Il notiziari de Cjargne
Sara Maieron conduce il notiziario in friulano, incentrato sugli avvenimenti della settimana in Carnia.
Presentade a Tumieç la gnove vuide de Cjargne
Doi pratics e detaiâts imprescj par compagnâ i turiscj e i passionâts de mont ae scuvierte des bielecis dal paisaç e culturâls de Cjargne. Si trate de "cartoguide" e de vuide inmaneadis dal Touring Club Talian adun ae Comunitât montane de Cjargne e cu la colaborazion di Cjargne Welcome, Agjenzie Turisim Fvj e Cjamare di Cumierç di Udin che a son stadis presentadis a Tumieç, alì de sale multimediâl dal Centri di coordenament culturâl de Cjargne. "La vuide e la "cartoguide" - al à sclarît il president de Comunitât Montane Lino Not - a son doi impuartants imprescj par cognossi il teritori che, parcè che a rivuarde la Cjargne, inmò no esistevin. A contin percors sugjestîfs che a sclarissin i tancj mûts che si puedin doprâ par visitâ la zone, a pît o in bici, o dedicâsi ae art e culture cence dismenteâ lis tradizions de mangjadorie locâl. La vuide a è spartide in trê tocs: ambient, turisim e culture, biel che la "cartoguida" e presente di une bande une plante in scjale 1:70.000 de Cjargne, cun segnâts i museus principâls, i percors ciclabilis, lis plêfs e lis glesiis oltri che i albiercs e i ristorants, di chê altre une descrizion in struc des diviersis zonis dal Cjanâl dal Bût, de Concje Tumiezine e de alte Val dal Dean fintramai a Val Tiliment.
« Beppino Englaro citadin onorari di Firenze". Indaûr polemiche
Il Consei comunâl di Firenze al à dât la citadinance onorarie a Beppino Englaro. E je stade une votazion cetant sufierte pe vicende di Eluana Englaro, che e à spacât il paîs in doi e dividût lis cussiencis. Une feride tornade a saltâ fûr a fuart tant de assemblee di Palaç Vecjo, che e à viodût 22 conseîrs favorevui, 16 contraris e 3 astignûts. Il stes partît di maiorance, il Pd, si è spacât. Il sindic Leonardo Domenici, tant de discussion, al veve ancje proponût di "cjatâ un altri mût par pandi la solidarietât a Englaro", stant che "une citadinance e je tant plui sintude tant che e je unanim". La discussion e je durade plui di trê oris e ae fin, metudis da bande o sboçadis lis alternativis, si è votât. La votazion e à viodût contraris i conseîrs dal Pdl e de Udc. Pal Pd 9 conseîrs a pro, 5 contraris e 3 astignûts. Favorevui chei altris partîts de sinistre. La dade sù de citadinance e à tornât a inviâ lis polemichis che a sameavin dibot distudadis daspò de muart di Eluana Englaro.
Sapade in Friûl, incuintri in Provincie a Udin
"Motîfs storics, culturâi, gjeografics e turistics a fasin capî che il passaç di Sapade ae Regjon FVJ no si pues plui sprolungjâ, stant che e al è a fuart volût de int locâl. Par chest domandin ancje il coinvolzimint e il supuart dai politics furlans dal centri-sinistre che si cjatin intes aministrazions". Chest il pinsîr pandût da Danilo Quinz e Riccardo Breusa, esponents dal Comitât che al vûl il passaç di Sapade ae nestre regjon, tant dal incuintri, a Palaç Belgrât, cui conseîrs provinciâi Francesco Martines dal Pd e Paola Schiratti dal Grup mist. "Una comunitât - par Martines - che e à parentelis linguistichis cun chês di Sauris, Tamau e Malborghet, tant che e podarès vê un propit rapresentant in Consei regjonâl, come che za al è pe minorance slovene. Bisugne ancje visâsi che Sapade e fâs cjâf ae diocesi di Udin”.
Giancarlo Tabacco segretari Fnp Cisl Alte Furlane
Al è Giancarlo Tabacco, il gnûf segretari dai pensionâts de Cisl de Alte Furlane. Za diretôr teritoriâl de Inas, Tabacco, in gracie al so lunc impegn inte sede dal patronât di San Denêl, al è da simpri dongje ai pensionâts, che lu àn podût preseâ pe sô disponibilitât e umanitât. Cun lui, a cjâf de Fnp pai cuatri agns cu vegnin a son stâts confermâts Ennio Valent e Flavio Molfetta, biel che – pe prime volte in segreterie – Annalisa Bergagnini, dipendent de aziende Sanitarie n. 3 “Alte Furlane”, che e à sierât il so cicli lavoratîf tant che Responsabil dai Servizis Sociâi dal Distret n. 2 de Cjargne.
Vie de zonte ae riorganizazion dal personâl
Personâl stabil o plui eficience dal ent cuntun sbassament dai coscj pal personâl di dibot 400 mil euros. Cheste la principâl gnove de riorganizazion dal personâl di Palaç Belgrât fate buine de zonte Fontanini. «L’obietîf di chest – al à sclarît il president on. Pietro Fontanini – al è chel di dâ plui eficience ae machine aministrative. Dopo vê sbassât il numar dai dirigjents a 6, o vin riviodût dut il sisteme midiant un procediment di razionalizazion e miorament. La gnove plante organiche e previôt la creazion di 5 areis – mobilitât e sigurece stradâl, ambient, svilup socio-economic, tecniche, lavôr e welfare. E chest si è podût fâ mudant il sisteme dai servizis par mieç dai cuâi si son organizadis lis areis.
