<<GRAZIIS DI CÛR>> A BONS. BROLLO
La Provincie a à rindût omaç al Vescul jessint di Udin, bons. Pietro Brollo. Cuntune cerimonie semplice, cu la partecipazion dai components da Zonte e dal Consei, il president on. Pietro Fontanini al à esprimût la sô gratitudin e chê di dute l'aministrazion provinciâl a bons. Brollo pa sô opare pastorâl inta Diocesi di Udin. <<Un moment solen par ringraziâlu pai siei nûf agns di lavôr - al à det Fontanini rivolzìntsi a bons. Brollo - No che la Provincie a seti un ent che al à un rûl pastorâl ma si sintìn cetant dongje ai valôrs da Glesie. Il president da Provincie - al à seguitât Fontanini - al è espression di une maiorance elete ancje parcè al à presentât intal so program une Cjarte di valôrs là che a è marcade la centralitât da persone. Bons. Brollo al à volût ringraziâ i aministradôrs presints dantur une benedizion par furlan, no par adulazion, al à det, ma par che a ‘nt seti une consapevolece dal nosti jessi, parcè cui al à la cussience das sôs origjines al pos lâ lontan.

<< UDIN CITÂT DE VITE>> NO "SIMBUL DE MUART"
<< Un brut presentiment cualchi mês indaûr, voi un brut vencul che al è daûr a cjapâ forme: Udin simbul di muart>>. Pal president da Provincie di Udin on. Pietro Fontanini, il fat che il cjâflûc furlan al veibi ospitât il 6° Congrès da associazion Luigi Coscioni al è un fat penous. <<Tant da mê cariere politiche o ai vût mût di rapresentâ il Friûl ae Cjamare e al Senât - al à ricuardât Fontanini - e, simpri, cui che al saveve da dulà che i vignivi, mi cjacarave dal ricuart dal grant meracul da ricostruzion dal taramot dal 1976. Voi, par colpe da selerade gjestion, soredut mediatiche, di un brut fat, Udin al devente capitâl da muart, dulà inviâ il dibatit sui tancj temes, e tra chescj la eutanasie>>. << No vorès nue da dî se il cjâflûc furlan al fos stât sielt par motîfs logjistics o par cualsisedi ate rason, ma il fat che al seti stât preferît parcè achì a à cjatât "la muart dolce" Eluana Englaro, nol è acetabil.
A mi pese sintî la espression "Udin - citât da muart" - al à marcât Fontanini -, in riferiment a chel che achì al è sucedût e che dal sigûr la gran part dai furlans no à condividût.

I SINDICS DE ALTE FURLANE: NO A FUSIONS, SÌ A UNION DAI COMUNS
Al vorès di jessi ator dai 15 milions di euros il tai di risorses pal 2010 che la Regjon, par efiet da diminuzion das entrades, a metarà in vore tai confronts dai ents locâi dal Friûl Vignesie Julie. A anticipâlu tant dal Comitât esecutîf dal Anci, slargjât ai sindics da Alte Furlane che si è dât dongje  a Tumieç, il sindic dal cjâflûc cjargnel Dario Zearo, che al à incuintrât il President da Regjon Renzo Tondo e l'assessôr Garlatti pa presentazion de boze di riforme "post Comunitât montane", studiade da un grup di sindics bipartisan de Cjargne, e da ce che si è capît laudât dal stes Tondo. Cjalant il dât cun preocupazion, il president dal Anci Ginfranco Pizzolitto al à auspicât che "il Guvier nazionâl al difondi cetant prime i dâts definitîfs su las entrades fiscâls che a determinaran, par ricjadude, ancje chês dal Friûl Vignesie Julie".
In seguit a è stade la riforme dai ents locâi a calamitâ la discussion tra la ventine di sindics presints, cun Pizzolitto a marcâ un "No fuart as fusions dai comuns", poiant invezit il percors tacât par une normative che a puarti a Union dai comuns e duncje a une fusion dai servizis par garantî la cualitât domandade.

