LA PROVINCIE E CELEBRE I 25 AGNS DE BIBIE PAR FURLAN

<<Ricuardâ i 25 agns da presentazion da Sacre Bibie in lenghe furlane no è une semplice celebrazion ma un mût par afermâ ancjemò la identitât dal popul furlan>>. Cussì al à det il Presidet da Provincie on. Pietro Fontanini in ocasion dal incuintri public organizât a palaç Belgrât “Bibie: 25 agns dopo. Celebrazion dal aniversari di presentazion da Sacre Bibie in lenghe furlane”. <<Une imprese grande fate da doi grancj oms, pre Checo Placerean e pre Antoni Beline, doi oms di glesie un grum convints che un popul al veti il dirit di vei la espression massime dal so credo in marilenghe>>. Sul significât, 25 agns dopo, di celebrâ chest aniversari, Fontanini al à sotlineât che <<al è un dovei par cui che al rapresente vuei la gran part da tiere furlane ricuardâ publicamenti chest moment coinvolzint i maiôrs rapresentants religjious. E ai di confessâ che i sei cetant onorât di vei achì insieme a nou il nûf Arcivescul di Udin, sô ecelence monsignôr Mazzocato, che, ancje se al aparten da pouc a cheste comunitât, al à savût capî il valôr da indentitât furlane>>. Fontanini intal donâ une copie da Bibie in lenghe furlane a bons. Mazzocato al à lanciât al vescul la idee di proponi la leture integrâl dal test sacri, magari inta Glesie da Puritât di Udin, daûr di ce che al è stât fat l’an passât da RAI pa edizion in lenghe taliane.

 

ZONTE, VIE LIBARE AI GNÛFS ORARIS DAI UFICIS

Nûf oraris par garantî une fruibilitât plui grande da bande dai citadins dai uficis provinciâi. La Zonte Fontanini a à dât vie libare tant da ultime sentade a diretive che a proviout la modifiche da articolazion dal orari di lavôr. Cun cheste modifiche, che a dovarès diventâ operative dal 1 di Zenâr dal 2010, las zornades lavoratives “plenes” si trasformin da 2 a 3 cence modificâ il totâl das ores setemanâls. <<In chest mût – al à rimarcât il president On. Pietro Fontanini – al risultarà ampliât l’orari setemanâl di aperture al public. Inmò, al fin di favorî i rapuarts e i contats funzionâi dai dipendents cun altres aministrazions e strutures publiches, i vin calcolât miôr ritardâ l’inizi dal orari zornalîr di lavôr di 30 minûts e precisamenti fissantlu as 8 e 30 invezit che as 8, mantignint distès la pussibilitât di anticipâ o posticipâ l’ingrès di 30 minûts>>.

IL SPORT PAR FAVORÎ LA INTEGRAZION TRA DISABII E NORMODOTÂTS

“Par miorâ la situazion dai nostis disabii, dal 1989 a voi vin puntât su la cualitât da vite, la formazion dal personâl adet e soredut a vierzi las puartes a int par fâ finalmenti incuintrâ disabii e normodotâts”. Chest al è ce che a à dichiarât Rodica Negrea, diretôr gjenerâl dal Servizi Assistence sociâl e ativitât ricreative da Provincie di Timisoara, tant l’incuintri tecnic fat intal cjâf lûc rumen, cun presint ancje l’assessôr provinciâl Florin Ravasila che a à zontât: “vignint a Maian in Setembar i vin capît che il sport al è la miôr dissipline par favorî la integrazion e cumò i volìin procedi su cheste strade. Par chest motîf i ringrazìn ancjemò une volte la Provincie di Udin par vei volût emplâ di contignûts il nosti protocol propri partint dal sport pai disabii e integrantju cun ducj i altetes in gare”.

