|
20 DICEMBRE 2006 Çurçuvint: pal troi des liendis Il Circul Culturâl 'La Dalbide' al à metût adun, come che al sucêt da agns, il lunari pal an cu ven 2007. Il fîl che al pee i dodis mês al passone te tradizion plui popolâr, lassant cori libare ancje la fantasie; tun mont che al cîr simpri di plui di fanus crodi che al è biel dome ce che al ven propagandât in lunc e in larc tes televisions e tai mass media, chei da Dalbide a àn volût dâ un cuc al patrimoni di storiis e liendis. An cjatât alc di biel fasint vivi i personaçs che fin da piçui a àn fate compagnie a tante int fasintle ridi, vaî, vê pôre, niçulantle tal mont de fantasie; des storiis dai vecjos a àn cjapât forme i disens a colôrs di Alessandra Silverio e lis rimis in cjargnel a piturin cu lis peraulis lis figuris. Sui sfueis dal Lunari si mostrin I'omenut de nêf, chel da glace, chel de ploie, de tampieste, dal bosc e po inmò il vencul, il boborosso, la medace, i danâts de Ruvîs da Smit, la mari de gnot, I'omenut di Praduç e chel di Peonis. Dodis personaçs, dodis storiis, une par mês, par tignî compagnie dilunc l'an, dutune cu lis fiestis e i sants da plui gjenuine tradizion cjargnele. La Dalbide inmò une volte a cîr radiis, dant il so contribût par salvâ alc dal patrimoni orâl de comunitât di Çurçuvint: «In ponte di pîts tal bombâs des liendis a liberâ lis pôris, a cjareçâ ilusions, a supâ il savê, ombris e figuris a tiessin inmò la lôr tele che a ti invuluce e si sfante, ti cjape e ti mole, ti lenç e ti strenç … il mont de fantasie che nissun nus tolerà … mai». La Pueme dal lâc di Soandri «Tai timps antîcs che lis gjalinis a filavin e i gjats ai daspavin»... cussì a començavin lis liendis che i vecjos ai contavin. Ancje cheste a è un liende inventade lant a burî tal poç de storie e tal grim de fantasie; si conte che tancj e tancj agns indaûr, dongje di Priole a si spielave sul lâc di Soandri un grant cjistiel dulà che e viveve seglereade di ascôs, par punizion, une bielissime pueme di Vignesie. Il so morôs, restât a Vignesie nol si da pâs e.., penis, amôrs, sperancis e sintiments si incrosin tra monts e mâr. Une storie par piçui e par grancj, parcè che tocje deventâ piçui par jessi grancj, cence dismenteâ che no si finìs mai di imparâ. Cheste e è la tierce liende di un progjet da Dalbide, Circul Culturâl di Çurçuvint, che àn cjape dentri trê; le prime: “II svol des pavesi” boutade fûr tal 2003 e la seconde “II vierî di Agalt” tal 2004. “La pueme dal lâc di Soandri” scrite da Celestino Vezzi e insiorade dai disens di Annarita De Conti a è stade premiade cun menzion di onôr te "6 Edizion dal Concors Internazionâl par une Storie disegnade: “Su pe aliis des paveis - incjants di aghe: il lât, inte realtât e inte fantasie (an 2002)", inmaneât dal Comun di Bordan, adun cu la Regjon FVJ , la Pro Loco di Bordan, di Dales e Forgjarie, la Societât Cooperative Paveès e il Centri Studis di Leterature zovanîl 'Alberti' di Triest. La publicazion a è stade pussibil in gracie dal contribût de Provincie di Udin e dal Comun di Çurçuvint. Il Lunari pal 2007 e la storie “La pueme dal lâc di Soandri” ai saran presentâts ai 24 di Dicembar aes cinc di dopo misdì te stanzie multimediâl dal Municipi di Çurçuvint; une ocasion par stâ une dade in compagnie e çercâ une fete di paneton. La Dalbide a spiete ducj chei che ai àn gust di stâ un pôc insieme. Provincie, 50 mil euros di contribûts pai traspuarts I contribûts pai traspuarts dâts fûr de Provincie di Udin ai saran di 50 mil euros. Cussì e à stabilît te ultime sentade la zonte Strassoldo, su propueste dal assessôr Renato Carlantoni, par permeti diviers intervents intal setôr. «I contribûts saran dâts fûr compagns par dut il teritori» al à sclarît Carlantoni, fasint ancje savê a cui che a son lâts chescj bêçs e a ce che a coventaran. Jenfri di chescj segnalin: chei dâts al Consorzi Servizis turistics pal Tarvisian e Nevee, pe metude in vore di un colegament ski-bus e bus turistic tra lis localitâts dal comprensori dal tarvisian. «Chest servizi al permet di peâ adun lis zonis schiistichis cui paîs e duncje a fâs in mût che, seti lis pistis che i centris, a setino plui sfrutâts, soredut da bande dai turiscj» al à notât Carlantoni. Altris impuartants bêçs coventaran par supuartâ i coscj de gnove trate dal traspuart scolastic, fate colpe il slac de galarie di Zui.
