Fontanini: "La Sangalli e darà un sburt ae economie dal Aussa-Corno"

"Concori al sbloc de situazion de Sangalli, fasint in mût di inviâ i lavôrs di costruzion de gnove fabriche di veris a San Zorç, e je stât sintût da cheste aministrazion tant che une sante scugne". Chest il pinsîr pandût dal president de Provincie on. Pietro Fontanini che, adun cul vice-president Fabio Marchetti, al à incuintrât il president Sangalli Giorgio, che al à volût chest incuintri par pandi la sô ricognossince pe posizion cjapade de Provincie, tai mês indaûr, sul câs Sangalli. In fats la zonte e veve dât la autorizazion al president a resisti in judizi pe difese dai provediments regjonâi e comunâi su pe compatibilitât ambientâl pal implant e duncje sul benstâ di costruî. "Intun moment come chest - al à notât Fontanini - no si podeve no tentâ di risolvi il probleme di une aziende che e veve decidût di vierzi il so stabiliment in Friûl e che, colpe de burocrazie, e riscjave di vê di bandonâ il progjet».

 

La Provincie e regale une statue al Marinoni di Udin

"Une piere scuadrade, stufe di jessi dome piere, e à decidût une dì di mudâsi in arbul. Cussì e cressè subit in altece, ma ae prime bugade di aiar, a començà  a pleâsi e a clopâ, periculant di sdrumâ par tiere. E jere une plante in cumò, no plui piere e par stâ sù e veve dibisugne di lidrîs". Cussì il scritôr Paolo Maurensig al descrîf la statue "Equilibrio instabile" che da cualchi timp e je plaçade inte cort dal Istitût Tecnic par Gjeometris "Marinoni" a Udin, screade dal president de Provincie on. Pietro Fontanini ae presince dal sorestant scolastic Ester Iannis e dal president dal circul culturâl "Il Faro" Roberto Cossettini. La statue, che l'an passât e à cjapât part al 11 "Simposi internazionâl di culture" di Vergnac e je stade regalade dal Circul culturâl "Il Faro" ae Provincie di Udin che e à decidût di plaçâle al Marinoni.

Eluana, procediment dissiplinâr dal Ordin dai miedis cuintri De Monte

L'Ordin dai Miedis di Udin al à decidût di inviâ un procediment dissiplinâr cuintri il dotôr Amato De Monte, sorestant de equipe che e à fermât la alimentazion e l'idratazion di Eluana Englaro.  La decision e je stade cjapade de Comission Miedis dal stes Ordin che al à ancje decidût di fermâ il procediment in spiete di stazâ une schirie di documents e lis conclusions de inchieste inviade de Procure de Republiche di Udin par De Monte, Beppino Englaro e altris 12 personis pe ipotesi di reât di concors in sassini di Eluana, muarte ae cliniche  “La Quiete” di Udin ai 9 di Fevrâr stât. Si trate de ipotesi di bandon terapeutic di Eluana in contrast cun ce che al stabilìs il gnûf Codiç di Compuartament dai Miedis.

Tamau: dispedâts i teis dal Crist.

I teis dal Crist di Tamau di vie don Tita Bulfon, in cuatri dîs a àn mudât muse. Dant acet ae domande de int, stufe dai discomuts causionâts des lidrîs des plantis e dal frindei che a stropavin lis gornis, la Aministrazion comunâl di Paluce e à dât sù a un dotôr forestâl di Tumieç une ricercje par sclarî la situazion de vegjetazion de strade. Studiât e fat bon il studi prontât dal professionist, la zonte comunâl e à clamât la dite CAFAB par dispedâ e, tal câs, taiâ i teis dilunc la strade. I lavôrs, començâts lunis 23 e sierâts joibe 26 di Març, ai àn fat taiâ 9 plantis e dispedâ chês altris, dibot une 40. Il cefâ, davuelt sot il control dal maressial de pulizie municipâl Giovanna Unfer, al à impegnât ancje il jutori dai alpins dal grup ANA di Tamau e dai volontaris de Protezion civîl di Paluce.

 

Porzûs: acuardi jenfri Provincie e Ana di Faedis par ramondâ la zone

Meti a puest il lûc di Porzûs e lis stradis che alì a rivin, dulà che ai 7 di Fevrâr dal 1945 e fore fate la maçadice. Par chest la Provincie e firmarà un acuardi cul grup Ana di Faedis. I detais de iniziative a son stâts pandûts a palaç Belgrât jenfri il president on. Pietro Fontanini, l'assessôr ae edilizie patrimoniâl Stefano Teghil, il conseîr Cristiano Shaurli, il sindic di Faedis Franco Beccari, il cjâf grup e il component dal locâl grup Ana Paride Fioritto e Dario Sgualdino. "Il guvier al à za stabilît, in mût no uficiâl, par che Porzûs al deventi monument nazionâl - al à declarât Fontanini – in fats, in curt la zone e scugnarès otignî chest impuartant ricognossiment. Intratant la Provincie, adun al grup Ana di Faedis, e inviarà la metude in sest de zone e des stradis". Il grup Ana di Faedis si è za metût a disposizion pai lavôrs di manutenzion.

