09 MAGGIO 2007
Femine e sport: inmò tancj i travuarts da jonzi
In dì di vuê la femine tant che atlete e je cetant presint tal setôr sportîf ma no je dibot par nuie intes posizions di comant o di alenadôr. Nissun dai 91 ents nazionâi sportîfs a à a cjâf une femine. E ancjemò plui grâf al è il fat che il sport professionistic feminîl in Italie nol esist e i premis in bêçs des feminis a son cetancj plui bas di chei dai mascjos. Chescj a son dome pôcs dai cantins pandûts da Maria Savonitto, docent de Universitât di Udin tant de cunvigne "2007 an internazionâl des paris oportunitât - Femine e sport" inmaneât a Udin de Provincie e presentât da Maria Giovanna Elmi. A dâ bon acet, daspò dal benvignût dal president Marzio Strassoldo, Valeria Grillo e l'assessôr al sport Fabio D'Andrea. «Ancje se il gno percors di vite al è stât inviât viers la cariere di manager e di aministradore publiche - e à dit la Grillo - no pues dismenteâ cetant che a vebi volût dî inte mê formazion personâl, la esperience sportive. E seont l'assessôr D'Andrea chest al è stât un moment a fuart significatîf massime parcè che «chest an al sarà dal sigûr ferbint pal nestri teritori par vie dai grancj events sportîfs in program. No stin in fats - al à notât – a dismentêa che ca di un pôc la provincie di Udin e viodarà doi apontaments sportîfs nazionâi come lis dôs tapis dal Zîr di Italie e la maratonine di Udin.
Lis protezions dai sogjets debui al centri di une cunvigne
«Une iniziative tant che chê inmaneade de associazion di volontariât "Oficine de Ment" e je cetant impuartant parcè che si ferme su argoments dispès dismenteâts de int». Cussì e à començât il so discors Valeria Grillo, delegade al assessorât ae culture de Provincie di Udin, dentri de Cunvigne nazionâl "Lis protezions dai sogjets debui. Aministradôr di sosten, no abilitazion e interdizion". «Masse voltis - e à zontât la Grillo - la societât no si interesse di chescj argoments, ancje se impuartants massime pes fameis dai sogjets interessâts. Chestis cunvignis - e à precisât - prin di saludâ in marilenghe - a coventin a ribati il fat che lis fameis no son da bessolis tal supuart ai lôr cjârs». La Cunvigne nazionâl e à marcât la impuartance de figure dal aministradôr di sostegn tai câs di no abilitazion e interdizion e la scugne di protezion dai sogjets debui. Juriscj e academics si son impegnâts a sclarî cun argoments psicologjics e sociâi, tignint cont sedi dai problemis pratics pes fameis che di chei tecnics pai operadôrs.
Il premi di lauree “Adele Del Bianco Bonacina” ae Dotore Michela Mecchia
Inte ultime sentade dal Consei Comunâl di Zui si è davuelzude la impuartant cerimonie de dade fûr dal premi di lauree “Adele Del Bianco Bonacina”. Vincidore dal premi e je stade la dotore Michela Mecchia, da pôc laureade ae Universitât di Udin. Il sindic tal complimentâsi cu la gnove dotore, al à pandût il laut de aministrazion comunâl e di dut il paîs di Zui cul auguri di un bon lavôr e un doman professionâl inte nestre tiere. Il sindic al à marcât il gjenerôs e cualificât contribût che la dotore Mecchia e à furnît ae aministrazion comunâl sul probleme dai eletrodots che a podaressin passâ sul teritori comunâl.
Grande Vuere: 30mil visitadôrs intun mês
30 mil visitadôrs intun mês, 5 mostris contemporaniis sul teritori, 20 events colegâts, 200 volontaris cjapâts dentri inte organizazion. Chescj a son dome alc dai numars che a pandin il sucès de manifestazion “ La Grande Vuere in Friûl”, inmaneade dal assessorât ae culture de Provincie di Udin e metude in vore in gracie al supuart de Regjon e de Fondazion Crup, cul patrocini de Unci (Union uficiâi in congjêt di Italie sezion di Udin) e dal Ufici Storic – Sme. I dâts a son stâts butâts fûr tant di une conference stampe dulà che a jerin presints il vicepresident dal Consei provinciâl Valeria Grillo, il sorestant dal servizi culture William Cisilino e il president de associazion Military Historical Center Roberto Machella. «Al è stât un event inovatîf pal nestri teritori – e à sclarît la Grillo – stant che al è rivât adore di valorizâ i lûcs storics de nestre tiere e di fâ scuvierzi chei events storics che a àn tant segnât il nestri Friûl. La Provincie , come ent di aree vaste, e à inviât sul teritori un progjet e e à çumât dongje dut chest florî di iniziativis».
Traspuart public: la Provincie di Udin si cjate cu lis scuelis
I cantins dal traspuart public de scuelis a son stâts il cûr di un incuintri inmaneât a Palaç Belgrât dai assessôrs provinciâi Cargnelutti e Carlantoni, ae presince dai rapresentants de Saf e di chei des istituzions scolastichis de provincie di Udin. Problemis pai oraris e pes coincidencis des corieris, domandis di incressi i percors e di mudament des fermadis, i ponts di fonde discutûts dai dirigjents scolastics e dai maestris des scuelis. «Da chest apontament – al à dit l'assessôr provinciâl ae istruzion, Paride Cargnelutti – a son vignudis fûr cetantis pecjis tal servizi di traspuart public. Dut câs cumò stazarin lis domandis presentadis cu la cussience che un dai nestris assums pal doman al scugnarà jessi chel di inscuelâ i fruts al rispiet e ae atenzion viers un servizi che ur ven dât».
