16 MAGGIO 2007
Family Day: l'assessôr Decorte a Rome
Ancje l'assessôr ae famee Enio Decorte al jere presint al Family day a Rome, come rapresentant de zonte provinciâl di Udin. «Mi sei metût dacuardi cui coleghis pe mê partecipazion par puartâ indevant e condividi cierts valôrs ma cence jessi cuintri a di nissun - al sclarìs l'assessôr - che al à volût pandi la scugne di tornâ a meti la famee tal centri dal sisteme, robe che in ore presint e samee a riscli. Al è just ribati - al à zontât - il rûl di fonde de celule de nestre societât, celule fondade sul matrimoni, che al stabilìs e al sigure precîs dirits e dovês. Il gno jessi a Rome (ancje pe particolâr deleghe che mi è stade dade) al à volût dâ un sburt ae promozion di gnovis politichis a pro de famee, no assistenzialissim, ma intervents complets par che la famee e torni a vê il puest che i spiete, val a dî al centri de atenzion».
Gjestôr unic: fate buine la letare di intents
E je stade firmade a Palaç Belgrât la letare di intents par sistemâ i rapuarts dentri dal gjestôr ugnul, prin pas pe metude in vore dal ent che al à di miorâ, sigurâ e distrigâ la emergjence peade ae cjapade sù e eliminazion dai refudums. Il document al è stât firmât dal president de Provincie di Udin, Marzio Strassoldo, dal president de Comunitât montane de Cjargne, Lino Not e da altris ae presince dal assessôr provinciâl al ambient Fabio Marchetti.
«Cun cheste firme - al à dit Strassoldo - la Provincie e à pandût il so sens di responsabilitât e la sô volontât a volê frontâ realmentri i problemis dal teritori. Cumò - al à zontât - scugnarìn dâsi da fâ par jonzi l'obietîf finâl de scree dal gjestôr ugnul, un dai nestris progjets plui impuartants tal setôr ambientâl». Strassoldo al à po dopo dit graziis a ducj i presints par «vê capît che ducj insieme a si pues inviâ alc di impuartant, bon di dâ rispuestis reâls ai citadins».
Scuele, inviât il Centri servizis scolastics provinciâl
Meti in vore un Centri servizis scolastics provinciâl che al furnissi rispuestis prontis aes dibisugnis dal mont de scuele. Il Centri, sôl tal so gjenar a nivel nazionâl e inviât in mût sperimentâl, al è stât il cûr di un incuintri a Palaç Belgrât jenfri l'assessôr provinciâl ae istruzion Paride Cargnelutti e la rapresentant de direzion centrâl istruzion, culture, sport e pâs, Renza Del Fabbro. In detai, l'apontament, al à permetût, oltri che di confermâ l'infuarciment dal progjet, di stabilî lis liniis di continuitât pal 2007, fondantsi su un studi su pal funzionament des scuelis tes areis di dibisugne, come: la metude in rêt des scuelis, l'inscuelament, il sît internet e la cjapade dentri de scuele dal oblic. « La Provincie di Udin - al à sclarît Cargnelutti - doprant un contribût regjonâl in materie di istruzion e à lavorât dilunc il 2006 metint in vore un progjet che al scolti lis necessitâts des scuelis cjapant dentri ancje i dirigjents scolastics. Une pussibil e pronte rispueste - al à continuât - e sarès la dade dongje di chest centri tignint cont che al ven fûr diretementri des scuelis, al valorize lis risorsis che za si cjatin tai istitûts, la flessibilitât e la rispueste des scuelis».