Provincie e San Gallo, pas concrets pe cooperazion
Un scambi concret di iniziativis jenfri il Cjanton San Gallo e la Provincie di Udin. E par partî, la Provincie e à za pronts doi progjets: un su pe mostre dai codiçs miniâts, testemoneance dai rapuarts secolârs jenfri lis badiis di San Gjal e Mueç. Chel altri su pe Scuele dai Mosaiciscj di Spilimberc e, in detai, su chei che a vivin e a lavorin in provincie di Udin. Tai dîs stâts il president de Provincie on. Pietro Fontanini e il sindic di Mueç Ezio De Toni a àn incuintrât a San Gjal Josef Keller Conseîr di Stât, sorestant dal Dipartiment de Economie publiche, component dal Guvier e responsabil des relazions esternis. «Un incuintri a fuart volût dai trê ents – al à dit Fontanini – e che al è coventât a inmaneâ lis dôs iniziativis». Oltri lis singulis manifestazions, dut câs, vi è il proponiment di lâ indevant su pe strade de cooperazion inviade cualchi an indaûr cuntun protocol di intese firmât de aministrazion provinciâl e da chê svuizare.
Implants sportîfs, stazâ lis ativitâts par decidi lis prioritâts
Un plan provinciâl des ativitâts e des struturis sportivis sul teritori che al permeti di individuâ i ponts critics e lis prioritâts di intervent. Cun chest obietîf la aministrazion provinciâl e à firmât tes setemanis stadis cul Coni provinciâl. E propit par fâ il pont de situazion dai implants sportîfs de provincie, si è vût l'incuintri a Palaç Belgrât jenfri l'assessôr al sport Mario Virgili e i rapresentants dal Coni. "Aes Provinciis - al à sclarît Virgili - al è stât dât l'assum di cjapâ sù lis dibisugnis dal teritori e pensâ un gnûf plan provinciâl dai centris sportîfs dulà che a vignaran pandudis lis prioritâts e armonizâts i intervents, cemût previodût des liniis vuide, su la fonde de ativitât verementri davuelzude o potenziâl. E in chest plan a cjataran spazi sedi i implants dai Comuns sedi chei gjestîts de associazions sportivis.
Un libri pai passionâts di poesie
Inmaneât de redazion de" voce della montagna" che chest an e à puartât a tiermin la 5 edizion di "Disinlu par furlan".
Si trate des oparis di Toni Adami, poete versatil e sclet che al à scrit un libri par ducj i passionâts di poesie e di furlan (cun voltade ancje par talian). A fâ di suaze, lis oparis di altris doi fradis de famee Adami, Maurizio e Domenico cjargnei doc, pitôr e ceramist il prin, scultôr il secont.
La presentazion dal libri: "Disinlu par furlan, Toni Adami, il cirubit" si davuelzarà sabide ai 28 di Març aes 5 e mieze sot sere alì de "Cjase da int" a Çurçuvint. Toni Adami, Antonio Russo adun ae redazion de "voce della montagna" a ringraziin la aministrazion comunâl di Çurçuvint pe disponibilitât.
Si scree la stagjon de "Cjase des Pavees" di Bordan
A 'nd ere une volte un zardin magjic, dulà che lis paveis a svolavin mostrant dute la lôr bielece e daûr di une antighe liende e mudavin in diamants e in cjossolis preseosis dut ce che a tocjavin, mostrantsi ai oms dome di Primavere, e par un momentin, parcè che si vignive subit inceâts dai riflès des lôr svolis.
In cumò, al è pussibil vivi cheste magjie a Bordan:"il paîs des paveis"; inte Cjase des Pavees, la che si puedin viodi libaris centenârs di paveis, e la che la stagjon cu la vierzidure al public si è screade sabide stade.
I risultâts dai fondiscj de Timaucleulis in Abruz e Svuizare
Ae Engadin Skimarathon (Svuizare) a ‘nd è stadis dibot 10 mil presincis. Pe Polisportive Timaucleulis, Chiara Di Lenardo e à fat 42 km tal timp di 3h.19.45” e e je rivade 209° jenfri lis feminis.
Ae Nazionâl zovins di Barrea in Abruz, inte prime zornade a tecniche libare, i fondiscj de Polisportive a son rivâts cussì: 27° intai Aspirants par Gabriele Primus, biel che 8° dai Juniores e prin dai regjonâi al è stât Thomas Primus; la seconde dì, fate a tecniche classiche, Gabriele al è rivât 19° e Thomas 10°. Federica Bulliano, in Val Aupa a Pontebe, si è tignude la ultime prove dal campionât regjonâl di “fondo” pes categoriis zovanilis; sot la direzion di maestris tant che Luciano Bulliano e Sandro Unfer e Mosè Puntel pe preparazion dai schîs, i atletis de Timaucleulis ai àn vint il Trofeu “Baldan Sport” pes categoriis dai plui piçui e a son rivâts al secont puest tal Trofeu “Valentino Baldan” pai grancj. A àn partecipât a cheste manifestazion clamade “Marcia Corta di Primavere” ancje atletis rivâts de Austrie e de Slovenie. Ancje cheste volte cetantis lis medais cjapadis e bonissims i risultâts dai singui fondiscj.
