14 MARZO 2007
Il Tar al refude il ricors cuintri Valeria Grillo
Il Tar dal FVJ al à stimât no acetabil il ricors presentât dai conseîrs provinciâi Aldo Burelli, Cristiano Shaurli e Giordano Menis cuintri la Provincie di Udin (rapresentade dal president Marzio Strassoldo) e la vice president dal Consei Valeria Grillo. Motîf dal cuistionâ, il destinâ ae Grillo deleghis su pes paris oportunitâts, culture e politichis linguistichis. «Viôt - e à dit la Grillo - che ce che al veve di jessi stât subit al sucêt vuê. Dilunc chescj mês, in fats, a dispiet dai problemis peâts ae mancjance di risorsis, ai simpri cirût di lavorâ pal benstâ de comunitât provinciâl cun gnerf e buine voie, cumbinant, dispès cun sacrificis, l'impegn in Provincie cun chel de dite la chi lavori ogni dì. L'interès pe decision dal Tar, scuen dî, al jere stât da me lassât da bande par concentrâmi dome su pe metude in vore des deleghis che mi son stadis dadis. Par chest, cun dut che al jere il ricors de oposizion - e à zontât - ai continuât a lavorâ cun passion, dantmi da fâ par chei che mi àn elet». «Colpe di chest ricors inacetabil e cence fonde - al à notât Strassoldo - la aministrazion provinciâl, par vuardeâ il so lavôr, e à scugnût paiâ cualchi miâr di euros, doprant bêçs che podevin jessi impleâts a pro de Provincie e de int. Par chest mutîf - al à sierât - pensin di segnalâ il fat ae Cort dai Conts».
Provincie, Prefeture e categoriis, acuardi pai lavoradôrs forescj
Udin e è la prime Provincie dal FVJ a vê firmât il Protocol di intese cun Prefeture e categoriis par gjestî miôr i timps preparatoriis ae dade fûr dai permès di lavôr par citadins extra comunitaris. La firme fate in Prefeture, ae presince dal vice prefet vicjari Francesco Palazzolo e dal assessôr al lavôr di palaç Belgrât Daniele Macorig, adun cui rapresentants des categoriis interessadis al document. Daspò de firme dal protocol nazionâl ai 6 di Dicembar stât e regjonâl miercus ai 28 di Fevrâr, la convenzion e è cumò in vore ancje tal teritori de Provincie di Udin. «In spiete che al seti inviât ancje in FVJ il Sportel ugnul pe imigrazion, al è un pas impuartant - al à notât l'assessôr Macorig – parcè che al è un mût par scurtâ i timps des proceduris di istrutorie, che la Provincie (che dal 2002 e à la competence pal lavôr), si è cjatade devant, massime dopo che il Guvier al à cetant cressût lis cuotis dal decret "flussi". Une cressince che, al è clâr, e à vût grandis colpis te sprolungjâ i timps des pratichis e che cun chest acuardi sperin pardabon di scurtâ, soredut pai lavoradôrs stagjonâi che a àn presse di insedâsi tes localitâts turistichis e inte agricolture».
Pantianins: cors pai produtôrs di mêi
Cjapâ sù gnovis competencis pe vendite di mêi intun marcjât simpri plui larc. Chest un dai obietîf dal progjet italo austriac "Mêi cence confins", finanziât de Union Europeane, dal Ministeri des Financis, de Regjon e de Provincie di Udin. E par rivâ a meti in vore chest obietîf, in curt al començarà un percors di inzornament pai produtôrs di mei e lôr derivâts. Il cors al previôt dôs dadis: la prime part e è indreçade al savôr dai derivâts e al marketing dal mêl. La seconde, che si davuelzarà chest autun e è invezit indreçade ai mûts di produzion dai melârs e de sôs pomis, ae fiscalitât des ditis agriculis e ai contribûts che si puedin domandâ. Si è tacât lunis ai 12 di Març cul incuintri di scree ae presince dal assessôr ae agriculture de Provincie di Udin, Mario Strazzolini.
