‘O VENDARÌN CJARE LA PIEL’, I COMITÂTS A STRENZIN LIS FILIS

Grande partecipazion a manifestazion - dibatit su aghe e eletrodots in Cjargne, organizade dal comitât 'Cjargne in Moviment'. 400 e passe persones a àn rivendicât il rispiet pal futûr dal teritori e a domandin di fermâ las rambes das centralines e da aghe di bevi. Presentade dal gjornalist Alberto Terasso, nosti diretôr responsabil, e introdusude da analisi "profetiche" di Pre Pierluigi Di Piazza, che al pense che il moviment al dovarà <<savêsi tradusi par fuarce in politiches e in politics nûfs pa Cjargne>>, l'incuintri al è servît a discuti su las divierses cuestions che a son cjares ai citadins da mont. A cjapâ la peraule Dario De Alti (sindic di Çurçuvint che al resist al ingrès intas S.P.A. da aghe), Franceschino Barazzutti (Moviment Mont), Aldevis Tibaldi (Friûl Rurâl), Hannes Guggenberg (Pro Gailtal, Carinzie), Enore Picco (Conseîr Regjonâl cuintricorint) e par finî cetancj citadins che a son disperâts pal cost alt das boletes e pal passaç dal eletrodot Wurmlach-Samblâc.

I LEDS DI ATENA FVG A ILUMININ IL CENTRI DI INOVAZION TECNOLOGJICHE
ATENA FVG a puarte las noves tecnologjies leades a iluminazion intal Centri di inovazion tecnologjiche di Agemont, a Damâr. La aziende si è di fat insediade uficialmentri intal CIT cuntune cerimonie dulà che a erin presints, tra i aitis, encje il president da Regjon Friûl Vignesie Julie, Renzo Tondo, e il coordenadôr cjargnel da Associazion industriâl di Udin, Federico Gollino. "Cu la sô esperience inta inzegnerie e inta produzion dai dispositîfs otics - al à spiegât il president Giovannino Bearzi -, ATENA FVG a opare su ducj i aspiets dal progjet-lûs inta sô complessitât, ufrint servizis e soluzions justes, da progjetazion a produzion di nûfs dispositîfs fint a preparazion das linies eletriches cun pose in opare dai dispositîfs pa iluminazion". A inaugurâ la nove realtât produtive al è stât invidât il president da Regjon Friûl Vignesie Julie Renzo Tondo che al à evidenziât la part fondamentâl che Agemont a recite inta creazion di noves realtâts produtives, mostrant cussì che la agjenzie a è l'interlocutôr principâl da Regjon pa promozion dal teritori montan e pa utilizazion dai fonts FAS. Il president al à encje cjacarât dai principâi intervents fats da Regjon par tignî front a crisi - da sigurece sociâl as infrastrutures, al sostegn dal sisteme.

TUMIEÇ, PAL STUDENT MAZZOLINI CHE SI LAUREE IL CO-RELATÔR AL È RENZO TONDO
No si trate dal titul di un nûf libri, e nencje di un manifest programatic eletorâl, ma da Tesi di lauree magjistrâl dal student universitari Lorenzo Mazzolini, un zovin di 27 agns di Tumieç, che a è stade ilustrade inta Aule Grande da Universitât dai Studis di Triest cu la colaborazion dal President da Regjon Renzo Tondo in persone, tant che co-relatôr. Tondo, clamât dal zovin universitari no pa sô cariche politiche ma pa sô figure di imprenditôr che al opare inta mont furlane, al à tignût duncje a batisim la tesi che lu rivuarde. Lorenzo Mazzolini, che al frecuente il cors specialistic in Economie e cumierç internazionâl e dai mercjâts valutaris li da Facoltât di Economie dal ateneu julian, al à sielt l'argoment supuartât dal propri professôr, ordinari di Economie dai mercjâts agricui. Renzo Tondo al è tornât cussì par une zornade student universitari propit in chê Universitât che intal '79 lu à viodût laureâsi a 23 agns in Siences Politiches, mentri, intal stes timp, si sentave za intai bancs dal consei comunâl cjargnel e al lavorave intal Albierc di famee.

