07 MAGGIO 08
Domenie ai 4 di Mai si è davuelzût la liturgjie dal "BACIO DELLE CROCI"
Domenie ai 4 di Mai si è davuelzude a Zui, une des liturgjiis plui fassinants de nestre regjon. Il "Bacio delle Croci" in fats al è un at di sotanance des glesiis filiâls inviers de Glesie mari di Sant Pieri, che al impense il timp passât cuant che Zui e jere sede dal vescul, e prime ancjemò, impuartant citât romane. Tante la int presint aes 10 al radun des crôs alì de Gleseute "della Beata Vergine delle Grazie", che si cjate sot chê di Sant Pieri, po dopo la pussision viers il "Plan da Vincule", dulà che aes 10.30 si è tignût l'antîc rituâl dal "Bacio delle Croci".Ravasclêt - Si è davuelzude "Fasino la Sensa?"
La edizion 2008 de scampagnade de Sense tai boscs di Voscjanazies e je stade indreçade ae riscuvierte des Aganis. I paisans di Ravasclêt, Salârs e Zuviel e tancj altris a son stâts invidâts de Pro loco di Ravasclêt a cjatâsi domenie ai 4 di Mai intal bielissim pecêt che si cjate subit sore Salârs, la che agnorums indaûr al jere logât un fuartin antîc, stramanât de culture popolâr dilunc lis etis cul non di Cjastiel di Voscjanazies. Marina Lunazzi di Verzegnis, urint dai risultâts de sô tesi di lauree in lenghe e leterature furlane, e à sclarît cemût e parcè che lis Aganis a sedin da simpri peadis a stret ai lûcs furlans e cjargnei dulà che la int si dave dongje par fiestezâ la Sense. Adun cu la Pro Loco des Vals dal Nadison a son stadis proponudis musichis e contis de “Benecia” che a àn tant che protagoniste la “Krivapeta”, il non dât aes Aganis slovenis. La fieste si è sierade cu la preparazion sul puest di petis tradizionâls e cun zûcs par fruts tal mieç dal bosc e intai lûcs pandûts des liendis popolârs tiradis dongje dal abât Leonardo Morassi di Salârs.
Protocol di intese jenfri la Provincie di Udin e i Comuns
«Al è il gno prin at public. O stoi par sotscrivi chest protocol di intese jenfri i 45 comuns dal teritori provinciâl udinês, dacuardi su pai criteris metûts in vore dal Comissari Fusco tal privilegjâ lis scuelis dai comuns sot i 3 mil abitants, ma a fuart critic cu la passade Zonte regjonâl che e à metût in vore un ripart penalizant pe Provincie di Udin su la fonde di un parê pandût dal Upi tant di une sentade dulà che no jerin presints lis provinciis di Udin e Pordenon»: chestis lis peraulis dal president de Provincie di Udin, Pietro Fontanini, tant de cerimonie de firme dal protocol di intese pe edilizie scolastiche.
«A pet di 145 domandis - al à sclarît l'onorevul Fontanini - la gjestion dal comissari e à stabilît intervents in 45 comuns cun mancul di 3 mil personis che a podaran cussì inviâ mutuis par 15 agns fintramai a 11 milions di euros. In detai, si podaran començâ i lavôrs edîi intes scuelis indreçâts ae sigurece, ae salût e al abatiment des barieris architetonichis».
Ma e je stade propit la dibisugne di mudâ direzion inte spartizion dai contribûts regjonâi a dicerni lis peraulis dal president Fontanini: «chest ripart al è stât spartît in cuatri tocs no tignint cont de popolazion e dal teritori, val a dî dismenteant che la Provincie di Udin e je dibot la metât de regjon slargjantsi sul 48% dal teritori dal FVJ».
Tamau: alc si môf …
La Pro Loco di TimauCleulis e fâs i prins pas e chescj a samein pandi che il so percors al sarà siôr di gnovis pensadis e iniziativis. Pe gnove Associazion si svicine il prin impuartant apontament e il so president Fernando Colajacomo, al à mandât a chei altris presidents des associazions paisanis une letare, che chi sot ripuartin:
« La Pro Loco TimauCleulis, pe 24 mostre des cjaris che si davuelzarà il prin dì di Zugn a Tamau in place S. Pio X, e vûl inmaneâ il tradizionâl marcjât dai prodots dal artesanât e gastronomie locâl. O saressin cetant contents se la vuestre associazion a cjapàs part cun materiâl turistic, culturâl e di informazion su pe proprie ativitât (libris, depliants, opuscui, CD e vie indevant) cul fin di presentâ e spandi il lavôr che lis associazions a davuelzin dentri dai nestris paîs. E je improibide la vendite di mangjâ e bevi. La Pro Loco a metarà a disposizion dai gazebo pes associazions che a cjaparan part ae iniziative, a gratis, biel che par ducj chei altris - comerciants e artesans - a vignarà domandât un contribût di 20 euros par chescj. Par motîfs di organizazion, si domande di fâ rivâ lis adesions dentri dai 10 di Mai, clamant al numar 0433 779441, numar la che si pues indreçâsi ancje par dutis lis informazions».
