DISVELÂTS I AGNUI DI DIEÇ, GIANNI LETTA: “MARAVEÔS”

Las grandes mostres che dal 2004 il Comitât di San Florean al organize a Dieç a son stades un cressint di sucès, lu à ricognossût il cardinâl Giovanni Lajolo, President dal Guvier da Citât dal Vatican, che al è stât presint a inaugurazion adun cul Arcivescul di Udin, Andrea Bruno Mazzocato, cul sotsegretari a Presidence dal Consei dai Ministris, Gianni Letta, cul ambassadôr di Italie inta Sante Sede, Antonio Zanardi Landi, e cul diretôr dai Museus Vaticans, Antonio Paolucci. Lu àn sotlineât encje il Sindic di Tumieç, Dario Zearo, e il President da Provincie di Udin, Pietro Fontanini, che al à rilevât in particolâr il significât da proposte da identitât cristiane pal popul furlan. Il President Tondo al à sotlineât la alte cualitât da mostre, che a propon opares di grant valôr realizades di artiscj tant che Sandro Botticelli, Filippo Lippi, Correggio, Paolo Veronese, Peter Paul Rubens, Gian Lorenzo Bernini e Giambattista Tiepolo. Secont Letta, i vin di imparâ dai agnui di Diu la art indispensabil di dâ soredut notizies buines, "intun timp dulà che al semee cuasi che si scuegni simpri tignî la int azornade su las tantes manifestazions da mediocritât umane, che purtrop a è presint e che in cualchi câs a va smascarade platealmentri, ma che no pues deventâ un fatôr di malinconie e di demoralizazion continue".

ELETRODOT: A TUMIEÇ LA OPOSIZION IN DIFESE DI CJANIVE E FUSEE

"Contrarietât al traviersament dal versant dal mont Cuel Maiôr, dal Plan di Curiedi e da Val dal torent Cjantone fint al confin cul Comun di Zui; nove verifiche di fatibilitât da imbonidure; riduzion al minim dal impat ambientâl; valutazion cu las comunitâts locâls di eventuâls compensazions ". Chestes a son in sintesi las richiestes che las minorances dal Consei Comunâl di Tumieç (PD, Nûf Tumieç e Çampe) a àn presentât a Zonte, cuntune mozion za dibatude intal stes Consei comunâl relativementri al teme dal progjet di eletrodot aeri a 220 Kv tra Samblâc e Wurmlach. Las oposizions a denunciin l'impat "devastant" che un eventuâl vie libare a linie aerie al varès sei suntune part particolarmentri significative dal teritori comunâl (Torbiera di Curiedi), sei su las ativitâts agricules e agrituristiches da zone. Une opare, a spieghin las oposizions, che "no è volude nencje dai citadins residents intas frazions di Cjanive, Cjasenove e Fusee, cemût che al è stât fat presint dai lôrs rapresentants intas dôs consultes frazionâls".

DAMÂR, LA CONDOTE FOGNARIE E SARÀ COLEGADE CUN TUMIEÇ

Vie libare di bande dal Consei comunâl al colegament cul depuradôr consortîl di Tumieç. Il progjet preliminâr, proponût dal Consorzi Industriâl di Tumieç, al varà un cost di cirche un milion e 800 mil euros. Cun cheste sielte la aministrazion comunâl di une bande a sparagnarà intai futûrs coscj di gjestion, di chê ate no varà la necessitât di costruî un sô implant nûf, viodude la veglece di chel atuâl; tierç aspiet la assence future di vincui e pericui ambientâi. La condote fognarie, che a corarà dongje as rodaies da dismetude linie feroviarie Cjargne-Tumieç, a ere inizialmentri proviodude pal colegament nome cu la zone industriâl di Damâr, ma in gracie di un emendament a leç dal belanç regjonâl 2010, al sarà estindût al centri abitât par permeti la racolte e la seguitive depurazion, li dal implant di Tumieç, encje dai scaric civîi.

