25 LUGLI0 07
CJARGNE - Eletrodots, interogazion in Regjon
Trê eletrodots, e ducj trê peâts ae linie todescje. I progjets - che a cjapin dentri la zone che da Somplât, in Cjargne, e scjavalcjin il confin fin sù a Paluce - a son stâts presentâts un pôcs di mês indaûr ae Regjon. Ma indi è un ma, a marchin i conseîrs Antonio Martini e Isidoro Gottardo intune interpelance: la pocje disponibilitât di energjie in Austrie e permetarà di fâ dome un eletrodot. E indalore Martini e Gottardo si domandin cuâl che al sedi il progjet che al à i recuisîts par jessi metût in vore e cuâi che a sedin lis valutazions de zonte su pes ricjadudis socio economichis e ocupazionâls che ognidun al varà sul teritori regjonâl.
TUMIEÇ – Lavôrs di netade dal acuedot
Dai 24 di Lui a son tacâts i lavôrs di smondeade dal acuedot di Tumieç, che a cjaparan dentri dut il teritori dal cjâf lûc e un toc di Betanie. I lavôrs a fasaran sierâ daûr des voltis difarents tocs di acuedot, netant i tubis cuntun sisteme di lavade arie aghe. Dut il procediment al durarà trê mês. Ogni utent al restarà cence aghe da 4 a 8 oris dilunc une zornade, ven a stâ des 8.30 aes 17.30 cirche. Al è impuartant impensâsi di no doprâ robis eletrichis (come lavablancjeriis, laveplats e v.i.) intes oris di sierade. Trê dîs prime dal començâ dai lavôrs la int e sarà visade par ogni zone (zone nord, centri, zone dal ospedâl e v.i.), e saran metûts fûr avîs, ancje sul sît dal comun www.comune.tolmezzo.ud.it. E inmò une dì prime de sierade de aghe, la liste des stradis sarà picjade te zone di competence.
Provincie: gnûf sît pal inseriment lavoratîf dai disabii
Si clame www.linda.lavorodisabili.eu e al è il gnûf sît internet dal progjet Equal L.In.d.a., che la Provincie di Udin, Project Leader, e altris partner de iniziative a àn presentât. «Si trate di une lade indevant dal progjet, che al furnìs un servizi inovatîf pe incressite di iniziativis pes personis pedimentadis - al à sclarît l'assessôr al lavôr, Daniele Macorig - la lôr metude dentri tal mont dal lavôr e viôt Palaç Belgrât impegnât a promovi atenzion e ativitâts indreçadis a sensibilizâ il setôr dai servizis e de opinion publiche, butant fûr e prudelant la sperimentazion di gnovis pensadis e davuelzint ancje ativitât di colegament cu lis associazions e la cooperazion». Sul sît, al vise Furio Pertossi, si puedin cjatâ dutis lis informazions, i inzornaments, lis leçs su pal inseriment lavoratîf e une sezion avodade aes "domandis fatis dispès". Cun di plui chest strument al permet di contatâ il Ciddi (Centri Documentazion Disabii e Impresis) di vie Martignac, par vê un servizi a gratis di consulence da bande di un jurist che al fâs part dal progjet». «In fats la sielte sperimentâl e permet di svecjâ, miorâ i struments, i percors, lis rêts, i prodots - al à sierât Macorig - l'obietîf al è chel che il progjet, che si sierarà tal Zugn dal 2008, al continui te vite di ogni dì, stant che il so iter al è stât metût dentri te rêt di servizis che si interessin di inseriment lavoratîf, inte prospetive di un so miorament inte eficacie e inovazion, a mieç dal dialic jenfri lis impresis, il mont sanitari e chel aministratîf».
