28 MARZO 2007
Paulâr: paris e maris a difindin la scuele
Bielzà da Setembar dut il paîs di Paulâr a si è dât da fâ par parâ la sô scuele. Il continui cambi di maestris che al va indevant da agns, al sta - magari cussì no - scombussulant no pôc i scuelârs che par chest mutîf a àn plui indevant problemis tal frontâ il prin an di superiôrs a Tumieç. Mancjance di continuitât intal insegnament, chest il mâl de scuele di Paulâr e par chest mutîf a si è inviade la proteste che, a no vûl jessi cuintri i insegnants, ma un mût par fâsi scoltâ des istituzions. And'è scuelârs che in nancje doi agns a àn cambiât 6 maestris di matematiche e 2 di italian, mudaments fûr di ogni gracie pal preside D'Avolio, i gjenitôrs e il siôr santul don Tita. Paulâr nol met in discussion lis capacitâts dai singui professôrs che a àn decidût di restâ cidins in cheste cuestion restant in aule a fâ lezion ai doi fruts che no àn volût partecipâ ae iniziative e a àn marcât sul regjistri lis assencis, ancje se il preside al à dit di justificâiu di persone. I dusinte scuelârs des elementârs e des mezanis a si son spartîts in trê grups, i plui grancj a àn partecipât a un cineforum, i plui piçui a àn scoltât la lezion di une vuardie forestâl, biel che chei altris a son lâts in municipi par une lezion di educazion civiche fate dal sindic Vuerli. Ae fin, intal auditorium, gjenitôrs e fruts a àn incuintrât il vescul Brollo che al à ribatût il supuart totâl de Glesie. Se in curt a no rivaran rispuestis in Cjanâl d'Incarojo la int e je pronte a tornâ a meti in vore la autogjestion, un fat chest che al puedarà slargjâsi in dute la Cjargne.ENEMONÇ - Slacs dal teren in amplis areis
In cetantis zonis dal comun di Enemonç periodichementri il teren al slache, a front che, in tantis parts de plane, a sedi declarât improibît costruî propit par chest riscli. A marcâlu, intune interogazion, al è stât il conseîr regjonâl Paolo Ciani che al à zontât: «intai ultins timps a si è podût viodi une incressite tal savoltament dal teren intune aree che e cjape dentri dibot dute la frazion di Cuiniis e dal scandai des robis ruvinadis a si pues pensâ che il lâ insot dal teren al ledi cjapant dentri une zone simpri plui largje, sedi viers mont che a val. Un prin studi nol à puartât a risultis definitivis parcè che a tocje la divignince dal fenomen, la sô evoluzion e tant mancul parcè che a rivuarde il sisteme da doprâ par fermâlu o almancul intervegni. «Il scjars aprofondiment dal studi e duncje la mancjance di dâts che a sedin sigûrs - al à zontât il conseîr di AN – a àn lassât in pîts une situazion che pardabon e podarès deventâ pericolose sedi pes costruzions ma ancje pe int che a sta dentri. Lis ricercjis e i studis a son stâts fermâts e a no si è vût nissune novitât dai risultâts da bande dai uficis de Protezion civîl e dal Universitât di Triest». Stant chest, Ciani al vûl savê de Zonte ce che a intint fâ par cjatâ une soluzion prime che a sucedi alc di grâf e al domande la evacuazion di dute la zone e ancje la interuzion de strade statâl 52.
DAMÂR – Cunvigne ae Agemont su pal albierc difondût
Un dai imprescj pal disvilup de mont al è il turisim. In chest setôr a si scuen pontâ su pe esperience dal albierc slargjât che in Cjargne e sta vint une buine risulte da bande dai visitadôrs e che, dal sigûr, e seguìs lis gnovis tendencis dal turisim internazionâl, cetant leât ai aspiets ambientâi e culturâi dal teritori.Di "Albierc difondût, rispiet dal ambient e pe culture" a si è cjacarât a Damâr davuelzût aì dal Agemont inte cunvigne inmaneade de Regjon e dulà che al è rivât ancje il salût dal president Illy. I diviers intervents a son stâts indrodusûts dal assessôr regjonâl Enrico Bertossi, che al è intervegnût cul argoment “Albierc diffondût: esperiencis e prospetivis"; po dopo al è lât indevant il diretôr dal "Turisim FVJ", Josep Ejarque, che a si è fermât sul teme comercializzazion e promozion. Intervents specifics su altris aspiets di cheste esperience che de mont e pues jessi passade ancje in altris zonis, a son stâts pandûts da Maurizio Droli, coordinadôr didatic de Scuele di specializazion su chest gjenar di albierc, Roberto Marin, sindic di Grât, Adriano Corao, de Direzion centrâl relazions internazionâls e autonomis locâls. Po dopo Emanuela Blancuzzi, diretôr Servizi pe mont, e Stefano Lucchini, president nazionâl “Borcs vêrs”, a àn sclarît altris ponts di fonde de cuestion. A finî la cunvigne l'intervent dal assessôr regjonâl Enzo Marsilio, che al à marcât "Lis resons di une sfide".
