04 LUGLI0 07
CJARGNE - SS52, letare ae Anas da bande de Comunitât Montane
La Comunitât montane de Cjargne e domande ae Anas di inviâ daurman i doi progjets su pe strade statâl 52 tai comuns di Soclêf e Enemonç e lu fâs a mieç di une delibere di zonte e di une letare indreçade al sorestant de viabilitât in FVJ, Ugo Dibennardo, e al assessôr regjonâl Lodovico Sonego. Tal document, mandât par cognossince ancje ai sindics dai comuns interessâts, l'ent al poche l'inviament dai lavôrs da bande de Anas, domandant al assessôr Sonego supuart e jutori par inviâ in curt il procediment, e ancje proponint un incuintri, plui in là, par studiâ lis prioritâts da frontâ pal miorament de viabilitât dal teritori. «I doi progjets - al sclarìs il president de Comunitât montane de Cjargne, Lino Not - a son cetant impuartants pe sigurece stradâl cjargnele: o savìn che la fase di progjetazion, par ducj doi, e je finide e che si è vude dute la documentazion necessarie, ancje lis retifichis dai progjets, za fatis buinis dai comuns tal 2006. Indi è dibisugne dome che la Anas e invii plui prest pussibil i lavôrs». La Comunitât montane de Cjargne e furnìs la plui grande disponibilitât a colaborâ cui orghins competents, di mût che il setôr des infrastruturis stradâls nol deventi un probleme ma ben un pont di rilanç pe zone».
DARTE - Mostre des artistis di Federcasalinghe
Il leam jenfri Federcasalinghe FVJ e lis termis di Darte al va indevant benon. Daspò de firme de convenzion che e permet aes iscritis de associazion di acedi aes curis e ai trataments dal stabiliment cjargnel a presits ribassâts, la diretore des termis Anna Zambelli e à inmaneât une altre iniziative che e viodarà dilunc dute la Istât ospit a Darte il grup "L'Art dal Artesanât" de Federcasalinghe, cun sù par jù 60 artiscj. 16 pitôrs e pitoris a alternaran lis lôr oparis, metudis fûr inte grande e biele jentrade des termis, fintramai ae fin di Setembar. La presentazion de iniziative culturâl si è davuelzude domenie ai 1 di Lui ae presince de diretore Zambelli, di Lauretta Serafini president regjonâl Federcasalinghe e dal artist Marco Marra. La mostre e sarà vierte a ducj e oltri a podêlis viodi, lis oparis a podaràn ancje jessi compradis. Prin autôr al è Giovanni Patriarca di Tresesin: «i siei lavôrs di cîi, nûi e paisaçs, fats cu la tecniche de incision calcografiche dal vueli e dal pastel sec, ben si insedin tal ambient di polse e benstâ che si cjate te struture - al dîs Serafini, zontant che – la prossime istât il percors dal Grup Artesans de Federcasalinghe a previôt, simpri achì, un altre mostre artistiche».
Provincie: si infuartìs la colaborazion jenfri ditis cravuatis e furlanis
«Indi è scugne di incressi i rapuarts economics e sociâi tra la Provincie di Udin e la Croazie : par chest vin di cirî di continuâ a inmaneâ progjets pe internazionalizazion des ditis come Rete Class». Chest l'obietîf di fonde che l'assessôr aes ativitâts produtivis Daniele Macorig al à ribatût tant dal incuintri cu la delegazion cravuate (dulà che si cjatavin i rapresentants de Cciaa, de Agjenzie pal disvilup, dal Progjet ICE de contee di Varazdin e ancje i rapresentants de zonte regjonâl istriane e di chê de Slavonia e Baranja). La riunion, che si è davuelzude prin de cunvigne "Internazionalizazion e agregazion tai percors di cressite des piçulis e mezanis industriis" inmaneade de Cna, e je stade ancje ocasion par discuti su "Rete Clas", il progjet di promozion e metude in vore di une rêt di centris locâi di assistence e servizi aes piçulis e mezanis impresis che al à cjapât dentri tai ultins agns oltri ae Provincie e ae Cna di Udin, ancje la Contee , il Consei dai imprenditôrs e la Cjamare di Cumierç di Varazdin. Par Macorig «in gracie a chest progjet si son rivâts a jonzi impuartants travuarts di integrazion economiche e sociâl jenfri chescj Paîs. Par chest motîf nô o sin disponibii a furnî un jutori par inviâ gnûfs progjets di cheste fate».
