Fontanini: «Friûl simpri plui tal cûr de Europe»

«Puartait tal vuestri paîs il ricuart dal cûr dal Friûl: il Friûl, cul so teritori e lis sôs carateristichis». Chest l’invît che il president de Provincie on. Pietro Fontanini al à indreçât ai fruts vignûts da Ongjarie, Russie, Serbie, Ucraine, Grecie e Estonie, tai dîs stâts in regjon pal prin "Seminari internazionâl de Zoventût di confin". Tant dal incuintri, Fontanini, al à sclarît ai fruts ce che al è il Friûl, «un puest – al à dit – là che si cjatin sedi lis monts che il mâr. Dulà che e je une impuartant minorance, chê furlane, cu la sô storie, la sô identitât, la sô lenghe». Dopo vê pandût i ponts fondamentâi de storie de Piçule Patrie, Fontanini al à ribatût chel che, inte Europe cence confins, al è il rûl di fonde dal Friûl. «Il nestri teritori – al à spiegât – al è pont di incuintri di trê monts che a formin la Europe: chel todesc, chel slâf e chel latin. Si trate par nô di une grande oportunitât par rilançâ il nestri rûl». Une colocazion strategjiche ancje parcè che, tal contest regjonâl, chê furlane e je la economie plui impuartant. Ancje se in chest moment o stin traviersant un dificil moment dal pont di viste economic, achì a son logadis ciertis industriis a nivel internazionâl cognossudis par dut il mont. Vere fuarce dal nestri tiessût economic il manifatturiero, un setôr che in cumò al sta paidint e che al è in spiete de riprese».

Provincie: progjets di scambi cu lis scuelis argjentinis
Argjentine e Provincie di Udin simpri plui dongje. A infuartî il leam jenfri i doi teritoris l'incuintri tai dîs stâts tra il president on. Pietro Fontanini e la delegazion argjentine cul ministri Walter Grahovac e il vice ministri Carlos Sanchez. Jenfri i argoments principâi dal incuintri la pussibilitât pai zovins students argjentins di fâ periodis di formazion in Friûl. Une iniziative che a varès di jessi metude in vore, seont il ministri argjentin, il prin pussibil stant la dibisugne di vê zovins preparâts in materiis tecnichis e sientifichis. "Il nivel di preparazion furnît dai nestris istitûts al è altissim - al à notât Fontanini - in fats par ce che a tocje i scuelârs furlans a samee, secontri i ultins scandais, che a vebin rivâi dome jenfri i students dal nord Europe. Al è par chest che o fasarìn in maniere che a podin jessi metûts in vore in curt i scambis interculturâi jenfri fruts argjentins e furlans.

Socors alpin: cjatade la femine pierdude da doi dîs
Si è sierade benon la brute aventure di une siore restade par dôs gnots difûr. La femine e je stade cjatade de scuaris dal Socors alpin dal FVJ, cuntun intervent che al à viodût impegnâts ancje i cjans de Vuardie di Finance, volontaris de Protezion civîl regjonâl e il Cuarp Forestâl (par un totâl di une trentine di personis). La femine, e jere jessude par fâ un zîr cul so cjan, ma no viodintle tornâ, la famee, dopo vêle cirude, e à clamât i socors, che le àn cjatade, in buine salût - dopo doi dîs apont - par dongje dal Tiliment. 

Mattiussi: Udin e Timisoara plui dongje 
“Vivi insieme”: si è sierât cun chestis peraulis deventadis subit un sproc l’incaric dal  assessôr provinciâl udinês aes Relazions internazionâls, Franco Mattiussi, a Timisoara, impegn marcât ancje de presentazion des propuestis turistichis furlanis oltri che dai prodots locâi e massime dal persut di Sant Denêl par vie de presince dal diretôr comerciâl de societât Dok Dall’Ava, Silvia Forabosco. Tant de sô visite in Romanie Mattiussi al à incuintrât il president de Provincie di Timisoara, Constantin Ostaficiuc, su la fonde dal acuardi di colaborazion firmât za di un an dal president de Provincie di Udin, on. Pietro Fontanini, cul ent rumen. Ostaficiuc al à marcât «il fuart rapuart esistintti jenfri lis Provinciis, lis tantis robis compagnis tra lis dôs zonis ma soredut lis grandis pussibilitâts di disvilup soci-economic ancje in gracie dai progjets europeans».

 

Tumieç al da acet aes fameis taramotadis

Campanons, la corâl "G.B. Cosetti" a legrâ la cerimonie, i sindics di Tumieç e Zui a saludâju cun calôr, i volontaris de Protezion Civîl che trê mês indaûr ju àn judâts cumò ur pandin lis bielecis dal nestri teritori. Chest il bon acet che la comunitât tumiezine e à volût riservâ aes fameis taramotadis de frazion di Sant Jacum de Acuile, rivadis in Cjargne par passâ cuatri zornadis in gracie de iniziative di solidarietât metude in vore dai Grups di Protezion civîl comunâl di Tumieç e Zui, des Pro Loco e cu la colaborazion di altris ents dal teritori. A acolziju devant dal Domo l'assessôr comunâl ae Protezion Civîl dal comun di Tumieç Renzo De Prato, il siôr santul Bonsignôr Angelo Zanello e int dal puest che e à volût jessi presint ae cerimonie, che dopo si è spostade in municipi pai salûts uficiâi dai sindics dai doi comuns cjapâts dentri, Dario Zearo e Elio Moser.