Distret de Cjadree: un studi pal so rilanç
Ocupazion e formazion, inovazion e creativitât, ativitât di promozion e supuart ae vendite. Chescj i ponts di fonde par dâ snait al distret de cjadree daûr dal studi "Analisi par cognossi e propuestis pal disvilup dal distret de cjadree" indreçât ae Provincie di Udin da Maria Rosita Cagnina, ricercjadore di Economie e Gjestion des Impresis de Universitât di Udin. Da chest studi si è partîts inte cunvigne inmaneade de Provincie che si è davuelzude inte Abazie di Rosacis a Manzan e dulà che si son cjatâts Marzio Strassoldo e Daniele Macorig, assessôr aes ativitâts produtivis. Par Strassoldo al è stât «un moment impuartant par dâ dongje dutis lis domandis dal teritori e cirî di marcâ ponts di fuarce e ponts da mendâ par inviâ la riprese di un dai setôrs simbul de nestre regjon». Il distret de cjadree, tal Lui dal 2006, al è stât declarât cun decret dal assessorât regjonâl al lavôr, zone in grande dificoltât ocupazionâl. «La aministrazion provinciâl - al à sclarît Macorig - cul fin di dâ un jutori costrutîf al disvilup de economie dal teritori, e à cjalât cun cetant interès e partecipazion ae situazion dal distret».
Refudums: incuintri jenfri Provincie e Comuns dal Glemonàs
Il president de Provincie di Udin, Marzio Strassoldo e l'assessôr al ambient, Fabio Marchetti, si son incuintrâts a Palaç Belgrât cul president de Comunitât Montane dal Glemonàs, Cjanâl dal Fier e Valcjanâl, Ivo Del Negro, i sindics di Montenars e Dartigne, Antonio Mansutti e Roberto Venturini, e i sorestants di Exe, Net e Csr. Argoment dal incuintri la cjapade sù des scovacis tal Glemonàs e in detai lis soluzions da meti in vore par sfantâ un doman situazion dificilis in chest setôr. « La Provincie - al à dit Marchetti - e à volût chest apontament tecnic e duncje si met a disposizion par distrigâ lis dibisugnis dai comuns. Vin conseât cualchi soluzion al probleme sedi a nivel tecnic che politic».
Tumieç - Solidarietât dai sindics a Cuzzi
Leç eletorâl ancjemò al centri dal dibatiment dal Comitât esecutîf dal Anci dât dongje dal president Gianfranco Pizzolitto inte sale Comissions al cuart plan de sede de Regjon a Udin. Clare la posizion pandude joibe stade a Codroip de assemblee dai sindics: no a cheste leç eletorâl e no a un referendum che al zontarès un altri penç scjas istituzionâl a chel dal Consei regjonâl cu la fate buine di une riforme passade cuntun emendament noturni. «I Comuns a son la fonde e no la cuintri part de Regjon FVJ - al à marcât il president Pizzolitto - e ancje se a pandin une dissidie su pe leç eletorâl no puedin metisi cuintri, ma a scugnin ribati il principi di sclete colaborazion disbredeant i problemis». Achì e ven fûr la dibisugne di une revision a fuart dal Consei des Autonomiis. Al centri de atenzion dal Comitât esecutîf ancje il câs dal sindic di Tumieç Sergio Cuzzi su pe vicende Burgo.
CJARGNE - Tantis pensadis in spiete dal Zîr di Italie
Biel che a cres la spiete pal Zîr di Italie, a son tantis lis pensadis “di preparazion” previodudis dilunc chei dîs in dute la Cjargne. Il mont de bici si è viert aes iniziativis peadis al Zîr. Si è za començât sabide ai 28 di Avrîl cu la mostre “Coppi e Bartali al Giro d'Italia”, screade a Davâr. La mostre e sarà vierte fintramai ai 3 di Zugn cun chescj oraris: ducj i dîs des 5 aes 7 e la domenie e il martars ancje des 10 aes 12. La sezion avodade a Fausto Coppi e Gino Bartali e cjape dentri 60 panei che mostrin i doi campions tes imagjinis plui bielis de lôr cariere sportive. Cun di plui i visitadôrs a puedaran viodi ancje lis mais origjinâls dai doi atletis e lis copiis des bicis che a dopravin tes lôr “barufis sportivis” jenfri il 1948 e il 1950.
I fruts des scuelis di Davâr dai 3 ai 13 agns a son impen i protagoniscj di panei sul teme “Fruts e bici a Davâr”. Il mont dal ciclismi viodût duncje cui vôi dai scuelârs dal centri cjargnel. L'apontament pe lade sù in bici, daspò de iscrizion a mieç dal sît internet www.amiciebici.it, al è previodût a Tumieç in Place XX di Setembar aes 14.30. Ae fin de pedalade, su pal Zoncolan, altris apontaments cu la screade dal monument ae figura dal ‘ciclist scjaladôr' e il rinfresc pai partecipants. I organizadôrs a àn pensât pai atletis cence altris mieçs di fâ rivâ i vistîts pe mude di fin corse intun lûc di pueste.