25 APRILE 2007
La zonte provinciâl di Udin a Paulâr
La zonte provinciâl di Udin si è dade dongje tal municipi di Paulâr. Une usance, chê di lâ fûr da palaç Belgrât, che e va indevant da un pôc di timp cul fin di stazâ diretementri i problemis dai 137 comuns de provincie di Udin. «Se si cognòs za un probleme - al à dit il president Marzio Strassoldo - lis decision par distrigâlu a son plui semplicis da cjapâ. Par chest mutîf acetin di bon grât lis clamadis che nus vegnin da difarents aministrazions comunâls: in cheste maniere ducj i assessôrs a rivin a capî lis diviersis realtâts comunâls che si cjatin inte provincie, mostrant cun di plui il lôr interès e il lôr volê stâ dongje ae int». A dâ il benvignût il sindic Maurizio Vuerli, che adun cu la zonte al à saludât i aministradôrs provinciâi. Dopo vê ringraziât la zonte provinciâl par jessi vignude sù a Paulâr, Vuerli al à pandût lis iniziativis puartadis indevant tal setôr culturâl e turistic, massime tes politichis zovanîls e la viabilitât.
Po dopo si è cjacarât dal cantin dal continui mudament di mestris e su chest i aministradôrs provinciâi a àn ribatût la posizion za sclaride in zonte cuntun ordin de zornade (che al sarà discutût tal Consei provinciâl cu ven), val a dî la dibisugne che i incarics tai puescj scuvierts de scuelis di mont a vebin almancul scjadince di trê agns.
Strassoldo aes celebrazions pal 50° aniversari dai Tratats di Rome
«Il Partît Popolâr European al è il model pal grup che guvierne la provincie di Udin». A dilu al è stât il president Marzio Strassoldo cjacarant a Palaç Belgrât tant de fieste pai 50 agns dai Tratâts di Rome.
«In cumò la plui part dai partîts che a son inte nestre coalizion - al à zontât - a son dentri dal Partît Popolâr European e i siei ideâi e principis a son di esempli pal nestri procedi politic. In fats la direzion di cheste aministrazion provinciâl e je indreçade a une Europe comun vierte viers il forest e a metin in vore rapuarts privilegjâts cui paîs dongje. Une Europe dai Stâts e dai Popui - al à sierât Strassoldo - che e à tant che sante scugne chê di fondâsi su pes sôs lidrîs cristianis».
Scuelis: «Pofardie? No, graziis»
«Slargjâ la culture dal rispiet par chei altris» cheste, pal president de provincie di Udin, Marzio Strassoldo, la scugne des istituzions par fermâ il probleme dai prepotents tes scuelis. Strassoldo, rispuindint a un scuelâr di cuinte dal Istitût "Malignani", al à marcât cemût che la pofardie e vebi lidrîs lontanis. «Cuant che o studiavi ae universitât, patî scherçs o matanis, al jere dibot di oblic, une usance pes matriculis che a vevin di gloti cjapadis pal cûl e insolencis ancje penzis. In ore di vuê chest no si cjate plui, dut câs si cjatin inmò ecès che no tignìn cont dal rispiet che al à di jessi par chei altris». In detai Strassoldo al à impensât la sô esperience tant che insegnant universitari e al à pandût cemût che chest al sedi «il plui biel mistîr dal mont e cetant che al puedi stiçâ la ment vê a cefâ ogni dì cu la zoventût, però ai ancje podût viodi fats che a mostravin la mancjance totâl di rivuart par chei altris. Un esempli a son stadis certis fiestis di lauree dulà che si podin viodi, oltri ai normâls scherçs, matetâts che e si tramudin in reâls dams pes publichis aministrazions e pe int che si cjate a dovê netâ la che chei altris a àn soçât».
Un centri scolastic cuintri ae dispersion
«La mont e pues deventâ un puest la che si decît di stâ, a pat che i servizis a sedin avuâl cun chei che si cjatin in citât. E il prin di chescj a scuen jessi la scuele». Chest il struc dal discors dal assessôr provinciâl pal disvilup de mont Vittorio Caroli inte cunvigne "Dispersion scolastiche in Alte Furlane" inmaneât de provincie di Udin a Tumieç te sale des riunions de Comunitât Montane de Cjargne. «No si pues pretindi che la int a continui a vivi in mont – al à zontât Caroli - se dopo i fîs a patissaran par cheste sielte, colpe de cualitât de istruzion che ur ven dade. Par chest, tant che assessôr ae mont ai volût indreçâ la mê azion massime a pro dai zovins e de scuele. Ma chest assum al reste limitât se nol si zonte a une organizazion, se nol devente struturâl. Ve parcè che si stin impegnant pe metude in vore di un Centri teritoriâl pai Servizis scolastics de Alte Furlane in gracie a un contribût de Regjon, ven a stâ di une struture e di une organizazion che a coventi a judâ la autonomie des scuelis dal teritori».