«Nol è avonde produsi aliments bogns e gjenuins - al sclaris l'assessôr - nd'è dibisugne ancje di savêju promovi benon. Par chest vin inmaneât chescj cors informatîfs, i prins te nestre regjon. I argoments dai cors son stâts stabilîts lant daûr aes dibisugnis pandudis dai produtôrs».
Consei, fate buine la conformazion in house de Cafc
E è stade fate buine ae unanimitât de assemblee di palaç Belgrât la delibere su pal adeguament di Cafc Spa al model societari "in house", indreçât ae gjestion in mût dret dai servizis de aghe in 72 comuns de provincie di Udin, document za al centri des comissions provinciâls Ambient e Belanç. Cheste e è stade une des delibaris plui impuartants dal plan di vore de ultime sentade, tacade cun 6 interpelancis di cuestion time e sierade cun altris 7 ordins de zornade dai 20 alegâts al belanç di prevision 2007.
Un consei "speciâl" chest, dulà che al jere presint ancje un grup di zovins scuelârs dal Liceu "Dante Alighieri" di San Pietroburgo, fruts che studin trê lenghis forestis e jenfri chestis il talian. Ae plui zovine dal grup al è tocjât sclarî cemût che al funzione chest cors di studis che si cjate te citât russe. Une scuele che da 40 agns e insegne l'italian e dulà che, come che al à dit l'assessôr ae istruzion Paride Cargnelutti, «al si cjate fintramai un club di "passionâts de Italie", che al studie in sot la nestre culture, la nestre storie e la vite dal nestri Paîs». Il benvignût al è stât ferbint da bande di dute la assemblee, cui intervents di Marco Quai, Ermilio Taverna e dal president Marzio Strassoldo, che al à marcât la «vocazion de Provincie di Udin, pe sô posizion e la sô tradizion sociâl, a inlaçâ leams cu lis comunitâts di altris Paîs».
Zanin: "Compart ugnul, faliment de zonte Illy"
Il cjâf grup provinciâl di Forza Italia al cjape la paraule su pai ricors presentâts dai dipendents regjonâi: «Il fat che un dipendent regjonâl su sîs al presenti ricors cuintri il Compart ugnul al pant dal sigûr la malfidence inviers la gjestion dal personâl da bande de zonte Illy». Cussì duncje Piero Mauro Zanin, che al marche cemût che «chest al seti il segnâl di doi problemis. Val a dî che il mût di gjestî il compart ugnul, al à: seti creât insigurece ai dipendents regjonâi (scontents parcè che la lôr situazion no è stade frontade in maniere serie e juste); seti problemis ai dipendents dai ents locâi che a viodin tant che un pericul il ricors presentât dai coleghis regjonâi e a sintin simpri di plui che il doman nol è sigurât. Un altri flop, duncje, par une zonte regjonâl e il so president che, oltri a cjacaris, no è rivade a centrâ il cûr di un cantin di prionte tant che chel dal personâl».
Lis listis civichis e sburtin lis feminis inte politiche
Lis listis civichis e sburtin lis feminis inte politiche: chest il risultât che al ven fûr des rispuestis dadis des aministradoris comunâls de provincie di Udin, in gracie di un cuestionari butât fûr de universitât e inmaneât de delegade aes paris oportunitâts Valeria Grillo
Lis feminis e jentrin in politiche massime par mieç des listis civichis indipendents pitost che dal poc dai partîts politics. Dome il 0,9% al è sindic, ma dibot il 45% al è assessôr. Chestis lis risultis des domandis preparadis da Marco Cucchini, docent de Universitât di Udin, par cont dal assessorat provinciâl aes paris oportunitâts. Feminis che e àn une istruzion alte e a son zovinis, jenfri i 30 e i 45 agns, e pal 90% e lavorin, une percentuâl dople a pet de medie nazionâl. Il cuestionari al è stât mandât a 432 aministradoris comunâls eletis in dut il teritori provinciâl e lis rispuestis tornadis indaûr e son stadis 111, un risultât bon midiant che il timp par rispuindi al jere dome di un mês, tra Otubar e Novembar dal an passât». Cinc i argoments di fonde spartîts in 21 domandis: background socio culturâl; reclutament politic; ativitât in Consei comunâl; valutazion des politichis di paris oportunitâts e pinsîrs finâi. «La maniere juste - e siere la Grillo - al sarès mudâ chest sisteme. Ancje si mi sint di unîmi aes coleghis che par passe il 40% e pensin che pe rapresentance in politiche a vali la competence e no il gjenar».
