"Las cidules": creât il plat tipic di Darte

Tal salon des Termis di Darte si è davuelzude la presentazion dal plat "las cidules". A jerin presints ae serade Pepi Pucciarelli, espert de materie; Novella Del Fabbro, scritore e gjornaliste; Domenico Molfetta, espert di jerbis e tradizions locâls. Po dopo si è lâts indevant cu la cerce. Il progjet "las cidules" al è saltât fûr de creativitât di un grup di feminis cjargnelis - maris, imprenditoris, designer, coghis - e de lôr voie di sgarfâ fûr, de tradizion, par inventâ plats particolârs e gnûfs. Si che duncje tignint cont de tradizion dai cjarsons, il grup si è concentrât sul pastum e su pe forme da dâ al gnûf gnoc. Dentri dal patrimoni grandon cjargnel si son sielzûts doi elements dal mangjâ cjargnel a strent peâts cu la storie di Darte: lis coculis de Cjargne, menzonadis dal poete Giosuè Carducci che tal comun si è fermât tal istât dal 1885, e il Sliwowiz di Cjabie (fraz. di Darte), une sgnape di brugnuls che in ore presint e ven fate te uniche distilarie artesanâl dal teritori montan. La forme e il non dal plat, las cidulis, e ricuardin la tradizion, ancjemò sintude e vivude in tancj comuns de Cjargne, dal tîr des rodelis di len ardints - in cjargnel "cidules" a pont - che i puems a tirin in onôr des lôr morosis.

 

Sierâts i lavôrs tal municipi di Tumieç
I lavôrs pe metude in sest e l'ingrandiment dal municipi di place XX Settembre si son sierâts. In chescj dîs i uficis che pal moment a jerin stâts spostâts tal edifici de ex SIP, cun jentrade in vie Roma, a son tornâts inte sede origjinarie da dulà che si rive da place Piazza XX Settembre. I uficis Protocol, Sportel dal Citadin, Segretarie e, dai 30 di Avrîl, ancje l'ufici afission-publicitât e COSAP, a son operatîfs al plan tiere di place XX Settembre. Sindic, assessôrs e segretari a son tornâts al prin plan di place XX Settembre, inte sede di prime dal trasferiment. I uficis Assistence, Istruzion e Culture a son stâts logâts al tierç plan, tai gnûfs locâi rigjavâts de metude in sest dal sotet, simpri cun jentrade in place XX Settembre. Da joibe ai 30 di Avrîl si son trasferîts tal gnûf municipi, al secont plan, ancje i uficis Resonarie e Tribûts (che a jerin stâts pal moment spostâts in vie Del Din 8/a), biel che il traslocament dai uficis demografics e dal comant de pulizie municipâl, cumò in plaçâl Vittorio Veneto, i timps a son cetant plui luncs par vie che par resons di servizi al è preferibil spietâ il davuelziment des elezions.

 

Bonus energjie eletriche:  proroghe dai tiermins

Lis fameis che a stentin par causis fisichis o economichis a varan doi mês di timp in plui par domandâ ai comuns di residence il bonus energjie eletriche cun efiet retroatîf fintramai a dut il 2008. Si sclarìs in fats che il bonus energjie si pues domandâ ogni moment dal an, ma la scjadince e je stade spostade ai 30 di Zugn, invezit che ai 30 di Avrîl, par vê dirit al scont ancje par dut il 2008.  Plui informazions su recuisîts  e modui si podin domandâ ai Sportei dal Citadin dai comuns di Tumieç, Damâr, Cjavaç e Verzegnis o lant a viodi il sît internet www.concatolmezzina.it.

