19 NOVEMBRE 08
Tumieç: cjapât il pirate de strade
In gracie dal fanalin de jeep che e à cjapât sot e copât joibe stade Gabriella Bano, al è stal è stât cjapât il zovin che, daspò vei cjapât sot la femine, al è scjampât, lassantle aì sul asfalt. Cuntun lunc e pazient lavôr i carabinîrs di Tumieç a àn pescjât il numar di serie dal fanâl e cun chest i proprietaris di dutis lis machinis compagnis inte zone. Fintramai a rivâ a Cristian Della Pietra, 30 agns di Ravasclêt e al zovin che al ere cun lui in machine chê sere, Paolo Morassi, di 23 agns di Çurçuvint. Della Pietra al à cirût di platâ il dam fat ae jeep fasint finte di lâ a sbati cuintri une pacare e cheste e je stade ancje la prime version dade ai incuirents, ma dopo, metût sot pression, ancje in gracie di un testemoni, al è confessât ce che al ere sucedût.
In Friûl al sarà dificil cjatâ cui che al stacarà il sondin
Nissune improibizion: la Regjon FVJ e à pandût la sô disponibilitât a ospitâ tai siei ospedâi Eluana Englaro, ma chest no vûl dî che in automatic ai vegni stacât il sondin de alimentazion. Tal cidinôr des declarazions uficiâls, chest al è stât rimarcât pûr intune situazion di grande dificoltât sul plan medic: cui, in concret, si cjaparaie la responsabilitât di fermâ il mangjâ e il bevi a Eluana? Il president de Regjon Renzo Tondo al tas, ma no dal dut. Sul so blog e je saltade fûr une imagjin dal filosof di Viene Ludwig Wittgenstein cu la citazion di chestis sôs peraulis: "Di ciò di cui non si può parlare si deve tacere". A chel "si scuen tasê", Tondo al preferìs dut câs chest sproc: "al è miôr tasê". Fintramai masse clâr il riferiment al câs di Eluana, il cui pari Beppino al è ami di lungje date dal president, che cun lui al à spartît la vicende e il dolôr, grandonon. Un altri ami di famee, il senatôr Ferruccio Saro, intant al brame "un tic di privacy". Al dîs che a Beppino Englaro al è simpri stât dongje, ma al condane "i ecès dâts a cheste vicende che e cjape dentri dome la sfere privade". In cumò al è inviât un stazâmint clinic di chescj malâts, che però a pandin situazions un grum difarents fra lôr, in fats cualchidun a son in chest stât par incidents, altris par malatiis vascolârs.
Screât il Centri di coordenament culturâl de Cjargne
Screât, a Tumieç, il Centri di coordenament culturâl, la prime struture dal teritori che a smire a valorizâ la imagjin de Cjargne e il so grant patrimoni culturâl par mieç une ativitât di coordenament des diviersis iniziativis inmaneadis da ents e associazions ma, ancje, e par dâ vite a gnûfs servizis culturâi in gracie de creazion di un sisteme integrât che al meti in contat lis rêts za esistintti come chê musiâl, chê bibliotecarie, Carniarmonie, Carnia Archeologia, Carnia Immagini, Carnia Cuore Antico, La Via dell'Arte, La Via delle Malghe, Carnia in Tavola.
La sede dal gnûf centri, finanziade cun su par jù 1 milion e 300 mil euros de Regjon Fvj e cun 280mil euro de Comunitât montane, e je logade intal Museu des Arts e Tradizions Popolârs "Luigi e Michele Gortani" di Tumieç, cun cuatri uficis oltri ae sale conferencis , la sale su pe art contemporanie e l'ufici "Officine Visive" che e fâs produzions audiovisivis e, in principi, e ospitarà il diretôr di Rêt e il personâl dal ufici culture de Comunitât montane, in particolâr i operadôrs di CarniaMusei.