FOR DI AVOLTRI, LA GOTE DI CJARGNE CUINTRI L’AUMENT DAI CANUI
"Un aument sconciertant che al riscje di comprometi la economicitât da noste aziende". Cussì si sfoghe Giovanni Santambrogio, il president da storiche aziende di imbutiliâment di aghe minerâl che si cjate a Pierabec. La jessude dal president a rive a distance di cualchi dì da delibare regjonâl che a à riviodût, dopo il reclam formâl da Cort dai Conts, i canui pal prelêf e l'imbutiliâment das aghes minerâls e di chês termâls. Un imprenditôr dal setôr al dovarà cumò versâ al erari une impueste di 30 euros par ogni etar di tiere ocupât dal so implant di estrazion. Mil litris di aghe imbutiliâts da sot tiere a costaran un euro. "A livel nazionâl gran part das societâts che si ocupin dal imbutiliâment da aghe a fasin fadie a sierâ i belançs in paritât - al spieghe Santambrogio -, cumò i scontìn encje sieltes politiches che a vuelin privilegjiâ la aghe dal rubinet rispiet a chê minerâl, e par nou a è deventade une sielte obleade chê di pontâ al export par sorevivi, soredut intai mercjâts dal est; ma cun chescj auments selerâts no sarìn plui in condizion di competi cui aitis mercjâts".

VERZEGNIS, UNION MARMUL – ZÎR DI ITALIE
La proposte a rive dal grup di minorance dal comun, "Nou par Verzegnis", che intal cors dal ultin consei comunâl al à avanzât la idee a Zonte guidade di Luciano Sulli. “Dade le ecezionalitât dal aveniment - a spieghin i conseîrs - al sarès oportun anticipâ la date, cumò proviodude par Lui/Avost, dal tradizionâl Incuintri Internazionâl cul Marmul, inta VI edizion da "Sculture in Ros", par unîle cu la tape Mestre-Mont Zoncolan dal Zîr di Italie. L' apontament origjinâl e impuartant, in contemporanie pai doi events, cu la acetazion da noste proposte, a sarès partant al "Parc Scultôrs" di Siele Cjanzutan, in localitât "Vie dal Marmul", il 23 di Mai cul passaç sul Prin Grant Premi da Mont da lungje tape alpine". La stesse oposizion a à dopo solevât il probleme da cressite svelte e gjenerâl dai impuarts das boletes da aghe, "situazion che a à viodût numerous reclams di bande dai citadins utents, sorprendûts e deludûts da riforme che, timp indaûr, a prometeve un bon cambiament da gjestion da aghe e une calade dal impuart das tasses”.

SAURIS, MIEÇ MILION PE STRADE SLACADE
L'assessôr regjonâl Riccardi al à confermât un nûf intervent finanziari, di 500 mil euros, par lâ indenant a meti in sigurece il versant a mont da strade provinciâl dal Lumiei, a Sauris, che al ere stât interessât di une frane intai dîs di Nadâl dal 2008. La Protezion Civîl dal Friûl Vignesie Julie a ere za intervignude a Dicembar di doi agns indaûr, sei par liberâ la strade (in vicinance da localitât "La Maine") sei seguitivementri par ridusi cun cualchi opare il pericul di ulteriôrs moviments da frane e la colade di claps; ma cumò, cemût che al è stât verificât intai dîs passâts dal assessôr Riccardi intal cors di un sorelûc cui sindics e i assessôrs comunâi di Sauris, Dimpeç e Soclêf, a bisugne fâ un secont intervent par ridusi la pussibilitât che il centri di Sauris al resti di nûf isolât. Di fat ce che al è capitât intal Dicembar dal 2008, cuant che une frane di miârs di metris cubis di tiere e cret a à blocât la strade provinciâl, a no si à di ripeti.