LEGAMBIENTE CUINTRI LA CENTRÂL DI SOMPLÂT

Tant da assemblee publiche organizade dai sindics di Bordan e Trasaghis a son saltades fûr las posizions dai comuns rispiet al ampliament da centrâl di Somplât. E se il progjet presentât da Edipower al tire dongje la aprovazion dai comuns di Bordan e Trasaghis (chest ultin cun prescrizions), contrarietât e je stade esprimude da Legambiente. Intune sale plene, dongje il centri studis di Dalès, si è davuelzude la assemblee publiche indete dal sindic di Bordan Gianluigi Colomba e dal sindic di Trasaghis Augusto Picco, che e veve tant che teme, ancjemò une volte, l'ampliament da centrâl di Somplât. Tant da serade al è rivât l'okay da ducj e doi i comuns pal progjet presentât da Edipower.

REFRION DI VILE: VINARS RIUNION IN COMUNITÂT MONTANE
Dopo l'alarme lançât dai sindics su las pussibiles migrazions in Austrie da dite che a à problemes logjistic intal stabiliment cjargnel, il conseîr regjonâl Cacitti al anuncie la riunion convocade dal comissari Drabeni. "Sul pericul di trasferiment de Refrion da Vile a ates localitâts, probabilmenti in Austrie, come anunciât su pa stampe in maniere alarmistiche dai doi rapresentants sindacâi da Cisl e Cigl da Alte Furlane, a van fats oportuns e imediâts aprofondiments". A domandâlu il conseîr regjonâl Luigi Cacitti, che ancje su richieste da bande dal sindic di Vile Romano Polonia al à concuardât un incuintri inte Comunitât Montane cul comissari dal stes Ent. "I ai savût - al spieghe Cacitti - che il comissari Giorgio Drabeni al è stât informât dal probleme cualchi dì indaûr e subit si è ativât par dâ rispuestes concretes a une cuestion che stant as notiziis di stampe e dure da agns".

AGRICULTÔRS IN EMERGJENCE, LA COLDIRETTI  E PETENE LA REGJON

Tantes impreses agricules dal Friûl Vignesie Julie "no àn ancjemò viodût un euro dai provediments da Regjon leâts al decret anticrisi". Il President Regjonâl da Coldiretti, Dario Ermacora, lu sosten a Cjavaç, tant dal diretîf provinciâl da associazion a presince dal assessôr regjonâl a agriculture, Claudio Violino. Magari cussì no - al à det Ermacora - a son daûr a entrâ in crisi propri las impreses plui inovatives. Al sarès un erôr tragjic se la Regjon a pensàs di ridusi las risorses al di sot dai 70 milions di euros ad an, biel che pa culture - al à marcât -  int spint 135. Violino al à ricuardât che la Regjon a à "stanziât 30 milions di euros che a saran daurman spindibii. In part il contribût, che nol sarà a font pierdût, al sarà a tas zero e in part il tas al sarà concuardât cu las bancjes.

COROT PE DISPARIDE DAL COORDENADÔR DAL CENTRI IMPLEI DI TUMIEÇ

La improvise muart di Davide Alvio Candido, coordenadôr dal Centri pal Implei di Tumieç, a è stade ogjet di un messaç di corot indreçât a famee da bande dal president da Provincie onorevul Pietro Fontanini, dutun al assessôr al lavôr Daniele Macorig. Candido, a ricuardin Fontanini e Macorig, al ere un pont di riferiment pal CPI di Tumieç, pa esperience madurade su chestes tematiches, cetant complesses e divierses intal teritori montan. Intal coordenâ il CPI si ere distint, in particolâr, inte conduzion di ativitâts di acompagnament impuartants e delicades, finalizades a fâ incuintrâ las esigjences das impreses cu las competences e lis carateristiches sogjetives dai lavoradôrs daûr a cirî un lavôr.

FONTANINI, <<LA PROVINCIE E SOSTIGNARÀ LA SNAIDERO BASKET>>

La Provincie di Udin si colore di narançon. Ancje la aministrazion provinciâl e sostignarà la Snaidero Basket, societât che, dopo da parziâl jessude di sene dal storic paron Edi Snaidero, si è tornade a presentâ su la sene sportive in gracie dal impegn di une cordade publiche-privade. <<Ancje la Provincie di Udin - al à garantît il President on. Pietro Fontanini – a à pronte a dâsi da fâ pal storic grup furlan. Fin cumò cheste aministrazion a à cirût di dâ sostegn ai sports minôrs ma, in chest moment di crisi economiche, al covente favorî la ativitât da rapresentative furlane di basket. << Cumò - al à sigurât Fontanini - si trate di fâ las verifiches che a coventin par cuantificâ la disponibilitât dai fonts prime da fin dal an>>. Important, pal president Fontanini, il rûl di promozion davuelzût da une scuare, che intun passât no masse lontan a è rivade a obietîfs importants a livel nazionâl e internazionâl>>.