 

Gnove sede pe Associazion "Candoni" di Darte

Dopo un lunc periodi di timp e in gracie de sensibilitât de Aministrazion comunâl di Darte, e je finalmentri pronte la sede de Associazion Culturâl "Luigi Candoni". Logade intun maraveôs edifici de frazion di Cedarcjis, pôc lontan de cjase dal dramaturc furlan cognossût in dute Italie, la sede de Associazion Culturâl Luigi Candoni, e racuei sedi l'archivi personâl dal scritôr cjargnel, sedi l'archivi dal premi a lui avodât, che al cjape dentri centenârs di copions e tirâts dongje cun pazience e passion dal professôr Armando Bortolotto  e cumò regalâts al Centri de fie Irme. In plui, l'edifici al ospitarà no dome la Biblioteche comunâl, ma ancje lis associazions locâls sportivis e culturâls. Il Centri al è stât a fuart volût de stesse associazion che e à come president Giuliano Candoni e e conte jenfri i siei iscrits i plui atents studiôs de opere candoniane in Cjargne vâl a dî Luigi Dereatti e Celestino Vezzi.

Ocjâi fats in Cine e vendûts come made in Italy: Safilo sot procès

Un indagjin su pe supueste copie di ocjâi fats in Cine ma vendûts cul marchi "Made in Italy" e je stade inviade tai confronts de Safilo da bande de Vuardie di Finance. La investigazion e je buride fûr da une schirie di secuestris di passe 200mil ocjâi, fate cualchi mês indaûr intal stabiliment furlan di Pricinins.

Po dopo si è vût un altri secuestri di documentazion a Padue e Plêf di Cjadovri. Daûr de ipotesi che il Procuradôr de republiche di Udin, Barbara Loffredo, e sta studiant, l'aziende a varès fat fâ intal Lontan Orient i ocjâi, e dopo in Italie e saressin stadis tacadis lis tichetis "Made in Italy". Si definiressin duncje i reâts di broi in cumierç e vendite di prodots segns ingjanôs. Tai ultins mês, lis fabrichis furlanis a son stadis al centri di un progjet di ridimensionament, cuntune pierdite di dibot 750 puescj di lavôr.

 

Grâf il zovin becât de cecje. La infezion e à cjapât il sisteme gnervôs
E je rivade la Istât e, cu la biele stagjon, e je tornade la emergjence cecjis. Un om di trente agns, resident a Glemone, al è malât di une penze forme di neuroborreliosi dopo jessi stât becât da une cecje. La malatie, che e à fat ricoverâ l'om za di une setemane, i à cjapât il sisteme gnervôs, causionant seris problemis. Za ca di un mês l'om al à tacât a pandi sintoms stranis: tant che dificoltât tai moviments e intal fevelâ. Une neuropatie cognossude, la sô, e par cheste al è stât ricoverât tal repart di midisine dal ospedâl di Conean par une serie di aciertaments che a àn stabilît la malatie di neuroborreliosi.
"E pues sucedi - a sclarissin i miedis - che la cecje si distachi dopo vê morbât la persone. In chest câs probabilmentri al è sucedût cussì".
Dopo vê fat 20 dîs tal repart di midisine, là che al è stât curât cuntune terapie di pueste, l'om al è stât trasferît tal repart di fisioterapie tal ospedâl di Vitorio Venit.

Comissariament des Comunitâts Montanis
Il governadôr Renzo Tondo e la sô maiorance a àn decidût pal comissariament des  Comunitâts Montanis tornant a meti in vore un film za viodût tal 2001. “Come che za sui saveve, no ‘nd è in ore presint ni une idee di metude a puest ni un progjet alternatîf di gjestion de mont – a àn declarât i conseîrs Della Mea e Marsilio – il centri diestre al guvier in Regjon prime al disfâs e dopo forsit al fâs e intant nus puarte indaûr di 8 agns ricreant une situazion che in chê volte al veve dal sigûr contribuît a peiorâ il cuadri des dificoltâts de mont. No reste che sperâ che no si ripeti. Ma no pues jessi di bon augûr che a vegni gjavade la gjestion ae mont a cui che in mont a vîf e che si metin da bande i sindics che tant a àn fat pe tutele e promozion dal teritori.

Zui: gnove zonte comunâl
Tant de cerimonie dal zurament, il sindic, Elio Moser, al à comunicât al consei comunâl la composizion de gnove zonte. In detai: Gian Pietro Tomat, vicesindic, za presint inte legjislature passade, delegât ae agricolture, ativitâts produtivis assistence, Luigino De Prato, assessôr al turisim, lavôrs publics e ae edilizie privade, Denis Romano, assessôr ai boscs, al ambient e teritori, Luciano Agostinis, assessôr al patrimoni, manutenzions e  politichis energjetichis.  Cun di plui, il sindic al à pandût di vê dât sù incarics di colaborazion speciâl ai conseîrs: Stelio Dorissa, sanitât, servizis sociâi, assistence, culture, museu e protezion civîl, Eros D'Orlando, politichis zovanîls, sport, scuele e associazions e Antonio Agostinis, personâl e deleghe al consei de Comunitât Montane de Cjargne.

Colaborazion jenfri la "Patrie dal Friûl" e la Associazion Udinês Club 

Chei dal Udinês a fevelin furlan: tant de ultime pontade di Mondo Bianconero, la trasmission dai tifôs in onde a www.udineseclub.net, il responsabil dal ufici stampe de Auc Gianluca Bertozzi e il vicediretôr dal mensîl "La Patrie dal Friûl", Christian Romanici, a àn presentât la sinergjie jenfri lis dôs associazions. In fats, i comunicâts a saran publicâts sedi par talian che par furlan. Cheste colaborazion  si zonte a chês za in vore jenfri la redazion de "La Patrie dal Friûl" e chês dal "Ent Friûl tal mont" e dal notiziari il Dono de Associazion Furlane dai Donadôrs di Sanc