31 GENNAIO 2007

Marcjanziis pericolosis: studiâts i pericui dal traspuart su strade

Meti ordin intal setôr dal traspuart su strade des marcjanziis pericolosis, fissant origjins e destinazions dai spostaments, precisant la cualitât e il gjenar des robis traspuartadis e pensant a ce che a podarès capitâ se par câs sucedès un incident. Chescj i pinsîrs che a àn indreçât la Provincie di Udin, e massime l'assessorât ae Protezion civîl, a prontâ un studi su pal traspuart di marcjanziis a riscli, cul jutori da Cooprogetti e dal Studi Novarin. Un lavôr finanziât in part de Protezion civîl regjonâl, e prudelât dal assessôr provinciâl Vittorio Caroli. «A dispiet che la Provincie no davuelzi ativitâts di coordenament sot emergjence - al à sclarît Gabriele Peressi, tecnic provinciâl presint ae presentazion, insieme cul sorestant Daniele Fabbro - cun chest studi vin volût dâ ai ents che par solit a lavorin in situazions di emergjence, ven a stâ la Prefeture o la Protezion civîl, un imprest operatîf zovevul». In fats il document, oltri che pandi lis manieris e i criteris dal traspuart di robis pericolosis, al furnìs une schirie di datis sul pês che al à chest gjenar di traspuart, su lis pussibilis consecuencis pe int e soredut su pes zonis a riscli di incident.

Plan di gjestion de crisi ocupazionâl

Lis ativitâts dal plan di gjestion de grande crisi de ocupazion tal distret de cjadree e van indevant. Il Plan di gjestion inmaneât dal assessôr provinciâl al Lavôr Daniele Macorig, e metût in vore dal Servizi lavôr e colocament de Provincie, al previôt dôs liniis di intervent: di une bande, la dade fûr di contribûts aes ditis che cjaparan sù i operaris che a son stâts licenziâts o che a stan par jessi mandâts vie des fabrichis dal distret de cjadree, di chê altre bande si sta prontant un percors di jutori al lavôr personalizât, dome pai operaris cjapâts dentri dal progjet. «I intervents - al à sclarît l'assessôr Macorig - son stâts studiâts e imbastîts par che il lavoradôr al puedi vê dutis lis informazions, i jutoris e i servizis che a coventin par tornâ a jessi cjapât sù, secondant cussì une logjiche di inseriment e svilup des risorsis e dai progjets za metûts in vore (in detai: il Pari e il Restart, che son imprescj dal Plan di gjestion)». Tant dai prins incuintris (che àn cjapât dentri 82 operaris) son stâts pandûts i ponts di fonde dal progjet e i lavoradôrs a àn podût cjapâ apontament cul personâl dai CPI e dal RESTART par vê un colocui a cuatri voi e podê duncje inviâ il progjet.

22 mil euros pal sociâl

Si infuartìs la colaborazion jenfri la Provincie di Udin e lis associazions che lavorin tal setôr de assistence e dal sociâl. L'assessôr provinciâl Adriano Piuzzi al à di fat dât fûr 22 mil euros pai grups che a lavorin sul teritori, tant che supuart aes ativitâts e ai lôr programs. In detai 5 mil euros saran destinâts ae Cooperative Sant Antoni di Udin pe metude in vore dal progjet "Buteghe artesane de piere e dal len", che al à tant che fin chel di inscuelâ e judâ lis personis cun problemis sociâls. Altris 7 mil euros saran spartîts jenfri la Associazion "Cjase famee Luigi Scrosoppi" di Udin e i grups famee dal “Convit Providence” simpri di Udin. «Chescj bêçs - al à dit Piuzzi - a coventaran, no dome par puartâ indevant lis iniziativis, ma ancje par favorî la gjestion des diviersis struturis. Cheste a è une clare sielte de aministrazion provinciâl di Udin - al à zontât - che e à l'obietîf di dopleâ chestis associazions che davuelzin un lavôr cetant impuartant pes comunitâts locâls e massime pe int cun problemis». L'assessôr Piuzzi al à po dopo decidût di dâ un contribût di 6 mil euros ae scuele "Paolino d'Aquileia" di Cividât par comprâ software indreçâts a insiorâ l'inscuelament dai pedimentâts, e 4 mil euros al CSRE di Glemone par podê cambiâ i imprescj robâts e tornâ a meti a puest il sisteme di alarme. «La funzion di chestis associazions - al à zontât Piuzzi - e è une grande sioretât pe nestre provincie e par chest mutîf al è di just supuartâlis e judâlis».