«Vuide al recupar de architeture spontanie» "Vuide al recupar de architeture spontanie", chest il titul dal libri metût adun da Valentina Piccinno e Enzo Pascolo che al è stât presentât intal Salon dal Consei di Palaç Belgrât, ae presince dal president de Provincie Marzio Strassoldo e de delegade ae culture de Provincie Valeria Grillo. «De pensade di creâ une vuide che sugjerisi ae comunitât une osservazion plui atente de specificitât de architeture tradizionâl dal Friûl - ai àn dit Strassoldo e la Grillo - son vignudis fûr impuartants considerazions, zovevulis seti pai professioniscj seti pai parons di cjasis, di mût che a si svicinino al recupar cu la cussience dai criteris in grât di garantî la coerence cu la nestre memorie architetoniche. La vuide, prudelade de Provincie, a rientre duncje tal progjet di conservazion dai nestris borcs storics, simbul de culture e de identitât de nestre tiere. Un progjet che l'Ent al sta puartant indevant cun passion». L'obietîf dai autôrs al è chel di indreçâ ducj i citadins che ai àn la fortune di vê cjasis storichis par che ai pretindino un recupar in linie cul ambient e lis carateristichis des cjasis rurâls.
De Provincie 111 mil euros pes associazions musicâls La zonte provinciâl di Udin e à butat fûr une schirie di contribûts par passe 100 mil euros a pro des scuelis e dai istitûts di musiche no statâi dal teritori. La propueste a è partide dal assessôr Fabio D'Andrea, cul fin di supuartâ la ativitât des diviersis istituzions musicâls. «Dutis chestis associazions - al à dit D' Andrea - a àn un rûl rimarchevul pes nestris comunitâts, vint il mert di pocâ la int a moments di studi e union. Par chest, dentri di une cierte misure, cirin di prudelâ lis lôr ativitâts». La plui part dai contribûts son lâts ae Associazion culturâl musicâl. «Cul lâ dal timp - al à zontât D'Andrea - cirarìn simpri di interessâsi e dâ un jutori aes associazions musicâls che si cjatin sul teritori, tignint cont massime des ativitâts e dai programs proponûts».
Nadâl 2006 intal Comun di Paluce Chescj i apontaments dilunc il mês di Dicembar tal Comun di Paluce. Sabide ai 23 di Dicembar, il Circul Culturâl di Cleulis al à inmaneât inte Glesie di Sant Svualt un conciert di musiche sacre cu la partecipazion dal coro polifonic "Synphonia" di Bicinins. La serade a començarà aes 20.45, ducj son invidâts a partecipâ. Domenie 24 aes 15.30 daspò misdì pe contentece dei plui piçui te place di Paluce al rivarà Sante Claus. Sabide ai 30 di Dicembar tai Laghets di Tamau, la Societât Sportive Aldo Moro e à organizât a partî des 9.30 di binore une gare di schi di fondo. Ae gare a puedin partecipâ ducj dai 6 agns in sù.Pai apontaments dal 2007 si sintarin plui indevant.
