Il notiziari de Cjargne
Sara Maieron conduce il notiziario in friulano, incentrato sugli avvenimenti della settimana in Carnia.
Fate buine dal belanç de Comunitât Montane de Cjargne
La Comunitât montane de Cjargne e smire a pontâ, ancje dilunc il 2009, su pe energjie nete e su pes filieris produtivis rimarcant il so impegn par favorî il disvilup economic e sociâl de zone midiant la programazion di intervents integrâts finanziâts de Union Europeane. A pandilu a son i dâts dal belanç di prevision dal ent, fat bon, a grande maiorance, tant de ultime riunion di consei, che al è in pari par 38milions e 600mil euros e al viôt i finanziaments a pro dal teritori passâ i 10milions di euros. In detai, jenfri i dâts su pai investiments in program par chest an, o vin: passe 9milions di euros pes oparis publichis, 3milions e 800mil euros pal ambient e il teritori e 1milion e 500mil euros pe culture, turisim e sport. Cun di plui passe 3milions di euros a son destinâts ai servizis associâts e oltri 800mil ae programazion e svilup. "Il belanç 2009 - al à sclarît il president de Comunitât montane de Cjargne, Lino Not - al rive ae fin dal mandât eletorâl començât tal 2004 e al è une ocasion par pandi lis ativitâts davueltis dal ent e su pai progjets dal doman. "Tant dal 2009 - al è lât indevant Not - a saran inviâts implants fotovoltaics su edificis di proprietât de Comunitât montane e dai comuns, al sarà progjetât l'implant idro-eletric sul riu Chiarsò e une plateforme logjistiche pal dipuesits e la produzion di "cippato" a servizi dai implants a biomassis.
Tutelâ la cualitât de istruzion in Cjargne
"La mude dai parametris che e à fat cressi da 13 a 17 il numar minim di scuelârs pa formazion des "pluriclassi", metude dentri intal gnûf "Regolament Gelmini", e riscje di meti cetant in pericul il nivel cualitatîf de istruzion in Cjargne, no sigurant la continuitât dal insegnament". A dîlu al è Marino Corti, assessôr ae culture e ae istruzion de Comunitât montane de Cjargne e coordenadôr dal grup di lavôr dât dongje alì dal ent sorecomunâl e componût dai rapresentants dai sorestants scolastics de Cjargne e dai comuns, par cirî di tutelâ la cualitât de istruzion ancje intes zonis montanis fûr di man. Il grup, che al à za presentât une propueste rivuardant lis dimensions des scuelis, po dopo metude in vore dal Centri servizi scolastic provinciâl, al sta stazant lis pussibilis conseguencis di cualchi provediments metût dentri tal regolament, come chê di meti insieme lis classis che no rivin a un ciert numar di students. "Lis conseguencis di chescj provediments - al note l'assessôr de Comunitât montane - a podaressin jessi brutis, stant che no vignarès sigurade la continuitât dal insegnament. La Comunitât montane e seguissarà il probleme e e puartarà indevant lis dibisugnis dal teritori devant dai orghins politics e aministratîfs pal salvâ la cualitât intes scuelis di mont".
Eluana: 14 indagâts par omicidi, insiemit al pari Beppino
Un at spietât "che nus lasse davuelzi lis nestris ativitâts difensivis in contraditori": chestis lis peraulis di Giuseppe Campeis, avocat de famee Englaro: "Si spietavin une robe dal gjenar - al à zontât - dome che, forsit, e veve di rivâ la dì stesse de muart de famine. Par nô no cambie nuie - al à sclarît Campeis - cumò varin mût di clarî dut". Ma pal avocat, la Procure de Republiche di Udin no à inmò distrigât il cantin "se ce che al è stât fat ae Quiete al seti stât legjitim o no. Par chest il Procuratôr al sta lavorant su doi aspiets". Beppino al zonte: "e scugnive rivâ prin o dopo, o savevi che e veve di rivâ". No si è sorestât Beppino Englaro, il pari di Eluana, pe denuncie dal Comitât "Verita' e Vita" che e à sburtât la Procure di Udin a iscrivilu intal regjistri dai indagâts cul acuse di omicidi pe muart de fie. "Mal spietavi" al à dit Englaro, impensant che da plui bandis si ere anunciadis denunciis.
Zoncolan: memorial Plazzotta
Grant gust al è stât pandût dal conseîr regjonâl Luigi Cacitti su pal risultât positîf de vicende su pal probabil dinei de manifestazion metude in vore sul Zoncolan inmaneade dal "Sky Alp Carnia" par memoreâ un zovin finançot Francesco Plazzotta muart cualchi an indaûr.
Il câs si è sierât benon massime pe grande disponibilitât e atenzion su pal argoment mostrade dal sindic di Sudri, dai sorestants de Promotur e dai uficis regjonâi cjapâts dentri de vicende.
A chest probleme e je stade dade la massime atenzion sedi dal president de regjon Renzo Tondo, sedi dai assessôrs Luca Ciriani e Riccardo Riccardi pes lôr competencis.
Il conseîr regjonâl Luigi Cacitti al à cun di plui presentât une interogazion in consei indreçade al assessôr de protezion civîl Vanni Lenna in merit ai grâfs discomuts causionât des bondants neveadis.
L'interogazion e smire a finanziâ chei comuns dulà che no dome si è scugnût palâ la nêf des stradis ma ancje dai tets, publics e privâts.
