30 MAGGIO 2007
Leader+ : contribûts par gnûfs puescj jet
Plui che buine rispueste dal teritori al bant indreçât a supuartâ i progjets par altris puescj jet: bed & breakfast, fite cjamaris e cjasis pes feriis. Lis domandis presentadis par vê contribûts di jutori a chest pro o pe divierse destinazion da dâ ai edificis, a son di fat stadis il dopli. «Des 25 domandis sin passâts aes 44 di cheste gnove publicazion. Fuart e je stade la rispueste dal teritori - al dîs il president Carlo Toniutti - a marcâ il fat che la dibisugne di incressi la capacitât di acet de zone e je cetant sintude. Un obietîf che al è dentri des politichis di disvilup dal Gal Alps Prealps Juliis. Lis domandis in cumò a si stan stazant e lis graduatoriis a vignaran butadis fûr in Zugn alì dai cuadris pretoris dai comuns interessâts, des Comunitâts montanis e su pal sît de Regjon FVJ. Fin cumò vin finanziât - al sclarìs Toniutti - 249 puescj jet e cun chest bant previodin di podênt finanziâ inmò 200. Lis risorsis publichis a son di passe 200mil euros, dal sigûr une impuartant oportunitât».
Çurçuvint: inviât il Progjet AGRIMONT
Disvilup de agriculture par tutelâ il paisaç montan in gracie dal progjet AGRIMONT (Agriculture Inovative inte aree montane Transfrontalire), pandût tal municipi di Çurçuvint dai sindics des trê localitâts, Dario De Alti, Sergio Straulino e Mirko Brulc, e dal rapresentant dai coltivadôrs direts di Udin Rosanna Clocchiatti, che lu presentave uficialmentri. AGRIMONT al è un progjet sperimentâl, metût in vore adun cul comun sloven di Nova Gorica e finanziât de Union Europeane cun 300mil euros, indreçât al svilup di une filiere pe valorizazion, la conservazion e la produzion des nestris plantis origjinariis e oficinâls in gjenar, cirint di dâ cussì une rispueste al continui distac dal setôr agricul in cheste zone. Cussì i trê sindics: «Nô o crodin intes potenzialitâts di cressite economiche che la produzion e la valorizazion des jerbis oficinâls a puedin furnî deventant pardabon un stimul ae economie locâl e di dut il cjanâl. Il sindic di Çurçuvint al note: «La colaborazion cul comun sloven di Nova Gorica, che al à començât un percors compagn a chel dal gno paîs al è un valôr zontât dal progjet. Cun di plui il lavorâ insieme al comun di Sudri nus permetterà di stimâ miôr i risultâts suntune aree sorecomunâl e la colaborazion cu la Coldiretti e furnissarà cualitât e concretece al progjet».
Provincie: 169 mil euros pes associazions sportivis
La zonte provinciâl di Udin, su propueste dal assessôr al sport, Fabio D'Andrea, al à fat buine la dade fûr di contribûts par 169mil euros a pro des associazions sportivis e ricreativis dal teritori provinciâl, pal davuelziment des lôr manifestazions e ativitâts. La prime tranche di contribûts (dâts fûr de Provincie di Udin cun fonts propris daûr de leç regjonâl 8/2003) e je di 93 mil euros e e cjaparà dentri dut il teritori provinciâl, da Udin a Davâr, da Pontebe a Maian. «Pe spartizion di chescj bêçs - al à sclarît l'assessôr D'Andrea – si son stazâts i programs presentâts des associazions, la lôr capacitât di promovi il teritori, spandi i valôrs dal sport e la capacitât di dâ snait ai setôrs zovanîls».
FUSION SUDRI/ÇURÇUVINT - Incuintri a Triest
La V Comission consiliâr, ae presince dal assessôr aes Risorsis agriculis, naturâls, forestâls e a mont Enzo Marsilio, e à incuintrât i rapresentants dal comitât "Alternative par Çurçuvint" pal cantin de petizion cuintri il progjet di fusion cun Sudri. La maiorance de int di Çurçuvint (406 sui 726 che vevin dirit di votâ) e à pandût il so no ae fusion firmant la petizion. I organizadôrs a àn marcât che la reson di cheste contrarietât e je causionade dal pinsîr che la union dai doi comuns e fasarès nassi un comun piçul, biel che la union dai sîs comuns dal alt cjanâl dal Bût e varès cetant plui sens, par vie che e screarès une entitât locâl di passe 6mil abitants e duncje cun cetante plui fuarce e maiôrs competencis.
Daspò dal struc su pal procediment, il president al à cjapât note che il sindic di Çurçuvint al à dit ae zonte di no volê clamâ dongje il consei comunâl su pe cuistion. La mancjance di une cjapade di posizion formâl da bande di chest orghin, di fat e blocarès il davuelziment dal referendum e l'inviament dal procediment pe fusion. La Comission e à stabilît cussì e, in spiete di altris gnovis, e à decidût di no mandâ la petizion al Consei.
