4 APRILE 2007
Incuintri a Palaç Belgrât jenfri Isidoro Gottardo e Forza Italia
Incuintri a Udin tra i rapresentants di Forza Italia de aministrazion provinciâl e il gnûf coordenadôr regjonâl Isidoro Gottardo. Obietîf de cunvigne al jere chel di sclarî a Gottardo lis liniis vuide dal partît in Provincie di Udin. Tant de assemblee, dulà che a jerin presints ancje il coordenadôr provinciâl Mario Virgili, i conseîrs Silvano Galetti e Franco Costantini, il cjâf grup Piero Mauro Zanin, il president dal consei provinciâl, Marco Quai, e i assessôrs Adriano Piuzzi e Paride Cargnelutti, al è stât pandût cemût che si è tornâts a unî la maiorance ae vuide de provincie. Cussì al à dit Zanin «A si è ribatude la plene unitât de maiorance che, intes elezions dal 2006, e je stade confermade a cjâf de Provincie cul 58% dai vôts e cun di plui si son stabilîts i rapuarts jenfri zonte, consei e fuarcis politichis: e ogni tant timp a si convocaran lis taulis di lavôr par stabilî lis prioritâts da puartâ indevant».
Piuzzi gnûf referent dal Upi in Comission regjonâl politichis sociâls
Adriano Piuzzi, assessôr aes politichis sociâls, ae cooperazion e al volontariât de Provincie di Udin, al è il gnûf rapresentant dal Upi dal FVJ inte Comission Regjonâl des politichis sociâls (leç regjonâl 6/2006). «Pensi – al à notât Piuzzi – che al è un ricognossiment a dut l'ent provinciâl udinês e al bon lavôr da chest davuelzût tal coordenament di iniziativis di colaborazion ative cui comuns e lis associazions dal teritori. Ma cheste nomine e je ancje un stimul a impegnâsi inmò di plui in chest delicât e impuartant setôr de nestre comunitât che al à dibisugne di atenzion e cetante passion».
Leç eletorâl: incuintri cul president dal Consei regjonâl
«Un incuintri zovevul che però nol à distrigât i ponts di fonde de cuestion» cheste la note dal president dal Upi Fvj e de Provincie di Udin Marzio Strassoldo su pe riunion che i sorestants dal Upi, dal Anci (cul president Gianfranco Pizzolitto) e dal Consei des Autonomiis (cu la presince dal president Vittorio Brancati), a àn vût cul president dal Consei regjonâl Alessandro Tesini. L'argoment principâl de discussion al jere chel de gnove leç eletorâl regjonâl e la atenzion e je stade dade massime a chel pont che al previôt che no si puedin elei in consei regjonâl sindics che a setin a cjâf di comuns cun plui di 3.000 abitants e nancje presidents di Provincie. «Un incuintri volût par pandi il malstâ dal consei des autonomiis par no jessi stât interpelât su un argoment cussì impuartant e che pardabon al podarès vê conseguencis penzis su pe stabilitât des aministrazions – al à sierât Strassoldo – ancje se inte plene autonomie decisionâl, il consei regjonâl al varès scugnût visâ lis aministrazions locâls».
Dâts fûr a Sudri i ricognossiments de 5^ edizion di “Leggimontagna”
Si è sierade la cuinte edizion dal premi leterari nazionâl “Lei in mont”, un dai events culturâi de regjon, che si è davuelzût inte sale consiliâr dal comun di Sudri, indreçât a valorizâ oparis di leterature, sagjistiche, gjornalisim e audiovisivis, e ancje chês ineditis, buinis di esprimi pal miôr la sostance dal spirit alpin. Lis juriis dal premi, vuidadis da Aldo Larice, president de Asca (Associazion des Sezionis Cjargnelis dal C.A.I. – For di Avoltri, For Disore, Ravasclêt, Tumieç), a àn stazât 132 scrits, rivâts da dute Italie e da cualchi paîs forest, oltri a 19 filmâts.
A cjapâ il prin premi la opare di narative “Al di là del verticale” dal scritôr Georges Livanos. Impen che pai saçs e à vint la autore Marzia Verona cul scrit “Dove vai pastore?”. Pe categorie dal gjornalisim, prin Marco Albino Ferarri cul “Reportages-inchiesta sulle Alpi”.
