Pre Toni Beline: in curt une racuelte cun dutis lis sôs oparis

Dâ dongje une racuelte complete di ducj i scrits di pre Toni Beline. Chest il progjet di Glesie furlane che la Provincie di Udin a supuartarà cul so contribût. Di pôc al è stât firmât a Palaç Belgrât il protocol di intese che al impegne l'ent a dâ un contribût ae associazion par cinc agns - fintremai al 2013 - pe metude in vore dal progjet "Pre Antoni Beline: un profete pal Friûl di doman". Il progjet al è indreçât ae racuelte e publicazion des oparis di don Antonio Bellina intune edizion complete e organiche. In dut la Provincie e darà un contribût di 80mil euros che a vignaran doprâts pe publicazion di 9 oparis di Pre Antoni Beline. A firmâ il document, il president on. Pietro Fontanini e il president di Glesie furlane Giovanni Pietro Biasatti, ae presince di don Romano Michelotti, don Antonio Cappellari, don Giuseppe Cargnello, don Lorenzo Dentesano e Christian Romanini. "O stimi che si stedi fevelant di un dai progjets plui impuartants pe leterature furlane - al à dit - ducj nô o vin un debit viers chest om che al à metude dute pal Friûl, la sô int e la sô culture.

Eluana, i perîts de procure: «Nissun dubi, il protocol al è stât seguît»
Pai doi perîts nomenâts de Procure de Republiche di Udin no 'nd è dubis sul rispiet dal protocol metût in vore pe sospension de alimentazion e de idratazion a Eluana Englaro, la femine muarte a Udin daspò 17 agns di come. I doi tecnics - Gastone Zanette e Enrico Facco, de Universitât di Padue - a son stâts nomenâts dal Procuratôr di Udin, Antonio Biancardi, par stazâ l'acuardi fra ce che al jere stabilît tal decret de Cort di Apel di Milan (po dopo passât intun protocol de Associazion par Eluana) e ce che al è stât in concret metût in vore ae cliniche "La Quiete" di Udin, dulà che la femine e je muarte ai 9 di Fevrâr stât. Pai doi perîts: "no 'nd è nissun element che al puedi fâ nassi dubis su pussibilis mancjancis inte condote personâl di cui che al à assistût la Englaro intai ultins dîs, muarte in mût cidin e cence sufrî".

A Udin la citadele de musiche

Udin, citât de musiche, començant dal Conservatori Tomadini. Al va indevant l’iter che la Provincie e à metût in vore par jonzi chest obietîf. Dîs indaûr a Palaç Belgrât si è firmade la convenzion jenfri il Conservatori “Jacopo Tomadini” e la Provincie che e permetarà la lade indevant dai lavôrs di restaur de sede dal Conservatori. Il document al è stât firmât de presidente dal Conservatori Maria Amalia D’Aronco e dal president on. Pietro Fontanini. «In gracie di cheste convenzion – al à sclarît Fontanini – ae Provincie al vignarà sigurât un contribût di 90 mil euros ad an par vincj agns. Bêçs che a van a zontâsi a chei che la Provincie e à za metût par fâ in mût che l’edifici di vie Trep al puedi deventâ une vere e proprie “Citât de musiche” par dute la regjon. Il totâl – di 1 milion e 190 mil euros – al ven fûr da un acuardi di program inmaneât de Regjon pe metude in vore di intervents edilizis a pro dal sisteme universitari e de alte istruzion in FVJ.

La Provincie e premie lis patinadoris dal Friûl e de Italie  
"Un laut e un ricognossiment aes cualitâts sportivis, aes capacitâts tecnichis, organizativis e umanis che as àn puartât a jonzi grancj sucès in cjamp nazionâl e internazionâl, che a onorin i valôrs dal sport e dal nestri Friûl": cun cheste motivazion l'assessôr provinciâl al Sport, Mario Virgili, al à dât fûr tant di une cerimonie a palaç Belgrât, une targhe di ricognossiment ae Polisportive di patinaç di Orgnan di Basilian che, tal 2008, si è fate cognossi sedi a nivel nazionâl che internazionâl, vincint il titul talian, un arint ai europeis e un tierç puest ai mondiâi. Tal 2009 e à tornât a vinci chel talian e in curt e sarà impegnade intune competizion a nivel internazionâl.
"Us ai viodût in cetantis ocasions - al à dit Virgili - ma us cognossevi za di nomee: il vuestri fenomen al è unic par dut il nestri Friûl. Fâs i compliments al president Pavan, a ducj i sorestants e massime aes atletis pal biel esempli che nus stais pandint".

Une esercitazion cuintri lis slavinis pal Socors Alpin
E va indevant la ativitât di adestrament dai cjans dal Socors alpin regjonâl e de Vuardie di finance. Profitant de tante nêf che e je inmò a Siele Nevee (passe 2 metris), cualchi zornade indaûr 5 cjans ai àn fat une finte di ricercje intune slavine sot Siele Bila Pec, par dongje dal Ricovar Gilberti. Pal ocasion l'elicotar de Protezion Civîl regjonâl e à puartât in cuote sedi i cjans che il personâl, che a àn scugnût doprâ i schis par vie dai 30 cm di nêf frescje. Ae esercitazion ancje il comandant Giuseppe Locatelli di grande esperience di socors alpin. A Siele Nevee, cun precision e sveltece, al à permetût il coret davuelziment des manovris, ancje cun scjarse visibilitât. E sta duncje par sierâsi une stagjon che, par cont di nêf, e je stade cetant lungje massime pe organizazion dai cjans dal Socors alpin, che a àn scugnût, sin dal principi, jessi presints ogni dì tal câs di une urgjence.