IL COSINT AL È PRONT A POIÂ LA ULTIME MIE DI BANDE LARGJE
A saran la energjie e las fibres otiches a formâ il binomi di intervent che al impegnarà il Consorzi Industriâl di Tumieç in chescj prins sîs meis dal 2010, dulà che a vegnaran impegnades risorses par plui di 6 milions di euros. Il prin bant di gare, publicât ai 3 di Març stâts, a dimension europeane, al rivuarde la progjetazion esecutive, cun furnidure e poiade in opare, di un implant di 1 Mw a panei solârs in grât di produsi energjie eletriche, da fonts che si podin rinovâ, par plui di 1.200.000 Kwh. L'implant in cuestion al viodarà il COSINT impegnât finanziariementri par plui di 4 milions di euros. Di fat il COSINT al à sotscrit cu la COOP.CA., proprietarie dal lastric solâr, un contrat pal dirit di superficie da cuvierture dal nûf capanon in fase di costruzion, a Damâr. Il secont bant di gare al rivuardarà la pose di fibres otiches relatives a ultime mie e indispensabiles a colegâ i tirâts, za operatîfs, tra Cjanive di Tumieç e Vile e chei tra Vençon e l'ex terminâl feroviari dal cjâf lûc cjargnel.

 

VAL RESIE, LA CENTRALINE SUL FLUM NO SI FÂS
Da bande dal Consorzi pal Svilup Industriâl di Tumieç e è stade ritirade la domande di concession pa costruzion dal implant idroeletric "Resie 2 Puint Rop". Il comitât spontani e la popolazion, che si erin oponûts al implant, a son finalmentri contents. I rapresentants dal Comitât Spontani "No Centraline Idroeletriche Resie 2 Puint Rop", insiemi cu la maiorance dai roseans, a podin tirâ flât parcè che - almancul intal futûr imediât - la centraline idroeletriche  "Resie 2 Puint Rop" no vegnarà realizade. Di fat il Consorzi pal Svilup Industriâl di Tumieç al à ritirât la domande di concession che a ere stade avanzade, cuntune procedure specifiche, a fin di Otubar dal an passât pa valutazion dal impat ambientâl, li dai competents uficis regjonâi. Tra pouc il Comitât, in colaborazion cu la Aministrazion Comunâl, al intint promovi un incuintri public par meti a cognossince dute la popolazion dai svilups intervegnûts sul argoment e par riservâ un spazi di riflession e confront sul progjet di svilup turistic - paisagjistic - ambientâl dal torent Resie.

MANCUL MÂL CHE CUALCHI VOLTE SI VISÌN DE RUVINE DE MONT
"A mi confuarte che l'Onorevul Lenna finalmentri si inacuarzi che cualchi robe si scuen fâ par cirî di fermâ la ruvine lente e costante da Mont" cussì al dîs il Conseîr Regjonâl Enzo Marsilio. L'onorevul, intai dîs passâts, al à lamentât une riduzion dai servizis da Agjenzie das Jentrades di Tumieç. Intal câs in cuestion, si riferìs al trasferiment a Udin dal repart di control, mentri nuie al cambie rispiet ai aitis servizis che a dovaressin restâ a Tumieç. Dut somât, si trate di poucje robe rispiet a ce che invezit al è za capitât, a cidin vie, cu la complicitât da atuâl maiorance: une schirie di proviodiments, costants e seguitîfs, che a àn seriementri indebolît il sisteme economic e sociâl da mont. Intant intas Comunitâts Montanes i progjets e i programs, che pûr a erin stâts predisponûts, a restin congjelâts.

PROVINCIE, AL VIE I CORS DI FURLAN PAI DIPENDENTS DE PUBLICHE AMINISTRAZION
Lunis, ai 29 di Març, a començaran i nûfs cors di lenghe furlane, organizâts da Provincie pai dipendents da publiche aministrazion. A jessi interessât, duncje, al è il personâl che al opare intai 136 Comuns da Provincie, oltri a chel da stesse aministrazion provinciâl; ma encje il personâl che al lavore intas Aziendes Sanitaries, intai Consorzis, intas Municipalizades e intas Comunitâts Montanes. A son proviodûts trei livei diferents di cors: il base, l’intermedi e l’avanzât. Ogni cors al sarà formât di un numar massim di vincj partecipants. Las lezions, che si sieraran ai 19 di Mai, a saran 14, dividudes in doi dîs da setemane, plui las dôs ores di prove finâl. Cui che al è interessât al podarà contatâ l'Ufici pa Promozion dal Teritori da Provincie di Udin: in particolâr il numar 0432 279736 o il recapit stefania.agostinis@provincia.udine.it.