La teledidatiche ancje tes scuelis mediis Continue a cressi la rêt des scuelis in Alte Furlane. Daspò de risulte vude tes scuelis dal progjet inmaneât de Provincie di Udin "Cressi in rêt", che al à cjapat dentri dutis lis scuelis elementârs de Cjargne e dal Glemonês, la Direzion di aree montane de Provincie e à vût da "Euroleader Cjargne" il vie par podê finî ce che al jere stât inviât. «Di une bande - al à sclarît l'assessôr provinciâl al svilup de mont, Vittorio Caroli - chest progjet clamât "Sperimentâ in rêt par cressi in rêt" al è un sprolungjament dal prin, di che altre bande al presente novitâts, cjapant dentri ancje lis scuelis mezanis de Cjargne e dal Glemonês. Une iniziative - al à zontât - che e presente la teledidatiche tant che strument par seondâ tai scuelârs il spirit di ricercje e di inovazion, seti pes siencis che pal teritori». Il gnûf progjet al è stât presentât tai diis stâts aes scuelis e il consens al è stât totâl. «Ringrazi - al à sierât Caroli - il president di Euroleader Daniele Petris par ve crodût inte iniziative de Provincie. La idee jere nassude trê agns indaûr cul fin di creâ lis condizion buinis parcè che ancje la mont a puedi deventâ biele e vivibil no dome pai turiscj ma soredut pe int di ca sù».
Strassoldo ae cunvigne “Pordenon sarà!” «Cuant che a è stade metude sù la Provincie di Pordenon, chê di Udin e a calcolât just restâ socie de Fiere di Pordenon. Chest parcè che si jere convints a fuart che lis dôs provinciis, podessin lavorâ adun par studiâ e meti in vore soluzions comuns buinis di risolvi i problemis dal teritori. Vuê vuelin continuâ a pensâle cussì par une colaborazion che a deventi simpri plui fuart. Il slargjament a Gurize de Fiere di Udin al è il preambul par une colaborazion strete jenfri Pordenon, Udin e Gurize. In fats, il sisteme industriâl furlan al à carateristichis compagnis e par chest a son cetant zovevulis lis formis di cooperazion che lis dôs entitâts fieristichis a van metint in vore, massime tal cjamp industriâl. La Provincie di Udin e à duncje intenzionade a continuâ a sostegni la Fiere di Pordenon. Al president Cardin e a dut il personâl de fiere, son lâts - in ocasion dal 60° aniversari de fondazion, il laut pal lavôr davuelzût fin cumò».
Provinciis «Dâ dongje la Assemblee dentri dal mês di Març» Dâ dongje la Assemblee des Provinciis furlanis dentri dal Març 2007. Chest l'obietîf dai presidents des Provinciis di Udin e Pordenon, Marzio Strassoldo e Elio De Anna, che si son incuintrâts cui esperts economics juridics, nomenâts dal retôr de Universitât di Udin, Furio Honsell. Tai mes stâts in fats Strassoldo e De Anna ai vevin domandât al retôr la pussibilitât di une colaborazion tecniche su pe dade dongje de Assemblee des Provinciis furlanis. Honsell al à duncje nomenât i trê esperts: Francesco Marangon, ordinari de Facoltât di Economie, Guglielmo Cevolin e Marco Marpillero, professôrs di dirit public. Tant de riunion, dulà che al jere presint ancje Massimo Duca tant che referent de Provincie di Udin pe Assemblee, i doi presidents Strassoldo e De Anna ai àn fat savê che plui indevant tal Cjistiel di Susans, sarà fat un incuintri dulà che a vignarà sclarît il lavôr fat. A chest apontament, oltri ai presidents des provinciis di Pordenon, Gurize e Udin, son stâts invidats i trê presidents dai conseis e i rapresentants dai grups di minorance e maiorance, cui esperts nomenâts de universitât.
La pensade di un grup di zovins: libri amì Une trasmission di cuasi 10 minuts, un zîr intes bibliotechis dal Cjanâl dal Bût, une panoramiche tal timp: fondazion, ampliament e gjestion. Il fin al è chel di indreçâ la int a frecuentâlis, lassant magari un momentin da bande lis ostariis o i stupideçs che dispès si viodin par television. Cun di plui la trasmission a vûl jessi un invît a creâsi un spazi par sé e a lassâsi cjapâ da ce che il libri nus conte, un libri al pues fanus vivi par un moment intun altri mont, o pûr fanus tornâ adaments cjossis pierdudis dilunc i agns. No stin po dopo a dismentâsi che un libri al insiore la nestre culture, a nus poche a doprâ peraulis gnovis e al po deventâ argoment di conversazion (in detai fasin presint che tes bibliotechis si cjatin un grum di libris di argoments locâi, di storie e culture furlane). No dome libris, lis bibliotechis puedin deventâ pont di incuintri par zovins e no, par cjacarâ, dant spazi ai fruts, al è in cheste etât che si scomence a pensâ. La trasmission “Libri Amì” a larà in onde su lis frecuencis di VTC plui in là.
|
