13 DICEMBRE 2006

Bielece e sugjestion dai presepis

La bielece e l'incjant dai presepis, simbul da nassite dal Signôr, saran pandudis intun origjinâl zîr artistic e culturâl, che dilunc lis stradis, lis placis e lis glesiis de Alte Furlane a stramandaran a piçui e grancj il misteri de Sante Gnot. A Glemone a saran metûts fûr, da Dicembar a Zenâr, inte scuele di Sante Marie dai Agnui, il presepi fat di statuinis pituradis da int famose e chel metût adun dai piçui, cul fin di indreçâ al dialic, a scoltâsi e a sopuartâsi.

In sutîl veri di Muran al è impen il Presepi dai Cramârs, i vielis vendidôrs cjargnei che lavin ator vendint droghis, metût fûr a Ravasclêt, dal 17 di Dicembar al 18 di Zenâr. A Mueç, i presepis son deventâts ocasion par esercitâsi in dutis lis formis artistichis: dal 10 di Dicembar ai 20 di Zenâr inte Tor medievâl e intes vetrinis dal centri si podaran viodi tancj presepis fats in diviers mûts, piturâts, ricamâts, o sculpîts. La nassite di Gjesù Bambin a è ben rindude ancje in ''Borghi e presepi'', a Sudri, paîs cognossût pe lavorazion dal len e pai mobii: desenis di presepis talians, todescs e slâfs, tes corts e sot i volts des vecjis cjasis di piere, scuasit un percors sacri tes stradis dal paîs. Centri di cheste manifestazion al è dal sigûr il grant Presepi di Teno, fat movi da dute une schirie di argagns mecanics, si lu podarà viodi dal 17 di Dicembar fintramai ai 7 di Zenâr.

Buinis gnovis pe stagjon schiistiche

Passe 80 km di pistis par fâ fondo e 90 chês pe dissese, spartidis in cinc centris schiistic che fasin in mût che la ski-area furlane e cjargnele a seti un dai comprensoris plui siôrs presints in Italie, cun sistemis di neveâmint programât che cuvierzin il 100% des zonis e difarents livei tecnics di dificoltât. Des dissesis plui slissis par imparâ, fintramai a mitiche 'Di Prampero' di Tarvis, la plui biele piste regjonâl dulà che il prossim an (dal 2 al 4 di Març) e sarà fate une gare di Cope dal Mont di schi alpin feminîl.

La stagjon si presente plene di novitâts, cun gnûfs implants e apontaments internazionâls a segnâ l'inizi di une gnove stagjon scistiche, tacant dal tarvisian - sede des Universiades Invernâls dal 2003 - cui siei 25 km di pistis di dissese e dibot 60 pal fondo, cu la zonte di une segjovie su pe mont Florianca, cun modernâmint de piste tacade, biel che dongje dai Campi Duca D' Aosta a è stade metude sù une gnove zone "snow park'' pai passionâts di snowboard.

A Nevee, cognossude pe maraveose panoramiche su pes monts Canin e Montâs e pes neveadis bondants che permetin di schiâ fint in Mai, al è stât fat il dopleament de piste 'Canin', metint cussì in vore il gnûf Centri Agonistic Federâl pes dissiplinis sveltis, a pro di dutis lis scuaris nazionâls di schi alpin.

Gnûfs implants ancje pal Çoncolan: achì sarà fate une gnove segjovie a doi puescj che rivarà fintramai a 2 mil metris e un gnûf ambient in cuote. A For Disore invezit al è stât tornât a segnâ il secont toc che al mene sul Varmost cu la metude in vore di un gnûf implant a cuatri puescj, oltri a gnovis pistis.