Formazion: la Regjon e finanzie 13 progjets

La Regjon e à inviât il plan formatîf 2007 de Cooperative Itaca di Pordenon. Ven a stâ che la Regjon FVJ e il Font Sociâl European adun e àn finanziât 13 progjets, butant fûr un contribût di 100 mil euros. Un risultât impuartant pe Coop sociâl furlane che da 15 agns e sta daûr ai servizis socio assistenziâi e educatîfs ae persone (vielis, fruts, int cun problemis fisics e sociâi), che fasarà sì che si inscuelino la metât dai socis lavoradôrs (in dut passe 900) a mieç di plui di 10 mil oris da fâ. Une risulte inmò plui clare se si pense che chest risultât al è stât cjapât cundut che e jere la concorince des plui grandis ditis industriâls de regjon. «Cuatri i obietîfs di fonde dal plan formatîf aziendâl 2007 - e sclarìs Genny Dovigo, responsabil dal ufici formazion de Itaca – prin di dut inmaneâ gnovis oportunitâts pai nestris socis e sigurâur un lavôr ciert cun miôrs cundizions economichis e normativis; in secont lûc, incressi la cualificazion professionâl, po dopo svilupâ lis risorsis umanis di mût di seondâ la competitivitât e la cressite de imprese; al fin promovi i valôrs dal lavôr, de solidarietât, de dignitât, de paritât, de salût e de sigurece».

Operatîf a Tumieç il Centri scolastic teritoriâl

Dâ snait al sisteme scolastic de mont disvilupant lis specificitâts par infuarcî il spirit di identitât dai students. Cun chestis motivazions la Direzion di aree montane de Provincie di Udin e à inmaneât a Tumieç un Centri teritoriâl pai servizis scolastics de Alte furlane. Il progjet clamât "Domande e ufierte di formazion: un incuintri pussibil" al previôt la metude in vore di une rêt che e unissi dutis lis scuelis de zone, inviant ancje un leam jenfri scuele e teritori. «Il nestri fin - al à notât l'assessôr provinciâl al svilup de mont, Vittorio Caroli - al è chel di meti in rêt il sisteme scolastic de Alte furlane par resonâ e progjetâ sistemis miôrs di inscuelament, creant un rapuart jenfri scuele, teritori e ents locâi». Une iniziative che fra l'altri a pues zovâsi dai bêçs butâts fûr de Regjon tal 2006 (30 mil euros) e tal 2007 (altris 30 mil euros). «No vin volût screâ un gnûf ent - al à zontât Caroli - ma prontâ un sisteme snel che al seti bon di doprâ ce che za a si sta fasint intes scuelis». Inte prime dade - al à sierât - presentarin un Pat teritoriâl pe scuele de Alte furlane spartît in doi, un pe Comunitât montane de Cjargne e chel altri pe Comunitât dal Glemonês, Valcjanâl e Cjanâl dal Fier».

Ape fate buine de Comission europeane

La plene e definitive operativitât de Agjenzie provinciâl pe Energjie di Udin (APE), e è stade uficialmentri ricognossude de Comission Europeane cu la firme dal prin emendament al contrat jenfri la Provincie di Udin e la Comission stesse. Il progjet pe metude adun de Agjenzie pe Energjie, dentri de rêt europeane Intelligent Energy for Europe, presentât dal assessorât al ambient de Provincie di Udin, e rivât secont inte classifiche europeane che e dave fûr i bêçs pai gnûfs insediaments, al jentre tal vîf des ativitâts previodudis. In fats cu la firme dal emendament, l'APE e è stade fate buine de de Agjenzie Europeane che e vuide il program, deventant coordenadore dal progjet. L'Agjenzie e indrece i siei servizis ai ents publics locâi, aes piçulis e mezanis impresis, aes scuelis e a int che vûl savê di plui sul argoment de energjie. «In gracie dal so jessi no profit e de sô apartignince ae rêt europeane di Agjenziis energjetichis - al à dit l'assessôr provinciâl ae energjie, Enore Picco - l'Ape si mostre tant che une font di informazions inzornade e indipendent, che e pues deventâ imprest di trasparence tal cjamp de energjie e di sburt par indreçâ a un plui grant ûs des fonts rinovabils».