PRONT A TUMIEÇ IL PROGJET PE GNOVE PLACE XX SETEMBAR

Podei temporâl, spirituâl, judiziari e bancjari, si cjataran idealmentri colegâts inta future place. Al è un progjet che al torne a scuvierzi la identitât storiche da citât, chel che al risulte vincitôr, firmât dal architet Augusto Romano Burelli di Udin e dal studi associât Lenna 2B di Tumieç. "Sui palets furnîts da Aministrazion, in primis chel da pedonalizazion da place - al spieghe l'assessôr comunâl a planificazion Walter Marcon -, i professioniscj vincitôrs a àn elaborât la proprie proposte progjetuâl, cirint inta "storie" la identitât dal cjâf lûc cjargnel e dant risalt al colegament diret da place cui centris dal "podei" che a son alì: il Municipi, il Tribunâl e la Glesie. Dut chest al è stât fat cui inserts di piere piasentine grise che a son las linies ideâls di colegament su la pavimentazion principâl costituide di porfîr di tons svariâts, che a determinin encje biei zûcs di colôr.

SOCLÊF, TORNADE A VIERZI LA SIELE REST

Al è stât viert intai dîs passâts il trat da strade regjonâl 552 "da Siele Rest", comprendût tra las localitâts Caprizi - Puint Tiliment e Maleon. La sierade a ere stade disponude ai 4 di Novembar dal 2009, pa la impraticabilitât da strade dovude as primes neveades abondants. Las operazions par tornâ a vierzi la Siele Rest a son iniziades ai 12 di Avrîl di chest an, cun nûfs operadôrs impegnâts inta pulizie dal plan viabil e das cunetes laterâls, plenes di fuees e di detrîts colâts das cleves che a son sore, al fin di permeti la viertidure dal trat in assolude sigurece. Il lavôr, sospendût nome inta zornade di miercus ai 14 di Avrîl pa ploie e pa nevuscle, si è concludût intai dîs passâts. Il personâl di FVG Strades al è stât impegnât inta riparazion dal plan viabil, cun asfalt a frêt ("plastcold"), e das barieres di sigurece, danegjades par colpe dal peis da nêf o dal impat das lavines.

STOP AE PRIVATIZAZION DE AGHE, SI ORGANIZE LA RACOLTE DES FIRMES

Encje in Cjargne, tant che in dutes las Regjons di Italie, a è iniziade la racolte das firmes par domandâ il referendum cuintri la privatizazion da aghe. L'obietîf al è razunzi 500 mil firmes in 90 dîs. Une bataie che dopo la manifestazion nazionâl dai 20 di Març a Rome, si è estindude a dute la penisule dant dongje moviments diviers e comitâts teritoriâi, cun l'obietîf di difindi chel che a ven definît "un dirit inalienabil", la aghe publiche. Inta mont furlane, dulà che di tant timp il teme al è costantementri font di dibatit e di proteste, a saran Cjargne in Moviment, il grup che al à come leader Renato Garibaldi, e il Comitât pa Difese dal Bacin dal Tiliment, vuidât di Franceschino Barazzutti, a gjestî la racolte das firmes: "Liariis, las decines e decines di centralines idroeletriches, Carniacque SpA e las boletes cuadruplicades - al comente Garibaldi - nus ricuardin che i vin 90 dîs di timp par dî a politiche taliane e europeane che la aghe no è une robe che si pues vendi, ma un dirit inalienabil".

IL CONSEI FVG AL FÂS BON A LARGJE MAIORANCE L’ODG SUL ELETRODOT

A esprimi la proprie sodisfazion al è il conseîr regjonâl dal PDL Luigi Cacitti che al à presentât l'ordin dal dì in merit al teme dal eletrodot di Samblâc - Wurmlach, che al è stât sotscrit encje di dutes la fuarces politiches di oposizion, gjavade Rifondazion Comuniste. "A Zonte - al à zontât Cacitti - al è stât domandât di impegnâsi a verificâ che il tirât e las soluzions tecniches progjetuâls a ridusin plui che a si pues l'impat paisagjistic ambientâl e a proviodin al dismantelament das linies esistints, che al dì di vuê a passin par diviers pais. In chest mût a saran ridots i pericui a salût dai citadins. Cun di plui a saran valutades, cu las Comunitâts locâls, las propostes di compensazion a favôr dai rispetîfs teritoris, che no devin jessi nome di ordin finanziari".

