21 MAGGIO 08
Udin: presentade la “Giornata nazionale dell'arte e creatività studentesca”
Inmaneade de Provincie di Udin la “Giornata nazionale dell'arte e creatività studentesca” alì dal Centri studis udinês in vie Leonardo Da Vinci. A presentâ la iniziative a jerin il president de Provincie di Udin, on. Pietro Fontanini, che al à laudât la partecipazion ative di 21 scuelis, dibot il dopli rispiet al 2007, il sindic di Udin, Furio Honsell, il docent referent de Consulte provinciâl dai students di Udin, Emanuele Bertoni, e la presidente de Consulte Letizia Di Martino. La zornade e à viodût la presince di stand, musiche e mostris, la esibizion dai vincidôrs di Pagella Rock 08, torneus sportîfs cu la presince ancje de “Udinese calcio” e de Snaidero basket, une manifestazion di aeris cun rivade al parc.
La Sata Hi-Tech Services e sbarcje tal Paîs dai Faraons
Sata Hi-Tech Services, dite furlane leader inte sigurece informatiche e inte privacy, adun cun Siemens, un tra i plui grancj grups mondiâi de IT, al produsarà lis clâfs Usb pal Ministeri di Grazie e Justizie egjizian, come sole Autoritât di Certificazion dal paîs african. Chest rimarchevul travuart, cun aziendis che a unissin lis competencis inte critografie avanzade e inte firme digjitâl, e je la juste conclusion di mês di lavôr penç: il “token” sielt al met dentri intune comude clavute usb la funzion di une smart card critografiche e chê dal letôr, facilitant l'ûs dal imprest e sbassant i coscj di manutenzion e assistence pal produtôr. Il progjet sperimentâl, che al començarà in chescj dîs, al permetarà a ducj i dipendents de publiche aministrazion egjiziane, tai 12-18 mês cu vignaran di doprâ il token furlan pe gjestion de firme digjitâl.
"Chest risultât - al marche il president, dotôr Sandro Taddio - al è il prodot dal sfuarç e dal ferbint lavôr de nestre scuare, che e cjape dentri zovins inzegnîrs e informatics furlans e i centris di ricercje des Universitâts talianis e forestis, si augurìn che chestis risultis a puedin vê sucès ancje dentri de publiche aministrazion de nestre regjon".
Consei provinciâl di Udin: fatis buinis lis declarazions programatichis
Cun 18 vôts a pro e 11 contraris il Consei provinciâl di Udin al à fatis buinis lis declarazions programatichis dal president de Provincie, on. Pietro Fontanini. E il president inte sô repliche ae discussion, lade indevant par 5 oris, al à sclarît miôr ce che al veve za pandût la setemane stade, rimarcant cualchi obietîf programatic che la maiorance di centri-diestre di Palaç Belgrât e à intenzion di puartâ indevant dilunc 5 agns. "La formazion professionâl - al à dit l'onorevul Fontanini - e je za di competence des Provinciis intes Regjons ordenariis, al varès di jessilu in curt ancje in FVJ", e al à po dopo metût i puntins su la "i" ancje parcè che e tocje il rapuart cun Triest: "no volin meti su sierais cuintri il cjâf lûc regjonâl, ma no podin nancje lassâ fâ e decidi dut lajù jessint sotans di criteris che nus gjavin ce che nus spiete. Atenzion - al à zontât il president – o stoi fevelant no privilegjis ma di ce che nus spiete". Su pe leç Iacop, il president al à marcât che "e à svuedât il rûl des Provinciis, par chest o speri che la Zonte Tondo e riviodi cheste leç dant sburt ae autonomie e ai jutoris pai ents locâi".
Gnovis oportunitâts pal teritori montan in gracie dal font Agemont
E va indevant la ativitât de Agemont a sosten des pmi dal teritori montan. In fats a son stâts tornâts a vierzi i tiermins pe presentazion des domandis indreçadis al font di garanzie par secondâ l'acès al credit da bande des PMI" (Docup obietîf 2 2000-2006).