Screade la mostre “La Patrie dal Friûl: 1077 – 1797”
E je avodade ae storie, art, lenghe e usancis de Patrie dal Friûl la mostre event screade vinars ai 2 di Mai inte Glesie di Sant Antoni Abât a Udin. Inmaneade de Provincie di Udin, cul jutori de Regjon e de Fondazion CRUP, la mostre e restarà vierte fintramai ai 15 di Zugn des 10 aes 12.30 e des 16.30 aes 19, sedi vie pe setemane che tai dîs di fieste, gjavant i lunis. Ae inaugurazion a erin presints il president de Provincie di Udin, on. Pietro Fontanini cui rapresentants de Aministrazion Provinciâl di Udin, i curadôrs de mostre e dal catalic Giuseppe Bergamini e Gianfranco Ellero, e ancje il progjetist Leonardo Miani. Il spirit autonomist furlan, sul imprin culturâl fin al 800, po dopo ancje politic e aministratîf, al à sburtât la dibisugne di informazion storiche, no dome pai adets ai lavôrs, ma ancje pe opinion publiche. La Provincie di Udin, fasintsi interprete di cheste largje necessitât culturâl, e à decidût di valêsi de colaborazion di rimarchevui studiôs pe prontade de mostre e dal catalic di mût di rispuindi ae domande: "ce ise la Patrie dal Friûl?". Da documentazion disponibil e salte fûr che la locuzion "Patrie dal Friûl", ven a stâi une regjon che e à une sole leç, e fore cugnade (coniata) dopo il 1077 - an di istituzion dal Stât patriarcjin - par vie dal cuâl il Friûl al è stât guviernât da un sôl princip - patriarcje.Tumieç - Un libri su pe cure des malatiis mentâls
La malatie mentâl e jentre cence visâ inte vite des personis, e rive, e colpis e segne. La Leç 833 e stabilis un principi fondamentâl: ae fonde dal tratament sanitari, al scuen jessi no un judizi di pericolositât o di scandoleç public ma prin di dut la bisugne di cure dal malât. Intal FVJ il spinâl de organizazion teritoriâl al è il Dipartiment di Salût mentâl, cun funzions di cure, riabilitazion e reintegrazion sociâl. I mûts di davuelziment di chestis funzions a son tancj e a partissin des curis classics, par rivâ al compagnament des personis, siche duncje doprant struments professionâls ma ancje stant dongje tant de terapie. In cheste suaze si loghe la presentazion dal libri "ESISTE ANCHE LA BUONA SANITA': STORIA DI UNA PARANOIA" de autore Patrizia Vascotto. La presentazion si davuelzarà vinars ai 23 di Mai alì de librarie "La corte del libro" a Tumieç aes 5 sore sere.
Pedopornografia on line, stop ai paiaments
E va indevant la strategjie europeane a pro dai minôrs. Daspò de metude in vore de risoluzion da bande dal Parlament di Strasburc (a firme de deputade di An Roberta Angellilli), la Comission europeane e sta lavorant par incressi cheste strategjie di azion. Jenfri i gnûf ponts, la metude in vore di un numar unic european (116000) di assistence ai minôrs e la fermade dai paiaments fats par mieç di cjarte di credit o eletronichis su internet par comprâ imagjin di abûs sessuâi su minôrs. In gracie ae colaborazion operative de Comission europeane cu la Agjenzie europeane dai dirits fondamentâi si sta ancje finint la bancje datis su pes condanis par violencis sui fruts, in maniere che i colpevui no podin vê un lavôr che ju meti in contat cun fruts. I dirits dai minôrs a son part impuartant dai dirits dal om, che la Union europeane e scuen rispietâ daûr dai tratâts internazionâi in vore. La stesse Union europeane e à ricognossût a clâr i dirits dai minôrs inte Cjarte dai dirits fondamentâi.MTB- Domenie ai 15 di Zugn la "Sauris Superbike"
Si davuelzarà domenie ai 15 di Zugn la 11 edizion de "Sauris Superbike", une des plui penzis garis internazionâls riservadis ai bikers. In detai il riferiment al è al percors "Extreme", lunc 84 km , cun 3200 metris di dislivel. Il percors al rivarà, come par solit, ae forcele Pieltinis. La "Sauris Superbike" e je vierte a tesserats e no; chescj ultins a scuegnin però puartâ un certificât medic di idoneitât. Il presit de iscrizion al è di 25 euros pe Small e pe Classic dentri di miercus ai 11 di Zugn; se e ven fate dopo, il presit al cres di 10 euros. La Extreme e costarà 30 euros (40 par chei che si iscrivin jenfri joibe 12 e sabide 14). Dut gratis, come simpri, pes feminis. Riconfermât, pal cuint an, la insedade de gare tal circuit plui impuartant de Austrie, la "Trek Mountainbike Challenge", che a puarte ae manifestazion cetancj cicliscj forescj. Domenie dopo misdì si davuelzarà il savorît "sparsut party" e la premiazion sot il tendon in place a Sauris di Sot.
Buinis risultis intal schi di fondo pai zovins dal TimauCleulis.
Ancje chest an i sportîfs, paris e maris e i colaboradôrs de Polisportive Timaucleulis si son cjatâts aì des scuelis elementars di Tamau e Cleulis par tirâ lis somis de stagjon invernâl da pôc finide. Al apontament a jerin presints passe un centenâr di personis che a àn podût gustâ la bonissime paste preparade da Sandro dal Grup Alpins di Cleulis e i dolçs fats des maris. Daspò dal salût dal president Flavio Mentil, si son letis lis relazions, si è fate la premiazion dai atletis e si è davuelzude ancje la loterie siore di premis. Parcè che a rivuarde il schi di fondo no simpri i fantats a son rivâts adore di preparâsi su la piste di cjase cause la pocje nêf, dome i piçui lu àn podût fâ.
Par fortune al è simpri fuart il vivôr dai zovins e il setôr schi – almancul pe societât – al sta cressint cun buinis risultis da bande de zoventût. Cun di plui bisugne pensâ che ancje se il fin de societât al è chel di svicinâ i zovins al sport, nol va dismenteât che cheste ativitât a permet ancje moments di socializazion, preparazion ae fadie e al jonzimint di un obietîf, sedi sportîf che uman.