On. Pietro Fontanini pal 33 aniversari dal taramot dal Friûl
"Dopo 33 agns dal taramot il model Friûl al torne plui che mai atuâl. Lis imagjins dal Abruç a àn fat memoreâ ce che pai furlans al è un penôs ricuart. Dibot 1.000 muarts al è costât al Friûl, ma in chê volte no si podeve pensâ di vê ducj fabricâts antisismics. Chel dal '76 al ere un Friûl campagnûl, fat di piçui borcs che plan plan si lavin modernant. E chês cjasis antighis, chei paîs di claps, chês vecjis costruzions no podevin restâ in pîts dopo di chês scjassadis e a sdrumarin. No cussì chês gnovis. O almancul chês fatis benon. E se tal 1976 il disastri si pues capî, no si pues capî cemût che, tal 2009, edificis modernis no vebin sopuartât une scosse mancul fuart di chê di 33 agns indaûr: par esempli la Cjase dal Student al Acuile a vorès scugnût dome subî dams ma no lâ jù dal dut. Sì, parcè che a copâ nol è stât il taramot ma i edificis fats malementri. Al è naturâl, duncje, il gno auguri che la magjistrature e ledi a fonts e e punisi i colpevui di tante negligjence. Pensant po dopo ae ricostruzion no pues che jessi orgoiôs, da furlan, che il model Friûl, al vegni cjapât tant che esempli.

Cressi la sigurece par miorâ la cualitât de vite

«La sigurece e je un dirit primari par ogni citadin. Sigurâ il rispiet des regulis da bande di ducj e une educazion continue ae legalitât a son un impegn costant de nestri politiche. Plen supuart, duncje, a dutis chês iniziativis indreçadis a spandi la culture de sigurece e dâ informazions utilis par frontâ lis difarentis situazions de vite». Cussì il president de Provincie on. Pietro Fontanini che al à viert a Lignan “Vivere in sicurezza”, il prin Meeting nazionâl su pe sigurece. «La idee di creâ, midiant un portâl, un laboratori permanent par meti adun propuestis concretis e pussibilis soluzions – al va indevant Fontanini – e pues jessi une maniere otimâl par distrigâ chest teme. Par mieç de condivision di propuestis e problematichis i incargâts e i aministradôrs, in fats, a podin lavorâ par cjatâ rispuestis zovevulis par ducj i citadins». Ducj podin fâ alc, massime i ents locâi: incressi la sigurece – al à sierât Fontanini – al è un dai elements di fonde par aumentâ la cualitât de vite.

Udin, vôt di scambi: Strassoldo e Tavoschi a domandin il rît scurtât
Domandât il rît scurtât pal ex president de Provincie di Udin, Marzio Strassoldo, e dal ex vicesindic di Udin Italo Tavoschi, acusâts di vôt di scambi. Pe acuse 'nd sarès stât un "pat pre-eletorâl" firmât da Strassoldo e Tavoschi ae vee des elezions provinciâls dal 2006. La istance e je stade za presentade dai difensôrs dai doi, al judiç dal Tribunâl di Udin. Daûr ce che dit dal avocat Angela Di Marco, difensore di Tavoschi, il judiç al à spostât ai 21 di Setembar cu ven la udience, dulà che si decidarà se ameti la richieste e inviâ la discussion. Strassoldo, difindût da Luca De Paoli e Marco Zanotti, al è stât iscrit tal regjistri dai indagâts adun cun Tavoschi tal Zenâr dal 2008, daspò de publicazion dal pat segret sul Messaggero Veneto.

 

Tumieç: sprolungjât l’orari dal Ufici dal Catastic

In spiete de scjadince pe jemplade dal model 730, la Comunitât montane de Cjargne e à stabilît di sprolungjâ l’orari dal ufici dal Catastic, che al da fûr visuris e certificâts catasticâi di terens e fabricâts. Si che duncje dilunc il mês di Mai il sportel, logât alì de Comunitât Montane de Cjargne, al restarà viert vinars 15 des 8.30 aes 12.00, mentri che dopo al tornarà al orari normâl il vinars, come par solit, des  8.30 aes 11.45.

 

 

Tumieç: cors di gjinastiche ancje dilunc il mês di Mai

Stant la partecipazion, il cors di gjinastiche inmaneât dal comun di Tumieç alì de palestre dal Istitût Magjistrâl, al larà indevant par dut il mês di Mai cui stes oraris e zornadis: lunis, miercus e vinars des 18.30 aes 19.30. Plui informazions si podin domandâ al Ufici Sport al numar: 0433 487961 o al Sportel dal Citadin al numar: 0433 487965, che a son logâts in place XX Settembre.

