28 FEBBRAIO 2007
Fat bon il belanç de Comunitât montane de Cjargne
I ponts di fonde de Comunitât montane dilunc il 2007 a saran la energjie, l'ambient e la ricercje, fasint in mût cussì di ribati il rûl di regjiste par dutis lis realtâts cjargnelis tal setôr dai grancj progjets indreçâts al svilup dal teritori. In fats a son plui di 22 milions i bêçs metûts a disposizion, chest an, pe incressite socio economiche de Cjargne, cun atenzion massime al setôr de energjie e ambientâl, che al previôt lavôrs par 2 milions e 700mil euros, chel dai lavôrs publics cun 4 milions e 600 mil euros e chel de ricercje e svilup cun passe 3 milions di investiments. A marcâ la continuitât dal belanç di prevision a pet di chel dal an passât, al è stât il vicepresident e assessôr al belanç e forestazion Luigi Cortolezzis. «Il rispiet pa l'ambient - al à dit – e la volontât di dopleâ e dâ impuartance ae produzion di energjie nete e, duncje, la filiere bosc-len-energjie a smirin a meti in vore un sisteme economic di cualitât, che al comenci cul netâ i boscs par rivâ fintramai aes centrâls a biomassis, chescj son i ponts puartants de politiche forestâl e energjetiche dal ent. E è une scomesse che vuelin vinci: di fat chest an, a Trep, si inviarà la prime centrâl di teleriscjaldament a biomassis de Cjargne, po dopo si fasarà chê di Darte, la plui grande de regjon. Par chest ultin lavôr a son za stadis inviadis lis cernitis pe dade sù dal apalt, un progjet che al costarà in dut 9 milions di euros, cun contribûts pal 79% da Regjon».
Strassoldo su pe creazion de Aziende Sanitarie ugnule
«Lu vevi za dit timp indaûr, prime che si las indevant cu la union des dôs vecjis aziendis sanitariis, che cheste sielte de aziende ugnule ospedaliere-universitarie metude in vore dal ex sindic di Triest i furlans la varessin paiade cjare. Scuen duncje jessi content viodint rimarchevui personaçs de CDL che si metin dacuardi e presentin une interogazion adun. Une interogazion dulà che, par difindi i dipendents e dut il sisteme, si domande dome clarece intes robis da fâ. Ma sei inmò plui content che i conseîrs regjonâi di minorance Roberto Molinaro, Alessandra Guerra, Roberto Asquini e Paolo Ciani a vebîno marcât cetant timp che al è stât pierdût dal Lui 2006 fin cumò pe destinazion des cjariis, impen di impegnâsi pe cualitât dai servizis butats fûr, un fat chest chi vevi za fat presint chê altre Istât. Illy al veve imprometût plui snait e mioris servizis. Il Friûl dut di un colp in gracie al ex sindic di Triest al à pierdût l'ospedâl di Udin e il policlinic, simbui de sanitât e da formazion furlanis».
I eletôrs di Çurçuvint a disin "No" ae fusion cul Comun di Sudri
Il Comitât civic "Alternative par Çurçuvint", metût sù intes setemanis stadis par fâ cuintri al progjet di fusion cun Sudri supuartât de aministrazion dal sindic Dario De Alti, in pôcs dîs al à cjapat sù 406 firmis pe petizion che domande: seti ae zonte comunâl di fermâ l'iter inviât (invalidant la delibere dal 10 di Otubar dal 2006 dulà che si jere fat bon il protocol di intese cu la Regjon ), seti che il Consei comunâl al deliberi di "di no lâ indevant cul referendum consultîf in program", disint a clâr che "ducj i procediments inviâts pe fusion a vegnin cancelâts".
Lis firmis cjapadis sù a son il 55,9% dai eletôrs intal comun di Çurçuvint (che al conte 726 abitants).
Il Comitât al à decidût la strade de petizion al sindic e al consei comunâl par permeti a int dal paîs di pandi lis sôs ideis su chest cantin, parcè che a si à teme che intal referendum previodût daûr des proceduris regjonâls su pes fusions (che cun di plui al è dome consultîf) i risultâts a vegnino calcolâts su pe fonde dal numar da int dai doi comuns adun, cussì fasint, i eletôrs di Sudri (che al à 1395 personis) a varessin la maiorance in ogni câs.
Al vie il cors pe gjestion de aziende malghive transfrontaliere
Son tacadis aì de sale conferencis da Confartesanât a Tumieç, lis lezions dal cors "Gjestion de aziende malghive transfrontaliere", ae sô seconde edizion e indreçât a a int che lavore tal setôr, ai operadôrs turistics de mont e ai impleâts te produzion. L'iniziative a è stade presentade tai dîs stâts dal assessôr regjonâl Enzo Marsilio, dal president de Comunitât montane Lino Not e dall'assessôr ae agriculture, artesanât e assistence dal ent sore comunâl, Luciano Mazzolini. Tant da presentazion Marsilio al à marcât l'assum de aministrazion regjonâl a pro dal setôr, a partî ancje dal prossim Plan di Svilup Rurâl e da dibisugne di unî ents locâi, associazions e proprietaris. «I bogns risultâts vûts l'an passât - al sclaris Not - nus àn pocât a inmaneâlu inmò une volte, chest an si contin une cuarantine di iscrits. Rispiet ae prime edizion, che a veve doi cors in paralêl, chest an vin volût cjapâ dentri ducj i partecipants par creâ confront e pussibilitât di discori su pes esperiencis personâls di ognidun, robe impuartant par inmaneâ un percors condividût che al dêti un sburt al miorament de gjestion des caseris in Cjargne».
