” di Cuar di Rosacis (Corno di Rosazzo) e “S.D Volley Ball” di Udin e dal “Tennis Club Udinese” di Remanzâs, ducj ospits tal Salon dal Consei provinciâl par ricevi une acuile, simbul dal Friûl. Il president Fontanini al à ancje marcât cemût che “in vetrine vuê a son i valôrs che voaltris puartais indevant”. Adun cul onorevul Fontanini al jere ancje l’assessôr provinciâl al sport, Mario Virgili, che al à zontât che “celebrin il vuestri sucès cun orgoi ancje parcè che il premi che us din al è pes scuaris e no pai singui a prove de impuartance di fâ grup par vinci insieme”. “La Provincie di Udin – al à sierât il president Fontanini – e je une vore ricognossint aes trê societâts pai bogns risultâts jonzûts. Un esempli di professionalitât, tacament al lavôr, atenzion ai zovins, chestis a son la manifestazion miôr dal nestri Friûl e de nestre int”.
Alte Furlane: metude in vore di une rêt jenfri lis scuelis
La Direzion di Aree Mont de Provincie di Udin e à metût in vore une rêt jenfri lis scuelis de Alte Furlan a servizi de autonomie scolastiche: il Centri Provinciâl Teritoriâl Servizis Scolastics – Rêt de Alte Furlane. Chest centri al è za da un pieç operatîf, dut câs si stime zovevul pandi la sô costituzion ancje cu la aprovazion dal so Statût, robe par altri previodude da chest progjet. L’incuintri di davuelzarà miercus ai 23 di Lui aes 9 di buinore alì de Comunitât Montane de Cjargne, pe presentazion uficiâl dal Statût.
TAMAU- "Is guldana pearl" al devente internazionâl
Dai 10 ai 15 di Lui cualchi paîs dal FVJ a à logât la 9 edizion dal Festival mondiâl dal folclôr zovanîl, inmaneât e prontât benissim de Associazion "Folkloristica Giovanile Regionale", cul patrocini de Regjon FVJ adun di Provinciis, Comuns, Comitâts, gjornâi e trasmissions radio-televisivis. Al è stât un grant moment di fieste, calôr, musiche, bai e socializazion par ducj i grups folcloristics che a àn vût ocasion di confrontâsi sul plan culturâl, des tradizions e des usancis. Oltri ai balarins furlans al incuintri a àn cjapât part ancje grups rivâts dongje de Russie, Indie, Macedonie, Messic, Serbia, Austrie e Spagne. Ancje Tamau al è stât presint ae rimarchevul manifestazion cul famôs grup "Is guldana pearl", nassût tal 1980 in gracie a Ilia e Giorgio Primus, cul fin di tutelâ lis usancis e la lenghe tamovese par mieç dai vecjos bai compagnâts da musichis de tradizion locâl. Il "guldana pearl" al à partecipât ae manifestazion, cence esibîsi, domenie ai 13 di Lui a Udin. L'esordi artistic dai "guldana" si è davuelzût a Darte lunis ai 14 di Lui; po dopo i zovins balarins si son esibîts a Muggia, ae grandiose sierade dal Festival.
RAVASCLÊT- Percors pai passionâts de mountain bike
In gracie de disponibilitât dal gnovissim implant Funifor de Promotur Spa e al contribût di rimarchevui nons dal setôr MTB e furstrade e de aministrazion di Ravasclêt, che si è valude di tecnics specializâts e dal jutori de “ASD 100-One Kona”, in Val Cjalde si podarà zirâ su percors prontâts di pueste pai passionâts de mountain bike. A paronâ a son lis categoriis plui gnovis de mountain bike: la "All Mountain" cun passe 80 km di fassinantis stradis che a partissin de spice dal Çoncolan par rivâ jù cun dislivei di dibot 1500 metris fintramai a Sudri, Zui, Darte, Tumieç, Davâr, dome par dî cualchidun. Cu la vierzidure tai fins setemane fin ai 27 di Lui e tai prins doi week-e 'nd di Setembar e ogni dì dai 28 di Lui ai 31 di Avost. Lis manifestazions a son cetantis: dôs garis di dissese in program, ai 27 di Lui cuntune stafete noturne a scuaris e ai 23-24 di Avost (4° prove dal circuit talian); une gare par fruts, un cors di freeride e tant altri... Il cost dal biliet zornalîr al è di 15 €, la salide singule invezit di 7. Dutis lis informazions lis podês vê scrivint a info@bikearenazoncolan.com o clamant il numar 0432.510963.