Cjargnemuseus: dibot 300 i laboratoris didatics tal 2006
I laboratoris didatics inmaneâts da CjargneMuseus l'an passât a àn cjapât dentri passe 5.700 tra students e insegnants di dute la regjon, deventant cussì un imprest di fonde pe cognossince dal teritori. I laboratoris inmaneâts de rêt musiâl de Comunitât Montane de Cjargne a son stâts 282 cjapant dentri cetantis scuelis cjargnelis. Il 32% di chestis scuelis a son stadis chês mezanis po dopo lis elementârs e al fin i asîls cul 29%. I laboratoris a àn cun di plui regjstrât la presince pal 2% des superiôrs.
«La didatiche – al sclarìs l'assessôr ae istruzion e ae culture de Comunitât montane, Marino Corti – e je simpri stade il pont di diamant di CjargneMuseus dulà che si dan dongje lis energjis e dulà che si è investît pal inzornament e par jessi avuâl cun chês altris realtâts italianis e forestis. Lis iniziativis didatichis a son un imprest zovevul par fâ in mût che lis gnovis gjenerazions a imparin a cognossi e preseâ la culture dal lôr teritori».
Udin la lûs dal pitôr Sandro Gagliardi
Si è screade inte Glesie di Sant'Antoni Abât a Udin la mostre Sandro Gagliardi, "Il pitôr de lûs". La delegade pal assessorât ae culture de Provincie di Udin, Valeria Grillo, inaugurant la esposizion e à volût ribati la impuartance di fâ cognossi artiscj tant che Gagliardi, che cu lis lôr oparis a dan un sburt impuartant ae cressite culturâl dal Friûl. «di an in an - e à sclarît - si torne a resurî l'apontament cu lis mostris dal cicli "Art e teritori", iniziative inmaneade de Provincie di Udin par proponi a dute la int lis oparis dai autôrs che a rapresentin la atualitât dal Friûl. Une capacitât creative, chê di Gagliardi - e à zontât - che e met adun formis artistichis forestis cul ambient de Piçule Patrie che, in gracie a chescj prestits forescj, cul lâ des etis, si è insiorade di produzions culturâls unichis. Oparis un grum sugjestivis - e à sierât - buinis di pandi un slambri de nestre regjon».
D'Andrea a Rome par pandi il Progjet Sport e Etiche
Istituzions, radios e televisions privadis locâls, scuele e famee, adun par un gnûf progjet di sensibilizazion su pai valôrs di fonde dal sport, par une miôr preparazion ae vite. Chest l'assum cjapât ae fin de zornade di lavôr al Ministeri des Comunicazions a Rome, su iniziative dal sotsegretari Giorgio Calò, dulà che al jere presint l'assessôr provinciâl al sport di Udin Fabio D'Andrea. Il membri de zonte regjonâl di Palaç Belgrât al à ancje vût la pussibilitât di pandi il progjet de aministrazion provinciâl di Udin pe difusion dai valôrs de etiche intal setôr zovanîl des federazions sportivis. D'Andrea al è stât dacuardi cui presints marcant la «dibisugne di dâ mesaçs fuarts par mieç dai media, massime de television, a pro di une gnove culture, indreçade a inscuelâ i zovins par che il lôr svicinament al sport al vegni fat tal miôr dai mûts, ven a stâi come un “zûc”, par mateâ, cressi e disvilupâ sedi il cuarp che la ment». E se il sotsegretari Calò al à ribatût la necessitât che dutis lis realtâts locâls, Provinciis e Comuns, adun cu la radio e lis televisions privadis a davuelzin une funzion educative, D'Andrea i è lât daûr marcant cemût che in Friûl alc dal gjenar al sedi za in vore, in gracie ae sensibilitât dai aministradôrs e dai operadôrs de comunicazion. A Rome, D'Andrea al à ancje incuintrât il Sotsegretari al sport Elidio De Paoli e ai à presentât «i progjets vuide de Provincie, indreçâts a valorizâ i setôrs zovanîls».