Centenârs di milions di euros pes oparis publichis
Milions di euros pal inviade di lavôrs dentri la fin dal 2009. E je la rispueste des societâts partecipadis de Provincie ae crisi economiche. L’ocasion par vignî a bon de situazion al è stât l’incuintri dât dongje a Palaç Belgrât dal president on. Pietro Fontanini e che si insede inte ativitât dal Cpel, Comitât pe economie e il lavôr, che al cjape dentri lis associazions di categorie e i sindacâts. «Cheste riunion e à tant che obietîf – al à sclarît Fontanini – di pandi no dome i cantins ma ancje i mûts par distrigâju e i mieçs doprâts in chest brut moment. Si scuen cjapâ at dal moment e dai progjets inviâts di mût di tutelâ chel grant patrimoni che al è il sisteme economic dal nestri teritori». A sclarî la situazion, duncje, i rapresentants nomenâts de Provincie alì dai organisims di impuartance economiche. Invezit al è stât fat un altri invît par podê inviâ un inscuelament plui indreçât aes dibisugnis de zone: i 90 milions di euros dal belanç regjonâl e de Union Europeane a scugnin jessi doprâts par percors formatîfs studiâts di pueste pal disvilup di gnovis professionalitâts.
Incuintri a palaç Belgrât su pe anticipazion di casse integrazion
"In chest dificil moment ancje la Provincie di Udin, pûr tal rispiet des normativis di leç, si impegne par podê cjatâ soluzions concretis par supuartâ grâf situazions di disocupazion". Lu à dit l'assessôr provinciâl al Lavôr Daniele Macorig cjatantsi a palaç Belgrât cui rapresentants di Cgil, Cisl,Uil, lnps e Regjon.
L'incuintri al è stât a fuart volût dai sindacâts par stazâ la pussibilitât che la Aministrazion provinciâl e puedi anticipâ il tratament di integrazion de paie in chês situazions di dificoltât o fermade dal dut dal lavôr, tant che i câs de Caffaro di Torse, dulà che si fevele di ben passe 200 puescj di lavôr.
"La Provincie - al à marcât Macorig - e studiarà i protocoi metûts in vore dai ents locâi in chest sens, adun a dutis lis oportunitâts dadis des leçs regjonâls. L'incuintri di vuê - al à sierât Macorig - al è stât cetant impuartant parcè che al à permetût di une bande di stazâ lis diretivis dal Guvier e de Regjon su chest argoment e su pes iniziativis a supuart de ocupazion tal setôr dal lavôr, di chê altre di cognossi cualchi iniziative sperimentâl, che e sarà studiade plui in sot par valutâ la concretece.
Il vivôr dai fruts no è une malatie
«Il fat che chest Salon al sedi incolm, nus fâs capî cemût che chest al sedi un probleme cetant sintût de int. E cemût che lis istituzions a sedin in prime linie in chest impuartant campagne di comunicazion». Chest il pinsîr pandût dal president de provincie di Udin on. Pietro Fontanini intal so salût iniziâl de cunvigne “Psicosi, Psicome, Psichi. La vivacità dei bambini non è una malattia”. «O stimi che al sedi un dovê impegnâsi par che si clarissi su ce che al è verementri un disturp e chê che invezit e je dome la vivece dai fruts. Cemût che al dîs une vecje detule furlane – al à notât – “Fâ stâ fer un frut e fâ cori un vecjo a son dôs robis che no si puedin fâ” al è duncje di just che midiant cheste informazion e dedi la pussibilitât ai gjenitôrs di no confondi i compuartaments e i problemis umans come malatiis».
4 garis e 4 vincitis Gian Paolo Englaro ai Mondiâi Master di schi di font
L'atlete de Timaucleulis, ae sô 13edizion, al à decidût di fâ dutis lis garis inte tecniche da lui preferide, chê che dilunc la sô lungje cariere e i à permetût di fâ grancj risultâts, chê classiche, dulà che al è cetant impuartant cumbinâ la resistence cul slissâ a secondi de dificoltât dal percors, dal timp e de lungjece da fâ. Sfortunade chest an, invezit, e je stade Luigina Menean che par pôc timp no è rivade jenfri i premiâts, ae sô 8 partecipazion.
Campestre: 1 aur, 2 arints e 1 bronç pe TimauCleulis a S. Vît
La cuinte prove dal circuit CSI di campestre 2009, si è davuelte a San Vît al Tiliment, dulà che la Polisportive Timaucleulis e je rivade 6 jenfri lis 23 societâts partecipants. Impuartant al è stât il contribût di ducj i atletis che si ben che a pene saltâts fûr da infortunis, malatiis e fiestis, a àn di stes sigurât la lôr presince e lis bielis prestazions.
Intes Esordients, Nicole Puntel e je rivade 4, intes “Ragazze” Valentina Unfer e je rivade tierce, biel che Veronica Cortolezzis 6. Jenfri i Cadetti Michele Bellina al è rivât prin.
Jenfri i “Grancj”, Lavinia Garibaldi e à vint inte sô categorie cul miôr timp feminîl, secont puest par Marco Primus no in plene forme jenfri i Amatori A e di un malât Giuseppe Puntel jenfri i Senior, Fabrizio Cortolezzis al è rivât 13.
Tumieç: gnove mostre a Palaç Frisac
Sabide ai 7 di Març a Palaç Frisac a Tumieç si screarà la mostre "Cinquant'anni di pittura e scultura di Luciano Del Zotto" inmaneade dal Assessorât ae Culture dal comun, de Associazion Intercomunâl Concje Tumiezine, cul supuart de Provincie di Udin. La mostre e je cjapade dentri dal sfuarç che la aministrazion comunâl di Tumieç e sta puartant indevant da agns par promovi la culture midiant l'art e la bielece. Chescj i oraris fintramai ai 13 di Avrîl: dal miercus al lunis des 10.30 di buinore aes 12.30 e des 17.00 aes 7 di sere.