In cheste cuinte edizion al è stât dât spazi ancje ai inedits. Al prin puest Mario Schiavato cul scrit “Il mio Carso”.
Passant ai filmâts – sezion che e à vût une buine risulte sedi pal numar di oparis presentadis sedi pe cualitât di chestis – a vinci al è stât Emanuele Policante cul video “Eppure erano pochi minuti fa”.
«Chest premi – al à sclarît il president de Comunitât montane de Cjargne, Lino Not – al è une ocasion impuartant par creâ pussibilitâts di incuintri e di studi di mût di fâ cognossi la mont in ducj i siei difarents aspiets». L'assessôr regjonâl Enzo Marsilio al à impensât cemût che cheste manifestazion e coventi a infuartî il leam ae mont viodude tant che sielte di vite.
Lis Provinciis dal Friûl Vignesie Julie: risorsis pal teritori
“Lis Provinciis dal Friûl Vignesie Julie: risorsis pal teritori”, chest il titul de cunvigne inmaneade a Triest de Union des Provinciis Talianis, ma ancje il principi ribatût cun fuarce dal president dal Upi regjonâl e de provincie di Udin Marzio Strassoldo, e dai presidents des provinciis di Pordenon e Triest, Elio De Anna e Maria Teresa Bassa Poropat, che da pôc e à cjapât il puest di Strassoldo a cjâf de Upi. Un incuintri dulà che a jerin presints ancje l'assessôr regjonâl Franco Iacop e il president de Anci Fvj Gianfranco Pizzolitto. La cunvigne e je stade ocasion par frontâ cuestions fondamentâls pal sisteme des provinciis. «Vin volût cheste cunvigne – al à dit Strassoldo – parcè che il 2006 e il 2007 a son agns di grandis novitâts pal sisteme des autonomiis, che no son dutis favorevuls al ent di aree vaste. La oportunitât de esistence des Provinciis al è un cantin che al va discutût, stant che di tant in tant la lôr oportunitât e ven metude in discussion. Gjavant cualchi câs – al à precisât – lis provinciis a son dapardut in Europe: in fats la maiorance dai stâts e à stimât une dibisugne la presince di un ent di guvier mezan, che nol pues jessi metût in forsi».
Cooperativis: il vuadagn 2005 al à strapassât i 66 milions di euros
Lis cooperativis sociâls de provincie di Udin (val a dî il 40% des cooperativis de Regjon), a cjapin dentri passe 3.400 lavoradôrs - pal 77% feminis - e intal 2005 a àn vuadagnât plui di 66 milions di euros. Chescj, in struc, i risultâts dal Tierç Rapuart su pe Cooperazion Sociâl dal Osservatori provinciâl (fat da Finreco adun cun Confcooperativis, Legacoop e Agci) e presentât dal assessôr aes politichis sociâls Adriano Piuzzi. «Un apontament rimarchevul - al à notât Piuzzi - par fâ preseâ il rûl di promozion de cooperazion dât sù ae Provincie dal 2002 e infuarcît de normative regjonâl butade fûr da pôc (Leç 20 dal Otubar 2006). Un assum dulà che vuelin che la provincie a deventi pardabon protagoniste dongje des cooperativis intal lôr procediment di cressite par vie che a son la fuarce de nestre comunitât». «Il studi - al à sierât Piuzzi - al mostre la necessitât di tornâ a dâ une direzion manageriâl ae organizazion, che al dismeti la sole gjestion burocratiche dal sistemi des bancjis passant a une logjiche di relazion par rivâ a programâ sul medi o lunc periodi».
Cunvigne dal CONI provinciâl a palaç Belgrât
«Parcè che a rivuarde i implants sportîfs, la provincie e je impegnade su tancj fronts. Pûr, cence il jutori dal volontariât, dai Comuns, des associazions e di dutis chês altris impuartantis realtâts tant che il Coni, il nestri lavôr al sarès dibant». Chest il pinsîr pandût dal vicepresident de Provincie e assessôr ae edilizie des scuelis Paride Cargnelutti, che al à puartât il so salût e il so “grazie” ae cunvigne inmaneade dal Coni di Udin a palaç Belgrât. « La Provincie – al à continuât – e sta fasint sù la palestre plui grande de citât, chê dal liceu Stellini, che sperin di finî dentri di chest an. Come ducj i nestris implants e no sarà dome pai students de scuele ma a coventarà ancje a rispuindi aes tantis domandis di un spazi da bande des associazions sportivis dal teritori». Po dopo, Cargnelutti al à impensât ducj «i contribûts che butin fûr a pro dai comuns pe costruzion e metude in sigurece dai lôr implants sportîfs e massime impuartant e cun buinis risultis al è stât l'acuardi che la Provincie e à fat cul “Credito sportivo”: si pensi dome che in 4 agns a son stâts fats mutuis par 8 milions di euros, a pandi il fat che simpri plui comuns a si indreçin al “Credito sportivo” e che cun di plui chest acuardi al à vût il merit di disgredeâ i oblics burocratics».