"Chê finanziarie - al à sclarît il president de Agjenzie Alberto Felice De Toni - e je une des macroareis di intervent di Agemont, adun ae animazion economiche e aes ativitâts dal Centri di Inovazion Tecnologjiche. La Agjenzie e met in vore intervents a pro des pmi midiant prestazions di garanzie a front di finanziaments a tiermin medi e partecipazions al capitâl di riscli dant une vere e proprie oportunitât di cressite pes piçulis realtâts economichis dal teritori".
Lis garanziis dadis da Agemont a pet di operazions di finanziament a medi e lunc tiermin (minim di 18 mes), no podin superâ i 300mil euros par operazion e par imprese e a cuvierzin une percentuâl massime dal 50% dal finanziament dât. Il tiermin par podê sfrutâ cheste oportunitât des garanziis di Agemont al scjât ai 30 di Zugn 2008.
Collino: acuardi istituzionâl Stât - Regjon pes infrastruturis dal Friûl
"A covente un fuart acuardi istituzionâl jenfri la regjon FVJ e il Stât che al previodi a pro de Regjon podês straordenaris pe metude in vore di oparis che a son urgjents, tant che: i colegaments dai puarts dal Alt Adriatic, cjapant dentri ancje Capodistrie, la tierce corsie de Vignesie - Triest, la sierade dai lavôrs de A28 e de Villesse-Gorizia, il Corridoio 5 e la Linie a Alte Velocitât", chest ce che al à domandât in aule il senatôr Giovanni Collino tant dal so intervent pe fiducie al Guvier.
"Il FVJ al è pe Italie l'anel di leande jenfri la vecje e la gnove Europe , une zone strategjiche che tal interès dal Pais e à dibisugne di une plateforme logjistiche eficaç", al à continuât il senatôr Collino che al à memoreât il Taramot dal '76, cuant che la Regjon adun cui Comuns a fore delegade ae gjestion de ricostruzion in pôc timp, su la fonde dal principi de autonomie, un esempi che al pant in ore presint un câs unic in dute la storie de republiche.
I savôrs de Cjargne e resurissin inte gnove edizion di Gianni Cosetti
Une gnove grafiche e pant la gnove edizion di "Vecchia e nuova cucina di Carnia", il libri scrit dal chef Gianni Cosetti, cogo di nomee internazionâl e aromai un personaç de sô cjare Cjargne, muart tal 2001. La presentazion uficiâl de opare, inmaneade de Fondazion Museu Cjargnel des Arts e Tradizions popolârs adun cu la Regjon FVJ , la Comunitât Montane de Cjargne, l'Ascom e l'Isis Linussio di Tumieç, si è davuelzude tai dîs stâts inte suaze dal Museu cjargnel "Luigi e Michele Gortani" di Tumieç e e à viodût la partecipazion di Marino Corti, assessôr ae culture de Comunitât montane, di Adriano Cattelan, president dal Museu Cjargnel e dal conseîr regjonâl Enzo Marsilio.
"Valorizâ la tradizion dal mangjâ cjargnel - al à dit Corti - a vûl dî stramanâ, massime tai zovins, la sô culture e lis sôs tradizions; robis indispensabilis par tignî vîf il teritori e par creâ percors di svilup turistic che a cjapin dentri art, storie, mangjâ, artesanât e paisaç. Cun di plui cheste opare e je un tribût a chest grant chef che al è rivât adore a esaltâ i savôrs de cusine tradizionâl cjargnele, fasintju plui delicâts e bogns di jessi avuâl cu lis scuelis di cogarie internazionâls.
