14 FEBBRAIO 2007
Provincie: dadis fûr borsis di studi par dîs zovins
Borsis di studi di mil euros ognidune a pro di 10 zovins di Cividât, che si son fats viodi par profit e valence intal studi e intes arts. La cerimonie si è davuelzude lunis stât, aì de Sale dal consei de citât ducâl. Lis borsis son stadis dadis fûr dal sindic Vuga e dai assessôrs ae istruzion e ae edilizie, Paride Cargnelutti e Mario Strazzolini, che a àn cussì metût in vore il volê testamentari, mandât a Provincie, dal siôr Emanuele Partanni, mestri des elementârs dilunc tancj agns a Cividât. I zovins, che vevin fat domande seont il bant, a van dai 15 ai 20 agns e son stâts sielts de zonte provinciâl, che, intune des sentadis di Dicembar, e à fat buine la graduatorie presentade de comission dade dongje di pueste cun a cjâf Strazzolini. Ducj i zovins a àn mostrat cetant inzen tal studi, cun vôts une vore alts cjapâts seti al liceu seti intai conservatoris musicâls che a frecuentin. «Cun cheste assegnazion - a àn sclarît i assessôrs - vin dât esecuzion al testament dal mestri Partanni, che al à volut premiâ i zovins furlans e sore dut di Cividât».
No ae fusion: referendum autogjestît a Çurçuvint
Il Comitât "Alternative par Çurçuvint" si è dât da fâ par permeti a int dal paîs di pandi il so pinsîr su pe fusion cul Comun di Sudri, prime che no si puedi plui tornâ indaûr. Cun chest fin al jere stât inmaneât l'incuintri dal 2 di Fevrâr, che al à viodût une partecipazion ungrum folcjade di int. Apontament dulà che il Comitât al à metût a confront l'assessôr comunâl e cjâf grup di maiorance, Fulvio Vezzi, e il cjâf grup di minorance, Edimiro Della Pietra. I doi a àn supuartât ognun la lôr posizion, une a pro de fusion e chê altre cuintri, ancje pocâts da une schirie di domandis de tante int presint. Vierzint la serade, il puartevôs di "Alternative par Çurçuvint", il dotôr Denis Della Pietra, al à notât la mancjance di informazions su pal progjet puartât indevant dai doi sindics Dario De Alti par Çurçuvint, e Sergio Straulino par Sudri, che, a pet di sieltis mancul radicâls (ancje chestis prudeladis de Regjon) tant che la associazion dai servizis e la union dai Comuns, a àn cjapat la strade plui estreme e cence tornade. Jenfri i pericui de fusion su pai cuâi Denis Della Pietra al à invidât a pensâ sore, a son: il scuilibri demografic fra Çurçuvint (749 personis) e Sudri (1395) e il cantin de provision de aghe. Sierant l'incuintri, Della Pietra al à dit di sperâ che la aministrazion comunâl di Çurçuvint a no ledi indevant cun cheste pensade se la int a dimostras clarementri la sô contrarietât.
La "maie nere" ae sanitât udinese e palese che Illy al à falât
«I lambicants dâts vignûts fûr su pai timps masse sprolungjâts des listis di spiete de sanitât udinese a mostrin inmò une volte la pocje atenzion che Illy al à viers il Friûl». Lu marche il cjâf grup provinciâl di Fuarce Italie Piero Mauro Zanin, dopo che la Agjenzie regjonâl e à butat fûr i dâts des listis di spiete, dant la "maie nere" propit a Udin. Elements che pandin cemût che a si scuegni spietâ plui di un an par fâ une risonance al çurviel. «Vevi segnalât za timp indaûr cheste brute situazion - al à zontât Zanin - ma la Regjon no à fat nuie par furnî rispuestis buinis ae int e i numars, butâts fûr cumò, lu ribatin. Inmò une volte domandi plui atenzion pe sanitât furlane e la dibisugne di investî di plui, cuintri la indiference di Illy, che e mostre la sô sconfite, daûr di chê dal Guvier Prodi».