ZONTE, 96 MIL EUROS AE AGRICULTURE
A son complessivementi di 96 mil e 500 euros i contribûts in materie di agriculture che la Zonte a à stanziât tant da ultime sentade. Daûr da proposte dal assessôr Daniele Macorig, la aministrazion provinciâl a sostignarà in dut 29 tra Comuns, Associazions, Pro Locos e Consorzios par judâ la ativitât agricule, singule o associade, che a àn un puest important ta economie dal teritori. <<Il mont agricul - al spieghe Macorig - al à di frontâ ogni dì chês che a son las dificoltâts burocratiches e meteorologjiches che a tudin i imprenditôrs intun moment, come chel atuâl, là che a son ancjemò fuart i efiets da crisi economiche>>.

CJAMP ROM, FINÎT IL SORELÛC DE POLIZIE PROVINCIÂL

Al è finît in poucjes ores il sorelûc da Polizie provinciâl tal cjamp dai zingars di vie Monte Sei Busi a Udin. In dut a son stâts impegnades 12 persones, distribuides in 6 patulies, judades da 2 patulies dal Comant provinciâl dai carabinîrs di Udin.
Daûr di ce che al à riferît il Comandant da polizie provinciâl, a è stade cjatade une situazion gjenerâl di disgrât soredut inta aree a sud dal cjamp dai zingars e dongje dal simitieri citadin. Tant das operazions a son stâts rilevâts di fat cetancj grums di scovaces di ogni sorte, ancje pericoloses. Cetant grande la superficie interessade da presince di rudinaçs, materiâi ferous, machines abandonades e incendiades, ciclomotôrs distruts, pneumatics e vecjes bataries di machines.

INTERVENTS DI MIORAMENT DE VIABILITÂT

Dopo i intervents di restaurazion e metude in sigurece a è di nûf agjibil la strade comunâl in localitât Pisignaries, intal Comun di Paulâr, dulà che al è stât sistemât ancje il plaçâl dal oratori dal cjâflûc. Lu anuncie l'assessôr provinciâl al Svilup da Mont, Ottorino Faleschini, che al à efetuât un sorelûc intai dîs stâts. Faleschini al à acertât encje l’intervent di miorament da viabilitât e ribitumature dal font stradâl intas frazions di Testeons, Naunine e Cleules intal Comun di Paluce. Chescj lavôrs finanziâts da Provincie par vie dai Canuls rivierascos par un amontâ di 155 mil euros - al ricuarde l'assessôr - a testemoniin la atenzion di Palaç Belgrât viers la mont e a son inserîts intun cuadri plui gjenerâl di miorament complessîf ancje in viste da iminent stagjon invernâl, che a compuarte plui disagjos pa circolazion stant i fonts glaçâts o cuvierts di neif.

EASY FOOT, MARCHETTI AL INCUINTRE I SINDICS

Al è stât concuardât a Palaç Belgrât un pat tra la Provincie di Udin e i Comuns par miorâ la sigurece stradâl in dut il teritori. Il Vicepresident e Assessôr a Viabilitât e ai Traspuarts da Provincie di Udin, Fabio Marchetti, al à incuintrât i sindics da Provincie di Udin, e cun lôr al à condividût un percors di atuazion dal Progjet Easy Foot. Il Plan integrât su la sigurece stradâl realizât da Provincie di Udin al è stât ilustrât ai aministradôrs locâi cul obietîf di dâ vite a une politiche coordenade in materie di sigurece su las strades. Otime e je stade la rispueste ricevude da bande dai Sindics e dai numerous aministradôrs presints in sale, disponibii a colaborâ cul desideri di ridusi i incidents stradâi e il numar dai muarts e dai ferîts su pas strades.