TAI DAL NASTRI PAL CUART LOT DAL GNÛF TOMADINI

La Provincie a à consegnât di recent al Conservatori Tomadini di Udin, tant di une cerimonie organizade dal Assessôr Provinciâl a Edilizie scolastiche inz. Mario Virgili, i lavôrs dal 4 lot da Citadele da Musiche, realizâts 5 meis e mieç prime dai timps proviodûts. L’intervent, che al à compuartât un investiment di 4.255.000 euros, al à interessât il plan teren e il prin plan dal edifizi di vie Trep che une volte al ospitave un seminari e dopo l’ex tribunâl. <<I lavôrs a son lâts benon, grazie a opare dai miei professioniscj e dirigjents, ma ancje das impreses esternes che a àn anticipât la consegne: une robe positive, anticicliche, rispiet al lûc comun che al dîs che i lavôr publics a rivin simpri in ritart>>. Cussì si è esprimût il President da Provincie on. Pietro Fontanini intal discors inaugurâl, zontant che si trate di <<une struture cetant impuartant, achì intal cûr di Udin, dedicade a culture e a musiche>>.

TUMIEÇ, SIELTE LA IDEE VINCENT PAL RESTYLING DI PLACE XX SETEMBAR

Il studi preliminâr che al judarà a meti adun il progjet di rivisitazion dal centri storic al sarà chel dai professioniscj “Mazzorana-Cortiula-Cucchiaro”. Ricalibradure das strades, pistes ciclabils, noves furnidures, dut in funzion da pedonalizazion da place. “La comission a è restade favorevolmenti impressionade da analisi dai diviers elaborâts – al spieghe l’assessôr – che a àn centrât varies aspetatives ancje se al è stât dât pouc timp ai professioniscj pal deposit dai progjets. Il studi vincidôr rispiet ai aitis professioniscj al à proponût divierses idees inovatives ma atuabils – al comente Marcon – che a van da ricalibradure das divierses strades citadines, cun nûf furniment urban, a realizazion di une piste ciclabil par rivâ in place Cente, cu la riorganizazion interie dal ambit da stesse e la creazion di spazis nûfs da dedicâ ai fruts.

TUMIEÇ, A SANT MARTIN SI DIFINDIN I CROCIFÌS

Buine partecipazion di int inta zornade là che il cjâf lûc cjargnel al à celebrât il so Sant Patron, Sant Martin. Il Sindic Dario Zearo, saludant dal sagrât dal Domo i siei citadins, al promet fedeltât al crocifìs “che – al dîs – nol vegnarà gjavât da nissun edifici public fin cuant jo sarai achì”. Dopo il Sindic al à volût fâ tancj riferiments al contest sociâl atuâl dal comun, ricuardant la figure di Sant Martin. L’Arcipreidi Bonsignor Angelo Zanello al à ricevût Zearo su la puarte dal Domo citadin. Po dopo Zearo al à cjacarât dal moment atuâl di crisi economiche che a è daûr a portâ un grum di citadins a cundizions di bisugne cun domande di assistence e di lavôr.

COMUNITÂT MONTANE DE CJARGNE,DE REGJON VIE LIBARE AL PAL

Su proposte dal President Renzo Tondo (che al à la deleghe pai problemes da mont), la Zonte a à fat bon il Plan di Azion Locâl (PAL) che l’ent comprensoriâl cjargnel, cumò comissariât, al à presentât. 7 milions di euros par realizâ investiments di svilup teritoriâl. La leç regjonâl 4 dal 2008 (“Normis pa valorizazion dal teritori montan”) a stabilìs che las Comunitâts montanes a scuegnin inserî i intervents da lôr proviodûts intun document di programazion, il PAL apont. Cu la delibare fate buine da Zonte, la Regjon a à autorizât la stipule dai Acuardis cu las dôs comunitâts montanes par realizâ ce che al è inserît intal PAL. I intervents a podaran ancje gjoldi dai finanziaments comunitaris dal Obietîf 2.