Associazion jenfri lis Provinciis, fat bon l'at costitutîf
L'at costitutîf de Associazion jenfri lis Provinciis furlanis al è stât fat bon inte biblioteche Guarneriane di Sant Danêl ae fin de riunion dal grup di lavôr interprovinciâl. Al incuintri a àn cjapât part i presidents de Provincie di Udin Marzio Strassoldo e de Provincie di Pordenon Elio De Anna, i presidents dai conseis provinciâi di Udin e Pordenon. Tant de cunvigne al è stât pandût intai detais il regolament de associazion e i esperts incargâts a àn sclarît lis modificazions metudis dentri e lis funzions de associazion e lis sôs competencis e i siei orghins. Al è stât cun di plui presentât l'at costitutîf de associazion che al sarà firmât dai doi presidents des provinciis e alfin e je stade ribatude la dibisugne di mudâ il regolament consiliâr de Provincie di Pordenon par permeti la dade dongje des riunions de conference interprovinciâl tai teritoris di ognidune. Tes setemanis che a vignaran si larà indevant cu la fate buine dai conseis provinciâi.
Dentri di Setembar il progjet di disvilup dal setôr chimic
Al sarà pront dentri di Setembar il stamp dal progjet di disvilup e infuarciment dal setôr chimic inte nestre provincie. A dîlu l'assessôr al lavôr e aes ativitâts produtivis de Provincie di Udin Daniele Macorig, presint ae riunion dal Osservatori chimic provinciâl. «Si sin dâts dongje - al à sclarît l'assessôr - par sveltî la cjapade sù dai dâts, operazion decidude tant de ultime riunion dal Osservatori, cuant che o vin stabilît di dâ sù al Consorzi Aussa Corno la rilevazion dal stât de industrie chimiche inte Basse. In detai - al à zontât - o vin cirût di scjampâ soreposizions jenfri lis difarents azions di stazâmint inviadis sedi a nivel locâl che nazionâl». Ae riunion dal Osservatori provinciâl a erin presints i sorestants di ducj i ents e istituzions cjapadis dentri tal progjet che a àn fat il pont de situazion. «Il nestri obietîf - al à sierât Macorig - al è chel di meti jù un document cun propuestis di disvilup dal setôr chimic inte Basse furlane, pensât su pe fonde des dibisugnis pandudis des ativitâts produtivis che si cjatin sul teritori».
«Insiel tant che Alitalie: prime proclamis, dopo faliments»
«A samee di viodi la Corrida: pecjât però che i diletants al sbarai, achì a sedin i assessôrs regjonâi, che cu lis lôr decisions a stan fasint lâ cu lis scarpetis pal aiar l'Insiel». Cheste la declarazion dal cjâf grup di Forza Italia in Provincie di Udin, Piero Mauro Zanin, che nol rive a capî cemût che la zonte e stedi puartant indevant l'afâr Insiel. «La insigurece che a rivuarde il doman di Insiel – al à dit Zanin – e je causionade da cemût che la zonte regjonâl e il so president Illy a àn gjestît la facende. Dilunc chescj mês di fat la maiorance no à savût distrigâ chest cantin che oltri a interessâ il cjamp ocupazionâl, al varà impuartantis conseguencis su pe economie furlane». Zanin si è mostrât «cetant pinsirôs» di cemût che la zonte Illy e sta puartant indevant il procediment di privatizazion de societât informatiche, augurantsi che «par une volte, la Regjon e invii un confront jenfri i interessâts, pensant al ben dal Friûl e no a interès personâi». «Ce che al sta divignint cun Insiel – al à notât – al è confrontabil a ce che a sta sucedint cul Alitalia: prime si magnifiche in lunc e in larc il plan par tirâ sù il grup, e po dopo si viôt cence podê fâ nuie il so crac».
