18 LUGLI0 07
CJARGNE - Contribûts pes impresis comerciâls
A son passe 460mil euros i bêçs butâts fûr de Comunitât montane de Cjargne par supuartâ lis ditis comerciâls de zone a mieç di un bant di pueste, publicât tai dîs passâts sul Bur. A vê zovament di chescj contribûts dal ent sore comunâl a saran lis aziendis che si cjatin tes localitâts cun mancul di 3mil abitants. La Comunitât montane e à cun di plui stabilît, par ogni sorte di ativitât e su la fonde di dulà che cheste e je logade, un liminâr peât al vuadagn vût tal 2005; al di sot di chest al sarà pussibil fâ domande di contribût. «Cun cheste pensade - al sclarìs l'assessôr al cumierç de Comunitât montane, Andrea Plazzotta - vuelin dâ un jutori concret al disvilup dal cumierç ancje tai paisuts di mont che, dispès, a àn un rûl di fonde tal sociâl oltri che in ambit economic. Se, di une bande, la Comunitât montane e sta cirint di inviâ une politiche simpri plui a pro dal disvilup dal teritori a mieç di progjets metûts in vore dacuardi cui diviers setôrs, di chê altre e stime impuartant continuâ a supuartâ lis piçulis realtâts comerciâls che a stentin, e che a podin furnî ae int servizis di prime necessitât, permetintti di restâ a vivi ca sù». La percentuâl di contribûts pes impresis che e jentraran in liste e podarà rivâ fintramai al 70% de spese par un massim di 2.500 euros, limit che al vignarà alçât a 3.000 euros se indi sarà risorsis a disposizion.
MONT - Maestris, interogazion de Udc
«I ritarts inte dade fûr di contribûts regjonâi a pro dai maestris di mont che no vivin ca sù, dal sigûr no jude la lôr permanence sul teritori montan e a prejudiche il bon insegnament». Chest il pinsîr pandût dal conseîr regjonâl de UDC Roberto Molinaro intune interogazion indreçade al president de Regjon Riccardo Illy.
«La leç regjonâl 13 dal 2001, mudade de 17 dal 2006 - al impense il centrist - e previôt contribûts a pro dai insegnants che a stan a almancul 20 chilometris de scuele che si cjate in mont; criteris di prioritât e modalitâts di concession a son stabilîts cuntun regolament di pueste, che a cjaparès dentri ancje lis Provinciis e lis Comunitâts Montanis». «Pal an scolastic passât - al è lât indevant Molinaro - no indi è stade nissune butade fûr di contribûts, causionant pinsîr jenfri i maestris che a lavorin in mont e, e je duncje sante scugne che cheste situazion e vegni sclaride, e che si meti subit in vore une soluzion pai problemis che magari a son vignûts fûr». Da pît Molinaro al domande: «se lis risorsis a disposizion a permetin il paiament di dutis lis domandis presentadis e par cuant che e je previodude la spartizion dai contribûts».
Ucit: finît il procediment cuintri Collaone e De Alti
La vicende des investigazions su pe assunzion dal energy manager e responsabil dal Ucit de Provincie di Udin Franco Bressanello, che e veve viodût indagâts ancje il dirigjent Paolo De Alti (tant che funzionari responsabil dal procediment e Paolo Collaone, ex conseîr provinciâl cun deleghe ae Energjie), si è sierade cul decret di archiviazion da bande dal Gip Alberto Scaramuzza, su domande dal Pm Lorenzo Del Giudice. Nissune ilegjitimitât e je stade cjatade e Collaone al à pandût gust pe sierade dal procediment «a mostrâ - al à dit - che dut al è stât fat cun coretece e sot la lûs dal soreli». Cemût che si pues lei tal document dal Public ministeri, dubis a jerin stâts pandûts da un dai funzionaris che a àn lavorât al procediment di nomine, parcè che a rivuarde la esistence su Bressanello dai recuisîts domandâts dal articul 110 dal Test Unic dai Ents locâi pe assunzion di un incaric dirigjenziâl extra organic. Interogâts, De Alti e Collaone, a àn sostignût la coretece dal procediment di nomine, dant resons tecnichis aministrativis, e da chest si è podût capî che chel provediment di nomine al è stât metût in vore su la fonde di une juste leture juridiche des normis di riferiment e no par supuartâ ilegalmentri e intenzionalmentri un sogjet.
