23 MAGGIO 2007
Dâts fûr i premis dal concors “Jacopo Linussio
Lis scuelis elementârs di Paulâr, Çurçuvint e Trep, la scuele mezane “Matiz” di Paluce e l'Isis “Solari” di Tumieç, a son stadis lis vincidoris de prime edizion dal concors “Jacopo Linussio: gnovis ideis pe nestre mont”, inmaneât da Agemont, la Agjenzie pal disvilup economic, e indreçât ai scuelârs dai comuns montans des provinciis di Udin e Pordenon. La premiazion si è davuelzude ali de Agemont a Damâr ae presince de poete Novella Cantarutti e di Marco Fantoni, president dal Grop Fantoni.
Il concors al jere spartît in trê categoriis, ognidun cuntun argoment specific: “La mont che o volarès” pes scuelis elementârs, “Une mont di ideis” pes scuelis mezanis e “La mont: une oportunitât di imprese?” pai students des superiôrs e de universitât. Il premi totâl al jere di 6000 euros, dâts fûr de Federazion des BCC dal FVJ. Lis classis 5 A e 5 B des elementârs di Paulâr a àn cjapât mil euros, come lis dôs classis di Trep e Çurçuvint.
La 1 e la 2 B de scuele mezane di Paluce sin son siguradis invezit il prin premi di 2000 euros, in gracie al progjet di metude sù di un sît internet www.parsta.it, indreçât a pandi i prodots tipics di Paluce, Sudri, Trep, Çurçuvint e Ravasclêt. Pes scuelis superiôrs e je rivade al prin puest la 4^ trm cjamp tecnic de Isis “Solari” di Tumieç, cuntun progjet di metude in vore di une imprese cooperative pe produzion e vendite di biodiesel e bioetanolo, gjavâts fûr da plantis vueleosis fatis cressi te zone pedemontane de Alte Furlane, a cheste classe a son lâts 2000 euros.
Judiç di Pâs: la comission mont cuintri la fusion
La comission mont de Provincie di Udin e à pandût la sô dissidie ae fusion dal ufici dal Judiç di Pâs di Pontebe cun chel di Glemone. Ancje l'ent di aree vaste in fats, dopo des posizions cjapadis su chest cantin dai Conseis comunâi di Tarvis, Malborghet e Pontebe, al pandarà la sô contrarietât intun ordin de zornade di pueste in Consei provinciâl. In comission, al è intervignût l'assessôr pal disvilup de mont Vittorio Caroli: «No podin plui lassâ che la mont e continui a jessi svalisade di servizis primaris. Dal sigûr nol è chest il mût just par fermâ il bandon di cheste zone. Bisugne protezi i servizis che a son e al è par chest che la Provincie di Udin e je cuintri la fusion dai doi judiçs».
L'ufici di Pontebe al davuelç ogni an passe 200 causis civîls e une disine di controversiis penâls. Il conseîr Lino Not al à marcât cemût che da pôc ai Judiçs di Pâs a sedin stadis dadis sù gnovis competencis, incressint il lavôr in ogni ufici. Une reson di plui par fâ cuintri ae fusion.
Strassoldo: « La Meroi inte storie dal alpinisim»
«Nives Meroi e je jentrade inte storie dal alpinisim». Il president de Provincie di Udin, Marzio Strassoldo, al à pandût grant gust pe gnove de rivade insom al Everest (a cuote 8.848 metris) dal trop che al cjapave dentri la alpiniste tarvisiane (oriunde di Bergamo) e dal so om, Romano Benet. « La Meroi – al à dit Strassoldo – e ingrume dentri di sé cetantis carateristichis de int furlane: come la indurance, il spirt e il gnerf. No si pues che puartâ la braure di cheste femine, rivade al so decim votmil, che e slargje in dut il mont il non dal Friûl». Strassoldo, augurant ae Meroi di rivâ adore biel prest a jonzi la risulte di ducj i 14 votmil dal mont, al à pandût la voie di clamâ a Palaç Belgrât la alpiniste tarvisiane par complimentâsi di persone cun jê, cemût che al è di just. «Pe int furlane – al à sierât – e je causion di orgoi podê vê jenfri lis sôs citadinis une persone tant che cheste».