CUNVIGNE: cemût vinci il cancar
Tornâ a meti al centri il malât, masse voltis dismenteât in programs di curis che a samein fondâsi dome su criteris standarts cence tignî cont de umanitât di ogni singule persone. Fâ cjacarâ i malâts, i lôr familiârs, cui che al sta bataiant cuintri il tumôr e cui che al è rivât a vincilu: chestis lis finalitâts de cunvigne regjonâl di doi dîs che l'onlus Cericot (Centri di ricercjis e studis di cure oncologjichis teritoriâls) al à inmaneât adun cun Federfarma dal FVJ e l'Aiom (Associazion taliane di oncologjie miedie). Achì si è cjacarât soredut di terapiis, pandint lis ultimis scuviertis e lis gnovis sperancis di vuarison, sclarint ancje lis terapiis di jutori che a permetin al malât di reagjî benon aes curis. Un argoment di fonde di chest incuintri al è stât chel dal control dal dolôr, sedi parcè che a rivuarde la regolamentazion ministeriâl de dade fûr des midisinis opiaciis, sedi dal mût di curâ. In chest ultin câs e note la president de Cericot, la oncologhe Simona Liguori: «vuelin rivâ a capî lis dibisugnis e miorâ i modei di assistence. Dal rest une cure triste e nas, dispès, da une maniere falade di comunicâ e da no rivâ a vê un rapuart uman, clâr e onest cui malâts».
COLLINO: il guvier al vûl scancelâ i alpins
«Cuntune sielte discutibil il guvier al à decidût di scancelâ i alpins. Di chest domandarin cont al ministri Parisi». Chest ce che al à dit il senatôr di Aleance nazionâl, Giovanni Collino, membri de comission Difese a Palaç Madama che al à presentât une interogazion su cheste gnove. «La scugne di frenâ la spese publiche decidude dal Ministeri de Difese - al dîs il parlamentâr di An, al à obligât il Stât maiôr dal Esercit a calâ, pai prins doi blocs, i puescj a disposizion pal arolâmint dai volontaris in ferme di un an. De gnove rimodulazion des unitâts, i alpins a son stâts dal dut dismenteâts, a dispiet des tantis domandis».
« In ore presint i alpins - al à marcât Collino - a son une fuarce che si dicern no dome pal pront intervent tes disgraciis naturâls, ma ancje pe professionalitât e la preparazion intes missions tal forest. Par chest, adun a altris senatôrs di An – al à sierât Collino - vin presentât une interogazion dulà che domandin al ministri Parisi ce mendis che al pense di meti in vore su chest cantin, in spiete ancje de finanziarie che vignarà».
Pandût in Basilicade il progjet Musnet
Al è stât presentât tai dîs stâts ai de Comunitât Montane Val D'Agri, in provincie di Potence, "Musnet - Museums in network: il progjet che, cul Setembar dal 2006, al à metût adun la Comunitât Montane de Cjargne, il Progjet Integrât Teritoriâl de localitât lucane e il museu regjonâl di Jicin, in Cecoslovachie. Obietîf dal intervent, che si cjate dentri tal progjet Interreg III C, al è chel di incressi il scambi di esperiencis su pe metude in rêt dai museus piçui e des ativitâts didatichis che a fasin cognossi lis culturis locâls. Ae presentazion al jere ancje l'assessôr ae culture de Comunitât Montane de Cjargne, Marino Corti, che al à marcât cemût che: «Il progjet Musnet al cjape dentri la rêt musiâl Cjargnemuseus impegnade intune iniziative che, in gracie dal sît www.eumusnet.org e di pensadis pes scuelis des trê zonis cjapadis dentri, e je indreçade a promovi la cognossince dal teritori e des sôs usancis tra i zovins, seondant cussì un sens de identitât cussient e viert al scambi».
CJARGNE - Not Blancje in spiete dal Zîr di Italie
A bolin i preparatîfs par stabilî il program de Gnot blancje, che animarà i paîs de Cjargne tor dal Çoncolan, dulà che al rivarà il Zîr di Italie miercus ai 30 di Mai. Si tacarà martars ai 29 di Mai cuant che la Cjargne e si prepararà a dâ il benvignût a ducj i passionâts de 17 tape dal 90 zîr di Italie. Tumieç, Vile, Sudri, Paluce, Ravasclêt, For di Avoltri, Rigulât, Prât e Davâr, il paîs dulà che si previôt che ducj chei che a partecipin a serade a si dedin dongje a mieze gnot cuant che al tacarà un grandiôs spetacul di fûcs artificiâi. Un spetacul che si spere si viodarà ancje l'indoman cuant che i coridôrs a frontaran lis rivis dal Çoncolan.
Impensin che prime dal zîr, ai 20 di Mai, si corarà il "SuperTriathlon Zoncolan ".