Tumieç: asfaltade di stradis inte zone nord
Tai dîs cu vegnin a vignaran asfaltadis stradis inte zone nord di Tumieç. In detai: cualchi toc di Via Paluzza, Via Gortani, Via Morgagni, Via Carnia Libera 1944. Dutis chestis stradis a saran, a turni, sieradis al trafic. Ancje i residents a scugnaran lassâ lis machinis fûr des stradis sore ditis, stant che al sarà sigurât dome il passaç a pît.

On line lis oparis di pre Checo Placerean

On line l’archivi di Pre Checo Placerean. Tal gnûf sît internet dal Istitût ladin furlan - www.istitutladinfurlan.it - in fats ‘nd è une sezion dal dut dedicade a un dai personaçs simbui dal autonomisim furlan. Il sît, finanziât de Provincie, al è stât presentât a palaç Belgrât dal on. Pietro Fontanini president de Provincie; da William Cisilino president dal Istitût Ladin Furlan; da Lorenzo Zanon, president de Arlef e da Arnaldo Baraccetti, esponent dal Comitât pe autonomie dal Friûl.
«No si pues pensâ di lâ tant lontans se no si àn a cûr lis lidrîs – al à dit Fontanini – e al è ancje par mieç de cognossince de nestre culture che si pues pensâ al doman. Par chest, o stimi cetant impuartant spandi il plui pussibil la opare di un om che al à tant fat pe culture furlane». E propit in ocasion dal aniversari dal taramot dal ’76 la presentazion dal sît dal istitût a lui avodât, «cul ricuart – al à notât Fontanini – che al va aes nomenadis peraulis di pre Checo che al sburtave il Friûl a superâ la tragjedie “cul cjâf”, marcant la dibisugne di vê la sô universitât, par sfrancjâ i furlans da chê “sotanance” che, magari cussì no, ju à simpri fats cognossi te storie.

Pro Loco TimauCleulis: "25 mostre des cjaris"
La Pro Loco TimauCleulis, pe 25 mostre des cjaris che si davuelzarà a Tamau in place San Pio X, ai 30 e 31 di Mai, e pense di inmaneâ une schirie di manifestazions come la Rassegne regjonâl des cjaris, une cunvigne tecniche par arlevadôrs, la sagre de gastronomie e de musiche, spetacui di animazion pai plui piçui e il tradizionâl marcjadut agro-artesanâl. A sarà dât il bon acet ai esposidôrs, prontant dai barachins cui lôr prodots (mangjadorie, hobbystiche, artesanât e altri), indreçâts a fâ cognossi i savôrs e il mont dal artesanât locâl. Al è improibît vendi mangjâ e bevandis. Par doprâ i "gazebo", metûts a disposizion de Pro Loco, al è previodût un presit di 20 euros.

Corse in mont: primus tierç e Bellina prin zovin al "Memorial Cimenti"
Si è davuelzût il 6 Memorial Cimenti, une des classichis di vierzidure de stagjon di corse in mont, a ricuart di Cristian muart zovin. La gare e je stade fate su pe strade che da Cjasegnove e rive al cjamp di balon di Fusee, par une lungjece di 6 km, dulà che dispès Cristian si alenave. Come intes dôs edizions precedents al à vint a Manuel Dal Col de Atletiche Calalzo cul timps di 25'27'', al secont puest si è classificât Lorenzo Della Pietra pal Socors Alpin de Vuardie di Finance e tierç al è rivât Marco Primus pe Timaucleulis. A seguî i atletis de Polisportive: 7 il neo papà Marco Nardini, 11 Gian Paolo Englaro, 24 l'alenadôr Stefano Chiabai, 31 Fabrizio Cortolezzis, 39 Matteo Romano ae prime competizion cui colôrs blanc-celescj, 64 Roberto Mentil, 69 chê altre new entry Massimiliano Vergendo, 93 Libero Maieron e 113 Ezio Puntel.