Paulâr: solidarietât de CISL Alte Furlane
Il sunsûr de juste proteste inviade inte scuele di Paulâr e à vût la valence di puartâ la atenzion suntun cantin penç, che al fâs paidî aes scuelis di mont un dam no just, ven a stâ il spropositât continui cambi dai maestris. Mudâ ogni an tancj insegnants, o inmò piês, plui insegnants inte stesse materie dilunc l'an, a vûl dî ruvinâ la formazion dai fruts intun slambri de lôr vite cetant delicât. Di fat al è tant de scuele medie che i fruts a comencin a formâ capacitât di judizi e a tachin a sielzi pal lôr doman. E duncje un dam patît in chescj agns al pesarà un altre dì su le vite dal frut. Il disvilup de mont, da tancj agns un pont di fonde pe Cisl, nol pues jessi separât dal sigurâ a mularie che vîf cassù lis stessis oportunitâts dadis a chê che e sta te basse. Insaldâ lis catidris intes scuelis di mont a è une sante scugne, par vê une buine cualitât de formazion par miârs di arlêfs. Par jonzi chest obietîf si scuen, da une bande incoragjâ economichementri i maestris des scuelis plui discomudis (in altris regjons chest a sucêt aromai da timp) e di chê altre bande dâ la pussibilitât di incarics plurienâi. Cun dut chest la Cisl de Alte Furlane a da la sô plene solidarietât e il plen supuart ae comunitât di Paulâr.
Esposito vincidôr a Lonato
Domenie ai 25 di Març a Lonato (in provincie di Bresse), a si è davuelzût il "5° Trofeu Internazionâl F.I.K.B. citât di Lonato" di semi e light-contact. Al torneu a àn partecipât cetancj atletis rivâts da dut il nord Italie. Il Friûl, in cheste ocasion, al jere rapresentât de Cjargne KICK-BOXING di Paluce che, come in ogni gare, e à dât buinis sodisfazions. L'atlete e maestri Andrea Esposito al è rivât prin in dôs categoriis, - 65 Kg e - 75 Kg , vincint, cun merit, doi dai trê incuintris previodûts.
Simpri pe Cjargne KICK-BOXING, sul tatami, pe categorie -70kg, al si è batût Michele Muser. A front di une otime rimonte, il nestri atlete al scugnût cedi par dome un pont il prin puest a un lombart. I assums dal maestri Esposito a son un grum: intes setemanis stadis al à partecipât a dôs garis in Austrie e si è classificât, in dôs categoriis, al cuint puest su une cuarantine di atletis.
Cumò si spietin altris bielissims risultâts intes garis che vignaran, nazionâls e internazionâls, dulà che la Cjargne KICKBOXING di Paluce a è simpri presint.
Cleulis: al prin puest tal donâ sanc.
Il piçul paîs di Cleulis cui siei 400 abitants al è jenfri lis localitâts in Italie cul plui alt numar di donatôrs di sanc. Gust al è stât pandût de presidente de associazion Marietta Bellina che e à sclarît cemût che i dâts – vignûts fûr da un studi dal Istitût Superiôr de Sanitât – de sô sezion a setin tra i miôr di Italie. Nuie di straordenari se si pense che su 400 abitants i iscrits a son 126 (impensin che si pues donâ dome dai 18 agns ai 65), cuntune medie che e je di un su doi, a pet di chê provinciâl dal 15%, chê regjonâl dal 5% e al fin chê nazionâl dal 4. A fâs dal sigûr plasê savê che intai piçui paîs al continui a jessi un cussì grant impegn sociâl e che si cjatin, intune realtât simpri plui egoiste, personis che ancjemò si dan da fâ pal ben di chei altris sore nuie.