CONCJE TUMIEZINE - Ufici dal Patrimoni a Damâr
L'Ufici dal Patrimoni de Concje Tumiezine si è da pôc trasferît alì dal municipi di Damâr cun vierzidure al public dal lunis al vinars buinore des 10.30 aes 12.30 e intai dopomisdîs dal lunis ae joibe des 17.00 aes 18.00, il numar di telefon al è il 0433.94056. La ativitât di sportel rivuardant il patrimoni e la ricostruzion a vignarà dut câs davuelzude a Tumieç alì de sede de Resonarie in vie Del Din 8/A, il martars e la joibe buinore des 10.30 aes 12.30.
ALTE FURLANE - Gnûfs bants di concors pe ATER
La Aziende Teritoriâl pe Edilizie Residenziâl de Alte Furlane, cun sede a Tumieç, e à inmaneât 7 bants di concors pe destinazion di cjasis di edilizie publiche. Si sclarìs che al è impuartant fâ domande ancje in chei comuns dulà che in ore presint no 'nd è cjasis disponibilis di mût che, se une dì si liberassin puescj, a saran dadis daûr des graduatoriis metudis jù cui bants saltâts fûr cumò. Al è impuartant duncje che i interessâts a presentin domande in ogni câs e ancje chei che a son stâts metûts dentri in altris graduatoriis a scugnaran tornâ a fâ domande. Lis graduatoriis, metudis jù da une comission di pueste, a saran dopradis par destinâ lozaments tai comuns di Paulâr, Pontebe, Prât, Resie, Tumieç, Vençon e Zui. I recuisîts e i mûts par presentâ domande a son pandûts tai bants di concors; i modui di domande si cjatin tai municipis dai comuns interessâts o alì de ATER Alte Furlane a Tumieç in vie Matteotti 7, volint si podin ancje discjamâ da internet. Lis domandis a scugnaran jessi presentadis inte sede de ATER Alte Furlane dentri dai 4 di Setembar.
Scree de gnove sale parochiâl di Tamau
Si davuelzarà vinars ai 18 di Lui aes 8 di sere la inaugurazion de gnove sale parochiâl inte Cjase da Zoventût “S. Pio X” a Tamau. La sale, metude a puest cun grancj sacrificis economics e in gracie di une lodevul gare di solidarietât, de Regjone FVJ, di Ents e Associazions comunâls e di buine part de int tamovese, e je cumò dal dut a puest cu lis normis di sigurece europeanis e e pues dâ acet aes plui svariadis manifestazions, come cunvignis culturâls, teatris, spetacui musicâi. La serade di vinars si presente penze di intervents, cu la presince dal diretôr dal consei parochiâl, Marco Plozner, i sorestants religjôs e civîls, il siôr santul Tarcisio Puntel e i tecnics che a sclarissaran, par mieç di filmâts, i lavôrs metûts in vore inte sale e in dute la Cjase de Zoventût.
La rassegne dai lunaris cjargnei ta Polse di Cougnes
La 16 edizion de rassegne 'Il Lunari fat in Cjargne' e torne a mostrâsi e lu fâs ta biele suaze de Polse di Cougnes, a Zui, a cuatri pas da antighe Plêf Mari di Sant Pieri.
Di fat il Circul Culturâl 'La Dalbide' di Çurçuvint, organizadôr di cheste edizion promovude come simpri da redazion de 'Il gjornêl' di Dimponç, al à pensât di dâ vite a une version estive da mostre, cjatant place e disponibilitât inte struture da Polse di Cougnes.