Traspuarts: gnove corse di coriere Udin-Lignan
Rivâ adore di scjampâ lis muarts dal sabide sere. Il progjet "Voi a divertîmi…sigûr!...o cjapi la coriere" al à propit chest fin. Il gnûf progjet inmaneât dal assessorât ai traspuarts de Provincie di Udin e de Saf al previôt in fats une gnove corse jenfri Udin e Lignan intun orari just par ducj chei che a vuelin fâ notolade intal paîs balneâr furlan. Il servizi al sarà atîf ducj i sabidis fintramai ai 26 di Avost e ancje martars 14 di Avost cun partence aes 10.30 di gnot de stazion di Udin e rivade a Lignan pes 11.45 (lis fermadis mezanis a saran: Mortean, Cjasteons di Strade, Muçane e Palaçûl). La tornade e sarà aes 5.30 di buinore cun rivade a Udin aes 6.45. Il biliet al è di 5 euros 20 euros. «La nestre provincie, magari cussì no - al à sclarît l'assessôr ai traspuarts e al turisim, Fabio Marchetti tant de conference stampe di presentazion - e je jenfri lis primis in Italie par numar di muarts su strade. Un belanç negatîf - al à continuât Marchetti - che si augurìn di sbassâ ancje cun cheste linie sperimentâl, che o sperin di dopleâ ancje l'an cu ven, magari slargjantle ancje al vinars gnot».
La Provincie e cjape sù dôs personis pe Aree Ambient
Gnûfs puescj di lavôr in Provincie di Udin. La aministrazion cun a cjâf il president Marzio Strassoldo e à butât fûr un bant pal assunzion di dôs personis (categorie D tecnic e tecnic-aministratîf, posizion economiche D1) alì de Direzion di Aree Ambient, cun contrat a timp determinât e plen par un an, cu la pussibilitât che al vegni sprolungjât. «O vin decidût cussì - al à sclarît il president Strassoldo - parcè che vuelin potenziâ i uficis de Aree ambient, di mût di davuelzi benon ancje lis gnovis competencis che la regjon nus à dât sù cu la leç 24. L 'ambient - al à zontât - al è un dai setôrs di fonde de aministrazion provinciâl e par chest al à dibisugne di jessi infuartît, miorant la sô eficience». Cui che al passarà il concors al jentrarà in servizi dentri 10 dîs de propueste di assunzion formalizade dal Ent. A podaran presentâ domande ducj chei che a àn la lauree in inzegnerie chimiche, gjestionâl, civîl, ambientâl e di procès, o chê in chimiche, siencis ambientâls o un altri diplome compagn sedi dal vecjo che dal gnûf ordenament universitari. La Provincie e fasarà un colocui dome cun chei che a àn un curriculum stimât impuartant de Comission.
TUMIEÇ – lis faturis de T.I.A.
T ai dîs che a vegnin a rivaran lis faturis pal smaltiment e il traspuart dai refudums. Come l'an passât la cjapade sù de tasse e sarà davuelzude diretementri dal comun di Tumieç e no de SFET. Par paiâ la tasse i citadins a varan di doprâ i boletins zontâts ae fature, fasint il versament in cualsisei bancje, a gratis, o in pueste paiant un soreplui. Il versament al podarà jessi intune sole rate dentri dai 31 di Lui o in 4 voltis ogni doi mês. Lis tarifis a son compagnis di l'an passât, l'impuart in fature però al sarà lizermentri plui bas pe vuaiade fate jenfri coscj e vuadagns relatîfs al servizi.
La politiche e scuen supuartâ il merit e il lavôr des feminis
Valeria Grillo, delegade pe sô aziende ae Assindustrie e vice president dal consei provinciâl di Udin, si è mostrade dacuardi cui argoments tratâts dal president Luca Cordero di Montezemolo, su pes politichis dal lavôr, de imprese e de valorizazion dal rûl de femine. «Montezemolo - e à dit la Grillo - al à pandût a clâr la situazion dal marcjât dal lavôr, massime parcè che a rivuarde la condizion feminîl. Tant che manager di aziende e delegade aes paris oportunitâts de Provincie o ai la pussibilitât di interessâmi cetant dai argoments discutûts da Montezemolo, soredut sul probleme dai coscj che di continui a svilissin e a frenin lis nestris aziendis, cuntune politiche che, in chest setôr, e fâs masse pôc. Indi è inmò pocjis feminis che a lavorin, cause la mancjance di flessibilitât che ur permetarès di gjestî miôr i timps dal lavôr e de famee. Montezemolo al à marcât plui voltis cemût che in altris Paîs cheste situazion a sedi stade distrigade subite, cun asîi nît e oraris che a permetin di tornâ a lavorâ benon daspò dal part. Jo mi auguri che lis sôs peraulis a sedin scoltadis par miorâ la situazion e che la part atente de societât - e à sierât la Grillo - a puedi jessi chê zovanîl, che no scuen stâ lontane e indiferent a robis di cheste fate».