Un depliant in marilenghe par chei che a vuelin donâ i orghins
Ancje la Associazion Italiane Donadôrs di Orghins, e podarà pandi lis sôs iniziativis suntun volantin dal dut scrit in furlan, che al coventarà a fâ capî ae int la impuartance de donazion dei orghins. Il scrit volût de Aido adun cul Assessorât aes Politichis sociâls de Provincie di Udin e cul Servizi Comunicazion e Promozion des Identitâts de Aministrazion provinciâl di Udin, al è stât presentât tant di une conference stampe dulà che a erin presints il President de Provincie di Udin Marzio Strassoldo, l'Assessôr provinciâl Adriano Piuzzi e il gnûf President de Assindustrie Adriano Luci, che publichementri al à aderît ae Associazion. "O stin vivint intun periodi la che la marilenghe e sta resurint - al à marcât il president de zonte - e i furlans a stan simpri plui rindintsi cont de lôr identitât. Cheste iniziative e pant, inmò une volte, cetant che la lenghe furlane e puedi jessi doprade in ducj i contescj. Sei sigûr che cheste mût di sensibilizâ, inte nestre lenghe, e svicinarà tante int a chescj impuartants problemis".
Mostre di Cesare Mocchiutti inte Galarie di art moderne "De Cillia" di Trep
"Il braconîr, il so mont, il so timp". Chest il titul de mostre avodade a Cesare Mocchiutti, screade alì de Galarie di Art Moderne "E. De Cillia" di Trep. Volude de aministrazion comunâl, la rassegne e presente une grande novitât, ven a stâ la esposizion des sculturis dal artist che, da dibot 36 agns, no erin mai stadis metudis fûr. La inaugurazion e je stade vierte dal sindic di Trep, Luigi Cortolezzis, che al à marcât cemût che: «Cun cheste mostre continuin la usance che e viôt la Galarie "E. De Cillia" come une fra lis realtâts culturâls e artistichis plui significants dal teritori». Par l'assessôr regjonâl Roberto Antonaz: «Il Comun di Trep, cun cheste iniziative al fâs onôr a un artist straordenari che al à peât adun il tacament pal teritori (tai siei cuadris si viodin slambris di Friûl), dal mâr fintramai ae mont, e la sfere internazionâl, stant che al à lavorât cui plui grancj artiscj dal secul passât». Antonaz al à ancje marcât cemût che cheste mostre e puedi jessi metude dentri intun percors internazionâl inteligjent.
Un laut ae pensade, che a incrès la rêt musiâl dal comprensori montan cul prontamint di mostris di grant riclam, al è rivât al assessôr ae culture de Comunitât montane, Marino Corti.
Ae scree e jere presint ancje la famee dal artist: «O vin metût fûr cun gust - e à dit la fie Enrica - ancje lis sculturis che, dal 1971, cuant che a forin metudis fûr ae Bienâl dal Bronzetto a Padue, no erin plui stadis mostradis ae int». La esposizion si podarà viodi fintramai ai 2 di Setembar cun chescj oraris: dal martars al sabide des 3 dopomisdì aes 6 sore sere e la domenie des 9 aes 12 e des 15 aes 18.
Screât in Provincie il gnûf pont anti- mobbing
In cumò ancje la Provincie di Udin, adun a chê di Pordenon, e à un so centri anti-mobbing. A Udin chest pont, che si cjate tes stanziis di Palaç Belgrât, al è un puest dulà che i lavoradôrs a puedin vê une consulence specialistiche a gratis: la sede e cjape sù lis domandis che a puedin rivâ par telefon, fax, internet e, miôr, di persone. Il centri anti-mobbing al è stât presentât tant di une conference ae presince dal president de Provincie, Strassoldo e dal vice president dal Consei Valeria Grillo. Strassoldo al à cussì sclarît: «Cheste vierzidure e je in gracie dal assum de Provincie e massime de delegade Grillo, che si è dade da fâ par jonzi chest obietîf, cul jutori dai uficis des politichis sociâls e dai orghins des parîs oportunitâts, e dai preziôs conseis dal avocat Teresa Dennetta, component de Comission provinciâl Paris oportunitâts». La Grillo e à marcât «cemût che il mobbing al sedi une forme di terorisim psicologjic che si davuelç midiant continuis limbics cuintri une persone, tirâts a dilunc, di mût di pocâ il lavoradôr a lassâ il puest di lavôr». Il Centri al à chescj oraris: dal lunis al miercus des 11 aes 19 e il vinars des 1 aes 7 sore sere. Si pues ancje clamâ ai numars 0432 279524 - fax 0432-279525 .