Tamau - Començade la stagjon estive de Polisportive
Domenie ai 11 di Mai e je tacade la stagjon estive de Polisportive Timaucleulis cu la partecipazion al 5° Memorial Cristian Cimenti. La cronoscalade da Cjasegnove a Curiedi e à premiât jenfri i oms Manuel Da Col de Marciadôrs Calalzo cul timp di 25'25'', biel che jenfri lis feminis e à vint Lavinia Garibaldi pe Atletica Brugnera in 32'10''. I partecipants ae manifestazion a son stâts dibot 150 e la biele zornade e à permetût di gustâ di fûr intun clime clip di primevere. Jenfri i atletis de Timaucleulis al è rivât 13° Giampaolo Englaro, classe 1956, fermant il timp a 28'55'' e jenfri lis feminis, daspò dal sucès de fie, Luigina Menean rivade al 5° puest, 30 Xenia Capelli. I altris atletis si son cussì compuartâts: 19° Erwin Puntel, 56° Roberto Mentil , 63° Del Bon Miuri, 68° Cortolezzis. Jenfri i Zovinissims, che a podevin fâi 6 km compagnâts dai gjenitôrs, 1° Fabrizio Puntel e fra lis feminis 8 Veronica Cortolezzis. L'alenadôr Luciano Bulliano che al à Stât daûr ae gare, al à cjapât sù impressions une vore positivis su chest prin apontament come che al à podût gjoldi de contentece dai atletis pes gnovis divisis dal dut paiadis de "buteghe da Coperative" di Paluce di Mauro Unfer, blancjis e blu cemût che e vûl la tradizion che e à peat chescj colôrs ae Polisportive.Luciano Bulliano al lasse il comitât regjonâl Friûl Vignesie Julie
Tant de ultime riunion davuelte jenfri i tecnics e i responsabii dal setôr schi di fondo, l'alenadôr Luciano Bulliano al à pandût la sô decision di lassâ il comitât regjonâl FVJ par podê doprâ dut il so timp ae preparazion dai atletis de sô societât. La decision, dopo passe 30 agns di presince tal comitât, e je stade cjapade pe incressite dai impegnis de Polisportive Timaucleulis causionade de zonte dal setôr de corse cun chel dal schi. Propit tal fondo, Buli, chest il so stradinon, al pues vantâsi di ve cressût 3 gjenerazions intune stesse famee. La gnove e je stade cjapade cun grande contentece da bande dai atletis che lu àn viodût presentâsi, cun maravee, ai prins alenaments de corse in mont.
0sôf - Dut pront pe Biker Fest
Dai 5 ai 8 di Zugn si davuelzarà la BIKER FEST , che par cheste 22 edizion e torne tal Parc dal Rivellino a Osôf, une zone di passe 240mil m2 intal vert, che e à za logât chest storic apontament, regjistrant ancje 30mil personis. Protagoniste de BIKER FEST e sarà, come simpri, la grande musiche cun concierts internazionâi. Si podaran ancje viodi lis ultimis creazions dai miôr "customizer" internazionâi al BIKE SHOW, che ogni an al fâs ancje vinci 3 viaçs pe Daytona Bike Week (USA) e altris premis impuartants. Si impense che la iscrizion al Bike Show e je gratis e vierte a ducj. Po dopo pai passionâts di machinis americanis, domenie 8 si davuelzarà la 13a US CAR REUNION, storiche dade dongje di machinis a stelis e strissis, cun esibizions e provis.
La manifestazion si cjate intune des plui bielis zonis culinârs dal FVJ, la organizazion par chest, e propon zîrs turistics ae scuvierte di chestis tieris. Dut chest e tant altri us spiete ae BIKER FEST, dai 5 ai 8 di Zugn e si si stais domandant cetant che al coste dut chest, no stêt a ve pôre, dome 20 euros par ducj e 4 i dîs. No val duncje la pene mancjâ!
DARTE – Spostade la “Fieste dal Sparc”
Cause lis brutis cundizions dal timp la “Fieste dal Sparc di bosc, dal lidric di mont e dai foncs di primevere” previodude a Darte domenie ai 18 di Mai e je spostade a domenie ai 25 di Mai, simpri cul stes program.