"Il Centri di coordenament culturâl al è une realtât dal dut gnove in Cjargne - al à sclarît tant de inaugurazion l'assessôr ae culture de Comunitât montane de Cjargne, Marino Corti - e al smire a deventâ un pont di riferiment par ducj i events e lis iniziativis culturâls dant, massime intal forest, une imagjin plui trative dal teritori, buine di peâ la culture al artesanât e al agroalimentâr.
Tant de inaugurazion dal Centri di coordenament culturâl inte gnove ale dal Museu Gortani si prontaran dôs mostris: "Amore e morte in Friuli 1511" e "La Carnia che c'è più" che si davuelzaran fintramai ai 6 di Zenâr.
Tamau. Ancjemò robariis in glesie
A Tamau, dopo lis glesiis di Sante Gjeltrude e di Cristo Re, i laris a àn decidût di passâ ancje tal Crist. Ancje achì a àn sfuarçât la casselute devant dal locul di Maria Plozner Mentil. La robarie si pense che a sedi stade fate l'ultin fin setemane di Otubar, cence che il vuardian si inacuarzès. E si lu pense parcè che: i doi puartons no presentin segnis di nissun gjenar e la robarie si è scuvierte dome al 1 di Novembar tant de cerimonie pe partence de torce viers Redipulie. A indagâ sul fat i carabinîrs di Paluce.
"Ancje chest an la provincie e sigure 190 mil euros ae universitât"
"Come promotôrs e firmataris dal acuardi cu la Universitât di Udin continuarin a supuartâ la universitât furlane. Se il Guvier al à taiât i fonts nô no si tirarin indaûr". Cussì il president de Provincie di Udin on. Pietro Fontanini tant dal incuintri cul retôr de universitât dai studis di Udin Cristiana Compagno e la che a ere presint ancje l'assessore ae istruzion Elena Lizzi. "Cheste Provincie e crôt a fuart inte universitât furlane e lu à pandût firmant l'acuardi. E e continuarà a dimostrâlu continuant a dâ simpri la stesse cuote di finanziament dal 2007. I comissaris - al à notât - a àn lassât sul cjapitul di spese pal ateneu furlan dome 52 mil euros. O stin za previodint a incressilu par rivâ a 190 mil, bêçs che ai son i stes dal an passât". Ma l'impegn di Fontanini no si ferme achì. "Ind'è scugne di sensibilizâ i parlamentârs furlans su pe situazion dal ateneu par podê vê segnâi concrets: za pe setemane cu ven al sarà stabilît un incuintri".
La provincie e sburte la mission educative dal sport
Il sport, pai zovins, al è un element di fonde pe cressite personâl e la integrazion sociâl. Al è convint di chest l’assessôr provinciâl aes Ativitâts sportivis e ricreativis Mario Virgili promotôr di un protocol di intese jenfri la Provincie, il CONI furlan e l’Uffici scolastic regjonâl, pandût a Palaç Belgrât.
La intese, che e durarà doi agns, e previôt tra lis altris robis la creazion di reclam educatîfs pal supuart des pratichis sportivis indreçadis ae zoventût; azions di contrast cuintri il doping e di educazion ae regulis di coretece e lealtât, “par favorî compuartaments positîfs, che ai prevegnin – secont Virgili – manifestazions di malstâ e contrastâ cualsisei forme di violence”. E sarà metût in vore un program di intervents coordenât dal Ufici scolastic adun cul CONI pal davuelzimint di ativitâts didatichis. “Cuant che vinci al devente dut, cuant che jessi il plui fuart al è dut – al à sierât Virgili – cui che al piert no è dome la scuare ma ancje il sport. Si scuen insegnâ ai fruts ancje a acetâ lis sconfitis parcè che chest al permet la acetazion di se stes, il rapuart cun chei altris e une cressite ecuilibrade”.
