7 MARZO 2007
Versace: «Artesanât locâl di ecelence, stimul pe economie»
Valorizâ l'art e la tradizion dal ricam furlan a po jessi il mieç just par che l'artesanât di ecelence de nestre tiere al deventi il stimul pal marcjât e il turisim locâl. Chest il pinsîr pandût da Santo Versace, ospit al incuintri fat inte sale zonte di Palaç Belgrât, inmaneât de delegade ae culture Valeria Grillo e dulà che a erin presints i rapresentants di dutis lis categoriis economichis. «Vin volût presentâ prime de ore i argoments de Cunvigne che si davuelzarà dentri de "Fiere rose" - a à sclarît la Grillo, adun al president Marzio Strassoldo - sin sigûrs in fats che la valorizazion dal nestri artesanât di cualitât a seti l'esempli just di cemût che la culture a puedi, e a scugni, dâ simpri di plui il sburt ae economie dal nestri teritori. Par chest motîf vin proponût un protocol di intese, propit par impegnâsi ducj insieme a cjapâ chest impuartant obietîf».
Tierce edizion di "Dopomisdîs di animazion in biblioteche"
Tal 2006 al à cjapât dentri 300 fruts de Cjargne e chest an al ponte a slargjâ inmò di plui la sô sfere di azion. Si cjacare dal progjet "Dopomisdîs di animazion in biblioteche", inmaneât da CjargneMuseus, il circuit musiâl atîf dentri de Comunitât montane de Cjargne, che al tacarà sabide ai 10 di Març aì de biblioteche di Preon. Rivât ae sô tierce edizion, la pensade culturâl e previôt la metude in vore di laboratoris didatics e dadis di leturis animadis par fruts des scuelis elementârs, che si fasaran fintramai al mes di Avrîl intes bibliotechis comunâls di Damâr, Dimpeç, Denemonç, Paulâr, Paluce, Prât, Preon, Ravasclêt, Trep, Verzegnis e Vile. Lis ativitâts a includin leture animade e sperimentazion cun voris manuâls e lavôrs artistics lassant libar di sbrocâ in chest mût l'estri dai fruts. L'ultin apontament si davuelzarà a Damâr martars ai 24 di Avrîl. Par vê plui informazion si pues clamâ l'ufici di CjargneMuseus al numar 0433/487779.
Provincie, Prefeture e categoriis: acuardi pai lavoradôrs forescj
Udin e è la prime Provincie dal FVJ a vê sotscrit il protocol di acuardi cu la Prefeture e lis categoriis par gjestî miôr che a si pues lis dadis preparadoriis ae dade fûr des permissions di lavôr par operaris forescj. La firme e è stade fate in Prefeture, devant dal vice prefet vicjari Francesco Palazzolo e dal assessôr al lavôr di Palaç Belgrât Daniele Macorig, oltri naturalmentri ai rapresentants des categoriis cjapadis dentri dal document. Daspò de firme dal protocol nazionâl ai 6 di Dicembar stât e regjonâl miercus ai 28 di Fevrâr, il pat al è cumò in vore ancje inte provincie di Udin. «In spiete che al seti inviât ancje in FVJ il sportel ugnul pe imigrazion, al è un pas impuartant - al à notât l'assessôr Macorig - parcè che al è il prin at par scurtâ i procediments di istrutorie che la provincie (che dal 2002 e à in man la competence dal lavôr) si è cjatade devant massime dopo che il guvier l'an passat al à triplicât lis cuotis cul decret "flus". Un incressiment che, al è clâr, al à vût un grum di pês su pai timps dai cartolaments e che cun chest acuardi cirin di strenzi. In ore presint, firmât il document gjenerâl di intents, si larà indevant cun altris acuardis cun dutis lis categoriis, par sclarî i detais de part operative».
Manzan: gnove coriere pai fruts des scuelis
La gnove coriere e è stade screade uficialmentri devant des scuelis mezanis, ae presince dai assessôrs provinciâi Renato Carlantoni e Daniele Macorig, dal vice sindic Lidia Driutti e dal assessôr comunâl ae istruzion Angela Della Rovere, adun cun ducj i scuelârs, ae diretore dal istitût e al siôr santul Elio Romanutti, pe benedizion. «La coriere - al à dit Carlantoni - al un dai mûts doprâts de provincie par dâ un jutori ai comuns, prudelantju intune grande spese, tant che cheste, par miorâ i servizis a pro dai students e de lôr sigurece. Chel di Manzan, magari cussì no, al sarà un dai ultins nestris intervents, parcè che la regjon - al à cuistionât Carlantoni - a no nus da plui i bêçs indreçâts a chest. In fats par podê judâ un comun a cambiâ la vecje coriere, la provincie a scugnût butâ fûr bêçs siei. La pierdite dai finanziaments regjonâi al è un grâf tai che al larà a pesâ cetant sul teritori e su chei che, cun reson, a volaressin fâ lâ i lôr fîs a scuele in plene sigurece». Stes pinsîr pandût da Macorig, che cun di plui al à impensât che «il sfuarç economic al è stât grant: metint adun Provincie e Comun a si è podût comprâ un bus di 210 mil euros, cun 63 puescj».
