01 AGOSTO 07
MONT - Un studi par valorizâ lis malghis
Un studi su 42 caseris par lumâ i problemis che a impedissin un disvilup just di chest setôr de agriculture di mont che al è cjapât dentri tal progjet di valorizazion des caseris e dai passons. A son sù par jù 1600 lis vacjis che dilunc la istât a passonin tai cjampeis dal teritori comunitari cun cetante produzion di spongjis, formadis, scuetis (frescjis e fumadis) e altris cjossulis tipichis. La metude in sest des stradis che puartin in chescj puescj, il comedâ lis caseris, il miorament de rêt de aghe e de eletricitât, a son dome cualchi des dibisugnis che plui dispès a saltin fûr par podei sigurâ un ciert nivel di cualitât a chestis struturis. Un altri element impuartant al è chel de ativitât di agriturisimets che nûf di lôr a davuelzin, adun ae tradizionâl ativitât di produzion e trasformazion dal lat. La pussibilitât di dâ fûr da mangjâ e di podê tegni a durmî no dome e garantìs une jentrade di plui ai puescj ma a dâ la pussibilitât al turist di cognossi diretementri la vite che si fâs tes caseris, oltri che podê preseâ lis carateristichis dal paisaç e dal ambient la che si cjatin.
REGJON – Fûcs tai boscs, grâfs pericui
Dilunc chescj mês, pe cressude des temperaduris e la calade des ploiis, i boscs a deventin facilmentri une pericolose lescje pal fûc: lis statistichis a pandin in fats che in chest timp dal an il numar dai fûcs, ancje se in mût difarent seont lis zonis de nestre regjon, al cres une vore e duncje indi è scugne di inviâ dutis lis misuris buinis par fâ cuintri a chest stât di robis. Tant di cheste istât la situazion e je stade vonde cuiete in gracie aes ploiis dal mês di Zugn. Da un pocjis di setemanis in ca invezit il cjalt e l'ars a àn creât lis condizions plui a riscli: cheste la reson che e à pocât la Regjon , come tai agns passâts, a declarâ, cuntun decret firmât dal president Illy, «il stât di grâf pericul dai fûcs boschîfs», a començâ dai 30 di Lui fintramai ai 2 di Setembar, su dut il teritori regjonâl cjapât dentri te zone segnalade dal "Plan di difese dal patrimoni forestâl dai fûcs", val a dî Alps, Prealps, Cjars, penisule di Lignan e dutis lis areis cun boscs. In cheste dade di timp nol è permetût brusâ scovacis, cuestis, roiis e jerbis ni fâ sclopâ mortarets. No si podin butâ fulminants impiâts, cjichis no inmò distudadis, fâ tonâ minis (gjavantti specifichis licencis) o, plui in gjenerâl, «meti in vore cualsisei operazion che a causioni un pericul di incendi». I compuartaments che a laran cuintri chestis normis a saran cjastiâts cun multis ancje passe i mil euros, dut câs tignint simpri cont lis responsabilitâts penâls.
CJANÂL DAL BÛT- Ricualificazion de racolte diferenziade
Si inviarà tai dîs che a vegnin il progjet indreçât ae ricualificazion de racolte diferenziade dai refudums, inmaneât de Comunitât montane de Cjargne adun cun Net Spa e Sager srl. La iniziative, che e previôt une butade fûr di bêçs par dibot 550mil euros da bande dal ent, in principi e cjaparà dentri il Cjanâl dal Bût, e par chest a son za a disposizion 200mil euros, par dopo slargjâsi cul lâ dal timp a dute la Cjargne e si davuelzarà in dôs ativitâts di fonde. Parcè che a tocje la valade dal Bût, di une bande e vignaran metûts, in ogni paîs, gnûfs contignidôrs specifics pe racuelte diferenziade (76 cjampanis blancjis pe cjarte, 76 verdis pal veri e 83 casonets zâi pe plastiche, che a laran a zontâsi a chei verts pes scovacis che za si cjatin) e, di chê altre bande, e sarà incressude il plaçâl ecologjic di Sudri, une aree furnide, sierade e vuardeade par ducj i comuns de valade, che e coventarà a tirâ dongje e smaltî, in maniere regolâr, ducj i catans grancj e pericolôs.
