05 NOVEMBRE 08
Aes Provinciis la competence su pe formazion professionâl
Vê de Regjon la competence su pe formazion professionâl. Cheste la istance vignude fûr inte prime riunion de gnove Comission provinciâl pal lavôr cun a cjâf l'assessôr al lavôr Daniele Macorig. Macorig, cu la sô relazion, al à fat il pont de situazion dal marcjât dal lavôr e su pai programs e lis iniziativis fin cumò metudis in vore. "La situazion gjenerâl di crisi interne e internazionâl che e sta puartant dam aes dites manifaturieris e ancje i mudaments de sene regjonâl daspò des elezions dal Avrîl stât - al à dit Macorig - a àn vût riflès ancje tal cjamp des politichis regjonâls di supuart ae ocupazion, ripercussions che si son fatis sintî ancje intes Provinciis. Parcè che a tocje la sperimentazion dal lavôr acessori, sodisfazion e je stade pandude dal assessôr pal fat che, dopo i risultâts jonzûts de Provincie di Udin, "i nestris sugjeriments par miorâ chest sisteme a son za stâts metûts in vore dal Inps intune circolâr: la 94 dai 27 di Otubar dal 2008".
Insegnâ ai fruts il plasê de leture
A saran lis flabis e lis contis di Gianni Rodari e Astrid Lindgren, scrittore dal famôs personaç Pippi Calzelunghe, i protagoniscj dai prins apontaments inmaneâts de Comunitât montane de Cjargne intes scuelis montanis par promuovi inte canaie il plasê de leture. Il progjet, començât lunis ai 3 di November aì des scuelis di Tamau-Cleulis e di Mediis, al à cjapât dentri passe 300 scuelârs des elementârs.
Un dai ponts di fuarce de iniziative al è stât il lavôr di scuare. “Meti in vore ativitâts didatichis adun – al sclarìs Marino Corti, assessôr ae culture e al istruzion de Comunitât montane de Cjargne – al è un valôr zontât che al pant lis carateristichis miôr de ativitât dal ent, che al à metût in vore doi sistemis culturâi in grât di lavorâ in “rêt”, vâl a dî CjargneMuseus e il sisteme bibliotecari. Cussì al è pussibil dâ ae utence scolastiche servizis formatîfs di cualitât simpri plui alte”.
Sport: premiâts i atletis furlans di "Pechino 2008"
Il sport, chel vêr, al rint ducj compagns. A palaç Belgrât il president de Provincie on. Pietro Fontanini, i assessôrs al sport e ae solidarietât sociâl, Mario Virgili e Adriano Piuzzi, a àn ricevût e premiât i atletis furlans des olimpiadis e paraolimpiadis di Pechin. "Un moment par fiestezâ ancjemò une volte chescj sportîfs - al à notât Fontanini - che che a àn savût fâsi cognossi ognidun inte sô dissipline ma ancje pal impegn e i risultâts jonzûts". Sodisfazion a plen condividude dal assessôr Virgili sedi pai vincidôrs che pai furlans che a àn cjapât part ae manifestazion internazionâl. "In gracie di personis come voaltris - al à dit - cui che al fâs sport a nivel plui bas al pues vê un esempli da seguî, voaltris pandês che cun indurance e sacrificis si puedin jonzi alts nivei".
Firmât il pat pe universitât
Ducj i rapresentants dal mont politic, economic e religjôs furlan a àn rispuindût ae clamade dongje pe Universitât dai Studis di Udin. Pe presentazion dal Pat jenfri la Universitât e lis rapresentancis dal teritori intal salon dal consei di palaç Belgrât no
mancjave nissun. De glesie - cul vescul di Udin bons. Pietro Brollo - ae Regjon - cul assessôr Alessia Rosolen - passant pal stât - cui senatôrs Mario Pittoni, Ferruccio Saro e l'on. Ivano Strizzolo - aes rapresentancis sindacâls e aes categoriis economichis. A testemoneâ che il teritori al è presint, come 30 agns indaûr, pront e unît par supuartâ e sostegni la universitât furlane. E je duncje inmò fuart la idee, che - cemût che al à sclarît il president de Provincie di Udin: "la universitât sedi un strument fondamentâl pe cressite e il disvilup dal teritori. La nestre universitât a à stade volude de int cu la racuelte di 125 mil firmis. L'ateneu furlan al à savût insedâsi e spandisi oltri la sô zone di origjin. Un lunc percors al è stât fat - al à continuât Fontanini - e in ore presint e je sante scugne sigurâ a chest ent une cressite che e sedi proporzionâl ai risultâts cualitatîfs e cuantitatîfs jonzûts.
Malborghet: screât il ripâr Gortani
Une piçule ma partecipade cerimonie e à fiestezât la fin dai lavôrs di metude in sest dal ripâr Gortani a Malborghet. Un lavôr che al à recuperât un blec di storie de comunitât de Valcjanâl e che cumò, oltri a podê dâ acet ai passionâts de mont, al varà une impuartant funzion educative in gracie de sezion didatiche che e impense la vecje scuele e lis bielecis ambientâls dal teritori. Al event, inmaneât dal sindic di Malborghet-Valbrune Alessandro Oman, nol à volût mancjâ il president de Provincie di Udin on. Pietro Fontanini che al à pandût cemût che "la Provincie di Udin, pûr no vint partecipât a cheste opare, e vûl mostrâ la sô atenzion ae mont e ae sô int. La comunitât di Malborghet a scugnût frontâ cetancj cantins - al à marcât - no ultin l'aluvion dal 2003. in chê volte o eri in Parlament e, adun cui coleghis furlans, mi sei dât da fâ par che dal Stât a rivassin plui di corse pussibil i contribûts par regolâ i disastris". Tant dal so intervent, Fontanini al à ancje memoreât la figure dal senatôr Michele Gortani, al cuâl la comunitât e à avodât l'edifici.