Il doman dal Friûl peât aes sôs lidrîs
La ocasion e je stade dade de presentazion di "Friûl: la soluzion finâl", une version incressude e voltade in lenghe furlane dal famôs libri dal professôr Raimondo Strassoldo, che al scrîf dai grancj pericui che il popul furlan si cjate a frontâ colpe il continui slontanament des lidrîs, causionât sedi de inclinazions spontaniis sedi da disens politics indreçâts a cancelâ lis difarencis dentri de regjon. Il libri al è stât presentât dal bonsignôr Duilio Corgnali, grant promotôr di iniziativis a pro de culture furlane (come la voltade par furlan de Bibie e dal lezionari), che però al à declarât di no condividi il pessimisim dal autôr, parcè che ancje devant a disastris tant che il taramot, e forsit in gracie di chês scjassadis, la int furlane si è segnalade pe sô capacitât di reazion aes situazion negativis e a à mostrât la capacitât di cjapâ gnovis stradis (baste pensâ ae ricostruzion, ae Universitât furlane e al ricognossiment de lenghe). L'autôr al à po dopo zontât lis resons de nassite di chest libri e li szontis che a son stadis fatis sul ûs dal furlan e des variantis locâls. Ancje il president de associazion " La Farie ", la inzegnere Valeria Grillo e à cjacarât, spiegant lis resons di chest event che si met in rie cun chei che a son i principis di fonde di cheste associazion. Une schierie di intervents a àn sierât la cunvigne, jenfri i altris chel dal presidente de Provincie Marzio Strassoldo.
Un protocol par sbassâ lis emissions di vernîs tal aiar
Sperimentâ tecnichis gnovis par sbassâ l'ûs di solvents te vernisadore dai ocjâi. Cun chest fin la Provincie di Udin, la Safilo Spa , la Assindustrie , la Universitât di Udin e la Arpa , a àn firmât un protocol di intese, impegnantsi a inviâ une taule di lavôr par jonzi a risultâts concrets dentri di 18 mês. A rapresentâ la Provincie ae firme dal document, l'assessôr al ambient, Riccardo Riccardi: «Cun cheste firme - al à dit - o vin za jonzût un bon risultât, ma al sarès dibant fermâsi achì. Anzit o vin di tacâ da achì par començâ un percors indreçât ae tutele dal ambient, cirint il plui pussibil di rivâ a risultâts concrets».
La Safilo , aziende che e prodûs ocjâi, dant lavôr a passe mil personis, si interesse cetant al probleme des emissions di Composcj organics intal aiar, studiant gnovis soluzions ancje a mieç di tecnologjiis compatibilis cul ambient.
Centris integrâts par l'implei: al vie il protocol
La Provincie di Udin e aderissarà al protocol di intese pe metude in vore sul teritori regjonâl di 6 Centris par l'implei. La zonte Strassoldo e à dât il vie ae firme dal document cu la Inps , la Regjon e lis Provinciis di Gurize, Pordenon e Triest, che al previôt la imbastide di chescj centris bogns di furnî integrazion logistiche funzionâl e a di screâ servizis e politichis ativis dal lavôr smirant ae semplificazion aministrative. I Centris si cjataran a Triest, Monfalcon, Gurize, Udin, Tisane e Pordenon. «Nol è par câs che la Provincie di Udin – al à sclarît l'assessôr al lavôr Daniele Macorig – e à decidût di meti sù chestis struturis tal cûr dai cjâf lûcs: la sielte, in fats, e rispuint ae dibisugne di vê un ufici che al fâsi da “baricentri” per ducj i paîs dal teritori. Il Centri di Tisane massime al è stât screât pensant aes risorsis umanis disponibils e pal fat che al gjestìs la flote dai lavoradôrs stagjonâi di Lignan». I gnûfs centris duncje a scuegnaran jessi un pont di riferiment pe int e ancje un imprest di politiche ative tal lavôr. La union che si creerà jenfri lis 4 provinciis, la Regjon e la Inps a fasarà in mût, no dome di creâ un grup di lavôr miscliçât e di podê stazâ l'andament dai obietîfs previodûts dal acuardi, ma soredut, di fissâ la inmaneazion di un sisteme indreçât ae tutela de int cence lavôr, inmaneant iniziativis comuns».