Bêçs par une cjase in Abruz
“O vevin metût adun i bêçs necessaris par comprâ une sede, ma o vin decidût di dâ dut pe costruzion di une cjase a une famee abruzese cuntun fî disabil, o stimin di rivâ a fâle sù in trê mês”: e je cheste une des gnovis dadis da Giorgio Zanmarchi, president de associazion “Fai sport”, tant de assemblee di passaç dal Comitato Fair play di Udin da Alessandro Grassi al gnûf president Giovanni Pullini.

Associazion des Provinciis: inviade la fase operative
Sul Tiliment e je stade screade e sul Tiliment e à inviât i prins progjets. A Dignan  la "Comunitât des Provinciis furlanis", la associazion dade dongje des provinciis di Udin e Pordenon cun a cjâf il president dal Consei Regjonâl di Udin Marco Quai, che si è cjatade e e à inviât l'iter pes funzions e pai servizis da associâ, fasint buine la convenzion cuadri pe metude in vore associade di oparis di viabilitât e ancje la "Convenzion pe metude in vore associade e coordenade di azions a tutele de lenghe furlane". "Cuntun vôt dibot unanim - al à notât il president de Provincie di Udin on. Pietro Fontanini - si metin finalmentri in vore dai progjet no dome pe viabilitât, ma ancje pe lenghe furlane e propit in gracie di cheste convenzion podarìn finanziâ impuartants iniziativis indreçadis ae difusion sui media locâi de lenghe fevelade in ducj i doi i teritoris provinciâi".

Ravasclêt: cors di todesc par grancj
Al è començât il tierç cors a gratis di todesc par grancj, inmaneât a Ravasclêt de Pro loco adun cul Centri teritoriâl permanent di Tumieç pal istruzion e la formazion par grancj. Lis lezions si davuelzaran il miercus, des 8 aes 10 e mieze di sere, alì de Scuele elementâr di Ravasclêt. Il cors al sarà di 30 oris e la maestre Paola Candoni. La iniziative e je cjapade dentri tal Progjet culturâl: «E gno von al era Cramâr», che da agns al è indreçât, oltri al studi dai tancj aspiets de emigrazion de valade (massime dai Cramârs,
XVI-XIX secul), al recupar dai rapuarts cui la fiolance dai cramârs che si cjate tal Todesc e la promozion dai leams cui paisans che si cjatin ator pal Italie o tal forest.

Boscs: assemblee dal personâl de Regjon a Tumieç

Si è davuelzude tai dîs stâts al Auditorium Candoni di Tumieç la assemblee anuâl dal personâl operari de Regjon, cjapât su pai lavôrs in aministrazion e in fuarce ae Direzion centrâl risorsis agriculis, naturâls e forestâls. Al  incuintri a jerin presints, oltri al personâl tecnic e aministratîf, i 200 operaris che a dipendin diretementri dal Servizi gjestion teritori rurâl, e l'assessôr regjonâl aes risorsis forestâls Claudio Violino, che al à marcât la grande impuartance sociâl e economiche dai intervents metûts in vore pe manutenzion dal teritori e la sô tutele, ancje ribatint la volontât politiche di cjatâ une soluzion in curt pe pussibilitât di assunzion a timp determinât di altri personâl operari tai mês cu vignaran. Tal 2008 la capacitât di spese dal setôr e je rivade a dibot 15 milions di euros, cuntun sparagn pe aministrazion publiche se pes spesis tecnichis di passe 750mil euros.

In Abruç ancje la Protezion Civîl di Tumieç
La Protezion Civîl dal comun di Tumieç e à cjapât part ai jutoris pal Abruç, mandant une scuare pai prins urgjents intervents. La scuare tumiezine, adun a chê dal comun di Zui, e je stade doprade a L'Acuile in localitât Sant Jacum e metude a prontâ tendis e i prins intervents, a chescj si son zontâts altri vot volontaris de Protezion Civîl de A.N.A. Cjargnele, e par chest il lûc dulà che al è logât il "campo base" al è stât clamât dai teremotâts "Borc Cjargne". I lavôrs a son stâts dut câs coordenâts dal responsabil de Protezion Civîl comunâl Gian Franco Blasoni, che al à pandût ogni dì la situazion al sindic Cuzzi. Il sindic al à laudât i volontaris in spiete di podêlu fâ di persone. La zonte comunâl intune riunion vude di pôc, e à decidût di fâ stazâ ae atenzion di chei altris Comuns de  "Concje Tumiezine" la propueste di un contribût finanziari a pro di cualchi intervent di ricostruzion gjestît diretementri de Protezion Civîl Regjonâl.