Sotscrite la convenzion jenfri la Comunitât montane de Cjargne e l'Inps
La int de Cjargne e podarà fra pôc vê gnûfs servizis tal cjamp de previdence sociâl, che vignaran inviâts in gracie ae convenzion firmade tai dîs stâts a Udin da Lino Not, president de Comunitât Montane e Biagio Giaccone, diretôr provinciâl de Inps ae presince dal assessôr regjonâl Enzo Marsilio e di Graziella Brusin Gorlato, president dal Comitât regjonâl Inps. Il document al met in vore un progjet di intervent pal disvilup di unions tra l'Inps e i Comuns cjargnei cul fin di incressi e miorâ i servizis. Jenfri i obietîfs al è chel di peâ adun, a mieç informatic, i uficis pal scambi e la condivision di documents, la union des anagrafis comunâls cul l'archivi anagrafic de Inps, l'inzornament continuât des situazions anagrafichis e il jutori ai Comuns par inviâ i procediments telematics necessaris e la butade fûr des informazions sui mûts di vierzidure e di ûs dai "Punti Cliente" tai Comuns. Tramite chescj, in fats, la int a podarà vê i estrats contributîfs, il doplon dal model Cud e ObisM (certificât di pension), oltri che controlâ il paiament des prestazions e vê informazions sul iter des domandis che si cjatin aì dal Inps.
Provincie, cruzis pal compart len
Al pant pinsîr l'assessôr al lavôr e aes ativitâts produtivis de Provincie di Udin, Daniele Macorig, «par ce che al è da pôc sucedût, ven a stâ che cualchi imprendidôr dal setôr dal len al è stât indagât. Rispietant lis iniziativis inmaneadis de Procure – al à notât Macorig – il messaç che vulin dâ aes 9 ditis al è chel da solidarietât, ma ancje ansietât, oltri che pai imprendidôrs e lis lôr fameis, ancje pai dipendents, midiant che tantis di chestis aziendis a àn scugnût fermâ la ativitât pal secuestri dai implants». L'assessôr cun di plui al à continuât «al è un provediment che al samee fat su pe fonde di denuncis incrosadis, denuncis che no puartin nue di ben ma a ruvinin ducj». E al à volût cjapâ dentri ancje «il president de gnove Asdi Angelo Speranza e l'assessôr di Manzan Fabrizio Bottacin cun cui, passânt pal Catas e lis associazions di categorie, inviarin la setemane che e ven un incuintri cui imprendidôrs cjapâts dentri, par furnîur sostegn, lâ plui in sot e pensâ sore su lis problematichis ambientâls contestadis».
Lis tecnologiis al servizi dai Fogolars e de viabilitât
Si è inviade plan plan la colaborazion jenfri Agemont - Autovie Venetis e l' Ente Friûl tal mont. A meti in vore il percors e è stade la passade dal onorevul Giorgio Santuz al Cit (centri di inovazion tecnologjche) di Agemont, inte sô dople nature di president di Autoviis Venetis e dal Ent Friûl tal mont.
“Cheste visite e fonde il preambul par une zovevul colaborazion – al à dit Santuz – metint adun Agemont che e promôf l'ûs di une tecnologje multimediâl, e l' Ent chi pensi di modernâ, a puedin nassi pensadis e voris indreçadis a dâ snait e inmaneâ leams culturâi e economics cui Fogolârs Furlans tal mont. Ai intenzion di modernâ l'Ent par mieç di riformis programatichis e organizativis che a lassino che la strutture e seti, in maniere complete e zovevul, strument di union de furlanetât e dai furlans sparniçâts tal mont cu la nestre Piçule Patrie. E, in chest câs – al à sierât – lis tecnologjis e puedin davuelzi un rûl impuartant”.