Pandût il program trienâl de Provincie a pro dai disabii
Infuartî il jutori ae domiciliarietât pal superament des situazions di logade dai disabii tes struturis residenziâls e definî un program di trê agns la che lis Provinciis a proponin progjets inovatîfs par valorizâ lis risorsis che a son sul teritori, in acuardi cui plans di zone. Chescj i obietîfs e lis modalitâts stabilidis dal protocol di intese Regjon-Provincie, che si fimaran ca di un pôc, daûr de leç regjonâl 41 dal ‘96. La Provincie di Udin e à za presentât a operadôrs e aministradôrs dal teritori la sô ativitât, che e vignarà metude in vore dilunc i agns 2007-2009. Un program che al à za vût il benstâ de zonte Strassoldo. «Tant dal incuintri a Palaç Belgrât al è stât marcât il rûl di coordenament e di control de Provincie, par jonzi a un plen acuardi su une politiche di setôr che a tigni cont des specificitâts dal teritori». Il program provinciâl e si spartìs in tancj intervents, che a previodin ducj une sperimentazion di modei, che a cjaparan dentri dibot une 80 di personis cun difarents capacitâts, dividudis in grups seont la lôr Aziende sanitarie.
Riforme de normative dal traspuart public locâl
«Sul traspuart public locâl indi è une totâl intese jenfri la Provincie di Udin e la Uiltrasporti». A dîlu al è stat il president Marzio Strassoldo ae cunvigne inmaneade dal sindacât di Palaç Belgrât, clamade “Riforme de leç 20/97 su pal traspuart public locâl” «Sin ducj dacuardi – al à zontât il president – che il sisteme al scuen jessi mudât, ma nol è lant viers il gjestôr ugnul, centralizât e cuntune gjestion aziendalistiche de struture, che i berdeis a saràn distrigâts e a si miorarà il servizi». Strassoldo al à po dopo marcât la scugne che «la Regjon e jessi no dome de gjestion dal TPL, ma ancje de stesse planificazion, tignint par sé dome la responsabilitât di dâ lis direzions gjenerâls e di stabilî i criteris cuantitatîfs e cualitatîfs dulà che i struments di planificazion dai comuns a scuegnaran stâ dentri».
Associazion jenfri lis Provinciis: prin incuintri dal grup di lavôr
A Pordenon si è davuelzude la prime riunion dal grup di lavôr pe scree de Associazion jenfri lis provinciis furlanis. Al apontament e jerin presints i rapresentants di maiorance e minorance dai conseis provinciâi di Udin e Pordenon, e i esperts de Universitât di Udin. Al grup al è stât dât l’assum di prontâ lis azions che a coventin ae istituzion de associazion, biel che il so fin al è za stât fat bon de assemblee udinês dai 16 di Avrîl. «Un document dulà che ducj vin scrit une pagjine impuartant pe storie e pal doman dal Friûl» al à notât il president Marzio Strassoldo tant de riunion, dulà che si cjatave insieme al president dal consei Marco Quai e ai conseîrs Arnaldo Scarabelli , Mauro Steccati e Stefano Teghil. Pe Provincie di Pordenon, oltri al president Elio De Anna, ospit dal incuintri, a son intervignûts il president dal consei provinciâl Antonio Sartori di Borgoricco e i conseîrs Nicola Zille, Annamaria Sarcinelli e Giuseppe Bariviera.
«Cun chest incuintri – al à sierât Strassoldo – inviìn une colaborazion e un coordenament stabil fra i nestris ents pe cressite di dute la comunitât furlane».
Progjet Artesanas: plui ocupazion e produzion
“Progjet artesans: modei di disvilup pal sisteme des impresis artesanis”, iniziative inmaneade dal Ministeri dal Lavôr e metude in vore da Italie lavôr adun cun Confartesanât e Cna, presentade dal assessôr provinciâl Daniele Macorig ai rapresentants di categorie. Il progjet al è indreçât a prudelâ la ocupazion intes ditis artesanis e a dâur un jutori par miorâ la produtivitât. Lis zonis interessadis a cjapin dentri 10 provinciis talianis (in FVJ, chê di Udin). «La nestre zone – al sclarìs Macorig – e je stade segnalade dal Ministeri come une di chês che a cjaparan i jutoris par incressi la ocupazion e la competitivitât des aziendis artesanis. In ore presint al è za butât fûr il bant pes domandis. I setôrs al centri di chestis azions a son la produzion di mobilie e il len, lis barcjis e l’artesanât artistic e tradizionâl».