TREP, F.I.S.I. FVG A CUNVIGNE. GRACIIS AES “FAMEIS OLIMPIONICHIS”
Un laut ai gjenitôrs dai atletis furlans impegnâts a Vancouver. L'incuintri, cun di plui, al à ufiert encje la ocasion par ates novitâts interessants che a rivuardin il mont sportîf invernâl da Regjon. La Federazion dai Sports Invernâi dal Friûl Vignesie Julie a podarès presentâ une proprie cuardade, cun a cjâf Manuela Di Centa, par rinovâ las cariches nazionâls. Encje Franco Fontana, atuâl president F.I.S.I. regjonâl, al podarès partecipâ par dâ nove linfe al consei, atualmentri encjemò masse pouc atent, par cualchidun, as necessitâts dai atletis. I tais, se a son da fâ, a devin interessâ las speses superflues, tant che chês di rapresentance, e no chês pai alenaments e pai atletis; al è stât encje metût in evidence che i setôrs mancul finanziâts a son chei che a Vancuver a àn "tignût" miôr e i atletis da Alte Furlane 'nt son stâts indiscutibii protagoniscj. Chescj e aitis a erin i argoments tratâts intal incuintri che si è tignût inta elegant pinacoteche “Enrico De Cillia” di Trep, cun ospits las famees dai olimpionics. Oltri a diviers sindics da Cjargne al è intervegnût encje l'assessôr regjonâl al sport Elio De Anna che al à clarît las linies guide pai aiûts as societâts sportives dal teritori.

CORSE CAMPESTRI 2010 – ALTRE VITORIE DI MICHELE BELLINA
A Tresesin, si è corude la ultime prove das corses campestris CSI dal 2010, e encjemò une volte pa TamauCleulis al è stât pussibil otignî un tierç puest inta classifiche di societât, daûr dal GS Nadison e dal GS Jalmic Corses. Ati prin puest par Michele Bellina che al à vint in plui il titul provinciâl FIDAL pa Dolce Nord Est, di fat la gare a valeve encje pal Campionât Provinciâl di Udin pas categories zovanîls. Otime prestazion di Nicole Puntel che a è rivade seste assolude e a à precedût Valentina Unfer, tornade a cori dopo la colade che a veve causât un meis di stop dai alenaments e das gares, e la compagne Veronica Cortolezzis. Mancul brilants las prestazions dai aitis fantats. A fin dal meis, la societât a parteciparà as finâls nazionâls CSI di Gubbio.

IL TROFEU “FRANCO BATTISTUTTI” AE POLISPORTIVE TAMAUCLEULIS
Su las nêfs da Val Daupe, la Polisportive TamauCleulis à vint il Trofeu "Franco Battistutti" e chel "G.S. Val Gleris", che a valevin come ultime prove dal circuit FriûlAdrie. La gare, cun partence in linie a tecniche classiche, a à puartât grancj risultâts a livel individuâl, gracie encje a preparazion dai materiâi da bande di Sandro Unfer e Luciano Bulliano. Tra i plui piçui, si confermin intas primes posizions das propries categories: Laura, Christian e Valentina; un vêr pecjât par Ennia e Mattia che al sprint no son rivâts a cjapâ la medaie, soredut par chest ultin che al à colezionât vie par dute la stagjon cuart e cuints puescj, simpri a pouc dal bronç. Inta seconde gare, Nice a è stade plui determinade e a fat tesaur dai conseis setemanâi dai alenadôrs. Tra i pumars a risalte la prestazion di Ambra e Mark, che a guidin la patulie dai nûf atletis rivâts ducj intas posizions altes da classifiche.