MONT - Une gnove pensade dal Turisim FVJ
Une presentazion unitarie dal prodot turistic mont par dopleâ il numar dai pachets dâts fûr. Cun chest obietîf il Turisim FVJ al à inmaneât un gnûf progjet di promo comercializazion, che al indreçarà la Agjenzie regjonâl a pandi i dîs consorzis de aree montane intes ocasions impuartants (tant che fieris e workshop), dulà che chescj ents no podin partecipâ. La iniziative, che e cjape dentri ancje la imbastide di un volantin di pueste avodât ae mont e indreçât aes agjenziis di viaç, tour operator e Cral (i Centris ricreatîfs aziendâi dai lavoradôrs), e ven incuintri ae dibisugne di struturâ miôr la ufierte e lis strategjiis di vendite, aumentant il disvilup turistic di une zone che e pues cetant miorâ e clamâ dongje turiscj. «La mont e je une risorse impuartant pal turisim regjonâl - al marche Enrico Bertossi, assessôr regjonâl aes ativitâts produtivis - par chest dongje ai grancj investiments in infrastruturis, servizis e events programâts de regjon, e covente un sisteme di promozion par dute la zone». Il servizi, inmaneât dal Turisim FVJ sore nuie, al è tant che il rûl di "General Sales Agent", ven a stâ di rapresentant comerciâl, e intune seconde dade al podarès jessi slargjât ancje a altris zonis de regjon e a singulis struturis che no son dentri in organisims consortîls.
No de Uncem Fvj al decret di leç Santagata
Contrarietât de Uncem Fvj al decret di leç Santagata che al met dentri il recuisît de altece minime di 600 metris di altitudin dai Comuns par jessi stimâts zonis di mont. A dîlu il president de Uncem regjonâl, Giuseppe Marinig, che al marche cemût che: «Il decret, se metût in vore, al causionarès un sore plui di isolament de mont parcè che al lassarès fûr, seont criteris superficiâi e populistics, cetancj comuns de basse des agjevolazions in setôrs come la agriculture e il cumierç, la istruzion, la sanitât e la assistence. Chest sisteme al gjavarès duncje, ai passe 4000 piçui comuns montans di dute Italie, l'unic jutori di coordenament e programazion che al sigure i servizis minims essenziâi ae lôr int». Il decret, contestât de Uncem ancje a nivel nazionâl, al è stât presentât cul fin di sbassâ i coscj de politiche, calant il numar dai comuns considerâts montans, e duncje lis spesis des iniziativis di sosten al teritori. «Nol è in cheste maniere - al va indevant Marinig - che si sbassin i coscj de politiche. Se ancje inte nestre regjon al varès di jentrâ in vore chest decret, ducj i comuns des vals dal Nadison, de zone di Tarcint, dal glemonàs e un toc de Cjargne, de Val Cjanâl e dal pordenonês, a saressin stimâts tant che planure».
Grillo, "Il furlan tant che lenghe veicolât tal insegnament"
«Cjapi at che la Regjon e je tornade indaûr su pe cuestion de lenghe furlane. Purpûr par capî cuâl che a sedin lis veris intenzions dal guvier regjonâl, si scugnarà stazâ cuâl che a son lis risorsis metudis a disposizion pe marilenghe». La Vicepresident dal Consei Provinciâl Valeria Grillo, e interven cussì inte discussion su pe tutele dal furlan. «Cemût che di pôc al à dit il president Tesini - e à marcât la Grillo - pai slovens de regjon si spindin ogni an 11 milions di euros e nol è pensabil che pai furlans, che a son dîs viaçs di plui, no si spindi nancje un cuart di chei bêçs. Par altri, chest, al sarès un investiment pal teritori parcè che la identitât furlane e podarès vê conseguencis positivis su pe unitât sociâl e duncje economiche. Cun di plui, promovi la marilenghe e je "une sigurazion su pe vite" stant che a permet di conservâ ae nestre regjon il so statût speciâl. Su pal insegnament dal furlan tes scuelis, o voi ribati che stimi just il so inseriment tant che strument di insegnament par altris materiis, cemût che za al sucêt pai ladins e ancje pai slovens de nestre regjon. Intun mont, che al è simpri plui menaçât da une pericolose splanade di dut e di ducj, indi è dibisugne di prudelâ il dirit ae difarence e incressi il sens di apartignince al Friûl, tiere da simpri scune dal plurilinguisim».