Cjamps eletromagnetics, Marchetti a Rome
L'esperience de Provincie di Udin intal setôr de informazion e dai studis sui cjamps eletromagnetics al è stât il cûr dal intervent dal assessôr al ambient Fabio Marchetti, ae Cunvigne inmaneade a Rome de Fondazion Ugo Bordoni e de Isimm (Istitût pal studi de inovazion tai media e pe multimedialitât) dulà che al jere presint ancje il Sotsegretari aes Comunicazions Giorgio Calò. Marchetti al è stât ospit al impuartant apontament inta capitâl, par sclarî i progjets puartâts indevant in chest setôr de provincie, che l'an passât e à firmât un protocol cul Consorzi Elettra 2000 par dâ supuart a 137 Comuns dal teritori sul studi de relazion che e je jenfri implants di telefons celulârs e ambient, seti dal pont di viste tecnic che di comunicazion ae int; un Protocol cjapât sù po dopo ancje de union des provinciis talianis (Upi). Ae cunvigne a Rome si è fevelât ancje di scandaiadis dai cjamps eletromagnetics e in detai de esperience dal nestri Paîs a pet di altris europeans o mancul, scandais che son la fonde pe pupilance dal ambient e de int.
Tisane, acuardi su pal traspuart scolastic
Un incuintri jenfri la Saf e lis scuelis di Tisane, adun cui Comuns de zone e de Provincie, par rangjâ, a partî dal an che al vignarà, i oraris des corieris pes scuelis tor Tisane inte Basse furlane. Cun chest acuardi si è sierât l'incuintri, dât dongje in municipi dal assessôr comunâl Maddalena Spagnolo, par viodi cemût mendâ i discomuts dal traspuarts pes scuelis, val a dî, par strapassâ chel sminuçâmint di oraris inte rivade e jessude di scuele dai students che rivin di ogni bande de Basse e cirî di scjampâ lis tornadis (i famôs "rientri"). Al incuintri, adun cui rapresentants dai comuns interessâts (Tisane, Lignan, Palaçûl, Pricinins, Cjamin e Roncjis) e jerin presints ancje l'assessôr provinciâl Renato Carlantoni, i delegâts de Saf, e chei dal Isis di Tisane. «Dal sigûr nol è facil rivâ a fâ cuadrâ lis esigjencis di ducj, massime tal cjamp dai traspuarts, la che la rêt e scuen jessi peade, e a si scuen tignî cont di tancj fatôrs - al à notât Carlantoni - ma cu la buine volontât di cjatâ une soluzion pandude dai partecipants, sei sigûr che podarìn cjatâ buinis rispuestis. Sin dacuardi cui rapresentants de scuele che un traspuart cun oraris plui precîs a podi garantî une incressite dal istitût e duncje un disvilup di dut il centri e dal teritori. Par chest motîf vin clamât dutis lis istituzions a dânus conseis bogns par meti adun e cumplî il Plan provinciâl de mobilitât, chi stin regolant in cheste dade: vuelin che al deventi l'imprest di union di dutis lis domandis dal teritori, par podê meti in vore un sisteme di traspuarts zovevul che al rispuindi ai dibisugnis de int. Il Plan al sarà presentât a regjon par marcâ cetant che al è impuartant che la provincie e seti coordenadore des esigjencis dal teritori. «Une competence che però, cul gnûf bant - al à sierât Carlantoni - la regjon nus gjavarà par incentrâ dute la strutture».
