Unesco: lis Dolomitis a son patrimoni de umanitât
A Sivilie ae unanimitât il 'World Heritage Committee' e à decidût di declarâ lis Dolomitis patrimoni de umanitât. Cjapâts dentri ancje i grups dolomitics furlans. "Un ricognossimint storic" pal sotsegretari al Ambient Roberto Menia. Nûf i grups dolomitcs par une grandece totâl di 142 mil etars, a chescj si zontin altris 85 mil etars di areis cussignel, par un complessîf di 231 mil etars, spartîts jenfri lis provinciis di Trent, Bolzan, Belun, Pordenon e Udin: chest il gnûf patrimoni de umanitât stabilît dal Unesco. La candidature des Dolomitis e jere rivade in Spagne cul parê positîf pandût tes setemanis stadis de Iucn (la Union mondiâl pe tutele de nature), l'organisim internazionâl incargât di stazâ in prime istance lis candidaturis dai bens naturâi Unesco. Fin cumò in Italie il ricognossimint come ben naturâl al jere stât dât dome aes Isulis Eolie.

Fontanini: «Ents che a lavorin adun: model da ripeti»

"No ai mai vût nissun dubi che e podès lâ in mût difarent in cheste storie. Al è stât un percors lunc e fadiôs ma ae fin i risultâts a son rivâts". Nol è par nuie maraveât il president de Provincie di Udin on. Pietro Fontanini tal savê che il World Heritage Commitee al à uficialmentri metût dentri lis Dolomitis inte liste dal Patrimoni Universâl de Umanitât Unesco. La decision su pe candidature presentade de Italie e je stade cjapade ae unanimitât dai 21 membris de comission de Unesco dade dongje a Sivilie. "Un lavôr fat insieme chel di chescj ultins agns - al à sclarît Fontanini - che al à viodût lavorâ adun lis Provinciis di Belun, Bolzan, Pordenon, Trent e Udin: unidis par jonzi un cussì impuartant obietîf. L'inserîmint des Dolomitis furlanis inte liste de Unesco - al marche - al è un grant risultât, sedi dal pont di viste ambientâl, che di chel turistic, par fâ cognossi lis bielecis dal nestri teritori.

 

Tondo: «In curt il comissariament des Comunitâts Montanis»
"Lis Comunitâts Montanis no saran scanceladis, ma comissariadis, in mût centralizant e anti federâl". Lu à dit il President de Regjon FVJ, Tondo - pal cuâl i comissaris a varan di jessi dai tecnics bogns di podê puartâ indevant i disens strategjics di cui che "al à o al varà la deleghe pe mont". Si è fermât sul probleme impensant che "in ore presint in mont nissun al sa cui che al è il president o il vicepresident de Comunitât. No lis podin scancelâ parcè che a son struments utilis pe gjestion des risorsis europeanis. Lis comissariarìn, biel che in prospetive - al à dit Tondo - o pensi a mudâlis cui cussì clamâts comuns di valade. Lis Comunitâts cussì cemût che a son - al à continuât Tondo - no son buinis di furnî lis rispuestis che la int a vûl, ma la colpe no je dai sindics che ai  aministrin la Comunitât, ma di un mecanisim che al è sorpassât".

Une cjase a misure di… sparagn 
Pandudis a palaç Belgrât tant di une cunvigne lis modalitâts par "costruî" sot dal sparagn energjetic. A son stadis marcadis lis novitâts e la impuartance dal gnûf  Font sperimentâl pensât dal assessôr Teghil. Tal cjamp de energjie il miôr investiment al è…  il sparagn. Cheste le filosofie che e compagne il lavôr e i progjets metûts in vore dal assessorât ae Energjie de Provincie di Udin. Come, par esempli, il Font sperimentâl pal sparagn energjetic in edilizie, argoment di fonde de cunvigne davuelte al salon dal Consei di palaç Belgrât, ae presince di aministradôrs locâi, tecnics, professioniscj e imprenditôrs. "Si trate di une iniziative - al à dit l'assessôr provinciâl ae Energjie Stefano Teghil - metude in pîts par miorâ il mût di costruî, cun piçulis ricjadudis ancje pai belançs des fameis in chest dificil moment. Il Font sperimentâl al rivuarde lis gnovis costruzions, ma ancje chês esistintti. Po dopo il discors, al cjape dentri in maniere particolâr i furlans che da simpri ai sufrissin dal mâl dal modon".