Dade dongje internazionâl des Fiat 500
1957-2007: a 50 agns de nassite de Cinccent, il Friûl al da acet, dentri des manifestazions pal aniversari, al sôl radun uficiâl dal trivenit de piçule machinute. A Palaç Belgrât e je stade presentade la seconde edizion dal "Radun internazionâl Fiat 500 - Tour enogastronomic dal FVJ e Slovenie" inmaneât dal “Club 500 coordenament di Udin e Pordenon”, che si davuelzarà in Cjargne, tal Tarvisian e in Slovenie ai 25 e 26 di Avost. La manifestazion, dome pes Fiat 500 di epoche, chest an e devente internazionâl: daspò de partence da Damâr e dopo vê tocjât Tumieç, Ravasclêt e Darte, il trop des machinis e rivarà a Kranjska Gora. In dutis lis fermadis si varan visitis vuidadis e cerçadis di prodots tipics. L'assessôr al turisim de provincie Fabio Marchetti cussì al à sclarît: «la gloriose cinccent e sarà fiestezade cun cheste impuartant dade dongje di passionâts, un progjet che continuin a puartâ indevant cun grant vivôr e che chest an al scjavaçarà ancje i confins».
Provincie: scomençât il cors par adets stampe di comuns e associazions
Comuns e associazions a scuele in Provincie par deventâ adets stampe. Cheste la gnove iniziative pensade da Palaç Belgrât par inscuelâ personâl da meti a disposizion de comunicazion dai ents di dulà che a vegnin. «Si cjacare - al dîs il president de Provincie di Udin, Marzio Strassoldo - di un gnûf servizi che volin furnî al teritori. O stimin la comunicazion un setôr impuartant par infuarcî il leam jenfri istituzions e citadins, par informâ su ce che si messede dentri dai ents e lis ativitâts da lôr metudis in vore. O volin cun di plui, in cheste maniere, rispuindi ae tante int che, tai sondaçs, a dîs di agradî le comunicazion des istituzions e des associazions e la stimin un setôr da slargjâ simpri di plui». I cors, dal dut gratis e cence nissun cost pe Provincie (il docent al è il sorestant dal Servizi Comunicazion) a cjaparan dentri argoments come lis principâls leçs de comunicazion e dai uficis stampe (tant che la leç 150 dal 2000), la preparazion dal plan di comunicazion, la organizazion dal lavôr in ufici, e ancje i rapuarts cui citadins, cui gjornâi, la radio, la television e la stampe on line.
Cleulis: Sagre di Sant Svualt
A Cleulis dut al è pront pe sagre di Sant Svualt e i clevolans son in fervôr par dâ un bon acet a dute la int che a volarà passâ un moment di ligrie a ca sù sot la ruvîs. Chest an la sagre e presente une novitât: no si fasarà plui alì des scuelis ma e vignarà dividude jenfri Cleulis alt e Cleulis bas. In fats si tacarà sabide ai 4 di Avost aes 6 sore sere tor de ostarie Pakai, chi si podaran cerçâ frico di cartufulis, polente e gridelade di cjar, il dut simpri ben bagnât. I passionâts dai cjalsons invezit a varan di spietâ la dì dopo, val a dî, domenie 5, dopo i gjespui grancj par latin e la pussission, tor lis 5 si viezarà la cusine alì di chel che al jere la ostarie di Carleto. No podin no impensâ pai amants de armoniche che cheste no mancjarà, sabide di sere nol podere jessi altri che il Trio Pakai a fâ sintî lis sôs notis intal aiar. Cleulis a us spiete duncje.