MONT - Fibre otiche, butât fûr il bant
Al è stât butât fûr sul Boletin Uficiâl de Regjon il bant par fâ rivâ ancje tai comuns montans la tecnologjie des fibris otichis. Cheste la comunicazion di Mercurio Fvj, la societât al 97% controlade de Regjon e da Insiel. La aziende, indreçade a puartâ la fibre otiche il plui pussibil dongje al client finâl, e à presentât a Vençon il progjet pe bande largje in ducj i 75 comuns cjapâts dentri des 4 Comunitâts Montanis regjonâls. La pensade e jere stade anticipade il 19 Fevrâr stât a Vile Manin, e la Comunitât montane dal Glemonês, Cjanâl dal Fier - Valcjanâl e je stade il prin ent a podêle presentâ sul so teritori. Un centenâr i aministradôrs dai 15 comuns interessâts che a jerin presints al sclariment dal progjet, pandût dal President e Aministradôr delegât de Mercurio Fvj, Giovanni Pittino, e da Fabio Del Torre, responsabil di Network Operation intal ambît de stesse societât. Il program studiât da Mercurio pe mont furlane al previôt une prime dade di sperimentazion di sù par jù doi agns, dulà che par sveltî il slargjament de bande largje intes areis plui discomudis, al si è pensât di doprâ colegaments satelitârs bidirezionâi e tecnologjiis radio di difusion wireless. Par meti in vore dut chest, e sarà prontade une antene sul municipi di ogni comun, ma e je la pussibilitât che 'nt vegni metude une ancje suntun altri edifici. Daspò de publicazion dal bant, in Zugn di chest an, al sarà nomenât il vincidôr. La gnove tecnologjie a no coventarà dome aes aministrazions publichis, ma e podarà jessi zovevul ancje pai privâts. Dentri di Lui e si tacarà cu la instalazion in ogni comun, un procediment che al scugnarès finî tal mês di Setembar, cuant che a si tacaran ancje i colautis.DARTE - Cunvigne “La vie de lavande”
A Darte si è davuelzude, intal Palaç Savoie, la cunvigne internazionâl "La lavande di mont. Lis sôs potenzialitâts partint de culture fin al so ûs intal setôr dal benstâ". Il program al è començât cuntun rinfresc a base di lavande; il benvignût aes autoritâts da bande dal prin citadin di Darte, Giovanni Battista Somma, Guido Della Schiava, assessôr al turisim di Darte e Paola Toso, president de associazion "Lavande di Vençon"; po dopo a àn cjacarât Francesco Danuso, Romano Giovanardi e Lanfranco Conte dal Dipartiment di siencis agrariis e ambientâls de Universitât dai studis di Udin che a àn esplicât l'argoment "Ûs des rêts neurâls pe valutazion dai scambis jenfri ambient e produzion de lavande"; si è dopo lâts indevant cui intervents di Carla Da Porto, dal Dipartiment di siencis dai aliments de Universitât di Udin e Ireneo Kikic dal Dipartiment di inzegnerie chimiche dal ambient de Universitât di Triest che a àn pandût il teme "Tecnologjiis inte tramude de lavande"; e inmò Roberto Della Loggia e Aurelia Tubaro de Universitât di Triest, dipartiment dai materiâi e des risorsis naturâls, cul teme "Lavande e benstâ", al fin Albert Brugger, cul argoment "La fuarce des Alps. La esperience sul ûs dal prodot alpin", biel che Klaus Weiermaik, dal Universitât di Innsbruck, al à frontât "Il disvilup dai prodots tal setôr dal benstâ"; Thomas Bausch, de Universitât di Monaco al à cjacarât dai "I profîi professionâi pal setôr dal bonvivi intes Alps e propueste dal modul di formazion Alpine Beauty".
Al fin une cerce enogastronomiche ae lavande a è stade preparade tal albierc Salon. Tant de cunvigne a si è podût domandâ informazions e vê materiâl par capî cemût jentrâ tal mont viole de lavande magari zontantsi ae associazion di Vençon.