 

Regjon: intervent dal conseîr Franco Baritussio
"L'avanç disponibil di 15,7 milions di euros al pant no dome che si cjatin devant a une manovre sute, fie dal dificil moment di crisi che o stin passant, ma ancje che la Finanziarie 2009 votade a Dicembar za e cjapave dentri, e no rimandave, impuartants intervents indreçâts massime al sociâl e ae economie". Chest il coment, dopo de fate buine dal sestament di belanç in I Comission, dal conseîr regjonâl Franco Baritussio, che subit dopo al à ribatût cemût che "frontâ daurman lis dibisugnis dal teritori al sedi stât un at di responsabilitât e di judizi de aministrazion Tondo".

Lât di Cjavaç: Zornade Europeane 2009 de Cjase pe Europe di Glemone
Avodât massime ai scuelârs des scuelis primariis, si è davuelt sul lât di Cjavaç il secont apontament (dopo chel di Vile e prime di chel di Tarvis) de Zornade Europeane 2009 che la Cjase pe Europe di Glemone e à volût risiervâ aes scuelis dal oblic. In particolâr, cun cheste iniziative si è volût laudâ dutis lis scuelis che a fasin part de Direzion Didatiche di Glemone, che a stan sierant, cun cetantis scuelis europeanis (di Belç, Gjermanie, Finlandie, Spagne e Polonie),  un progjet "Comenius", començât tal 2007, risiervât ae aghe e clamât "Il segret sot de superficie". Ma si è volût ancje impensâ il zimulament che la scuele elementâr di Osôf da agnorums e puarte indevant cuntune scuele slovene e une di Klagenfurt, presints ae manifestazion cuntun trop di rapresentants. La zornade si è sierade in ligrie cu la buine mangjative prontade dai brâfs alpins de ANA di Forgjarie e i volontaris de associazion paisane di Peonis.

Paluce: no si davuelzarà il "country festival"
Par motîfs organizatîfs e di sigurece il responsabil de manifestazion il siôr Michele Sangion al à scugnût spostâ l’apontament alì dal:  RANCH MONDELLI a Flumignan dongje Talmasson. Plui informazions si puedin vê lant a viodi sul sît internet: www.countryfestival.it

Fontanini: «Misurâ lis spesis corints, stant il trend negatîf des jentradis»
Vie libere al rindicont di gjestion 2008 e ae 1 verifiche dai ecuilibris di belanç e dal stât di metude in vore dai programs 2009. A palaç Belgrât si è dât dongje il Consei provinciâl par fevelâ ancje dai doi documents economics-finanziaris. Par ce che a tocje il rindicont 2008, pandût dal president on. Pietro Fontanini, si è vût un avanç di aministrazion di 11 milions e 229 mil euros. "Un periodi aministratîf - al à marcât Fontanini - marcât da doi fatôrs di fonde: di une bande la calade di cualchi jentrade tributarie e, di chê altre, il trasferiment di gnovis funzions ae Regjon". Par ce che a tocje i tribûts, a pesâ di plui, chei riferîts ae Impueste provinciâl di trascrizion (Ipt). "Tal 2008 - al à sclarît Fontanini - si è viodût un sbassament de Ipt dal 7,4% cause il plui bas numar di imatricolazions di machinis. "Daspò de cressude dal personâl causionât dal trasferiment des gnovis competencis, tal 2008 e je cressude la spese relative al personâl. Dut câs - al à continuât - cheste aministrazion e je stade cetant atente tal contegni la spese corint, stant il particolâr moment di crisi che al rint malsiguris lis jentradis inmò par un ciert periodi di timp.