A Ruvigne pe Zornade dal ricuart
Al jere ancje Corrado Ficuciello, fradi dal tenent Massimo, muart a Nassirija inte tragjiche coparie dal 2003, ae cerimonie che si è fate a Ruvigne in ocasion de Zornade dal Ricuart. Une memoreazion inmaneade de Leghe nazionâl e de locâl Associazion "Ideis & continuitât", adun cul Comun, che si è fate tor al Monument dai Cjadûts intes vueris mondiâls, in place 4 Novembar. Un moment duncje dulà che si son impensâts, oltri ai martars des foibis, ancje dute chê int che e è muarte e che à patît in chescj triscj moments de storie. Cun di plui, tant de manifestazion si è volût marcâ il rûl fuart davuelzût ogni dì dai nestris soldâts e des Fuarcis dal Ordin. A rindi onôr ai martars, con la poiade di une zoie, ancje l'assessôr e il conseîr provinciâl Renato Carlantoni e Pierluigi Molinaro, cul conseîr regjonâl Bruno Di Natale, il sindic Mirco Daffarra e i rapresentants de zonte comunâl, il coordenadôr de Lega nazionâl pal FVJ Massimiliano Verdini e Marco Pascoli, zovin president di "Ideis & continuitât". A pet di lôr, cun tante int, un grup di fruts des scuelis mezanis: «Une presince impuartant - al à marcât Carlantoni - par che i zovins no si dismentino di chei muarts che par masse timp son stâts lassâts in bande, copâts dome pe colpe di jessi talians».
Provincie, mediatôr di aree pal sparagn energjetic
Tabaiâ un lengaç comun a è une dibisugne par che lis politichis su pal sparagn e su pe certificazion energjetiche dai edificis a setino metudis in vore in mût compagn su dut il teritori e a coventino pardabon. Di chest al à cjacarât l'assessorat provinciâl ae energjie, vuidât da Enore Picco, intal apontament che al sierave il cicli di conferencis indreçadis ai professioniscj e ai tecnics comunâi dal teritori. Apuntament che al à viodût une grande partecipazion, plui che no a Palme e Glemone, moderât dal gjornalist Gianfranco Biondi, e rezût dal ingegnîr Rosario Di Maggio, che al à curât la esplicazion dal toc normatîf e dai aspiets tecnics, val a dî dal "dizionari di fonde" pal conteniment dal consum energjetic inte costruzion di edificis. A presentâ la cunvigne, il president de Provincie Marzio Strassoldo, l'assessôr Picco, il president dal consei Marco Quai, e l'ingegnîr Marco Disnan, che al à sclarît il "Progjet cjase", iniziative pe edilizie sostignibil. «Volin incressi - al à dit Strassoldo, ae viertidure - il rûl che al è propri dal ent di vaste aree, chel di supuart e coordenament des iniziativis svilupadis dai Comuns». A chestis, si son po dopo zontadis lis peraulis dal assessôr Picco: «La premure mostrade da grandonone partecipazion a chescj incuintris - al à dit - al è in linie cul assum dal assessorât: jessi presint sul teritori e fâ sô la idee dal vêr significât di ‘aree vaste'».
Paluce: cors di musiche
Il progjet zovins 2007, adun cul Comun di Paluce e la coop Itaca, al organize un cors di musiche par imparâ a sunâ la chitare elettriche, il bas e la baterie. Il cors al è indreçât a puems e puemis dai 12 ai 18 agns, al è a gratis e si fasarà aì de ex sale di musiche (CDA). Lis iscrizions e àn di rivâ dentri dal 28 di Fevrâr in biblioteche al secont plan dal municipi o pûr te ex sale di musiche. Cui che al volès vê plui informazions al puès clamâ al numar 3396171287.
Progjets a pro dai pedimentâts
Lis gnovis modalitâts di acès ai contribûts regjonâi de leç regjonâl 41 dal 1996 a protezion dai pedimentâts, son stadis sclaridis ai esperts e ai aministradôrs inte sale dal consei di Palaç Belgrât a Udin. Pai trê agns che vignaran, in fats, e sarà la provincie di Udin a dâ dongje lis iniziativis inmaneadis dal teritori e a vualivâlis par screâ un sôl program sperimentâl di intervents, in armonie cu la planificazion teritoriâl dai plans di zone, cemût che previodin i protocoi di intese che saran sotscrits cu la regjon dentri de fin dal mês di Fevrâr. «In cheste suaze - al à dit l'assessôr aes politichis sociâls, Adriano Piuzzi - la Provincie e infuartirà il so rûl di coordenament par inviâ i servizis in rêt a pro dai disabii, inmaneant intervents inovatîfs par meti in vore o infuarcî i rapuarts cun chei altris ents che si cjatin sul teritori». Cemût che vuelin lis gnovis istruzions regjonâls, aes Provinciis a tocjarà l'assum di preparâ un program inovatîf di trê agns che al cjapi dentri metodis, struments e timps de sperimentazion, e ancje la individuazion dai progjets sperimentâi e dal plan finanziari dai coscj preventivâts.