"No si distrighin i problemis gjavant lis Provinciis"
Il president de Provincie Marzio Strassoldo al à preseât il discors dal president di Confindustrie Montezemolo, rimarchevul ospit de Assemblee anuâl de Assindustrie furlane, gjavant però il blec di discors che al criticave lis provinciis. «Achì no si trate di difindi par san scugnî - al à notât Strassoldo - ma se e je vere, cemût che al à dit Montezemolo, che pes impresis al è il marcjât che a ur fâs la autocritiche, tal stes timp a son i eletôrs che a fasin autocritiche aes istituzions. Tes Provinciis o vin une continue incressite di partecipazion eletorâl, che e pant il rûl cetant impuartant pe comunitât e pes impresis. Nol è gjavant i ents mezans che si cancelin i problemis, ma, invezit, cemût che a àn dit Valduga e Fantoni, cuntun confront concret tal rispiet di ognidun». «Lis Provinciis a esistin dapardut intes democraziis plui modernis - al à zontât il president - ancje se cun nons difarents, parcè che a davuelzin funzions di aree largje, di coordenament tra comuns, Regjons, Stâts. La lôr gjavade a fasarès pesâ su altris ents lis stessis funzions e i stes coscj, simpri che nol sedi un mût par toli funzions eletivis e di control ai citadins».
Zonte: 110 mil euros pe metude in sest di bens culturâi "minôrs"
Un supuart concret ai bens culturâi dal teritori provinciâl. Cun chest fin la zonte Strassoldo e à fat buine la dade fûr di un contribût di 110 mil euros a pro di 22 glesiis de provincie di Udin. «In Friûl indi è cetantis realtâts che a meritin di jessi valorizadis e che, in gracie a chescj bêçs, a podaran tornâ al antîc sflandôr - e à sclarît il vicepresident dal Consei provinciâl cun deleghe ae culture Valeria Grillo. La aministrazion provinciâl e sosten da simpri no dome lis realtâts culturâls plui grandis ma ancje e cun plui atenzions chês che se no, no saressin nancje calcoladis. Lis mainis, lis gleseutis, a son un valôr in plui de nestre comunitât che par vecjo e simpri stade leade a fuart cu lis plêfs sioris di storie». E il president Strassoldo al à zontât « la Provincie in chest mût a vûl furnî un jutori reâl aes piçulis realtâts che masse voltis a vegnin dismenteadis rispiet a chês plui cognossudis o plui grandis».
Leç eletorâl regjonâl, Strassoldo al ribat la sô contrarietât
«Une norme che e je pardabon un vê e propi tuart ae democrazie de nestre regjon parcè che a rivuarde il limit metût ae eleibilitât dai presidents di Provincie e dai sindics dai comuns cun plui di 3.000 abitants. Cun di plui, stant che la leç e tocje cussì tant sindics e presidents di provincie, chescj a vevin di jessi scoltâts tal ambit des autonomiis locâls. Metint man ae leç eletorâl si è pierdude la ocasion di sbassâ i coscj de politiche». Ancjemò une volte il president de Provincie di Udin Marzio Strassoldo al à marcât il so “no” ae norme de gnove leç eletorâl che e previôt la no eleibilitât di sindics a presidents di Provincie. La ocasion al è stât l'incuintri che Upi e Anci a àn vût a Triest cun ducj i rapresentants dai grups consiliârs e regjonâi. Il fin al jere simpri chel di meti adun il slambri jenfri Consei e Autonomiis locâls che al jere vignût fûr apont de leç eletorâl su pe incompatibilitât des cjariis.
"In Sole 24 Ore": concors pes associazions
"In Sole 24 Ore", cussì si clame il concors di ideis finanziât da iniziative comunitarie Leader+ e promovût da Euroleader, la Comunitât Montane de Cjargne adun cu la Cooperative Cramârs di Tumieç. Il progjet al è indreçât a ducj i zovins che a fasin part di associazions e grups che a presentaran propuestis e iniziativis a pro dal teritori cjargnel, come il netâ un troi, un riu, meti adun un teatri, insome dutis lis ideis che a podin puartâ alc di bon a ca sù e che a sedin in grât di valorizâ e tignî cont dal nestri teritori e de comunitât. Il concors al è viert a ducj i zovins jenfri i 12 e i 35 agns dai 28 comuns de Cjargne. Il progjet di ogni grup al scugnarà jessi presentât e sclarît intai detais dentri dai 15 di Lui, il premi finâl pe miôr pensade al sarà di 1000 euros. Plui informazions e il bant integrâl si podaran cjatâ sul sît www.insole24ore.info, par domandis e problemis si pues scrivi a info@insole24ore.info.