Un arbitri che al fâs onôr al Friûl 

Al à començât tal campionât di balon di serie A ae etât di… 32 agns! No stin tabaiant di un zuiadôr ma ben dal arbitri Renzo Candussio di Cervignan. Ae sô prime partide, Siena-Atalanta dai 25 di Zenâr stât, a son lâts al stadi Artemio Franchi cetancj dai siei paisans par rinfrancjâlu e chest al samee vê puartât ben, lant daûr ai coments de stampe nazionâl.
Po dopo al è stât ricevût a palaç Belgrât dal assessôr provinciâl al sport, Mario Virgili, che ai à pandût dut il so gust pe so dimostrazion di personalitât e fermece dilunc il match, cence intrigâ mai il zûc. “Candussio al è une des plui bielis imagjins de nestre regjon e dal nestri teritori e il sport al à bisugne di int come lui. In fats ‘nd è dibisugne di messaçs puartâts da modei di int come cheste”.

Lezions di tamaveis ae Scuele Secondarie di I grât di Paluce

Ancje chest an i scuelârs de scuele secondarie di Paluce, che a àn sielzût di imparâ la lenghe tamavese, a àn seguît trê lezions di dôs oris ognidune, doprant la lenghe intune suaze comunicative. I intervents, sprolungjant lis iniziativis inmaneadis de Scuele Primarie, a àn smirât a infuartî lis struturis linguistichis e slargjâ il lengaç di fonde, midiant la multimedialitât, la rotazion di domandis e rispuestis e la ricercje di ponts comuns fra il tamaveis e il todesc. A son stâts doprâts materiâi didatics metûts adun dai scuelârs. Ai fruts po dopo al è stât insegnât alc di gramatiche e notiziis di storie e culture dal paîs di Tamau: insediament, liendis e usancis.

Ancje a Paluce il "Volontariât de sperance"

Ancje la Protezion Civîl dal comun di Paluce a à cjapât part al progjet "Banca del Cordone". Un grup di volontaris in fats si è metût a disposizion pal traspuart dal ospedâl di Tumieç ae sede de protezion civîl di Palme dai campions di sanc dal cordon ombelicâl che intun secont timp a vignaran puartâts a Padue. Resints studis a àn marcât cemût che chest gjenar di sanc al puedi jessi une alternative cetant impuartant aes celulis staminâls e cussì permeti a un plui grant numar di malâts un traplant par vuarî da leucemiis, malatiis metabolitis, talassemiis e vie indevant. Il prelêf al ven fat diretementri in sale part, subit daspò de sierade dal cordon ombelicâl, cuant che il bambin al è za tes mans de ostetriche o dal pediatre. Tant che la secondine e je inmò in sede, si tache il cordon cuntune sache di pueste, dulà che si ingrumarà il sanc, cence che il procediment al dedi fastidis ae mari. Il prin traspuart dai volontaris dal comun, Diana Sottocorona e Paolino Puntel, al è stât fat di pôc. Il riceviment a Palme al è stât cordiâl e la esperience cetant coinvolzint, sintude tant che une sperance par une pussibil vuarision.

E cres la racuelte diferenziade de Cjargne

La Comunitât montane e slargje su dute la Cjargne il progjet di dopleament de racuelte diferenziade, che al previôt il logament, su dute la zone, di casselots di pueste, tant che: cjampanis blancjis pe cjarte, verdis pal veri e zâi pe plastiche, che si zontaran a chei vert scûr pe scovacis misturadis. Dopo il Cjanâl dal Bût, i Comuns cjapâts dentri a son stâts: Cjavaç, Verzegnis, Vile, Lauc, e Raviei, biel che tai prins dîs di Avrîl a tocjarà a Davâr, Prât, Comelians e For Di Avoltri. Il progjet si sierarà dentri de fin dal an, cun Preon, Soclêf, Dimpeç, For Disot, For Disore e Sauris. La iniziative e à previodût un stanziament di dibot 400mil euros da bande de Comunitât Montane che, adun cun Net Spa e Sager Srl, e à prontât il plan di intervent.  “Tai Comuns za cjapâts dentri – al note Andrea Plazzotta, assessôr al cumierç e racuelte dai refudums de Comunitât Montane – la dade fûr di casselots pe racuelte diferenziade e à judât la int a capî e fâ la juste racuelte».

Corse: Trofeu Provincie di Udin

Ancje chest an, jenfri i mês di Mai e Lui, si davuelzarà il Trofeu di corse Provincie di Udin rivât ae 9 edizion, lis garis si insuazaran intes fiestis de “L’unità”, dulà che – paiant la cuote di iscrizion – al sarà pussibil mangjâ ancje un past cjalt. Par partecipâ si scuen jessi iscrits cuntun Ent ricognossût e in regule cu la stagjon sportive dal 2009. Chei che a coraran almancul 4 garis a podaran rientrâ inte classifiche gjenerâl e cjapâ un premi a ricuart de manifestazion.
Cun di plui, vinars ai 22 di Mai a Manzan e vinars ai 14 di Avost a Pradaman, cun partence aes 19.30 sore sere, si davuelzaran lis dôs classichis stafetis estivis 3x3000.