La ex Caserme Duodo e deventarà la gnove “Cittadella della Provincia”
Unî intune sole sede i uficis de Provincie, fâ un parc pes machinis e un asîl nît pai dipendents dal ent. A son dome cualchidun dai progjets che la Provincie e inmanearà inte ex caserme Duodo, l’edifici passât ae Provincie de Regjon. Un event spietât par tancj agns dal ent che cussì e podarà meti in vore la “Cittadella della Provincia”. Ducj i progjets che a rivuardin il vecjo edifici militâr a son stâts pandûts tant di une conference stampe dal assessôr ae edilizie patrimoniâl Stefano Teghil e dal conseîr Sandro Bassi. «Cu la cession ae Provincie de storiche caserme – al à marcât Teghil – si podaran meti in vore cetantis ideis di cheste aministrazion». La caserme Duodo si cjate dongje de sede de Provincie e duncje la aree de aministrazion provinciâl e passarà da dibot 5 mil metris cuadris a passe 11 mil 500 cuntune cressite di passe 5mil. «Pal ambiziôs progjet – al à continuât Teghil – o vin pensât di inviâ concors di ideis e project financing di mût che la “Cittadella della Provincia” e puedi rispuindi il plui pussibil aes dibisugnis dai utents finâi».
Energjie: contribûts pe metude sù di implants a biomassis
Promovi la difusion dai implants a biomassis. Par chest la Provincie di Udin, ancje chest an, e à metût in vore il Font sperimentâl biomassis, il font metût su pe prime volte l'an passât, che al smire a incressi la instalazion di cjalderiis ad alt nivel tecnologjic a biomassis di len pal riscjaldament intes cjasis. I detais de iniziative a son stâts pandûts tant di une conference stampe dal assessôr ae energjie Stefano Teghil e dal president de comission consiliâr ambient, energjie, cjace e pescje, il conseîr Sandro Bassi. In concret, al vignarà dât un contribût dal 50% suntune spese di 20mil euros par comprâ e instalâ chescj implants. La scjadence des domandis e je ai 30 di Zenâr.Rigulât - Gjestôrs pe Cjase sociâl di Ludarie
La Cjase Sociâl di Lunarie tal comun di Rigulât e cîr gjestôrs interessâts a cjapâ su, une o dutis dôs, lis ativitâts de Cjase, ven a stâi i alimentârs e il bar. La Cjase Sociâl nassude ai prins dal '900, in ore presint a é gjestide dai socis de frazion cun president Lino Fruch.
L'obietîf dai socis de Cjase (da pôc metude a puest) al è chel di fâ deventâ il puest centri di agregazion, incuintri, socializazion e servizi pe int de frazion. Cumò, il bar al é puartât indevant da Ettore Fruch e la buteghe da Ilaria D'Agaro, che e furnìs un servizi un grum impuartant massime pai vecjos da frazion, puartantjur a cjase la spese. I Socis a sperin di cjatâ cui che ju sostituisi di mût di inviâ la ativitât cui prins dal an.
Cuintri la crisi: il guvier al taie Irpef e Ires
Nissune detassazion des tredicesimis, e costarès masse, ma un pussibil sbassâmint dai aconts fiscâi di fin an, pai cuâi a Novembar i lavoradôrs a son in cumò clamâts a versâ il 97\% dal Irpef e lis ditis il 100\% dal Ires. Cun di plui, daûr des risorsis, cheste misure e podarès jessi limitade ai redits plui bas: i sbassaments previodûts a son in fats jenfri i 3 e i 4 ponts percentuâi che, se slargjâts a ducj i contribuents, a podaressin costâ plui di 2 miliarts. Su pe ipotesi, che par ore e je nome une propueste, a lavorin i tecnics dal Guvier in viste di un decret par dâ un sburt ae economie taliane. Un decret che al ponte a sostegni la licuiditât dal sisteme Paîs, che vûl dî plui consums e plui cressite. L'intervent al varès il vantaç di incressi lis risorsis dal talians ma ancje di tegni i conts publics dal 2009, cuant che - dut câs - lis tassis "a saldo" a laran paiadis.