La Provincie e insegne l'e-government ai ents locâi
La Provincie di Udin e à decidût di meti a disposizion dai ents locâi la sô esperience parcè che a rivuarde l'e-government. Dopo vê inmaneât tal Zenâr dal 2005, un sisteme digjitâl pe gjestion dai documents (Iride), cumò e à sotscrit un protocol di intese cu la Comunitât montane de Cjargne e la Comunitât Culinâr par judâ la metude in vore dal e-government ancje in chestis struturis. «In chescj doi agns - al à sclarît l'assessôr provinciâl ae informatiche, Enore Picco - sin rivâts a archiviâ passe 200 mil documents, metint in rêt 500 utents che a lavorin in 20 puescj difarents sparniçadis sul teritori provinciâl. Vin cjapât sù - al à zontât - esperience, ancje in gracie di un implant hardware sodât e de professionalitât dei dipendents. Ve parcè che vuelin metisi a disposizion dai ents locâi par judâju in chest procediment di digjitalizazion, scjampantju dal fâ i nestris sbaliis». La Provincie di Udin e je stade la prime istituzion in Regjon a vê un sisteme informatic pe gjestion dai documents. «No vuelin imponi un ciert software impen di un altri - al à continuât Picco - ma dome sclarî ce che a vûl dî doprâ intun ent public l'e-government. Tant che ent di aree vaste si metin al servizi des istituzions par furnîur un supuart in chest procediment che, cemût che previôt la leç, al è aromai di oblic». Intun doman no masse lontan duncje, i ents teritoriâi e la int a podaran comunicâ tra di lôr passantsi informazions e documents par mieç dal computer.
OSÔF - 800 mil euros pe sigurece
Il comun di Osôf al spindarà passe 800mil euros pe sigurece. In program and'è in fats une impegnative schirie di intervents che a rivuardaran sedi il teritori che i edificis publics. «Ancje su sugjeriment dal nestri tecnic - al à sclarît l'assessôr Lucio Feregotto - vin lumât des precedencis e cumò stin inviant i cantîrs par metilis in vore. Jenfri chestis a àn massime impuartance la metude in sigurece de zone doncje dal Tiliment e di vie Batterie, strade di colegament tra il centri dal paîs e il parc dal Rivellino. Parcè che a rivuarde il Tiliment, in progjet a son l'infuarciment e la tornade a fâ sù de scoiere di claps metude a val dal puint di Braulins, di mût di protezi la frazion di Pineta da pussibilis montanis. Il cost dai lavôrs al è tor ai 361mil euros e je za stade inviade la cernite dai concorints pe gare di apalt. Invezit parcè che rivuarde vie Batterie, vuelin meti a puest il toc a soreli jevât dal Cjistiel. I bêçs che a coventin (320mil euros) a son stâts dâts fûr de Protezion civîl. In cumò si sta davuelzint la gare pe dade sù de progjetazion gjenerâl e de direzion dai lavôrs. In sumis chescj i lavôrs principâi che, dut câs, a son adun cun altris plui piçui. In fins - al siere l'assessôr Feregotto - vin previodût une spese di 20 mil euros par seguî lis normis de leç 626 dal ' 94 in teme di infortunis e di sigurece sul puest di lavôr».
PRAMÔS: Memorial "Mauro Fogli"
Une cincuantine di passionâts dal schi alpinisim si è dât dongje domenie stade ai 25 di Març, in Promôs par une gare inmaneade de Cooperative Gampspitz – Laghets di Tamau, avodade al Sest aniversari de tragjiche muart dal alpinist Mauro Fogli su pal Crostis. Il percors al jere tor i 7 chilometris e la competizion e à viodût al prin puest Daniel Seletto seguît da Bubisutti e De Franceschi.
E ancje se al è passât un pôc di timp al samee di just segnalâ e dâ merit ai biei risultâts vûts dai nestris atletis cjargnei de scuele Isis Solari ai mondiâi studentescj di schi che a si son davuelzûts in Andore. La scuare, che cjapave dentri Alessandro Pittin, Micheal Galassi, Gabriele Primus, Alex Bellina e Paolo Puntel, e je rivade cuinte. Jenfri chescj, ai 10 di Març stât, Gabriele Primus de Polisportive “Timau-Cleulis” al rivât sest te 7,5 chilometris dai “Campionâts talians arlêfs”. E inmò sabide 24, ai campionâts talians di Freestyle a Airolo in Svuizare Giacomo Matiz pe Aldo Moro al à vint la medae daur inte specialitât, secont Claudio Bosia.