GLEMONE - Un arbul di Nadâl carinzian

Ancje chest an, a Glemone, a è stade fate la cerimonie pe consegne uficiâl di un arbul di Nadâl, regâl de Carinzia, inte centrâl place dal Fier, dulà che l'arbul grandonon al è stât metût. Presint a cerimonie al jere ancje il governadôr Joerg Haider. "Pal secont Nadâl - al à notât il sindic Gabriele Marini - il land de Carinzie e la associazion Pro Natura di Klagenfurt ai àn volût pandi la lôr amistât, che aromai da timp a lea adun il comun di Glemone ae regjon carinziane (in particolâr ae localitât zimulade di Velden), dantnus in regâl un arbul di dîs metris. Il lôr at al è inmò plui impuartant, parcè che propit chest an al è stât il trentesim dal taramot. No stin a dismenteâ che i comuns carinzians, la lôr Crôs rosse e i lôr vigjii dal fûc, son stât jenfri i prins a danus un jutori in chei dificii moments. O crôt che il periodi di Nadâl al seti il moment just par confermâ e infuartî une vecje amicizie».

FOR DISORE - Pal pericul des lavinis, adestrât un gnûf cjan

Tant de assemblee anuâl de stazion di socors alpin di For Disore, a è stade presentade la gnove unitât cinofile pes ricercjis intes lavinis.

La unitât a cjape dentri il volontari Michele Zanier, di Soclêf, che al fâs part dal socors alpin di For Disore e il so cjan Leo, un pastôr todesc di 11 mês.

L'istrutôr Nazionâl Cinofil Tonino Cella, in cheste ocasion al à pandût il percors formatîf che Zanier e il so cjan ai varan di fâ dal 14 di Zenâr ai 4 di Fevrâr dal 2007 su pes nêfs e lavinis dal Stelvio (dulà che si cjate la sede de Scuele Nazionâl), par podê deventâ operatîfs e jessi pronts aes clamadis di socors su pes monts furlanis .

La buinore a è stade fate une esercitazion di evacuazion dal comprensori schiistic fornes, gjestît de Promotur. Ancje la gnove segjovie dal Varmost 2 in fats, come ducj i implants, a scuen vê un plan di evacuazion de int, che e podares par un eventuâl (ancje se improbabil) dam, restâ blocade là sù. In chescj câs la stazion di Socors Alpin di competence teritoriâl a scuen, adun cun chei da Promotur, intervignî di corse cun manovris di cuardis e caladis in sigurece.

Propuestis pal Progjet Mont

Il consei da Comunitât montane dal glemonês, Cjanâl dal Fier e Val Cjanâl, al à fat buinis lis propuestis di intervents cjapâts dentri tal "Gnûf Progjet Mont", inmaneât da regjon. Il program al è nassût da un procediment, che si è svilupât a mieç di tancj incuintris di discussion, fats dilunc i ultins mês. Son trê i ponts di fonde la che la Comunitât Montane e à proponût intervents pe nestre zone: il turisim, la filiere len - energjie e i servizis ae int.

Parcè che a rivuarde il turisim, la Comunitât Montane dal Glemonês e à proponût 4 intervents. I prins doi, cuntun cost di 35 mil euros ognidun, previodin ativitâts di animazion pal l'albierc difondût e progjets integrâts public – privât di supuart al turisim. Cun di plui al è stât pandût a zonte regjonâl un pussibil intervent, di 400 mil euros, pe metude in vore di une rêt di trois e il progjet Bamberga pal museu di palaç Venezian di Malborghet. Chest ultin al smire a celebrâ la millenarie paronance di tieris carinzianis, jenfri chestis chês da Val Cjanâl dal vescovât di Bamberga adun cun altris istituzions locâls e museus carinzians.

CJARGNE - Torne la iniziative "Nadâl in Museu"

Cjargnemuseus, la rêt musiâl de Comunitât Montane de Cjargne, l'an passât e à inmaneât la iniziative didatiche Nadâl in Museu: dopo misdì di animazion tant di chest i fruts des elementârs ai àn la pussibilitât di fâ mateçs par furnî l'arbul di Nadâl dal Museu, dât des aministrazions comunâls.

Viodût la buine partecipazion, la iniziative a vignarà fate ancje chest an, cun chest program: domenie ai 17 di Dicembar das 10 a 12 aì dal Museu archeologjic di Zui; sabide ai 23 di Dicembar das 14.30 aes 16.30 a Trep, a Preon, Dimpeç e Sauris.

Par informazions e iscrizions clamâ Cjargnemuseus in Comunitât Montane de Cjargne al numar 0433 - 487779.