CONSORZIS TURISTICS IN PERICUL, IL LÔR FUTÛR IN MAN A CARNIA WELCOME

Ancje i Consorzis di Promozion Turistiche tra i prossims obietîfs das “fuarfies” da Regjon ae opere ta riorganizazion dai ents locâi in Cjargne. E Carnia Welcome si invie a deventâ cussì il logjic interlocutôr unic cun Turismo FVG pa promo-comercializazion da ufierte turistiche locâl. Un percors forsit obligât che, naturalmenti, pas modalitâts atuatives ipotizades, al alarme i direts interessâts, soredut a For Disore, che a àn il sostegn da Leghe Nord da Cjargne. Voi a son restâts trei i Consorzis di chest gjenar (principalmenti dâts dongje da albergadôrs) ancjemò funzionants e presints sul teritori: ducj cumò in licuidazion.

TUMIEÇ

Sensibilizâ i zovins da Cjargne e svicinâju al univiers variegât dal volontariât, informantju das divierses ativitâts e dai programs che l’associazionisim locâl, vere e dispès pouc conossude risorse dal teritori, al à atuât. Al è il progjet “VolontariaMente” che al cjape denti i students di 3^, 4^ e 5^ dai Istitûts di istruzion superiôr di Tumieç. Pensât, ativât e cetant volût da Aziende Sanitarie n. 3 “Alte Furlane”, il progjet al à il supuart dal braç operatîf da Cooperative sociâl Itaca. I incuintris dai zovin di “VolontariaMente” a son partîts cuntun slanç nûf: dopo il grant sucès dal an passât, i zovins cjapâts denti intal progjet a son tornâts cul stes spirit dai prins dîs ma cu la consapevolece in plui di une stagjon passade a portâ ridades e bontimp intas comunitâts visitades.

I EX DIRIGJENTS DE FIAT IN AIÛT DAI STABILIMENTS DI OCJÂI DE MONT FURLANE

Al è dât dongje da un grup di ex dirigjents da FIAT il pool clamât in aiût dai stabiliments di ocjâi di For Disore, For Disot, Prât, Davâr, Nimis e dai altris comuns dongje, cetant colpîts da une crisi començade za a metât dai agns Novante e che a à ridot il lôr numar a une decine, par un totâl di cirche 200 adets. La Agjenzie pal svilup da mont a à di fat clamât a racuelte imprendidôrs e sindics da aree interessade par metju a confront cui esperts e valutâ las esigjenzes das impreses, las professionalitâts e las tecnologjes che a àn a disposizion e las lôr problematiches. In seguit, il pool si ativarà par visitâ diretamenti las aziendes che a ‘nt fasaran richieste e par individuâ un program di intervent. L’obietîf al è chel di varâ, cul aiût das capacitâts gjestionâls dai ex dirigjents da cjase automobilistiche torinese, un progjet di riconversion dal setôr dai ocjâi, in mût da tutelâ la ocupazion in aziendes che a rapresentin la font principâl di redit par une gran part das famees residents inta aree.

UN ESPLORADÔR SI È FRATURÂT UNE CJAVILE SUL CUARNAN

I volontaris da stazion dal Cuarp Nazionâl dal Socors Alpin e Speleologjic di Glemone, insieme ai oms dal Socors Alpin da Guardie di Finance di Tumieç, a son stâts impegnâts a meti in salf un esploradôr restât ferît sul Cuarnan, intal Glemonat. Il Socors Alpin al è intervignût a supuart dal elicotar dal 118 par prestâ aiût a un zovin di Glemone, che dopo jessi sbrissât suntune cueste erbose, al à ripuartât une presunte frature al cuel dal pît. Il ferît al è stât razunt e stabilizât sul lûc dal incident, a une altitudine di cirche 1250 metros. Cjariât su la barele, al è stât trasportât intune zone plane e cjamât sul elicotar, che lu à trasportât tal Ospedâl di Tumieç pai aciertaments dal câs.