FONTANINI, <<NECESSARI PONTÂ SU PROGJETS CONDIVIDÛTS CUN ALPE ADRIA>>

Favorî la colaborazion tra il Friûl e la Slovenie. Chest il motîf dal incuintri tra il President da Provincie, on. Pietro Fontanini, e la Console gjenerâl de Republiche di Slovenie, Vasta Valencic Pelikan. <<In gracie ai progjets condividûts - al à sotlineât Fontanini - si puedin razunzi obietîfs ambiziôs. Fondamentâl in chest moment pontâ su Alpe Adria: par mieç da grande aree industriâl che a cjape dentri, oltri a nostis teritoris, encje il nordovest da Penisule e une part da Gjermanie, si podaran pensâ politiches di svilup comun in grât di rilançâ las divierses Regjons comprendudes. E par fâ chest ducj a dovaran fâ la proprie part. Il Friûl, tant che la Slovenie - al à zontât Fontanini -, da agns al à començât un dialic util pa promozion dai propris prodots e teritoris. Vignissie dungje la condivision dai obietîfs par judâ las nostes impreses e, plui in gjenerâl, dut il nosti tiessût economic a vierzisi, par cjapâ su oportunitâts noves>>.

 

DÔS ESCURSIONISTIS AUSTRIACHIS A SON STADIS RECUPERADIS SOT LA CRETE SERNIATE

Dôs escursionistes austriaches di sessantevot agns, a son stades recuperades das scuares dal Cuarp Nazionâl Socors Alpin e Speleologjic di Mueç e dai oms dal Socors Alpin da Vuardie di Finance e dai Carabinîrs di Tumieç. Las dôs feminis, che a son di Feldkirchen, si cjatavin intal lavinâl di Nuviernulis, in vicinance da Crete Serniate. A àn passât la not al freit, dopo che domenie sere a son stades sorprendudes dal rivâ da niot, intant che si cjatavin encjemò in cuote. L'alarm al è scatât intor as ores 20 di domenie, cuant che las dôs escursionistes a àn clamât aiût cul telefonin celulâr. I components dal Socors Alpin las àn cjatades in gracie dal intervent, come al solit determinânt, dal elicotar da Protezion Civîl Regjonâl. 

PRIME TAPE DI “ECELENCE IN TOUR”: IL “MADE IN FRIÛL” AL CONCUISTE PRAGHE

<<Il nosti obietîf al è favorî las espuartazions dal "Made in Friûl" al interni da nove Europe>>. Lu à det l'assessôr provinciâl al turisim e ai rapuarts internazionâi di Udin, Franco Mattiussi, dilunc la conference stampe di presentazion das ecelences furlanes a Praghe: prime tape proviodude dal acuardi tra Provincie e Cjamare di Cumierç di Udin pa valorizazion dal Friûl, dal so turisim, da sô produtivitât e da sô culture in Europe. L’apontaments organizât dai furlans a Praghe al à creât un interès notevul intas istituzions ceches: di fat l'ambassadôr talian a Praghe, Fabio Pigliapoco, e il Ministri dal Lavôr cec, Petr Simerka, a àn partecipât al event. Mattiussi al à sotlineât cemût che <<la promozion das ecelences a vûl favorî la cressite das rispetives comunitâts e la vicinance concrete ai nostis furlans al forest>>. Dopo Praghe, las ates tapes, da azion di promozion comerciâl da Provincie e da Cjamare di Cumierç di Udin, a saran Viene, Munic, Milan e Basilee.

E NAS LA SOCIETÂT CONSORTÎL FRIÛLMONT PAL SVILUP DAL SETÔR DAL LAT E DI CHEL CASEARI

Cualificâ e valorizâ, sul marcjât, la produzion dal lat e chê casearie di mont dal Friûl Vignesie Julie. A saran chescj i obietîfs da societât consortîl FriûlMont, che a vegnarà costituide tra pouc e che a viodarà la partecipazion das lataries cooperatives di Sudri, Denemonç, Ugovizza, Vençon, Davâr, Paulâr, Campolessi, oltri che il Consorzi pai Prodots di Mont FVG e, in cualitât di socio di maiorance, Agemont SpA. I ultins aspiets organizatîfs a son stâts definîts intai dîs passâts a Damâr, in ocasion da riunion che a à viodût la partecipazion, oltri ai socis dal consorzi che si sta par costituî, dai rapresentants da aministrazion regjonâl, da Associazion Cooperative di Udin e da Associazion Arlevadôrs dal Friûl Vignesie Julie. FriûlMont al dovarà atuâ il plan di riconversion dal setôr dal lat e di chel caseari, da aree montane, fat bon da zonte regjonâl su proposte dal assessôr a la Agriculture, Claudio Violino, e dulà che la aministrazion regjonâl a à za investît las risorse necessaries.