Inmò cence soluzion la cuistion dal eletrodot

I sindics de Cjargne ai continuin a restâ contraris ae metude in vore di un eletrodot aeri che al unissi Somplât e Würmlach ma son vierts a dâ acet a propuestis che garantissino une sostenibilitât a livel ambientâl. Chest ce che al è vignût fûr tant da riunion volude da Alpe Adria Energy Spa (la societât a cjâf da gjestion de struture aeri) e da Comunitât montane de Cjargne, dulà che ai jerin presints ducj i sindics dai comuns interessâts e i rapresentants des Ferieris Nord dal grup Pittini e de dite Fantoni di Osôf.

Tant dal incuintri la societât Alpe Adria e à mostrât cualchi propueste di modifiche dal percors aeri presentât tai mês stâts, che al cjape dentri lis zonis di Tumieç, Cjavaç e Paluce. I sindics, ancje cu lis modifichis, ai àn purpûr refudât chest gjenar di implant, pal grant intop sul teritori, za strapassât da altris struturis. I rapresentants dai comuns cjargnei si sono però mostrâts disponibils a studiâ gnovis propuestis, come par esempli, il meti sot tiere l'eletrodot o doprâ cualchi toc di implants za esistint par dâ al teritori une linie ugnule. Dome su chestis fondis, ai àn marcât i sindics, sarà pussibil inviâ une discussion serie.

Picco: "Punî i colpevuls"

Son centenârs i messaçs di solidarietât rivâts in chescj dîs ae Procure di Tumieç, ae regjon FVJ e al president de provincie di Udin. I biliets si riferissin a vicende dal braconîr di Verzegnis, cjapât da pulizie provinciâl di Udin te risierve di cjace dal paîs. Lis e-mail rivin da dutis lis bandis di Italie e son indreçadis a domandâ justizie cuintri il braconîr che al à tentât di cjapâ sot un puliziot provinciâl che a lu veve fermât par un control. "In plui dai aspiets judiziaris che ai vegnin fûr des investigazions - al à sclarît l'assessôr ae cjace e a pescje, Enore Picco - cheste cjapade di posizion di tancj esponents dal mont de cjace e no a mostre cemût che chel che al è sucedût al scugni fâ pensâ. I cjaçadôrs cussienciôs, che noi àn nuie a cefâ cul responsabil di ce che al è sucedût - al à continuât Picco - viodin in fats intal fâ sec dal braconîr un vêr e propri colp aes leçs che regolin la cjace e che a pontin soredut a rivâ a une buine gjestion da bande des risiervis di cjace.

ÇURÇUVINT - Cors di prin socors de CRI

La delegazion di Çurçuvint de Crôs Rosse Italiane a organize un cors di prin socors, che al tacarà da metât Zenâr. Ducj i interessâts a puedin clamâ il numar 333-5299439 o pûr, il lunis das 20 aes 22, la segretarie al 0433-778923.

Lusevere: premiazions finâls pe corse in mont 2006

Sabide ai 25 di Novembar stât, aes 4.30 dopo di misdì si son davuelzudis in localitât Predielis, aì dal Centri sociâl Lemgo, lis premiazions dal 39° Trofeu Senatôr Michele Gortani. Pe Polisportive Tamau-Cleulis, il secont e tierç puest par Michele Bellina e Livio Maieron pai esordients, secont e tierç puest ancje par Silvia Puntel e Monica Degaudenz pes cadetis, pai cadets prin e tierç puest a Gabriele Primus e Alex Bellina, anin indevant cul prin puest di Erwin Puntel te categorie senior e Marco Puntel te categorie amadôrs A.

Invezit parcè che a rivuarde la Societât sportive "Aldo Moro", al prin puest Marisa De Felice pes esordients, secont e tierç puest par Erika Moro e Eleonora Morassi pe categorie "ragazze", pai "ragazzi"prin e tierç par Manuel Zamparo e Fabrizio Craighero, prin puest par Veronica Morassi pes cadette e pai arleifs Juri De Felice al secont puest, infin al tierç puest si son classificâts Fredi Gortan pai amadôrs B e Giovanni Bordignon pai veterans. Marchin che da cuant che al è stât metût sù chest premi (che i prins timps al previodeve dome trê provis), intal 1968, la Polisportive Tamau-Cleulis no è mai mancjade.