RAVASCLÊT- Une mostre sul ciclisim
Biel che in Cjargne si spiete la tape dal Çoncolan e a Davâr si cjate la mostre su Coppi e Bartali, ancje Ravasclêt al loghe une mostre sul mont dal ciclisim. Une mostre fotografiche inmaneade de Gazete dal Sport su pai grancj campions di cheste dissipline. La screade si è davuelzude sabide ai 12 di Mai inte vecje latarie da pôc comedade, tal stes timp de rivade de tape Cosean-Ravasclêt dal 45° Zîr ciclistic de Regjon FVJ, une corse a tapis che si è davuelzude jenfri il 9 e il 13 di Mai. La gare – che si fâs ogni an dilunc lis stradis di dute la regjon – al è un dai moments sportîfs plui impuartants de nestre regjon.
ÇURÇUVINT/SUDRI - inmò polemichis su pe fusion
Tant di une riunion straordenarie dal Consei comunâl di Sudri, dopo che une part de minorance e jere jessude de stanzie, e je stade decidude la metude in vore di un referendum consultîf su pe fusion dai comuns di Sudri e Çurçuvint. Il Comitât "Alternative par Çurçuvint", intun comunicât, al ribat cemût che ai 6 di Avrîl, il sindic di Çurçuvint De Alti, cussient che une part de int no jere dacuardi cu la sô aministrazion, al veve pensât che no si podès lâ indevant sul percors decidût cu la regjon e che si scugnis scoltâ il popul. Dal rest il 55,9 % de int dal paîs e veve domandât propit chest cuntune petizion, presentade ancje al president dal Consei regjonâl Tesini che al veve sigurât il so personâl interessament. In cheste maniere il Comitât al veve volût cjapâ dentri diretementri il Consei regjonâl, par vie che in chel moment il consei comunâl dal paîs nol veve fermât il procediment di fusion. Il Comitât "Alternative par Çurçuvint" jessint che il sindic De Alti nol à inviât la fermade dal iter di fusion, al marche cemût che in chest mût al vebi lassât al sindic di Sudri, Sergio Straulino, la libertât di domandâ ae regjon di fâ un referendum consultîf e di cemût che in cumò la fusion e samei deventâ simpri di plui une vere e proprie anession.
PRÂT – Incuintri cun Marcello Lippi
Martars ai 8 di Mai tal palaçut dal sport dal complès turistic "Fuina" di Prât, l'ex ct de nazionâl di balon campion dal mont, Marcello Lippi, al si è cjatât cui fruts che a fasin part dal progjet "Mateant cui acuilots". Une pensade de Provincie di Udin e dal assessôr al sport Fabio D'Andrea. Tant dal incuintri, Marcello Lippi al à contât ai passe 300 fruts, la sô esperience di om di sport e si è mostrât disponibil a rispuindi aes lôr curiositâts.
Adun cul assessôr provinciâl Fabio D'Andrea a jerin presints ancje il sotsegretari aes politichis zovanîls e ae ativitât sportive, Elidio De Paoli, l'assessor regjonâl Roberto Antonaz e i aministradôrs cjargnei. Il progjet "Mateant cui acuilots" al è indreçât ai setôrs zovanîls dal balon e dal rugby, e al à tant che obietîf chel di insedâ intai zovins une gnove culture sportive, pocant a un svicinament san a chest mont. Un progjet sperimentâl che al cjaparà dentri dutis lis scuaris di pulcins iscritis al torneu inmaneât dal Comitât tumiezin de Figc pal balon e de associazion "Leonorso" di Udin pal rugby, che cun dibot 400 personis, si sierarà jenfri la fin di Avost e il començâ di Setembar tai implants sportîfs a Davâr.
Spetacul teatrâl “Da Cleulis al Brasîl …”
I fruts de Scuele mezane di Paluce a àn inmaneât par vinars ai 18 di Mai aes 11 di buinore un spetacul teatrâl clamât “Da Cleulis al Brasîl… e tornade”, partint da letare di un emigrant e da altris informazions storichis su pe emigrazion de nestre inte Americhe dal Sud a son rivâts a prontâ un teatri che dal sigûr al sarà interessant. La rapresentazion si davuelzarà te Sale San Jacum di Paluce, ducj a son invidâts a cjapâ part.