I segrets di ruedis e muelis dentri intune vuide
Un turisim di elite, ae scuvierte dai piçui e grancj tesaurs che si cjatin tal teritori, chest ce che a sta cirint di incressi la Provincie di Udin e l'assessorât al turisim, che al cjapât dentri intune vuide i percors de aghe, jenfri ruedis e muelis. La publicazion, clamade "Ruedis e muelis. Lûcs e memoriis di aghe e mulins…" e je stade presentade a Palaç Belgrât dal president de Provincie, Marzio Strassoldo e de delegade ae culture, Valeria Grillo. «I percors proponûts da chest libri - e à dit la Grillo - a van daûr aes aghis par tornâ a realtâts dismenteadis ma che a son lis lidrîs de nestre societât e dal paisaç che al è ator di nô». «L'impensâ cheste realtât storiche - al à zontât Strassoldo - si pee ae atualitât cul ûs di energjiis rinovabilis e pe gjestion de aghe tal rispiet dal ambient e de nestre tradizion». Strassoldo al à po dopo marcât cemût che cheste vuide e sedi dome une des tantis che a vignaran, indreçadis a fâ scuvierzi ae int i cjantons plui biei e plui platâts dal nestri Friûl.
Passade dal ambassadôr de Eritree in Provincie
L'ambassadôr de Eritree in Italie, Zemede Tekle, al è rivât a Palaç Belgrât, ricevût dai assessôrs aes relazions internazionâls e aes politichis sociâls, Enio Decorte e Adriano Piuzzi. Une passade, chê dal ambassadôr eritreu, che è si è davuelzude tal stes timp de scree de mostre "Imagjinis de Eritree e devozion mariane intal altiplan", inmaneade tes stanziis dal Circul uficiâi di vie Aquilee, a Udin. Al è stât propit Tekle a inaugurâ la mostre, inmaneade dal Consolât provinciâl di Udin de Federazion dei Maestris dal lavôr di Italie. Argoments de mostre, curade da Domenico Capoduro, a son il paisaç e lis usancis dal Cuar di Afriche, cun grande atenzion aes robis sacris de religjon cristiane copte.
L'ambassadôr, ringraziant Decorte e Piuzzi pe ospitalitât, al à descrit la esposizion tant che «un barcon sul popul eritreu», augurantsi che «in gracie a cheste colaborazion la int de Provincie di Udin a impari a cognossi i costums e lis usancis dal so Paîs».
Secab dentri tal progjet pal eletrodot sot tiere Würmlach-Paluce
Sì de Secab al progjet pe metude in vore di un eletrodot sot tiere jenfri Würmlach e Paluce. La societât cooperative, leader in Cjargne inte produzion e dade fûr di eletricitât, e je in fats jentrade a fâ part de societât Alpe Adria Energy Line Spa di Verone e i furnissarà un toc de sô prime cabine primarie di Paluce, tant che pont di rivade de struture.
«Vin stimât cun atenzion - al sclarìs il president de Secab, Luigi Cortolezzis - il progjet di une struture che a previodès un percors dal dut sot tiere, plui curt e cun mancul tension a pet di chel proponût in altris progjets, e vin pensât che cheste struture e sedi une soluzion juste, buine di sodisfâ lis dibisugnis di energjie de nestre regjon, il rispiet ambientâl e i vincui di sostegnibilitât economiche par une cussì grande iniziative industriâl. In fats, cheste soluzion e permet di meti adun lis necessitâts energjetichis de Italie cu lis disponibilitâts presints in Austrie».
Ae Intherm di Verone il capanon de ex Seima Eletroniche a Vile
Al è stât dât ae dite Intherm di Verone l'edifici di Vile de Comunitât Montane de Cjargne e za sede di chê che e jere la Seima Eletroniche. A uficializâ il fit dal imobil al è stât l'incuintri, davuelzût ai de Comunitât Montane a Tumieç, ae presince dal president dal ent Lino Not e dal aministradôr unic de aziende Daniele Stolfo. Tant de cunvigne e je stade pandude la ativitât che la aziende veronese e insedarà tal paîs, marcant soredut lis oportunitâts ocupazionâls pal teritori cjargnel. L'aministradôr unic di Intherm al à ribatût in fats, la volontât de dite - che a fâs components di scambi termic - di cressi te zone ancje par mieç di pussibii acuardis cu la socie Xchange di Talmassons e la esperience dal personâl e dai piçui furnidôrs cjargnei. A son dibot 40 i gnûfs puescj di lavôr, indreçâts cuasi dal dut ae int de Cjargne, che a saran metûts a disposizion cul inviament de ativitât a Vile».