Cussì dai prins di Lui e dilunc dut il mês di Setembar si podarà viodi une nudride cerce di Lunaris dongje das plantis dal ort botanic, jenfri i libris de biblioteche, tra une scampanotade e chê altre, scrutinant lis stelis dal osservatori astronomic o dopo une orazions ta capelute ecumeniche.
Lis numerosis ativitâts da Polse, che a clamin dongje tante int in chest zup vie pa la istât, a saran cussì insioradis da cheste gjenuine presince di plui di vincj Lunaris che a contin storiis, liendis, personaçs, ricercjis, curiositâts di ancjetancj paîs de Cjargne e dal Friûl: Sauris/Zahre, Bordan, Tamau/Tischlbong, Magnan, Dogne, Prât di Resie, Val-Rualp/Fagnigola, Cleulis, Dimponç, Dimplan, Darte, Sapade/Plodn, Çurçuvint, Diêri, Ospedâl di Glemone, Palaçûl. No mancjin i calendaris di cualchi scuele, chel dal Socors Alpin Regjionâl, des “Over 40 classe operaia” e par finî, da Visepente, il lunari avodât a pre Antoni Belline. Insome une ocasion in plui par cognossi la anime culturâl de int che a vîf in mont.
Corse in mont: grande TimauCleulis a Pradibosc
Grancj risultâts pe Polisportive Timaucleulis inte seconde prove dal Trofeu Gortani 2008 davuelzude domenie ai 6 di Lui a Pradibosc. Pe prime volte doi atletis a àn vint sedi la gare maschîl che chê feminîl; in fats il prin puest al è stât di Lavinia Garibaldi prime di Carla Spangaro (Carniatletica) e tierç puest, e ancje prin in categorie, jenfri i "Amatori B" pe mari di Lavinia, Luigina Menean. Inte manche maschîl prin puest a Primus Marco e secont a Puntel Erwin pe categorie "Senior". Prin puest ancje par Michele Bellina jenfri i "Ragazzi", che si riconferme dopo de prove di Muine, e secont puest di Valentina Unfer al sprint cu la tierce inte categorie "Esordienti". Dome par pôcs minûts a son rivâts al seconts jenfri lis societâts (490 pt.) daûr de Aldo Moro (511 pt.), biel che al tierç puest si è posizionât il G.S. Natisone (361 pt.).
Tumieç - Sucès pal "Memorial Pillinini"
Al è stât vint de "Virtus Corno" il "12 Memorial Loris Pillinini", torneu pe categorie "Esordienti" inmaneât a Tumieç de "Asd Tolmezzo Carnia". Decisîfs inte finâl cu la "Itala San Marco" i rigôrs, dopo che i timps regolamentârs si erin sierâts cul 0-0 e i suplementârs sul 1-1. Aes premiazions, cu la presince ancje dal coordenadôr dal setôr zovanîl e scolastic Fvj, Franco Facchin, a son stâts dâts fûr i ricognossiments a Nicolas Pellegrinet de Sacilese (pal "gesto tecnico"), a Ymer Dedej dal Fiume Veneto (pal fair play) e a Roberto Aiello dal Tolmezzo (pal miôr zovin). Dilunc la zornade si è davuelzût ancje un incuintri educatîf sul argoment "informare per formare", cu la relazion di Giovanni Messina e la partecipazion di Maurizio Zorba.
La psicoterapeute Vera Slepoj e presente il so ultim libri.
Vinars ai 18 di Lui, aes 18.30 sore sere, aì dal Hotel Cjargne di Vençon, la psicoterapeute Vera Slepoj e presentarà la sô ultime fadie letterarie dal titul: “L’età dell’incertezza. Capire l’adolescenza per capire i nostri ragazzi”. Al apontament a saran presints: l’onorevul Renzo Tondo, president de Regjon FVJ, Andrea Biavardi (Natural Style) e Red Canzian (Pooh).
Avîs
Si fâs savê che a partî cul gnûf an scolastic 2008/09 la Direzion Scolastiche regjonâl e à nomenât tant che Dirigjente scolastiche pal Istitût comprensîf di Paluce, la professore Lucia Chiavegato.