Strassoldo, " La Coinè e pee, a no divît"
«Ducj a puedin proferî e fevelâ la lenghe furlane seont la sô variant, cun dutis lis sfumaduris de zone di origjin ma parcè che la lenghe e puedi jessi definide tâl, indi è dibisugne che al sedi un lengaç condividût da ducj, une coinè». Chest ce che al à dit il president de zonte di Palaç Belgrât, presint a une conference stampe di presentazion di un studi, inmaneât dal CIRF (Centri di ricercje su pe culture e la lenghe furlane), indreçât a stazâ l'agradiment de int pe campagne promozionâl in furlan metude in vore de Universitât di Udin. Dopo vê pandût il so gust pes risultis de ricercje, cul 80% dai intervistâts a favôr dal insegnament de lenghe furlane a scuele, Strassoldo al à fevelât des peraulis dal president de Pordenon Elio De Anna, che si è mostrât a pro des variantis locâls, viodintlis tant che un insiorament rispiet al furlan coinè. «Sei dacuardi cun De Anna cuant che al dîs che si scuen dâ snait aes variantis locâls dal furlan, però bisugne tignî cont che il furlan al à cualchi spere di sorevivi dome se da une lenghe dome orâl, e devente strument di comunicazion scrite, e in chest câs al è di oblic doprâ une grafie compagne, massime in setôrs tant che la stampe, la scuele, la comunicazion burocratiche. Il studi de Universitât nus a pandût dâts verementri sigurants che nus disìn che i furlans si stan simpri plui rindint cont de impuartance de lôr identitât".
Cjalderiis a biomassis: sucès dal progjet de Provincie
E je stade plui di ce che si spietave la adesion al progjet "Font sperimentâl biomassis", inmaneât dal assessorât ae energjie de Provincie di Udin. Cemût che al à sclarît l'assessôr Enore Picco in fats, a son stadis 81 lis domandis rivadis tai uficis di Palaç Belgrât, mandadis da dut il teritori provinciâl. «O sin cetant contents - al à notât - al è clâr che l'interès mostrât al è segnacul de validitât dal progjet. Dentri di 10 dîs e sarà metude fûr la graduatorie definitive e pe fin di Lui, o cirarìn di spartî i contribûts». La iniziative inmaneade dal assessôr Picco e jere indreçade ai proprietaris, usufrutaris, aministradôrs o legâi rapresentants di cjasis logadis in provincie, a lôr a vignivin metûts a disposizion 180 mil euros pe metude sù di cjalderiis a biomassis. «Al è stât un progjet sperimentâl - al à dit Picco - pensât par rivalutâ il len, da masse timp metût in bande o strassât. Il nestri fin al è chel di finanziâ 30 intervents, mostrant il sparagn economic e energjietic che lis biomassis a puedin furnî».
CJARGNE - Di gnûf in vore i centris estîfs in museu
I centris estîfs in museu, inmaneâts de Comunitât montane de Cjargne cun CjargneMuseus, a son esperiencis educativis avodadis a pocâ e insiorâ lis capacitâts espressivis dai canais insegnaitjur la impuartance de culture cjargnele tal setôr naturalistic e storic artistic. Intes ativitâts alì dal Art Park di Verzegnis e inte Galarie di Art Moderne di Trep, si scuvierzin i difarents lengaçs espressîfs a mieç di disens, colôrs, mots e peraulis. Un svicinâsi ae art, cun grande atenzion ae scuvierte dal colôr, des formis, dal zûc. Invezit il centri estîf che si davuelç tal Museu Archeologjic di Zui, al è spartît in sezions di ricercje e laboratoris. Il fuart rûl de nature e dai siei elements a son il fîl des ativitâts previodudis ae mostre "Preon 200milions di agns indaûr", un mût gnûf par studiâ il teritori di chel cjanâl. In fin, al Museu di Dimpeç si imparin lis carateristichis dai stâts europeans a mieç dal "Eurosauro", un dinosaur european che al covente ai fruts a confrontâ grazie al quale i ragazzi possono fare continui e significativi confronti tra le risorse ambientali italiane ed europee.