In Cjargne, cors di formazion par operadôrs socio sanitaris
Finanziâts de Regjon FVJ, si screaran tai mês che vignaran, in Cjargne, i gnûfs cors di assistence ae persone, indreçâts a sigurâ alts livei di cualitât tal setôr dal jutori aes personis e aes fameis, che dispès si cjatin a vê dibisugne di un jutori. L'esperience, za inviade tal 2006, da bande de Coop Cramârs di Tumieç, di cuatri cors di competencis minimis, intai paîs di Comelians, Dimpeç, Darte e Scluse, che a àn cjapât dentri un centenâr di personis, massime feminis, a tornarà duncje a començâ. Par vegni incuintri ai problemis de int, vignûts fûr ancje a mieç de Comission Pari Oportunitâts de Cjargne, si cîr di dâ un jutori a mieç seti di cors di base, che sperimentâi di 350 oris pal inscuelament di personâl cun cualifiche di OSS. «Vin viodût - a à dit la president de Comission, Nives Baldacconi - cualchi dificoltât inte zone montane da bande dai operadôrs a conciliâ i impegns cu la formazion standart, in dut câs a son operadôrs che dan un servizi di prionte su pal teritori. In fats a son soredut lis feminis a stâ dongje a vecjos e malâts, ma no dome, dispès a dan ancje une man a chei che stan dongje di cjase o ai paisans cun problemis». «Il vivôr che i iscrits ai prins cors nus àn stramanât - a continue la Baldacconi - al pant la voie di rivâ a incressi lis capacitâts professionâls e chest nus à fat domandâ a regjon la pussibilitât di tornâ a inviâ chescj cors, e da regjon vin subit vût une rispueste positive».
Screade a Malborghet une mostre su pe Grande Vuere
E è stade inaugurade a Palaç Venezian a Malborghet, la mostre " La Grande Vuere in Friûl", inmaneade de Provincie di Udin adun cu la Regjon e la Fondazion Crup. A inaugurazion, cui parons di cjase de Comunitât montane, Ivo del Negro e Fabrizio Fuccaro, a erin presints ancje il sindic di Malborghet Alessandro Oman, il president de Provincie di Udin Marzio Strassoldo e la delegade provinciâl ae culture Valeria Grillo. «Tant che Comunitât montane - al à declarât Del Negro - stin puartant indevant une schirie di iniziativis par fâ in mût che la memorie storiche de Grande Vuere no vegni dismenteade, impensant il sacrifici di tancj zovins soldats e de int». Strassoldo al à pandût la volontât de Provincie di slargjâ su dut il teritori provinciâl la cognossince de Prime Vuere a mieç di difarents apontaments, «parcè che Provinciâi - al à dit - a vûl di propit teritori». La mostre di Malborghet, curade da Guido Aviani e è une racuelte cjamade di fotos dai diviers fronts, cun schedis des principâls bataiis. Dut chest insiorât da robis raris e cetant preseosis e mudis militârs origjinâls.
Intune vuide lis cjasis storichis de tradizion europeane
Une vuide par valorizâ e promovi i palaçs e lis vilis dal centri european, incressint cussì il svilup di un turisim specialistic. La vuide si clame “Europe of Traditions” e a è stade presentade a Palaç Belgrât intal ambit dal progjet Interreg III C “Eurotrad”, ae presice dal president de Provincie di Udin Marzio Strassoldo, dai esponents des associazions Vilis Venetis e dal Consorzi Cjistiei adun cun altris proprietaris. La vuide è e un imprest par vê informazions su pal ricet intes fameis in cjasis storichis di Sl ovenie, Ungjerie, Austrie, Olande, Irlande, Inghiltere, Spagne e Portogal. Pal Friûl son stadis metudis dentri lis vilis Coren, Dragoni, Gallici Decani e Iachia, i Cjistiei di Susans e Vilalte e il Palaç Lantieri. «Par rivâ a entrâ in chest network di “Europe of Traditions” – al à sclarît Biroli – vin scugnût passâ esams une vore pençs. Eco parcè che la risulte a è stade un strument ungrum fin, zovevul par promovi un ingjâf di marcjât cetant cirût».
Par Strassoldo, cheste opare «a permetarà di unî l'ufierte di edificis storics sul teritori, che a àn scugne di jessi pandûts plui a fuart». «Une iniziative impuartant – al à precisât Strassoldo – parcè che al è di just no dome comedâ e recuperâ lis costruzions vielis, ma covente valorizalis par fâlis cognossi al turisim».
Turisim e fair play, acuardi jenfri Provincie e Confcomerç
Cuatri cors in citâts strategjichis dal teritori provinciâl – Lignan, Darte, Tumieç e Tarvis – par inscuelâ operadôrs che gestissimo lis risorsis turistichis adun cu principis i fonde de etiche e de buine gracie. Chest il centri dal protocol di intese firmât dal president de Provincie di Udin Marzio Strassoldo e dal president di Confcomerç Giovanni Da Pozzo. Un document che al jere stât presentât da pôc dal assessôr Fabio Marchetti ai rapresentants di Confcomerç, e che al ribadii l'obietîf di colaborazion jenfri i doi ents cul jutori da bande di Palaç Belgrât di 20 mil euros; si cjacare duncje di un gnûf pas dal inovatîf progjet inmaneât de Udin, indreçât a screâ une gnove maniere di fâ turisim, plui atent al ricet e ae ufierte su la fonde di fuarts leams di corete competizion e colaborazion metûts in vore dal fairplay. «Sin sigûrs – al à sclarît Strassoldo – che la professionalitât e la onestât cui interlocutôrs, ponts di fonde de buine gracie, a setino benon aplicabî ai sistemis turistics che a lassino valorizâ e promuovi simpri miei il nestri “tesaur di Provincie” ».