Agemont: ae unanimitât il gnûf diretôr al è Luigino Maravai 
Al è Luigino Maravai il gnûf diretôr di Agemont Spa, l'Agjenzie pal disvilup economic de mont. Nomenât ae unanimitât dal cda tant de ultime riunion, Maravai al sostituìs Pier Antonio Varutti e al cjaparà uficialmentri l'incaric, par trê agns a timp determinât, a pene che al sarà sierât l'iter che al puartarà, dentri di Lui, ae cession dal 100% di Agemont ae Regjon Fvj. Maravai, 63 agns, nassût a Longaron e laureât a Triest in Siencis politichis, al à lavorât par tancj agns inte aministrazion regjonâl dal Fvj, fasint ancje fra lis altris robis, il diretôr de Direzion regjonâl agriculture e pescje, de Aziende forestis e parcs e dal Servizi autonome pal disvilup de mont.

Picco: riscli cecjis in FVJ
Il conseîr regjonâl de Leghe Nord, Enore Picco, al à presentât une interogazion ae Zonte par cognossi i intendiments de Regjon su pal probleme, simpri plui sintût, de presince des cecjis intal nestri teritori. “Si è stimade une crescite dai câs di encefalite, massime tes zonis de Alte Furlane e in mont. Chest e vûl dî che la presince di chestis bestiis –al spieghe il conseîr Picco – e je grande. Dal sigûr un fenomen che al va pâr a pâr cu la cressite dal numar dai cignâi, no dome su pes nestris monts ma ancje in citât, come par esempli a Triest. O soi convint che al sedi impegn de Regjon garantî la sigurece de salût ae sô int e bisugne procedi di corse par fermâ a curt chest pericul, prime che al deventi pardabon un alarm”.

Carinzie e Provincie: adun pal gnûf bant Interreg
Un incuintri impuartant jenfri la delegazion carinziane vuidade dal assessôr Josef Martinz e il president on. Pietro Fontanini e l'assessôr ae mont Ottorino Faleschini: de riunion a son burîts fûr i trê progjets che i doi ents a puartaran indevant a pene che al jessarà il gnûf bant Interreg Italie Austrie. Content dal risultât Faleschini, par vie che i progjets a son chei pensâts dal ent di aree vaste: un pal disvilup di un turisim cence confins; un didatic e un su pe biodiversitât. "Tant de riunion - al à notât Faleschini - si è palesade la grande disponibilitât dai rapresentants de Carinzie a lavorâ inte otiche di chê Euroregjon, là che i nestris doi teritoris ai àn un rûl di fonde. E Fontanini al continue: "il leam cu la Carinzie e à lidrîs lontanis. Chel che in vuê podin fâ al è lavorâ insieme par seondâ il passaç di turiscj che dal Friûl a ledin in Carinzie e al incontrari".

Tierç di Tumieç: Memorial "Ivo D'Orlando"
A Tierç di Tumieç si è davuelt il Memorial "Ivo D'Orlando", valit come tierce prove dal trofeu Gortani di Corse in mont. Passe 200 partecipants ai àn corût dilunc i percors che si disvuluçavin jenfri stradis e trois dal paîs, par dopo cjatâsi a mangjâ sot il tendon de sagre locâl. Da segnalâ la premiazion cul supuart dal DJ che oltri a compagnâ cun musiche i vincidôrs, al à ancje fat di animadôr sburtant la int presint a fâsi sintî. La Polisportive Timaucleulis ancjemò une volte e à podût valêsi des vitoriis di Michele Bellina tai "Cadetti" e Marco Primus, cun di plui la gnove rivade Veronica Morassi e je rivade prime jenfri lis "Allieve". Fabrizio Puntel tai "Ragazzi" al à finît secont e trê tierçs puescj a son stâts cjapâts da Simone Ferigo, Gabriele Primus e Giuseppe Puntel rispetivementri tai "Cadetti, Juniores e Senior".