L'implant a biomassis di Trep al sarà metût in vore ae fin dal 2007

La centrâl di teleriscjaldament a biomassis di Trep e sarà metude in vore za ae fin di chest an e, l'an dopo, a vignaran finîts ancje chei altris sîs implants, includût chel di Darte, il plui grant de regjon. Lu à dit Luigi Cortolezzis, vice president e assessôr de Comunitât montane de Cjargne tant de seconde riunion de taule di lavôr, coordenade de Regjon Fvj e inmaneade de Comunitât montane de Cjargne, indreçade ae creazion de filiere regjonâl bosc-len-energjie. La taule di lavôr, che cjape dentri, oltri ae Comunitât montane de Cjargne e la Regjon Fvj, il Consorzi boscs cjargnei, i Ispetorâts ripartimentâi dai boscs, la Aiel (Associazion Italiane Energjie dal Len), chês altris trê Comunitâts montanis e Len servizis, e à l'assum di coordenâ dutis lis realtâts dal setôr par seondâ la produzion di energjie no incuinant e furnî, cussì fasint, un jutori e une pocade aes ditis de zone e al marcjât dal len. L'argoment di fonde dal incuintri, fat tai dîs stâts a Tumieç, al è stât chel di inmaneâ (in prevision, apont, de ativitât de gnove centrâl di Trep) un sisteme di provision dal len bon e stabil, che al fâsi sì che si puedi inviâ benon dute la filiere. «Viodût cetant che i lavôrs di progjetazion des centrâls a son indevant - al à dit Cortolezzis - al è urgjent meti daurman in vore i juscj contats cu lis segariis e lis ditis boschivis de Cjargne, che saran il cûr dal sisteme di provisionament».

La Provincie e prudele il laboratori dal len cun 12 mil euros

Sarà dopleât il laboratori di tecnologjie dal len dal Isis Solari di Tumieç. La Provincie e à in fats fat buine la dade fûr di un contribût di passe 12 mil euros pe compre di imprescj tant che seis a nastri, planis e vie indevant, gjavant fûr dal Font de mont de sede tumiezine de Provincie di Udin. «Tai ultins agns - al à sclarît Caroli - il Solari al à inmaneât une gnove sperimentazion par insegnâ lis tecnichis di lavorazion dal len e de piere, cul fin di preparâ tecnics sensibii a materiâi ecologjics, che a cognossin i principis di fonde de bioarchiteture, bogns di meti in vore concretementri competencis e mistîr». Une direzion, chê cjapâde de scuele, che è stade prudelâde ancje de Provincie, che l'an passât e veve za dât fûr 17 mil euros, simpri tramite il Font de mont, par fâ une gnove stanzie Cad.

D'Andrea al pant il progjet zovins a Giacomini

L'assessôr provinciâl al sport, Fabio D'Andrea, al à scuintrât Massimo Giacomini, vice president nazionâl dal setôr zovanîl e scolastic de Figc. D'Andrea in chê ocasion al à pandût il progjet, inmaneât de Provincie di Udin, che al mire a dâ jutoris, dilunc l'an 2007, ae categorie dai plui piçui pes scuaris di balon de Alte furlane. La pensade e è indreçade a promovi il slargjament di chest sport dapardut in mont, soredut passant pes scuelis. Si ponte a rivâ a chest travuart in gracie di bogns supuart tecnics e organizant torneis speciâi e incuintris cun personaçs famôs dal mont sportîf (ad esempli i alenadôrs Luciano Spalletti e Francesco Guidolin). Cun di plui vignarà creât un campus estîf intes struturis de Ge.Tur. di Lignan dulà che saran presints ancje lis scuaris zovanîls dal rugby provinciâl.