Interpelance di Marsilio a Rosato
L'assessôr Regjonâl Enzo Marsilio al à interpelât il sotsegretari ai Internis il dotôr Rosato par vê lis ultimis gnovis su pe caserme dai Carabinîrs di Tarvis, vint chestis rispuestis. Par ce che a rivuarde i lavôrs di metude a puest dal edifici dal comant e caserme, che a voran di jessi fats dal locâl Gjeni Civil di Tarvis, si segnale che pal prin lot de palacine – lozaments dal comant, trê dai vot previodûts saran consegnâts dentri di Zugn. Pe metude in vore dal secont lot (slargjament e metude a puest dal edifici), si pense di dâ sù il lavor dentri dal Zugn 2008, tignint cont de disponibilitât dai contribûts.
Interogazion de Leghe Nord par Pradibosc
La Leghe Nord , a mieç dal conseîr regjonâl Maurizio Franz, e à consegnât in regjon une interogazion par sburtâ il finanziament dal gnûf implant par tornâ in sù in localitât Pradibosc, intal Comun di Prât. Stesse domande, e è stade fate dal assessôr al sport de provincie di Udin, Fabio D'Andrea, al President de Provincie Marzio Strassoldo. La stazion di Pradibosc (furnide di une “sciovie” e di dôs “manovris” che a coventin une ae piste di 600 metris e une par chê di 200, cun iluminazion di gnot e cjamp scuele di pueste pai schiadôrs di prin svol), cul finî di cheste stagjon, che segne i siei prins 30 agns di ativitât, e à cûr di jessi sierade. «Il comprensori schiistic e turistic di Pradibosc - a àn marcât Maurizio Franz e Fabio D'Andrea - al à une capacitât grandonone e un doman sigurât, tignint cont ancje dal centri “fondo” Plan di Cjase, lûc preferît ogni dì da tancj schiadôrs e sielt cun di plui da olimpionics pai lôr alenaments. «Chest intervent - a disin ancjemò, tai documents presentâts, Franz e D'Andrea - al à di deventâ une precedence plene pe aministrazion regjonâl, gjavant fûr, se al è il câs, ancje da risorsis straordenariis, stant la presse di inviâ i lavôrs».
Consei, vie libare al font pai Comuns plui piçui
Vie libare al font di 258 mil euros ad an (par 10 agns) a pro di intervents di metude in sigurece e sparagn energjetic dai piçui Comuns. Chest ce che al à deliberât il consei provinciâl, impegnât ancje inte discussion e inte votazion di 7 dai 20 ordin dal dì, peâts al belanç di prevision 2007. Il document al è stât fat bon ae unanimitât, metint sot zonte e consei par che a si furnissino di corse dal regolament de informazion e di passâ ae presidence e ae Conference dai cjâf grups stesse la definizion di cundizions gjenerâls par sigurâ une informazion complete.
Buine risulte pe trasmission "Libri Amì"
E sta vint une buine schirie di scoltadôrs la gnove trasmission 'libri amì' che da cualchi timp incà e ven mandade in onde da cheste emitent. Libri Amì e è imbastide e curade da un grup di zovins passionâts di leture e dal gust di fâ alc adun: il titul sielt, al pant di bessôl chest aspiet. Cun semplicitât e snait i zovins a presentin di volte in volte un libri difarent: une schede metude adun da ognun, lant a dî alc su pal autôr, ingolosint cul contâ la trame, metint in taule lis propiis impressions e dant une cerce di cualchi part significative dal libri. Un moment autogjestît che al proviôt ancje la scuvierte des pussibilitâts di leture, a disposizion di ducj, tal nestri Cjanâl, ven a stâ lis bibliotechis; e in cont aes bibliotechis no mancjin di sgarfâ te lôr storie e te lôr atualitât. Libri Amì une idee zovine vierte a ducj chei che a vuelin unisi a cheste biele aventure; cui che nol à inmò vude ocasion di viodile che al tegni di voli cheste emitent e al podarà fasi une idee.
Infratant chei che a vuelin contatâ cheste zoventût a podin scrivi a: libroamico.vtc@libero.it