In struc i numars: lis ditis artesanis a podaran vê un massim di 5 mil euros di contribût par ogni assunzion fisse (bêçs che a calaran se la cjapade sù dal operari e je part-time) e di 3 mil e 500 euros par ducj i aprendiscj cuntun contrat di almancul 36 mês, indreçât ae stabilizazion. Cun di plui altris formis di supuart previodudis dal progjet a son: i contribûts pe inovazion, val a dî par servizis di consulence specialistiche o assistence tecniche. In chescj câs, il contribût al sarà dât a no plui di 50 impresis di ogni zone e nol puedarà passâ i 7 mil e 500 euros par dite.
Cjalderiis a biomassis: de Provincie 180 mil euros
La Provincie di Udin e cîr di incressi il slargjament di implants termics a biomassis. L’ assessôr ae energje Enore Picco in fats al à decidût di meti a disposizion di int (proprietariis, usufrutuariis, aministradôrs o legâi rapresentants di bens imobii che si cjatin in provincie e doprâts come cjasis par stâ), 180 mil euros pe instalazion di cjalderiis. I criteriis pe assegnazion dai contribûts (inte misure dal 40% des spesis) a son stâts sclarîts a Palaç Belgrât a aministradôrs, operadôrs idraulics e int de basse furlane.
«Si cjacare di un progjet – al à dit Picco – pensât par rivalutâ la risorse len, da masse timp lassade da bande e dismenteade. Pensin di finanziâ 30 intervents, mostrant il sparagn che lis biomassis a puedin dâ no dome pe economie ma massime pe energje. Un mût par miorâ ancje l’imagjin dai boscs e la lôr cure». Il progjet, clamât “Font sperimentâl biomassis”, al è indreçât a pandi la risorse len, tant che font energetiche par mieç di un jutori concret ai privâts, cuntun massim di dade fûr di 6 mil euros a implant».
Visin ducj i interessâts che la scjadence pe presentazion des domandis e je stabilide ai 29 di Zugn.
Plui colaborazion jenfri Friûl tal Mont e i Fogolârs
Infuartî il rapuart fra l’Ent Friûl tal Mont e i Fogolârs talians. Chest il fin dal prin incuintri nazionâl dai Fogolârs talian, davuelzût inte sede de Provincie di Udin. Presints il vicepresident vicjari dal Ent, Pierantonio Varutti, i presidents des Provinciis di Udin e Pordenon, Marzio Strassoldo ed Elio De Anna, l’assessôr regjonâl Franco Iacop, la component dal Consei di aministrazion dal Ent, Rita Cancan Del Gallo e il gnûf diretôr, Fabrizio Cigolot.
«Dilunc i doi agns che mi àn viodût a cjâf dal ent Friûl tal mont – al à dit Strassoldo – ai capît i problemis e lis pussibilitâts di disvilup di cheste istituzion. Prin di dut si scugnarà infuartî il leam jenfri l’Ent e i Fogolârs, cjapant dentri ancje i Fogolârs talians, che dispès, proprit parcè che si cjatin in Italie, a son un tic lassâts in bande. Cun di plui a coventarà une politiche pal svecjament dai Fogolârs, cul coinvolziment des gnovis gjenerazions e dai professioniscj. Dome cussì lis struturis e puedaran jessi infuartidis e disvilupadis». Par Strassoldo l’impegn principâl dai Fogolârs al sarà chel di continuâ a stramandâ la identitât furlane ai fîs dai emigrants di seconde e tierce gjenerazion, tignint simpri alt il non de Piçule Patrie».
PALUCE: un fin setemane da gjoldi
Il Comun di Paluce, adun cun la pro Loco di Paluce, chê di Timau-Cleulis, la Associazion Max Art e altris, e àn inmaneât pal prin fin setemane di Zugn, la manifestazion «Culturis, savôrs e profums si cjatin a Paluce». Un apontament unic ae scuvierte dai savôrs tipics de nestre zone. Il program al è siôr di iniziativis a partî da sabide 2: aes 9 di buinore e començaran i cors pe sculture su piere, ali de Sale Sant Nicolau di Paluce, aes 6 sore sere si screarà la stagjon estive pe Torate cuntune mostre di artiscj locâi, si larà po dopo indevant cuntune serade musicâl in place a Paluce cul grup “Banderos”. Te stesse zornade aes 2 daspò misdì a Tamau concors regjonâi dai prodots fats cul lat di cjare.
Domenie 3 simpri in place a Paluce “Mostre mercjât di prodots agro-alimentârs, artesanât e libris”, aes 10 in borc Cente laboratoris didatics pe mularie, aes 11.30 presentazion dal libri “Contis e poesiis” di Jacum Ortis in sale Sant Jacum. Dopo misdì aes 3.30 in place si puedaran viodi la scuele di bal acrobatic “Pivke”, il grup folcloristic sloven “Bovez” e i balerins de scuele “Happy Dance” di Tumieç.
Intant a Tamau, simpri domenie aes 10, si davuelzarà la presentazion de “23° mostre des cjaris”, lis premiazions a saran fatis aes 14 dopo misdì.
Paluce us spiete numerôs.