Çurçuvint - "Nêfdifarent" cun Legambiente
Un studi jessût da pôc da OCSE, l´Organizazion pe Cooperazion e il Svilup Economic in Europe: "I mudaments climatics su pes Alps: adatament dal turisim invernâl e gjestion dai pericui naturâi", al dîs che par ogni grât di temperadure in plui il confin dal neveâmint al va plui in sù di 150 metris. Duncje, intes localitâts turistichis talianis, cuntune cressince de temperadure di 2 grâts, dentri dal 2050 la linie de nêf a larà in sù di 300 metris e 'nt sarà il 68% di nêf di mancul. Lant daur a chest studi, lis zonis plui cjapadis dentri da chest fenomen a saran chês de nestre regjon, dulà che si calcole che il 45% des pistis al sarà aromai par dibant. L´Italie e è za campione europeane di nêf finte, che ricuardin, oltri a jessi cjare, a si spint ungrum di energjie par fâle e, cun di plui e cree problemis di impat ambientâl. Seont la Comission Internazionâl pe Protezion des Alps (CIPRA) almancul il 25% dai 90 mil etars di pistis talianis e è furnide di implants di neveâmint artificiâl, ma cul cjalt che si à e cu la cuote de nêf che e va simpri plui in sù, chest al podarès no coventâ plui. Il pericul di screâ gnovis pistis che a restaran uetis e cence nêf al è simpri plui fuart. Inte nestre regjon, za di cualchi timp incà si sintin vôs di butade fûr di contribûts par gnovis pistis, implants e struturis di ricet da bande de Promotur, robis che contrastin cu lis pussibilis domandis di declarazion di calamitât naturâl pe mancjance di nêf da bande di otelîrs e aministradôrs locâi.
Bordan: si scree la gnove stagjon de Cjase des Paveis
Sabide ai 10 di Març aes 10.30 di buinore si screarà la gnove stagjon de Cjase des Paveis che e restarà vierte ducj i dîs fint al mês di Otubar, a buinore des 9.30 a 12.30 e dopo misdì des 2 aes 4.
Dentri de Cjase podarês viodi, lant daûr al percors segnât, passe 400 gjenars di paveis (seti noturnis che diurnis), tiradis dongje da dut il mont, che si cjatin a svolâ in trê grandis seris. In ognidune al è stât creât l'habitat dai paîs tropicâi, cun plantis forestis e rosis di tancj colôrs, dulà che lis paveis e vivin e a fassin nassi di gnovis. Un mût diviers e dal sigûr interessant par passâ une zornade dute avodade ae nature e aes bielis robis. Cun di plui cjaminant dilunc lis stradis podarês preseâ i tancj murales che son lâts a insiorâ i mûrs des cjasis di Bordan e Tarnep piturâts da artiscj vignûts da dut il mont adun, in cualchi câs, cu la int dal paîs.
Cui che al volès plui informazions al pues clamâ al numar 0432988135 o lâ a viodi il sît internet www.casaperlefarfalle.it
Cjargne - Candidature pes Dolomitis patrimoni Unesco
Cu la firme metude jù a Belun dal vice president de Provincie di Udin Paride Cargnelutti, al è stât fat il pas uficiâl che al à puartat ae candidature des Dolomitis a patrimoni de umanitât de Unesco. Il dossier e il plan di gjestion studiats da un grup di esperts di nomee internazionâl innomenâts des cinc provinciis promontoris de iniziative (Udin, Pordenon, Belun, Trent e Bolzan) a cjapin dentri intes areis proponudis ancje un blec des Prealps cjargnelis (il Sic e il Parc des Dolomitis furlanis). Il materiâl sientific, a mieç dal Ministeri dai Bens e des ativitâts Culturâls e dal Ambient, è stât mandât a Parigj, dulà che al sarà stazât de comission di pueste de Unesco che dentri di Zugn decidarà su pe propueste. Lis resons morfologjichis e storichis che a àn causât un magri svilup di chestis bandis a àn però permetût di salvâ lis carateristichis naturâls che son un valôr zontât par un svilup sostignibil. Par chest a esist, fra i prudeladôrs istituzionâls de candidature, un ponderât otimisim pe buine risulte di cheste.
Pasche a Rome.
La Pro Loco di Bordan Tarnep è organize pai dîs 7, 8 e 9 di Avrîl une gjite a Rome in coriere. Si partissarà da Bordan aes 5 di buinore par rivâ a Rome aes 3 e mieze dopo misdì. Il zîr di Rome cuntune vuide al cjaparà dentri ducj i plui grancj monuments e lis bielecis de citât caput mundi (tant che il Pantheon, il Colosseo, il Foro, Place Venezia e po dopo li sbasilichis di Santa Crôs, di Sant Pauli e vie indevant), cun di plui la dì di Pasche si larà a Messe in place San Pieri. Il cost de gjite al è di 340 euros, 100 di dâ cuant che si va a notâsi e al cjape dentri oltri al viaç, a vuide turistiche, ae assicurazion, ancje la pension complete cun bevandis includudis. Il tiermin di prenotazion al scjât lunis 12 di Març. Par vê plui sclariments si pues clamâ la siore Carla Picco al numar 338-4619186 o 0432 988150.