DOGNE- L'assessôr Faleschini in visite
Tai dîs stâts, su clamade de zonte regjonâl, l'Assessôr provinciâl Ottorino Faleschini, cun deleghe al disvilup de mont, ae protezion civîl, ae cjace e ae pescje, al è passât in visite tal comun di Dogne. Tant dal incuintri, al Assessôr a son stâts presentâts i principâi problemis dal paîs e dal so teritori massime parcè che a tocje i servizis ambulatoriâi e chei puestâi. Su chest cont, al è stât marcât plui voltis cemût che, intes piçulis realtâts di mont come cheste, a sedi la dibisugne di cjatâ une soluzion ae mancjance che e va simpri cressint di chescj servizis. L'assessôr Faleschini al à imprometût di interessâsi aes problematichis pandudis sedi cjapant contat cu la Aziende Sanitarie de Alte furlane che cu la Direzion Provinciâl des Puestis; al à po dopo zontât che, intune otiche di svilup dai servizis, la colaborazion cun altris comuns e je fondamentâl. La visite e je stade ancje ocasion par cognossi lis carateristichis di un teritori cetant siôr: in fats al assessôr a son stadis pandudis dutis lis iniziativis turistichis e culturâls metudis in vore de aministrazion comunâl par promovi e fâ cognossi Dogne e il cjanâl.
MONT- Di Centa: lis scuelis di mont no vignaran tocjadis
"Li scuelis di mont no saran taiadis de riforme Gelmini". A dîlu e je l'on Manuela Di Centa, component de comission Culture, istruzion, sport e ricercje che su pe cuestion e à fevelât diretementri cul ministri Gelmini. "Chestis a son strumentalizazions di bas nivel che no àn un minim di fonde e a vuelin dome spandi insigurecis e fâ polemichis. Lis scuelis di mont - e sclarìs la Di Centa - no saran taiadis, massime in chês valadis dulà che 'n è inmò plui bisugne di une istruzion smirade, stant che in chestis zonis a son problemis peâts ae logjistiche. La sinistre e sta doprant i metodis plui bas pûr di alçâ fumaron". "A vignaran riordinats i uficis aministratîfs che a saran ridusûts e al sarà calât ancje il numar dai presidis. La riforme Gelmini - e siere la Di Centa - no je nuie altris che la metude in vore de riforme Bassanini dal 1998".
VENÇON- Museu dal taramot, de Regjon 180mil euro
La zonte regjonâl - su propueste dal assessôr regjonâl ai Lavôrs publics Vanni Lenna - al à metût a disposizion de Associazion dai sindics de ricostruzion dal Friûl, bêçs par 180 mil euros par finî i lavôrs inte struture dal Museu dal taramot a Vençon. Il program dai lavôrs al previôt une sale multimediâl, intervents di completament des salis espositivis e il prontâmint di un catalic vademecum plurilengâl. Il supuart de Aministrazion regjonâl al è insedât intal program des iniziativis pe memoreazion dal 30 aniversari dai taramot dal 1976.TUMIEÇ - Visentini gnûf assessôr
L'assessôr Gianni Toffoletto, par impegns personâi, si è dimetût de cjarie di assessôr, ancje se al reste come conseîr. Il sindic Sergio Cuzzi, cjapât at cun displasê des dimissions, al à ringraziât l'assessôr Toffoletto pal lavôr davuelzût dilunc chescj agns pe comunitât. Al à inalore nomenât il conseîr Roberto Vicentini assessôr al cumierç e ae gjestion e svilup informatic, fasintti i miôr augûrs pal gnûf incaric. Il mudament de zonte al è stât comunicât al consei comunâl inte sentade dai 29 di Otubar.
Volontariât: mancul jutoris pai forescj
I progjets dal Centri culturâl islamic di Triest e de Vignesie Julie e Solidarmondo a son stâts finanziâts de leç su pes associazions di volontariât. Si scuen duncje mudâ il regolament dal ex assessôr ae Culture Roberto Antonaz par seondâ chei sogjets che verementri a judin la comunitât". La richieste e rive dal conseîr regjonâl dal PdL Massimo Blasoni, che al stime negativementri i criteris in ore presint metûts in vore par dâ fûr i contribûts regjonâi. "Il regolament fat bon de zonte di Illy - al note - al previôt doi criteris di fonde che a permetin di vê ponts alts in graduatorie: l'alt numar di personâl interni e esterni e la associazion jenfri dôs o plui associazions. Al è un mecanisim orent, parcè che al permet a cui che al sa chescj tramais di vê i bêçs ancje se i progjets presentâts no son propit alc e ce pe utilitât sociâl. Nol è in fats un câs che tancj progjets finanziâts intai ultins doi agns a promovin politichis di pâs, legalitât e integrazion". Blasoni si domande se nol convegni cambiâ il regolament Antonaz e destinâ lis risorsis regjonâls aes associazions che a operin tal cjamp dal traspuart e sostegn ai malâts, ai vecjos e a altris sogjets svantazats.