A Palaç Belgrât i students de Republiche Ceche
«In chescj dîs vin fiestezât i 50 agns de firme dai Tratats di Rome: veius achì al è un segn cetant significant de lungje strade fate dilunc chescj agns par meti adun lis nestris comunitâts intune Europe simpri plui slargjade e siore di culturis». Cussì il vicepresident de Provincie e assessôr ae istruzion Paride Cargnelutti al à dât il benvignût al grup di scuelârs dal Liceu classic "Stellini" di Udin e dal Gjinasi cecoslovac di Skutec, zimulâts intun program di scambi culturâl jenfri lis scuelis europeanis. «Da tiere di confin cui paîs slâfs, da tiere di emigrants e di miserie - al à zontât Cargnelutti - il Friûl tai agns al è resurît fintramai a ribaltâ cheste inclinazion, deventant une regjon siore e produtive, cûr di une Europe che e continue a mudâ. Un centri ben pandût da voaltris puems, che in ore presint, par chest continui e lunc procediment, podês cognossisi e screâ gnovis amistâts». Cargnelutti ae fin al à dât fûr ai ospits il libri "Diplomâsi in Friûl", in cheste dade al à ancje impensât ai students dal "Stellini" l'apontament seguitîf: la inaugurazion de grande palestre: «che sperin - al à sierât - di screâ prime de fin dal an».
Gnûf contrat Rai cence lenghe furlane: ricors al Tar
Lunis ai 16 di Avrîl stât si è davuelzût a Udin un incuintri cuintre il gnûf contrat di servizi de Rai che nol ten in nissun cont la leç 482/99 su pe tutele des minorancis linguistichis storichis, sierant lis puartis ae lenghe furlane. L'incuintri al è stât inmaneât dal gjornâl “ La Vita Cattolica ” che cun di plui al à cjapât sù 54mil firmis par meti in vore une Rai autonome in Friûl e par dâ un sburt ae autonomie e al relanç dal Friûl. Ae taule di lavôr si son cjatâts il retôr de Universitât di Udin Furio Honsell, il president de Provincie di Udin, Marzio Strassoldo, il sindic di Udin, Sergio Cecotti, il vicari gjenerâl de glesie udinês Giulio Gherbezza e il diretôr de Vita Cattolica Ezio Gosgnac, oltri a ducj i adets ai lavôrs des scuelis e istituzions di studis pal furlan. Il supuart al è vignût ancje des Provinciis di Pordenon e Gurize.
L'azion di ricors al Tar decidude e larà indevant avuâl cu la domande di un incuintri cui presidents des Cjamaris Marini e Bertinotti.
Une scuele in Sri Lanka cui bêçs de Provincie
Indi è Paîs, come il Sri Lanka, la che no ‘nd è dibisugne di tancj bêçs par fâ sù une scuele par vincj fruts cun problemis; ma a coventin une mission, une vocazion speciâls tant che chês dai parincj di Raffaella Piva, storiche dal art furlane muarte tal tsunami dal 2004, e l'interès dal consei provinciâl di Udin, che cuntune delibere votade ae unanimitât e à dât fûr 10 mil euros. Chest contribût al è stât doprât de associazion di volontariât Raffaella Piva Fund, par furnî lis stanziis de scuele di Walasgala, dongje Tangalle in Sri Lanka. Alessandro Pasetti Medin e Margherita Piva, om e sûr di Raffaella Piva e fondadôrs de associazion, a son stâts clamâts a Palaç Belgrât dal assessôr aes politichis sociâls Adriano Piuzzi, par pandi i positîfs risultâts cjapâts passant par mieç de poie de prime piere e la inaugurazion dal edifici ai 27 di Fevrâr stât. «E je sul serio une emozion – al à notât Piuzzi – scuvierzi cemût che cul nestri piçul jutori vin podût da une man ai fruts di Walasgala. Une biele dimostrazion di cetant che al sedi impuartant la partecipazion di ducj par dâ un tic di benstâ ae int di chê zone disgraciade».
Tumieç: inviât il progjet “Viazadôrs di cjarte”
Sielzi, lei e condividi libris scrits da forescj che a vivin in Italie e che, tai lôr scrits, a doprin la lenghe taliane. Cheste la idee di fonde de gnove librerie “Viazadôrs di cjarte”, la iniziative inviade tai dîs stâts ai de stazion des corieris a Tumieç. La propueste culturâl, che e viôt protagoniscj i zovins de Cjargne, e je stade inmaneade de Associazion “Lander” di Darte, cul supuart de Comunitât Montane de Cjargne e de associazion “Torre Picotta” di Tumieç. «Si trate di un progjet sperimentâl di booksharing – al sclaris l'assessôr ae culture de Comunitât Montane, Marino Corti – val a dî di condivision di libris. I libris a puedaran jessi sielts, lets e tornâts indaûr, coseâts ai amîs e condividûts. Cui che al voles al pues lassâ une note su pe opare che al à let, dentri dal sît internet www.artalander.info , dulà che si puedin ancje cjatâ altris informazions su pe iniziative».
La particolaritât di cheste propueste e je chê di fâ cognossi di une bande i autôrs stranîrs che vivin intal nestri Paîs di chê altre viodi cemût che la lenghe taliane e pues insiorâsi in gracie al contribût di chescj scritôrs forescj, bogns di dâ une panoramiche su pe nestre Italie da un pont di viste difarent e cjamât di piçulis sfumaduris.