SUDRI - Fusion cun Çurçuvint, la peraule dal sindic
Il sindic di Sudri, Sergio Straulino, al à pandût il so pinsîr su pe probabil fusion jenfri il so Comun e chel di Çurçuvint. «Sindics e aministradôrs, un pôcs di mês indaûr, si son cjatâts ator di une taule, discutint su cheste pussibil fusion, stimant cheste tant che une sielte juste pe realtât dai doi comuns e une rispueste impuartant ancje par dâ miôr servizis ae popolazion. Dut chest une dade prime che la Regjon e començàs - intun ciert mût - a obleâ lis unions tra comuns. In fin dai fats, za tal 2000, il sindic di Çurçuvint, Dario De Alti, al pandeve ai sindics partecipants ae Union dai Comuns di Çurçuvint, Ravasclêt e Sudri la fusion parcè che, stazant la situazion in prospetive, si rindeve cont za in chê volte de oportunitât di une simil decision. In fats, Çurçuvint e Sudri a àn un teritori omogjeni, da simpri il rapuart al è cussì stret che cheste nus è sameade la vie plui naturâl da cjapâ, intal totâl rispiet des tradizions e usancis des dôs comunitâts, un patrimoni che vin, nô par prins, dut l'interès a tutelâ. A mi mi pâr clâr, magari cussì no, che il "Comitât dal no" al sedi stât metût sù a Çurçuvint plui cuintri il sindic che cuintri la fusion e chest al samee certificât des stomeosis critichis viers di lui. O crôt che il no acuardi cu lis ideis di un altri nol justifichi mai un tâl mût di fâ. No si è capît che lis reâls intenzions di Dario De Alti, che po dopo al è il sindic che plui di chei altris al à dât visibilitât al so paîs, a jerin chês di dâ une gnove pussibilitât al comun. Il grazie al è stât un butâ fûr volantins, in mût disonest e galiot da bande di cui che al lavore tal scûr e al sta platât cence vê nancje il coragjo di firmâ. Saborâ une tematiche di chest gjenar e la buine fede de int nol è un compuartament just di cui che al varès invezit di vê, da citadin e inmò di plui da aministradôr, une vision plui alte par stimâ miôr lis oportunitâts pe so int, massime cuant che chestis a àn une scjadence di timp».
PESARIIS - Nuie telefons nuie celulârs
Tal Dicembar stât, cuntune letare ae Procure de Republiche di Tumieç, la Aministrazion Frazionâl di Pesariis e domandave cun grande presse di vê un segnâl adat su pe linie telefoniche fisse e la cuvierture radio pai celulârs. La letare, mandade par cognossince ancje al Prefet di Udin e ai presidents de Comunitât Montane, Provincie di Udin e Regjon, e marcave i tancj tentatîfs fats ai de Telecom e des istituzions locâls par distrigâ il cantin, ducj dibant. Il president de Aministrazion, Giuseppe Solari, al notave che inte zone dulà che il segnâl al è debul, si cjatin l'Albierc Pradibosc (da pôc metût a puest, ancje cun contribûts regjonâi), il Centri Fondo "Pian di Casa" e il Ripâr De Gasperi. A dut chest si zonte la mancjance di segnâl pai celulârs, che no coventin dome ai turiscj ma ancje a chei che là sù a lavorin tai boscs e che a puedin cjatâsi a frontâ situazions di emergjence cence vê sot man il telefon. Par rispueste la Prefeture e à comunicât di vê visât dal probleme la sede romane e chê regjonâl de Telecom. A dispiet des tantis domandis presentadis e ancje se il probleme nol samee jessi cussì intrigôs da risolvi, in ore presint la situazion no è ancjemò mudade. Il segnâl pal colegament internet al è scjars e la cuvierture pai celulârs dal dut mancjant.