TUMIEÇ, IL GRUP DAL UDC SI DIVÎT IN CONSEI

La maiorance vuidade di Dario Zearo a cor il pericul di pierdi probabilmentri un toc pa strade: val a dî il conseîr Mauro Biscosi, cjâf grup dal partît di centri, che si è astegnût da votazion dal REND. In contrast cun Biscosi chel ati conseîr dal grup, Marino Iob, che invezit al à votât a favôr. Il document contabil, che al à segnât un vanzum di aministrazion di 2 milions e 180 mil euros, dulà che, tra risorses vincolades e bêçs metûts di bande, a restin nome 125 mil euros di podei spindi, al è nonostant dut passât cun 11 vôts favorevui e 7 contraris. La astension di Biscosi a rive dopo une setemane di scuintris intal partît che a àn puartât encje al comissariament da sezion locâl, afidade al ex Sindic di Dartigne Venturini. "Tra il nosti grup e i assessôrs di riferiment a son simpri mancjâts condivision e coinvolziment - al à spiegât Biscosi, clarint ce che al veve za det in ocasion dal belanç di prevision fat a Zenâr -; il mio nol è un vôt tecnic ma politic e al puartarà, cence dubis, a senaris futûrs che mi risiervarai di comunicâ prime di dut al Sindic".

FONTANINI, <<LA FORMAZION TANT CHE MOTÔR DE CRESSITE>>

La formazion tant che motôr da cressite. Di fat il titul da cunvigne, organizade a Palaç Belgrât da Consulte provinciâl dai students e dal Consei dai students da Universitât di Udin, al proponeve cheste frase in forme interogative, ma za dai prins intervents si capive che la formazion a è un element indispensabil pa cressite di un Paîs, tant plui intal cors di une crisi economiche. La cunvigne si è vierte cul intervent dal president da Provincie on. Pietro Fontanini che, prime di dut, al à ribatût il fat che <<il livel di istruzion inta noste regjon al è cetant alt, simil a chel dai students dal Nord Europe. Par chest motîf - al à zontât - no si trate di stimolâ o remenâ cualchi roube, ma di mantegni chest standard inta preparazion das gjenerazions futures. Su la fonde das crisis e dai cracs recents das economies dai paîs europeans tant che la Grecie, la vuardie a scuen jessi tegnude cetant alte. Al è necessari cambiâ i nostis costums, cirint di pontâ a une politiche plui responsabile>>.

IN LUI “ATTILA AL RICONCUISTE AQUILEE”

Attila al torne a Aquilee, tant che protagonist di un progjet che al met dongje dutes las associazions da citât pa sô organizazion. Fulcri da iniziative a è la rapresentazion, metude in sene ai 16, 17 e 18 di Lui, de opare di Giuseppe Verdi dedicade al re dai Uns che, dopo un lunc assedi, ai 18 di Lui dal 452 d.C. al à concuistât la citât romane. In concomitance cun cheste rapresentazion las associazions di Aquilee a àn decidût di dedicâ a Attila dut il meis di Lui. "Il Meis di Attila" al è stât presentât a Palaç Belgrât dai protagoniscj dal progjet: Franco Mattiussi, assessôr provinciâl al turisim, e Marta Novello, che a fâs part da Sorintendence pai Bens Archeologjics dal Friûl Vignesie Julie. Il Centri das Antighitâts AltAdriatiches al fasarà un conciert di musiche etniche. Cun di plui il Centrum Latinitatis Europae al organizarà un moment interementri dedicât ai cultôrs da lenghe latine.

COMELIANS, SI CÎR UN GJESTÔR PAL BAR-RISTORANT

La Aministrazion dai Bens Civics di Tualiis e Naiarêt a sta cirint un gjestôr pal so bar-ristorant, clamât "La Galogia" e che si cjate intal plaçâl da glesie di Sant Vicenç, a Tualiis di Comelians. La proprietât coletive cjargnele a pense di tornâ a vierzi l'ambient public (che al vegnarà concedût in afit par un periodi di 3+3 agns) prime da fin di Mai dal 2010. Intal indagjin di marcjât, començade par cjatâ un acuirent, la Aministrazion dai Bens a à stabilît une fonde minime, dal canul di afit, di 250 mil euros. La tratative privade pa sielte dal afituâl a è stade fate ai 30 di Avrîl passâts. Cumò si spietin las ofiertes di disponibilitât a tratâ pal afit, cun in plui i curriculums dai interessâts. I ats relatîfs a cuestion si puedin consultâ intal ufici dal President dai Bens Civics di Tualiis e Naiarêt, Giorgio Mazzilis, in viâl Arborât 8, a Comelians.